Enọ rẹ Ihwo ri Se Ẹbe Avwanre Nọre

Ọke vọ yen isun rẹ akpọ na che vwo kpere ukperi rẹ “ufuoma kugbe ofuvwegbe”?

Kirobo rẹ e djisẹ rọyen vwẹ ẹbẹre rẹ “Enọ rẹ Ihwo ri Se Ẹbe Avwanre Nọre” vwẹ Uwevwin Orhẹrẹa ọvo o krinọọ na, o che kri Jihova ki phi “iroro rọyen” phiyọ ubiudu rẹ “idjo ihwe” naa kọyen (ẹgba rẹ usuon rehẹ akpọ na eje) rere ayen vwọ reyọ ẹgba kugbe ogangan rayen vwọ kẹ ‘eranvwe rẹ aghwa rọ pha vwavware’ na​—rọ dia United Nations. E ji se eranvwe nana “oma rẹ eranvwe rẹ aghwa” na. (Ẹvwọ. 13:14, 15; 17:3, 16, 17) “Idjo ihwe” kugbe eranvwe rẹ aghwa ra kẹ ẹgba na che si ẹga rẹ efian no vwẹ akpọ na eje. Isun rẹ akpọ na che kpere ukperi rẹ “ufuoma kugbe ofuvwegbe”b tavwen a ke ghwọrọ ẹga refian gbanẹ a da ghwọrọ nu?​—1 Tẹsa. 5:3.

Uyota nẹ avwanre ghwa riẹn ọke re che vwo kpere ukperi rẹ “ufuoma kugbe ofuvwegbe” naa. Kọ dianẹ avwanre riẹn oborẹ erọnvwọn cha phia wan jovwo, avwanre rhe gbẹrophiyotọ yẹrẹ rhẹrẹẹ. Dedena, abọ buebun yen Jesu vuẹ idibo rọyen nẹ ‘ayen rha rhẹrẹ.’ (Mat. 24:42; 25:13; 26:41) E jẹ a nabọ fuẹrẹn oborẹ ọyinkọn Pọl ta kpahen aroẹmrẹ nana vwẹ ileta ro vwo rhe iniọvo ri Tẹsalonaika.

Pọl siri nẹ: “Ọke rẹ ayen da tanẹ, ‘Ufuoma kugbe ofuvwegbe!’ siẹvuọvo na, oghwọrọ mi rhi she teyen ayen kpregede.” (1 Tẹsa. 5:2, 3) Ọkieje yen ẹbe avwanre vwo djisẹ rẹ eta ri Pọl idjerhe ọtiọna: E che kpere ukperi rẹ “ufuoma kugbe ofuvwegbe” tavwen ukpokpogho rode na kẹ vwomaphia, ọ cha vwẹ oghwọrọ ri Babilọn Rode vwọ tuọnphiyọ​—rọ dia okugbe rẹ ẹga refian. E djisẹ ukperi nana nẹ ọyen oka rọ koba ra cha vwọ riẹn nẹ ukpokpogho rode na cha tonphiyọ re.

Ẹkẹvuọvo, ra vwọ nabọ fuẹrẹn ota na nu, ọ họhọre nẹ o ji vwo odjefiotọ ọfa rẹ avwanre cha sa kpairoro vrẹẹ. Ọ sa dianẹ e de kpere ukperi rẹ “ufuoma kugbe ofuvwegbe” na nu, yen a cha vwọ ghwọrọ ẹga rẹ refian. Diesorọ a vwọ ta ọtiọyen? E je roro kpahen enọ rehẹ obotọ na.

Ẹdia vọ yen ẹga rẹ refian kare vwẹ ifovwin rẹ akpọ na? Baibol na da ta: “Vwẹ evun rọyen [“igberadja rode na,” Babilọn Rode na] yen a da mrẹ ọbara rẹ . . . ihwo eje re hweri vwẹ akpọ na.” (Ẹvwọ. 17:1, 5; 18:24) Vwẹ ikuegbe rẹ ihworakpọ, igberadja rode na bicha ifovwin rẹ akpọ na ji titi ohwekufia rẹ ihwo buebun. Ọtiọyena, ọyen yen so ifovwin vẹ ozighi rehẹ akpọ na ukperẹ ufuoma kugbe ofuvwegbe. Onọ ọfa kọna: Kẹ e de ghwe si Babilọn Rode no nu yen isun rẹ akpọ na che vwo kpere ukperi rẹ “ufuoma kugbe ofuvwegbe”? Ọ sa dia ọtiọyen, jẹ avwanre ghwa riẹẹn.

Die yen che nene ukperi rẹ “ufuoma kugbe ofuvwegbe” na? Pọl da ta: “Oghwọrọ mi rhi she teyen ayen kpregede.” (1 Tẹsa. 5:3) Study note djisẹ owọ rẹ ota nana nẹ: “Pọl djere nẹ ugogo ọke cha dia vwẹ uvwre rẹ ọke re che vwo kpere ukperi rẹ ufuoma vẹ ofuvwegbe kugbe oghwọrọ rẹ ihwo ri kpere ukperi naa. Ọ cha ro ayen ọrhan, ayen cha sa vrabọ rọyeen.” Ọ da dianẹ e si ẹga refian no tavwen e ki kpere ukperi rẹ “ufuoma kugbe ofuvwegbe,” kọyen oghwọrọ rẹ ẹgborho rẹ akpọ na cha rhe kpregede.

Die yen erọnvwọn re cha phia na che ru vwẹ oma rẹ idibo ri Jihova? Pọl tare nẹ: “Iniọvo, ovwan hẹ evunrẹ ebri-i, rẹ ẹdẹ na vwọ ro ovwan ọrhan kirobo rẹ elo rẹ urhiọke rua iji ọrha-an.” (1 Tẹsa. 5:4) Di roro: Ọ da dianẹ a ghwọrọ ẹga rẹ refian no nu e ki kpere ukperi rẹ “ufuoma vẹ ofuvwegbe” na, ọnana cha nẹrhẹ idibo ri Jihova riẹn nẹ oghwọrọ rẹ ẹgborho na totọ re. Ẹkẹvuọvo, vwẹ ẹro rẹ ihwo rẹ ẹgborho na, oghwọrọ rayen cha rhe kerẹ oji​—ọ cha ro ayen ọrhan kpregede.

Kẹ die yen e se rhẹro rọyen? Kẹrẹkpẹ vwẹ obaro na, “idjo ihwe” na kugbe eranvwe rẹ aghwa ra vwẹ ogangan kẹ na kọ cha ghwọrọ ẹga refian. Ọnana yen ọtonphiyọ rẹ ukpokpogho rode na. Avwanre je riẹn nẹ ọke che te, isun rẹ akpọ na che vwo kpere ukperi rẹ “ufuoma kugbe ofuvwegbe.” Ọke vọ yen ọnana cha vwọphia? Iroro ivẹ yen a vwọphia re. Ọrẹsosuọ: E che kpere ukperi yena tavwen a ke ghwọrọ ẹga refian. Ọrivẹ: E che kpere ukperi yena siẹrẹ isun rẹ akpọ na da ghwọrọ ẹga refian nu. Avwanre cha hẹrhẹ je mrẹ oborẹ erọnvwọn cha phia wan. Ọkieje aroẹmrẹ ri Baibol de ruẹ orugba rayen yen a vwọ nabọ vwo ẹruọ rayen phiyọ, ọtiọyen ji te ọke ri de rugba nu.​—Ni Jọn 12:16.

Obo re ma ghanre asaọkiephana dia ọke re che kpere ukperi rẹ “ufuoma kugbe ofuvwegbe” rọ cha vwẹ obaro naa ẹkẹvuọvo oyerinkugbe rẹ avwanre vẹ Ọghẹnẹ. O fori a vwọ “rhẹrẹ ọkieje je sẹro rẹ iroro rẹ avwanre,” rere a sa vwọ nabọ muegbe o toro oborẹ erọnvwọn cha phia waan.​—1 Tẹsa. 5:6.