Obedaya​—Vwo Oshọẹdjẹ rẹ Ọghẹnẹ

Obedaya yen vwẹrote evwruwevwin rẹ orharhe rẹ Ovie Ehab, osun rọ nẹrhẹ erharhe iruemu rẹ ẹga ri Bel vọn evunrẹ Izrẹl. Dedena, “nẹ ọke eghene” rọyen rhe yen Obedaya vwo vwo oshọẹdjẹ ri Jihova. (1 Ivie 18:1-13) Ọtiọyena, ọke aye rẹ Ovie re se Jẹzibẹl vwọ tanẹ e hwe emraro ri Jihova eje, Obedaya de fiudugberi vwo si emraro ri Jihova nu rere e vwo jẹ ayen ehwe. E vwo si ọmraro ọvo nu ọyen emu rẹ imuoshọ; dedena, Obedaya si emraro 100 nu je vwẹ emu ghẹrẹ ayen ọke owẹnvwe vwo fi! Roro obo rọ bẹn te kẹ Obedaya rọ vwọ vrabọ rẹ emraro refian ujorin buebun ri gbe odibo kẹ ovie na vẹ aye rọyen ayen vwo jẹmrẹ.​—1 Ivie 18:19.

Die yen e se yono mie ọshare nana ro vwo oshọẹdjẹ rẹ Ọghẹnẹ na? Dede nẹ Obedaya djẹ oshọ rẹ Ehab, jẹ oshọẹdjẹ rọyen kpahen Ọghẹnẹ yen ma rho. Ọnana yen sorọ o vwo fiudugberi phi arhọ rọyen phiyọ ẹdia rẹ imuoshọ o se vwo sivwin urhuarhọ rẹ iniọvo rọyen. Ọ da dianẹ a dobọ rẹ ẹga rẹ uyota ji vwẹ asan rẹ avwanre dia, e ji se vwo oshọẹdjẹ rẹ Ọghẹnẹ. Oshọẹdjẹ tiọyena cha kẹ avwanre ẹgba re se vwo bicha iniọvo rẹ avwanre ri hirharokuẹ edavwini.