Die Yen Baibol na Ta Kpahen Obo re Cha Phia kẹ Ẹga?

Ofu rẹ ẹga dje we yẹrẹ ẹga nu we ọhọ re? Dede nẹ, ẹga ru erọnvwọn iyoyovwin vwẹ ekogho evo yẹrẹ kẹ ihwo evo re, jẹ ayen ji so okpetu buebun re. Ọbe ọvo re se Encyclopedia of Religion and War tare nẹ, “Vwẹ ikuegbe rẹ ihworakpọ, ohẹriẹ rọhẹ uvwre rẹ ẹga fikirẹ esegbuyota re fẹnẹre yen sua ifovwin buebun ra mrẹ na.” Abọ buebun yen ilori rẹ ẹga reyọ ẹga vwo titi oseghe rẹ usuon ukperẹ irueru rẹ ẹga. Ilori rẹ ẹga evo davwẹngba vwo rhurhu erhare rẹ iruemu rayen kerẹ e vwo gbe ihwo ẹgua vẹ uji-echo.

Ọ da dianẹ ofu dje we kpahen ẹga, gbe roro kpahen oborẹ oma ruẹ Ọghẹnẹ kpahọn. Baibol na djerephia nẹ ivun rẹ ẹga evo miovwin Ọghẹnẹ fikirẹ oborẹ ayen ruẹ. Baibol na je vọn vẹ aroẹmrẹ ri djisẹ rẹ oborẹ Ọghẹnẹ che ru kpahen ẹga. Baibol na reyọ eta rẹ udje vwo dje oborẹ Ọghẹnẹ che ru kpahen ẹga vwẹ otọrakpọ na eje rọ dia obo ro ji ri ru dẹvoo.

Die yen Baibol na ta kpahen obo re cha phia kẹ ẹga vwẹ obaro na?

Aroẹmrẹ: Ọbe rẹ Ẹvwọphia djisẹ rẹ igberadja ọvo re se Babilọn Rode na. Igberadja na chidia enu rẹ eranvwe rẹ aghwa ọvo rọ pha vwavware. Ọke vwọ yanran na, eranvwe rẹ aghwa rọ pha vwavware na da teyan aye na hwe.—Ẹvwọphia 17:3, 5, 16.

Obo ro mudiaphiyọ: Igberadja na ro dia Babilọn Rode na, mudiaphiyọ koka koka rẹ ẹga rẹ efian eje—kọyen ẹga rẹ Ọghẹnẹ senre.a Eranvwe rẹ aghwa rọ pha vwavware na mudiaphiyọ United Nation (UN).b Ọ vwọ dianẹ igberadja na chidia enu rẹ eranvwe rẹ aghwa rọ pha vwavware na, ọnana odjephia nẹ ẹga rẹ efian davwẹngba ayen vwo sun vwẹ enu rẹ usuon rẹ akpọ na eje. Ọ vwọ dianẹ eranvwe ivẹ ri djoma na yen hwe igberadja na, ọnana odjephia nẹ UN vẹ ẹkuotọ efa ri biẹcha cha vwọso ẹga rẹ efian eje je ghwọrọ ayen no karekare. Oghwọrọ nana cha bra mamọ.

Igberadja rẹ ọbe rẹ Ẹvwọphia ta ota kpahen na gua eranvwe rẹ aghwa rọ pha vwavware na. Iwevwin rẹ United Nation hẹ obohwẹre rẹ eranvwe na, jẹ iwevwin rẹ ẹga sansan hẹ obọrhen rọyen.

Mavọ yen a cha ghwọrọ ẹga rẹ efian wan?

Aroẹmrẹ: “Idjo ihwe ru wọ mrẹre kugbe eranvwe rẹ aghwa na, enana che vwo utuoma kpahen igberadja na, ayen cha kua fiotọ . . . je vwẹ erhanre torhẹ karekare. Kidie Ọghẹnẹ phiro phiyọ ubiudu rayen [ubuidu rẹ ihwo ri suẹn na] rẹ ayen vwo ru nene iroro rọyen, e, rẹ ayen vwo ru nene iroro ọvuọvo rẹ ayen vwori rẹ ayen vwọ vwẹ uvie rayen vwọ kẹ eranvwe rẹ aghwa na . . . Etiekọ rọyen cha vwọ rhe vwẹ ẹdẹ ọvuọvo, ughwu kugbe uvweri kugbe owẹnvwe, ka cha vwẹ erhanre vwọ torhẹ karekare, kidie Jihovac Ọghẹnẹ ro guẹdjọ rọyen na ọgba.”—Ẹvwọphia 17:16, 17; 18:8.

Obo ro mudiaphiyọ: Ọghẹnẹ che phi “iroro rọyen” phiyọ ubuidu rẹ ihwo ri suẹn vwẹ ẹkuọtọ na eje. Kọ cha nẹrhẹ ayen vwẹ “uvie rayen,” yẹrẹ ẹgba rẹ usuon vwọ kẹ UN. Ukuotọ rọyen, UN ra vwẹ ẹgba vwọ kẹ obọ na, kọ cha ghwọrọ ẹga rẹ efian rehẹ otọrakpọ na eje. Emu nana eje cha phia kpregede kẹrẹsiẹ ra da mrẹ nẹ “vwẹ ẹdẹ ọvuọvo” yen e phiare, ọnana cha phia vwẹ idjerhe rẹ ihwo vwo ẹwẹn roroo.—Ẹvwọphia 18:21.

Diesorọ a cha vwọ ghwọrọ ẹga rẹ efian?

Aroẹmrẹ: “Imwemwu rọyen ma kpenu te odjuvwu re, Ọghẹnẹ karophiyọ orukuruku rọyen re.”—Ẹvwọphia 18:5.

Obo ro mudiaphiyọ: Vwẹ ikpe buebun rhire yen ẹga rẹ efian vwo ruẹ erọnvwọn ebrabra cha re. Vwo oniso rẹ “imwemwu rọyen” rọ cha nẹrhẹ Ọghẹnẹ ghwọrọ na:

Uhoho rẹ isun vẹ ilori rẹ ẹga ri sa ohwohwo abọ.

Ayen vwobọ vwẹ oseghe rẹ usuon. Jesu kristi yono idibo rọyen nẹ ayen vwobọ vwẹ oseghe rẹ usuoon, ukperẹ ọtiọyen ayen vwẹroso Uvie rẹ Ọghẹnẹ rọ dia usuon rọhẹ odjuvwu ro che wene usuon rẹ ihworakpọ.d (Daniẹl 2:44; Matiu 6:9, 10; Jọn 6:15; 18:36) Ẹkẹvuọvo, ẹga rẹ efian jiro kẹ ihwo nẹ ayen vwẹroso usuon rẹ ihworakpọ. Ayen vwobọ vwẹ oseghe usuon mamọ ukperẹ ayen vwọ vwẹroso usuon rẹ Ọghẹnẹ, aroẹmrẹ rẹ ọbe rẹ Ẹvwọphia na djisẹ rẹ Babilọn Rode nẹ ọ riabe rẹ “ọfanrhiẹn” ji se “igberadja rode na.”—Ẹvwọphia 17:1, 2; Jems 4:4.

Uhoho rẹ olori rẹ ẹga rọ yọnrọn agbagba je nẹrhovwo vwọ kẹ isodje ri kpo ofovwin.

Ozighi-egbe. E djisẹ rẹ ẹga rẹ efian nẹ ọyen sua ughwu rẹ “ihwo eje re hweri vwẹ akpọ na.” (Ẹvwọphia 18:24) Ẹga buebun yono ihwo rayen nẹ ayen vwọtua ufuomaa. Ayen ji biẹcha yẹrẹ jiro kẹ ihwo rayen nẹ ayen phi ofovwin ji titi ohwekufia.

Uhoho rẹ olori rẹ ẹga rọ ghwẹ igho vọn obọ.

Urhuru. Ẹga rẹ efian koko “efe ri jẹ omavovwẹ evwo.” (Ẹvwọphia 17:4; 18:7) Ẹga buebun reyọ ẹgba rayen vẹ ẹdia ride rẹ ayen hepha na vwo koko efe buebun. Urhuru tiọyena miovwin Ọghẹnẹ ivun.—Taitọs 1:7.

Efian. Ẹga rẹ efian titi iyono kugbe irueru re vwọso uyota rehẹ Baibol na.e Kidie nẹ ẹga rẹ efian yen esiri rẹ iyono vẹ irueru buebun ri suẹn ihwo ghwrẹ ri ji brọghọ phiyọ Ọghẹnẹ omaa, e de se vwẹ aroẹmrẹ na nẹ, “oni rẹ . . . erọnvwọn ri tuẹn ohwo oma rẹ akpọ na.”—Ẹvwọphia 17:5; 18:23.

**Ẹga na eje yen a cha ghwọrọ?**

Ẹjo. Ẹbe rẹ Ẹvwọphia ta ota kpahen ihwo buebun re se “otu gbidigbidi.” (Ẹvwọphia 7:9) Ọ tare nẹ otu gbidigbidi nana “ku iwun efuanfon” phiyọ ro mudiaphiyọ nẹ ayen ga Ọghẹnẹ vwọ nene obo rọ guọnọre. Ayen che sivwin wan “ukpokpogho rode na,” rọ dia oborẹ Baibol na se uvwre rẹ ọke ra cha vwọ ghwọrọ ẹga rẹ efian vẹ ivwighrẹn rẹ Ọghẹnẹ eje. (Ẹvwọphia 7:13, 14; 19:11, 19-21) Otu gbidigbidi ri ku iwun efuanfon phiyọ na ga ẹga rẹ uyota—ọnana yen ẹga rọ cha dia bẹdẹ.f

Otu gbidigbidi rẹ eshare, eya, kugbe emọ re ghọghọ jẹ ayen yan usun. Jẹ iwevwin rẹ ẹga re guọghọre hẹ obuko rayen. — Otu gbidigbidi re vwẹ ẹga uyota kẹ Ọghẹnẹ che sivwin rhọ nẹ oghwọrọ rẹ ẹga rẹ efian

Die yen oghwọrọ rẹ ẹga rẹ efian mudiaphiyọ kẹ wẹ?

Biko riẹn nẹ Ọghẹnẹ rhọnvwephiyọ erọnvwọn ebrabra rẹ ẹga rẹ efian ruẹ naa, ọtiọyena gbe jẹ ẹwẹn wẹn totọ. Jẹ o muwẹro nẹ kẹrẹkpẹ, Ọghẹnẹ che si koka koka rẹ ẹga rẹ efian ri muọghọ kẹẹ re je nẹrhẹ ihwo rioja na no karekare.

Jẹ o ji muwẹro nẹ, wọ sa ga Ọghẹnẹ vwẹ idjerhe ro rhiabọreyọ. Baibol na tare nẹ, “egegagọ rẹ uyota na cha . . . ga Ọsẹ na vwọrẹ ẹwẹn kugbe uyota, kidie vwọrẹ uyota, Ọsẹ na guọnọ ihwo ọtiọna re cha ga ọyen.” (Jọn 4:23) Baibol na je tanẹ, “Ovwan vrẹn nẹ evun rọyen [Babilọn Rode Na], ihwo mẹ, ọ da dianẹ ovwan guọnọ vwobọ vwẹ imwemwu rọye-en, ọ da je dianẹ ovwan guọnọ vwo ẹkẹn vwẹ etiekọ rọye-en.” (Ẹvwọphia 18:4, 5) Vwọrẹ uyota, Ọghẹnẹ durhie ihwo nẹ e rhe ga ọyen vwo nene uyota rọhẹ Baibol na. (1 Timoti 2:3, 4) O veri nẹ ihwo ri rhiabọreyọ edurhie rọyen cha dia bẹdẹ.—1 Jọn 2:17.

Babilon Rode na ji churobọ si ẹga ri se oma rayen “Inenikristi”?

E. Jesu tare nẹ ihwo buebun che se oma rayen Inenikristi je tanẹ Jesu yen Ọrovwori rayen, ẹkẹvuọvo Ọghẹnẹ che rhiabọreyọ ẹga rayeen. (Matiu 7:21-23) Womarẹ iyono vẹ iruemu rayen, ihwo nana che djephia nẹ ayen Inenikristi rẹ efian. (Matiu 7:18-20) Ọtiọyena, ayen cha dia ẹbẹre ọvo ri Babilọn Rode na.

Enana yen iyono vẹ irueru rẹ efian rọ nẹrhẹ Ọghẹnẹ sen ẹga rẹ ihwo ri se oma rayen Inenikristi:

Ayen titẹ uyono rẹ Eghẹnẹ Erha ri Kuomagbe Dia Ọvo vẹ uyono ra cha vwọ torhẹ irumwemwu vwẹ erhanre ri bẹdẹ
Ayen siẹ odẹ rẹ Ọghẹnẹ Jihova nẹ kẹ ihwo
Ayen guẹn efian kẹ ihwo kpahen ẹdia rẹ ihwo ri ghwuru hepha
Ayen vwẹ ema vwọba ga ẹga

a Wo se vwo vughe erọnvwọn ẹne re sa cha wẹ uko vwo vughe Babilọn Rode na, se uyovwinrota na, “Die Yen Babilọn Rode?”

b Wo se vwo vughe erọnvwọn esan re sa cha wẹ uko vwo vughe eranvwe rọ djoma nana, se uyovwinrota na, “Die Yen Eranvwe Ọvwavware re Djunute Vwẹ Ẹvwọphia Uyovwin 17 na Mudiaphiyọ?”

c Jihova yen odẹrhi rẹ Ọghẹnẹ. (Une rẹ Ejiro 83:18) Ni uyovwinrota na “Ono Yen Jihova?”

d Wọ da guọnọ riẹn erọnvwọn efa, ni ividio na Die Yen Uvie rẹ Ọghẹnẹ?

e Wọ sa vwọ mrẹ udje evo, ni ekpeti na “Does Babylon the Great Include Any ‘Christian’ Religions?”

f A sa vwọ riẹn oborẹ Baibol na sa vwọ cha avwanre uko vwo vughe ẹga rẹ uyota, se uyovwinrota na “How Can I Find the True Religion?”