Vwẹ Ẹwẹn Roro Ikuegbe rẹ Baibol

Baibol na vọnre vẹ idje rẹ ihwo vwẹ awanre ri yono avwanre iyono eghanghanre. Avwanre da frẹkotọ roro kpahen idje rẹ ihwo tiọyena, ka sa nabọ vwo ẹruọ rẹ obo re se, je mrẹ erere vọnvọn norhe. Enana erọnvwọn evo re sa cha wẹ uko vwọ vwẹ ẹwẹn roro ikuegbe ri Baibol na.

• Se eta na phia. Re vwo se Baibol na phia sa vwẹ ukẹcha kẹ wẹ vwọ nabọ vwẹ ẹwẹn roro obo re phia. Ovwan de se Baibol na kuẹgbe kerẹ orua, ovwan sa nẹrhẹ ẹkpo na teyenphia womarẹ ohwo ọvo vwẹ orua na de se eta rẹ ohwo ọvo vwẹ Baibol na, ọfa mi rhe se eta rẹ ohwo ọfa.

• Vwẹ ẹwẹn roro obo re phia na. Davwẹngba vwọ riẹn oborẹ ohwo na roro vẹ oborẹ oma ruo wan vwẹ ikuegbe na. Kerẹ udje, nọ oma wẹn: ‘Diesorọ ohwo na vwọ ta obo rọ tare na yẹrẹ ru obo ro ruru na? Die yen mi che rhe roro kpahan ọ da dianẹ mẹvwẹ ẹdia tiọyena?’

• Si uhoho na. Wo de si ihoho rẹ ikuegbe ri Baibol na, ọnana sa cha wẹ uko vwọ nabọ vwẹ ẹwẹn roro je karophiyọ ikuegbe na, ọ da tobọ dianẹ uhoho rẹ wo siri na ghwe faroo.