Vwẹroso “Odjekẹ rẹ Ọghẹnẹ” Ọkieje

1. Erhọ yen erọnvwọn evo kiriguo ri Jihova ma phiyọ avwanre oma? (Matiu 5:3)

O VWO ọdavwẹ evo kiriguo rẹ Jihova ma phiyọ ihworakpọ oma. Kerẹ udje, ọ kẹ avwanre emuọre, irhuon, kugbe asan ra dia, rere urhuarhọ rẹ avwanre se vwo te odẹ. Ọvo usun rẹ erọnvwọn nana da kanre avwanre, jẹ ọbagha ghwa ro akpeyeren rẹ avwanre. Vwọ vrẹ erọnvwọn nana rọ vwọ kẹ avwanre na, ọ je ma avwanre vẹ owenvwe ra vwọ ga. (Se Matiu 5:3.) Avwanre da guọnọ uvi rẹ omavwerhovwẹn, ofori a vwọ kọn owenvwe na phiyọ ubiudu je davwẹngba vwọ vwẹ ẹga kẹ.

2. Mavọ yen wo che djudje obo ro mudiaphiyọ avwanre vwọ ‘riẹn’ nẹ a “guọnọ odjekẹ rẹ Ọghẹnẹ”?

² Die yen o mudiaphiyọ avwanre vwọ ‘riẹn’ nẹ a “guọnọ odjekẹ rẹ Ọghẹnẹ”? Ephẹrẹ ri Grik ra ka vwọ fan ota na, djisẹ rọyen kerẹ ogbere rọ guọnọ ukẹcha. Vwẹ ẹwẹn roro ogbere tiọyena rọ yare emu te ason te uvo vwẹ akọkọ rẹ idjerhe, jẹ iwun ro kuphiyọ bẹre dje oma. Oma bruro ku fikirẹ owẹnvwe, ihwo ke kẹnoma kẹ kidie oma rọyen pha farhiẹn farhiẹn. Ogbere nana riẹnre dẹn nẹ ọyen guọnọ ukẹcha erọnvwọn ki se shephiyọ kẹ vwẹ akpeyeren. Ọtiọyen ọ je hepha nẹ, ohwo rọ riẹnre nẹ ọyen guọnọ odjekẹ rẹ Ọghẹnẹ je guọnọ ukẹcha rọyen rere erọnvwọn se vwo shephiyọ kẹ. Ọtiọyena, o vwo owenvwe rọ vwọ reyọ kemu kemu ri Jihova vwọ kẹ ihwo ri vwo ẹguọnọ rọyen vwo ruiruo.

3. Die yen avwanre cha ta ota kpahen vwẹ uyono nana?

³ Vwẹ uyono nana, jẹ a ka ta ota kpahen obo re se yono mie aye ri Fonisha rọ rẹ Jesu nẹ ọ vwẹ ukẹcha kẹ ọyen. Ikuegbe nana djisẹ iruemu erha ri fori nẹ ihwo re riẹnre nẹ ayen guọnọ odjekẹ rẹ Ọghẹnẹ vwo. Ọyena da wan nu, ka cha ta ota kpahen idje rẹ ọyinkọn Pita vẹ ọyinkọn Pọl, ọtiọyen ji te Ovie Devid phi phiyọtọ, re dia eshare ri tedje.

UDJE RẸ OMAEVWOKPOTỌ, ERHIORIN VẸ ESEGBUYOTA

4. Die yen aye rẹ ohwo ri Fonisha na guọnọre nẹ Jesu ru kẹ ọyen?

⁴ O vwo aye rẹ ohwo ri Fonisha ro vwo ọmọtẹ ọvo rẹ “ẹwẹn rẹ Idẹbono gboja kẹ” gangan. Ẹdẹ ọvo vwo te o de bru Jesu ra. (Mat. 15:21-28) Aye na de shiguẹ ivẹ te otọ rẹ Jesu nẹ ọ vwẹ ukẹcha kẹ ọyen. Aye rẹ ohwo ri Fonisha na dje iruemu iyoyovwin phia ro fori nẹ a jokaphiyọ. Jẹ a mrẹ evo rayen.

5. Erhọ yen iruemu evo rẹ aye na vwori, kẹ die yen Jesu ru vwọ kẹ? (Ni uhoho na.)

⁵ Aye rẹ ohwo ri Fonisha na ọyen ohwo rọ nabọ vwomakpotọ. Diesorọ a vwọ ta ọtiọyen? Ọke ri Jesu vwọ reyọ aye na vwo dje ọmọ rẹ eranko, ra sa mrẹ vwẹ uwevwin rẹ Igiye, ophu muroo. Ọ da dianẹ owẹ yen Jesu ta eta tiọyena kẹ, die yen wo rhe ru? Wọ cha tanẹ, ọyen aroeyivwon, me rha guọnọọ? Ọ dia ọtiọyen aye rẹ Fonisha na ruruu. Ọ dia uruemu rẹ omaevwokpotọ ọvo yen aye rẹ Fonisha na vworii, ọyen ohwo vẹ erhiorin. A mrẹ ọnana womarẹ obo rọ rẹ Jesu wan. Die yen muro vwo ru ọtiọyen? Esegbuyota ro vwo kpahen Jesu. Esegbuyota rẹ aye nana da nẹrhẹ Jesu ru igbevwunu ọghanghanre ọvo. Dede nẹ Jesu ka vuẹ nẹ “igodẹ rẹ uwevwin rẹ Izrẹl ri ghwruru” ọvo yen e ji ọyen bru rhe, ọ da djẹ ẹwẹn rẹ Idẹbono na nẹ ọmọtẹ rẹ aye na oma.

6. Die yen e yono nẹ ikuegbe rẹ aye ri Fonisha na rhe?

⁶ Avwanre da guọnọ mrẹ erere vwo nẹ odjekẹ rẹ Ọghẹnẹ rhe, ofori nẹ e ji vwo ọkpọ iruemu rẹ ohwo ri Fonisha na vwori. E jẹ a dia ihwo re vwomakpotọ, ri vwo erhiorin, vẹ esegbuyota ọgangan. Ohwo rọ vwomakpotọ rẹ Jihova vwọ kẹ ukẹcha ọkieje. O ji fo nẹ e vwo esegbuyota ọgangan kpahen Jesu Kristi je vwẹroso ihwo rọ reyọ vwọ vwẹ odjekẹ kẹ idibo rọyen. (Mat. 24:45-47) Oma vwerhen Jihova vẹ Ọmọ rọyen siẹrẹ ayen da mrẹ nẹ avwanre dje iruemu nana phia, ayen ji muegbe rẹ ayen vwọ vwẹ ukẹcha kẹ avwanre vwo nene odjekẹ rọyen. (Ni Jems 1:5-7.) Enẹna e jẹ a mrẹ oborẹ Jihova reyọ urhuẹn, irhuon vẹ Ota rọyen vwọ ghẹrẹ avwanre. E jẹ a fuẹrẹn udje ri Pita, Pọl kugbe Devid phi phiyotọ, rere a sa vwọ riẹn obo re che ru vwo vwo iruemu eghanghanre tiọyena.

KERẸ PITA​—YONO OTA RẸ ỌGHẸNẸ ỌKIEJE

7. Owian vọ yen a vwọ kẹ Pita, kẹ die yen o ji fo nẹ o ru? Djekpahọn. (Hibru 5:14–6:1)

⁷ Roro kpahen udje rẹ ọyinkọn Pita. Ọyen ọvo usun rẹ ihwo ri Ju re ka riẹn nẹ Jesu yen Mesaya na​—wan oma rọyen yen Jihova cha vwọ reyọ “eta rẹ arhọ ri bẹdi bẹdẹ” na vwọ ghẹrẹ ihwo Rọyen. (Jọn 6:66-68) Tavwen Jesu ki kpo odjuvwu, ọ da vuẹ Pita nẹ: “Ghẹrẹ igodẹ itete mẹ na.” (Jọn 21:17) Pita ru nene oborẹ Jesu vuẹrẹ na, Jihova da je reyọ vwo si ileta ivẹ re rhe dia ẹbẹre evo ri Baibol na. Ẹkẹvuọvo, o ji fo nẹ Pita reyọ Ota rẹ Ọghẹnẹ vwọ ghẹrẹ oma rọyen. Kerẹ udje, o ke yono kpahen ileta rẹ ẹwẹn ọfuanfon rẹ Ọghẹnẹ mu ọyinkọn Pọl vwo si vwẹ obuko re. O de rhi noso nẹ eta evo rẹ Pọl si kpahen na “bẹnre re se vwo vwo ẹruọ” rayen. (2 Pita 3:15, 16) Dedena, Pita vwo erhiorin vẹ esegbuyota nẹ Jihova cha vwẹ ukẹcha kẹ ọyen vwọ nabọ vwo ẹruọ ‘emu ọgangan’ rẹ ẹwẹn ọfuanfon na mu Pọl vwo si vwẹ ileta rọyen.​—Se Hibru 5:14–​6:1.

8. Die yen Pita ruru ọke rẹ amakashe rẹ Ọghẹnẹ vwọ vuẹ kpahen ewene kpokpọ?

⁸ Pita djephia nẹ ọyen vwo esegbuyota kpahen Jihova o vwo nene odjekẹ ra vwọ kẹ. Kerẹ udje, ọke rọ vwọ hẹ unuerhuru ri Jọpa, Ọghẹnẹ da reyọ amakashe rọyen vwọ vuẹ Pita vwẹ emramrẹ nẹ o hwe eranvwe rere ọ re, jẹ vwo nene Urhi ri Mosis, eranvwe nana fonroo. Vwọ kẹ ihwo ri Ju, eta yena eyẹn eta rẹ ẹgua. Ẹsosuọ Pita da sen: “Ẹjo kakaka, Ọrovwori, kidie me je rhe riemu rẹ ẹgua kugbe ọ ro jẹfuọn dẹvo-o.” Amakashe na da vuẹ nẹ: “Wo se erọnvwọn rẹ Ọghẹnẹ ru fon nure, emu rẹ ẹgua-a.” (Iruo 10:9-15) Pita de rhi vwo ẹruọ rẹ ota na. Mavọ yen avwanre ru riẹn? O kririi, rọ vwọ mrẹ emramrẹ na nu, ọgiye ọvo re se Kọniliọs de ji eshare erha bru Pita rhe je vuẹ nẹ onini rayen guọnọ nene ta ota. Vwẹ obuko re, o vwo ọke vuọvo ri Pita cha vwọ rhọnvwe ro uwevwin rẹ Ọgiyee, kidie ihwo ri Ju nẹ Igiye kerẹ ihwo ri jẹfuọn. (Iruo 10:28, 29) Kpakpata Pita de rhiabọreyọ ewene kpokpọ nana ri Jihova vwọ kẹ na. (Isẹ 4:18) O ghwoghwota kẹ Kọniliọs vẹ evwruwevwin rọyen, je mrẹ aghọghọ ro no cha rẹ ayen vwọ mrẹ uyota na vughe, re vwo ku ẹwẹn ọfuanfon ku ayen, rẹ ayen ji vwo bromaphiyame.​—Iruo 10:44-48.

9. Erhọ yen idjerhe ivẹ a sa vwọ mrẹ erere e de vwo urhurusivwe re vwo yono kpahen iyono re hepha gangan?

⁹ Kerẹ Pita, ofori nẹ avwanre vwẹ ọkieje vwọ vwẹ ameivie yẹrẹ iyono rẹsosuọ rehẹ Ota Ọghẹnẹ vwọ ghẹrẹ oma rẹ avwanre. O ji fo e vwo vwo urhurusivwe kpahen emu ọgangan, kọyen iyono egangan rẹ ẹruọ rayen sa dia bẹnbẹn. E jẹ a rhuẹrẹ ọke phiyọ je davwẹngba vwo vwo ẹruọ rẹ Ota rẹ Ọghẹnẹ kodophiyọ, a mrẹ vwo dje erere ro no chaa. Diesorọ? Erere ra cha mrẹ ọ da hanvwe ivẹ: Ẹsosuọ, avwanre che yono erọnvwọn sansan re cha nẹrhẹ ẹguọnọ vẹ ọghọ rẹ avwanre vwo kpahen Jihova kodophiyọ; ọrivẹ, oruru rẹ avwanre vwọ vuẹ ihwo efa kpahen Ọsẹ avwanre rọhẹ odjuvwu kọ cha ganphiyọ. (Rom 11:33; Ẹvwọ. 4:11) Udje ri Pita ji yono avwanre orọnvwọn ọfa: A da vwẹ ewene kpokpọ phia kpahen ẹruọ rẹ avwanre vwo kpahen Ota rẹ Ọghẹnẹ, kpakpata e jẹ e rhiabọreyọ. E de ru ọtiọyen, ke che vwo ẹruọ rẹ Ota rẹ Ọghẹnẹ phiyọ, Jihova kọ je cha reyọ avwanre vwo ruiruo.

KERẸ PỌL​—TINKAMU IRUEMU RE VWERHEN ỌGHẸNẸ OMA

10. E vwo vwo iruemu rẹ Ọghẹnẹ, die yen o churobọ si? (Kọlose 3:8-10)

¹⁰ Re se vwo ru obo re vwerhen Jihova oma, o ji fo e vwo vwo iruemu rẹ Ọghẹnẹ. Die yen ọyena mudiaphiyọ? Ọyinkọn Pọl siri nẹ e si “uruemu rẹ awanre” nẹ oma rere a vwẹ “uruemu ọkpokpọ” na vwo ru amwa vwo rhuon. (Se Kọlose 3:8-10.) A sa vwọ reyọ uruemu tiọyena vwo rhuon oma avwanre ọkieje ghwa lọhọọ. Roro kpahen udje ri Pọl komobọ. Vwo nẹ ọke eghene yen ọ vwọ wian gangan o se vwo vwo aroesiri rẹ Ọghẹnẹ. (Gal. 1:14; Fil. 3:4, 5) Jẹ, o se ru ọtiọyeen kidie erianriẹn ọgbagba kpahen ọhọre rẹ Ọghẹnẹ kanrerọ. Ọtiọyena, jẹriẹn vẹ omaẹkparọ rọyen da nẹrhẹ ọ dia “ohwo ro yinvwaro” ro ji vwo erharhe rẹ iruemu.​—1 Tim. 1:13.

11. Ọrhọ yen ovwiẹrẹ ọvo rẹ Pọl vwori ro cha wian gangan kpahen? Djekpahọn.

¹¹ Pọl ọyen ohwo rọ fobọ muophu tavwen ọ ke rhe dia Onenikristi. Vwẹ asan ọvo vwẹ ọbe rẹ Iruo tare nẹ ophu ri Pọl ganre mamọ ọ da ‘djẹ uguegue muẹ idibo rẹ Ọrovwori na te ẹdia kọ guọnọ hwe’ ayen. (Iruo 9:1) Aphro herọọ nẹ Pọl wianre gangan vwo si erharhe iruemu awanre nana nẹ oma rọ rhe vwọ dia Onenikristi nu. (Ẹfe. 4:22, 31) Dedena, “ẹghwọ ọgangan” je vwomaphia ọke rẹ Pọl vẹ Banabas vwọ phraphro. (Iruo 15:37-39) Jẹ Pọl rhoma she ro orharhe uruemu na, dedena o muomaphiyotọọ. Ọ vwẹ ‘oja ria oma rọyen,’ ji nene jẹgba rọyen muabọ rere o se vwo vwo aroesiri ri Jihova.​—1 Kọr. 9:27.

12. Die yen vwẹ ukẹcha kẹ Pọl vwo phi orharhe uruemu ro rhere kparobọ?

¹² Kidie nẹ Pọl vwẹroso ẹgba romobọ rọyeen, ọnana da nẹrhẹ o se phi orharhe uruemu ro rhere na kparobọ je reyọ uruemu kpokpọ na vwo rhuon kerẹ amwa. (Fil. 4:13) Kerẹ Pita, Pọl “vwẹroso ẹgba rẹ Ọghẹnẹ siobọnẹ kẹ ohwo.” (1 Pita 4:11) Dedena, o ji vwo ọkievo Pọl vwo no nẹ o vwo emu vuọvo ra cha reyọ vwo ruu. Ẹkẹvuọvo ọka iroro tiọyena da djẹ ro ẹwẹn rọyen, ko roro kpahen erọnvwọn iyoyovwin rẹ Ọsẹ rọyen rọhẹ odjuvwu ru kẹ vwẹ obuko re, ọnana kọ nẹrhẹ owenvwe ro vwo ru yovwinphiyọ ganphiyọ.​—Rom 7:21-25.

13. Mavọ yen avwanre sa vwọ vwẹrokere Pọl?

¹³ O toro ikpe ra ga Jihova cha ree, a sa vwẹrokere Pọl vwọ wian gangan vwo si iruemu awanre na nẹ oma je reyọ iruemu kpokpọ na vwo rhuon​—re dia iruemu re vwerhen Ọghẹnẹ oma. Avwanre de dje uruemu ro forii phia​—kerẹ e vwo muophu ọgangan yẹrẹ ta eta ri dje ẹguọnọ phiaa​—e je no nẹ o rhe vwo obo ra cha reyọ avwanre vwo ruu. Ukperẹ ọtiọyen, e jẹ a rha davwẹngba re vwo wene uruemu yena. (Rom 12:1, 2; Ẹfe. 4:24) Avwanre vwo ruẹ ọtiọyen na, o ji fo nẹ a karophiyọ orọnvwọn ọghanghanre ọvo nẹ: Kirobo rẹ ewun da hanvwe nọ yẹrẹ rho nọ ke muẹ no rere o vwo fo avwanre ye, ọtiọyen o ji fo nẹ avwanre ru ewene vwẹ oma rẹ avwanre rere e se vwo vwo iruemu re vwerhen Ọghẹnẹ oma. Ọyen emu aghwanre rẹ avwanre vwo wene oka rẹ ohwo rẹ avwanre hepha rere a sa vwọ yanmu iwan rẹ Ọghẹnẹ.

KERẸ DEVID​—DIA URHUẸN RI JIHOVA ỌKIEJE

14-15. Idjerhe vọ yen Jihova vwọ chochọn rẹ ihwo rọyen? (Une rẹ Ejiro 27:5) (Ni uhoho na.)

¹⁴ E ki se vwo uvi rẹ omavwerhovwẹn, ọ dia Ota rẹ Ọghẹnẹ vẹ iruemu re vwerhọn oma ọvo yen a guọnọree. O ji fo nẹ avwanre dia otọ rẹ urhuẹn ri Jihova. Die yen urhuẹn yena, kẹ mavọ yen avwanre sa vwọ dia otọ rẹ ochọnvwe rọyen?

¹⁵ Ovie Devid ta ota kpahen urhuẹn rẹ Jihova vwọ kẹ avwanre. (Se Une rẹ Ejiro 27:5.) Jihova chochọn rẹ idibo rọyen vwo nẹ abọ ri kemu kemu yẹrẹ kohwo kohwo ro se gbowọphiyọ esegbuyota rẹ ayen vwo Kpahọn. Idjerhe vọ yen Jihova vwọ chochọn rẹ ihwo rọyen nonẹna? O veri nẹ o vwo emu vuọvo re duvwu vwọso ayen ro che yovwiin. (Une 34:7; Aiz. 54:17) Dede nẹ Idẹbono vẹ ihwo rọ reyọ vwọ wian vwo ẹgba mamọ, jẹ o vwo emu vuọvo rẹ ayen che ru rọ cha bẹrẹ odoo. Avwanre da tobọ ghwu dede, Jihova je cha kpare avwanre vwẹ evrẹnushi na. (1 Kọr. 15:55-57; Ẹvwọ. 21:3, 4) Jihova je vwẹ ukẹcha kẹ avwanre vwo yerẹn ghene ẹnwan re sa nẹrhẹ avwanre kpairoro vrẹ ẹga rọyen. (Isẹ 12:25; Mat. 6:27-29) Ọsẹ avwanre ro vwo ẹguọnọ je reyọ ekpako na vwọ vwẹ ọbọngan kẹ avwanre, ọtiọyen ji te iniọvo avwanre rẹ akpọeje. (Aiz. 32:1, 2) Ọkieje yen a vwọ karophiyọ avwanre idjerhe sansan a sa vwọ mrẹ erere nẹ ochọnvwe ri Jihova rhe siẹrẹ avwanre de siomakoko.​—Hib. 10:24, 25.  

16. Erhọ yen idjerhe evo rẹ Jihova vwọ sẹro rẹ Devid?

¹⁶ Ọke rẹ Devid de nyupho ri Jihova, kọ sẹro rọyen vrabọ rẹ okpetu ro te ihwo umwemwu oma. (Ni Isẹ 5:1, 2.) Ẹkẹvuọvo o rhe ru ọtiọyeen, Jihova ko chukokuo nẹ ọ rioja rẹ obo ro ruru. (2 Sam. 12:9, 10) Kẹ ọke sansan rẹ Devid vwọ rioja jẹ ọ dia o ru umwemwu vuọvoo vwo? Emu ọtiọyen da phia, Devid kọ ta ọdavwẹ rọyen kẹ Jihova vwẹ ẹrhovwo, ọ me je vwẹ imuẹro kẹ nẹ Ọyen vwo ẹguọnọ rọyen nẹ ọ jẹ cha vwẹrote, ọnana me nẹrhẹ ẹwẹn rọyen totọ.​—Une 23:1-6.

17. Idjerhe vọ yen a sa vwọ vwẹrokere Devid?

¹⁷ A sa vwẹrokere Devid siẹrẹ e de vwo erhiẹn re che bru womarẹ e vwo nene odjekẹ ri Jihova. O ji fo a vwọ mrẹvughe nẹ, ọkievo e se hirharoku uweren ọgangan fikirẹ erhiẹn echọchọ rẹ avwanre bruru, ọ dia kidie nẹ Jihova kpairoro vrẹ avwanree. (Gal. 6:7, 8) E de hirharokuẹ edavwini rẹ avwanre riẹn emu vuọvo kpaheen, ka ta ọdavwẹ rẹ avwanre eje kẹ Jihova vwẹ ẹrhovwo, vẹ imuẹro nẹ ọ cha sẹro rẹ ubiudu vẹ ẹgba iroro rẹ avwanre.​—Fil. 4:6, 7.

RHA VWẸ ODJEKẸ RẸ ỌGHẸNẸ VWỌ GHẸRẸ OMA WẸN

18. Egbabọse vọ yen e hirharokuẹ, kẹ mavọ yen a sa vwọ reyọ odjekẹ rẹ Ọghẹnẹ vwọ ghẹrẹ oma ọkieje? (Ni ihoho na.)

¹⁸ Uyovwinrota rẹ ukpe ri 2026 yen: “Omavwerhovwẹn dia vwọ kẹ ihwo re riẹnre nẹ ayen guọnọ odjekẹ rẹ Ọghẹnẹ.” Eta yena rhe dia uyota vrẹ obo ri jovwo. Diesorọ? Nonẹna, ihwo buebun sian nẹ ayen guọnọ odjekẹ Ọghẹnẹẹ, efa vwo imuẹro kpahen Ọghẹnẹ ẹkẹvuọvo ayen guọnọ ga vwẹ idjerhe ro je ayen, evo da ra vwẹroso odjekẹ rẹ ihworakpọ, jẹ ihwo nana yen riariẹ avwanre phiyọ. Ọtiọyena, e jẹ a vwẹ uphẹn kẹ uruemu rayen nẹ i ghworo avwanree. Mavọ yen e se vwo ru ọtiọyen? Womarẹ a vwọ reyọ Ota rẹ Ọghẹnẹ vwọ ghẹrẹ oma rẹ avwanre, re vwo ku uruemu ọkpokpọ na phiyọ, je dia otọ rẹ urhuẹn ri Jihova.