Jihova Cha Avwanre Uko Vwọ Rho Vwẹ Kasan Kasan rẹ Avwanre ra Re

Aye gbe ọshare nana kpo Isikuru ri Giliẹd vwẹ 1979, jẹ uvwre rẹ ikpe nana eje e “ji” ayen yẹrẹ mu ayen kpo Iran, Mauritius, Myanmar, Tanzania, Uganda kugbe Zaire. Ọke rẹ ayen vwọ hẹ Giliẹd yen oyono rayen ọvo re se Jack Redford, vwọ vwẹ uchebro kẹ ayen, uchebro nana cha ayen uko ọke re vwo “ji” ayen, “mu ayen nẹ asan” rẹ ayen hepha je “rhoma” ji ayen kpo asan efa abọ buebun. E jẹ ayen vuẹ avwanre obo re phiare.

Biko Mats, ka vuẹ avwanre oborẹ wọ wan mrẹ uyota na vughe.

Mats: Ọsẹ mẹ mrẹ omeru rọhẹ Ishọshi ri Fada ọke rẹ avwanre vwọ dia Poland vwẹ uvwre ọke re vwo phi Ofovwin Akpọeje II. Jẹ, ọkieje yen ọ vwọ tanẹ, “O vwo asan ọvo rẹ uyota na hepha!” Ọke vwọ yanran, me da rhe mrẹvughe nẹ obo rọ tare na uyota. Me da dẹ ẹbe rẹ ihwo se nure. E se ọvo usun rẹ ẹbẹ na ro vwo ikọlọ rẹ iblu The Truth That Leads to Eternal Life. Uyovwinrota rẹ ọbe na vwerhen ovwẹ oma mamọ, ọtiọyena mi de se eje re vwẹ ason rẹ ẹdẹ re me dẹrẹ na. Ọke vwo rhie, me da rhe mrẹvughe nẹ me mrẹ uyota na re!

Vwo nẹ April 1972 yanran, mi de se ẹbe rẹ Iseri ri Jihova buebun je mrẹ ẹkpahọnphiyọ rẹ enọ ri Baibol ri mi vwori. Oma de ru vwe kerẹ ọneki rọhẹ itẹ ri Jesu na, rọ shẹ erọnvwọn ejobi ro vwori rọ sa vwọ dẹ ivie eghanghanre rọ mrẹre. Me da “shẹ” kiroro kiroro eje mi vwori mi vwo kpo yunivasiti de re yono ẹbe me vwọ dia ọbo—rere me sa vwọ dẹ “ivie ọghanghanre” rẹ uyota na re me mrẹre na. (Mat. 13:45, 46) Mi bromaphiyame vwẹ December 10, 1972.

Uvwre ẹgbukpe ọvo, ọsẹ vẹ oni mẹ kugbe oniọvo mẹ otete ọmọshare da je mrẹ uyota na vughe ji bromaphiyame. Vwẹ July 1973, me da ton ẹga ọkieje phiyọ. Oniọvo aye ọvo re se Ann-Catrin, ọyen usun ekobaro ri vwo oruru vwẹ ukoko avwanre ro vwo erhuvwu mamọ rọ je nabọ vwo ẹguọnọ ri Jihova. Avwanre de rhi vwo ẹguọnọ ohwohwo je rọvwọn vwẹ 1975, avwanre dia orere oyoyovwin ri Strömsund rẹ ihwo da kerhọ mamọ ẹgbukpe ẹne soso vwẹ ubrakpọ ri Sweden.

Ann-Catrin: Ọsẹ mẹ mrẹ uyota na vughe ọke rọ vwọ guọnọ wontọ nẹ yunivasiti vwẹ Stockholm. Emeranvwe erha ọvo me hepha ọke yena, jẹ o mu vwe nene oma kpo uyono vẹ iruo aghwoghwo na. Oma vwerhen oni mẹ kpahọọn, ọtiọyena ọ da davwẹngba ro vwo dje nẹ oborẹ Iseri na ta na gbaree. Ẹkẹvuọvo o se ru ọtiọyeen, ọke vwọ yanran na o de ji bromaphiame. Ẹgbukpe 13 yen me hepha mi de bromaphiyame, me vwọ hẹ ẹgbukpe 16 me da ton iruo ọkobaro phiyọ. Me vwọ ga vwẹ asan ra da ma guọnọ ukẹcha ighwoghwota rẹ Uvie na vwẹ Umeå nu, a da vwẹ ovwẹ mu ọkobaro oghẹresan.

Me vẹ Mats vwọ rọvwọn nu, avwanre da vwẹ ukẹcha kẹ ihwo buebun vwọ mrẹ uyota na vughe je mrẹ aghọghọ ro no cha. Ọvo usun rayen yen Maivor, eghene ọmọtẹ rọ kpairoro vrẹ obo rọ vwọ tua vwẹ akpeyeren rọ dia ehẹha je rhe dia ọkobarọ rọ vẹ oniọvo mẹ ọmọtẹ otete gba ga kugbe. Ayen kpo Giliẹd vwẹ 1984 je ga kerẹ imishọnare enẹna vwẹ Ecuador.

Idjerhe vọ yen ovwan vwo nene uchebro rẹ ovwan vwọ rho vwẹ kasan kasan rẹ ovwan ra re vwẹ iruo imishọnare rẹ ovwan?

Mats: A “rhoma” mu avwanre kpo asan sansan vwẹ abọ buebun. Ẹkẹvuọvo, avwanre davwẹngba vwọ “tan awọ muotọ” vwẹ Jesu womarẹ avwanre vwọ davwẹngba eje ma rho vwọ vwẹrokere omaevwokpotọ rọyen. (Kọl. 2:6, 7) Kerẹ udje, ukperẹ avwanre vwo rhẹro nẹ iniọvo na ru ewene fikirẹ avwanre, avwanre ke davwẹngba vwo yono oboresorọ ayen vwo ruẹ oborẹ ayen ruẹ. Avwanre guọnọ vwo ẹruọ iroro vẹ ẹkuruemu rayen. Avwanre vwọ vwẹrokere Jesu phiyọ ye, avwanre ke mrẹ oma rẹ avwanre kerẹ urhe ra “kọnre kẹrẹ asan ame” rọ pha wọnwọn vwẹ kasan kasan rẹ avwanre ra re.—Une 1:2, 3.

Ann-Catrin: Rere urhe ra rhoma kọn sa vwọ nabọ rho, ọ guọnọ umuvo re phiọrọ phiọrọ. Jihova yen “ọnre” vwọ kẹ avwanre. (Une 84:11) Ọ kẹ avwanre iniọvo rẹ akpọeje re pha sasasa ri ji vwo ẹguọnọ rẹ avwanre. Kerẹ udje, vwẹ ukoko otete ọvo rẹ avwanre hepha vwẹ Tehran vwẹ Iran, iniọvo na vwo uruemu ra vwọ kokẹ ji dede erhorha rọ họhọ ọkpọ uruemu rẹ ihwo evo djephia vwẹ Baibol na. Avwanre je guọnọ Iran dia, ẹkẹvuọvo vwẹ July 1980, igọmẹti da dobọ iruo rẹ Iseri ri Jihova ji vwẹ ẹkuotọ na, a da kẹ avwanre unọke 48 ọvo avwanre vwo vrẹ no. Ọtiọyena, a da rhoma ji avwanre kpo Zaire (ra riẹn phiyọ Congo enẹna) vwẹ Africa.

Mi ke vwo nyo nẹ e ji avwanre kpo Africa, me da viẹ. Obo ri mi nyo kpahen eredekọ vẹ ega vwẹ Africa, nẹrhẹ oshọ mu vwẹ. Igbeyan avwanre ivẹ re ga krire vwẹ oboyin vuẹ avwanre nẹ: “Ovwan ji rhi te oboyiin! Ovwan davwọn ni, ovwan cha mrẹ nẹ ovwan che vwo ẹguọnọ rẹ Africa.” Ọtiọyen ọ ghene hepha! Iniọvo na vwo ẹguọnọ, ayen je pha sasasa. Uyota nẹ, avwanre vwo vrẹ nẹ Zaire fikirẹ iruo avwanre ra dobọ rọyen ji, ke me hwẹ oma mẹ kidie me nẹrhovwo rhe Jihova nẹ, “Biko jẹ avwanre dia Africa.”

Aghọghọ vọ yen ovwan mrẹre vwẹ ikpe nana eje?

Mats: Avwanre vwo uvi rẹ oyerinkugbe vẹ imishọnare ri vwo ẹkuruemu ri ji nẹ asan sansan rhe. Vwọba, vwẹ asan evo re ji avwanre ra, avwanre mrẹ uvi aghọghọ ra mrẹ vwo djee re vwo siẹrẹ wo de vwo ihwo buebun rẹ wọ vwẹ Baibol yono—ọkiọvo avwanre ọvuọvo yono omarẹ ihwo 20! Ẹguọno vẹ uruemu re vwo dede erhorha ro rhe iniọvo rẹ African te vwe ẹwẹn mamọ. Ọke rẹ avwanre re vwo kin ikoko evo vwẹ Tanzania, iniọvo buebun dede avwanre, ayen “tobọ ru vrẹ” oborẹ ẹgba rayen muru ọke avwanre vwo mu imoto avwanre kẹrẹ iwevwin rayen ji sherhẹn evunrẹ rọyen kerẹ “uvun” rẹ avwanre. (2 Kọr. 8:3) Orọnvwọn ọvo rọ pha ghanghanre kẹ avwanre yen oborẹ avwanre se ọke rẹ ikuegbe. Ọyen ọke rẹ avwanre de ru erọnvwọn eje nu, mẹvwẹ vẹ Ann-Catrin ki chidia totọ ta ota kpahen obo phiare vwẹ ẹdẹ yena, je kpẹvwẹ Jihova kẹ obicha rọyen.

Ann-Catrin: Vwọ kẹ vwẹ, aghọghọ mẹ yen mi vwo vughe iniọvo rẹ akpọeje. Avwanre yono ephẹrẹ kpokpọ—kerẹ Farsi, French, Luganda, kugbe Swahili—ọtiọyen ji te ẹkuruemu sansan re vwerhoma. Avwanre kọn uyota na phiyọ ihwo kpokpọ ẹwẹn, mu uvi rẹ igbeyan, ji “ku evun gbe” nene ayen wian vwẹ ẹga ri Jihova.—Zẹf. 3:9.

Avwanre je mrẹ erhuvwu rọhẹ igbevwunu rẹ emama ri Jihova sansan. Kọke kọke avwanre de rhiabọreyọ owian kpokpọ vwẹ ẹga ri Jihova, kọ họhọ nẹ avwanre vẹ Jihova kun usun phiyọ kerẹ ohwo rọ kobaro ro Sun avwanre. O yono avwanre erọnvwọn buebun rẹ avwanre rha sa riẹn komobọọ.

Egbabọse vọ yen ovwan hirharoku, kẹ mavọ yen ovwan se vwo yerin ghene ayen?

Mats: Avwanre mu eka rẹ ega sansan vwẹ ikpe nana eje, ji te odo. A bẹrẹ Ann-Catrin oma kpregede abọ ibro. Avwanre je ro ẹnwan kpahen esẹ vẹ ini avwanre re kpakore; ọtiọyena, oma rẹ iniọvo avwanre re vwẹrote ayen vwerhen avwanre oma mamọ. Ayen fuevun vwẹrote ayen vwọrẹ ẹguọnọ, ediri vẹ aghọghọ. (1 Tim. 5:4) Dedena, o ji vwo ọkievo ẹwẹn vwo kpokpo avwanre nẹ avwanre rhe se ru vrẹ oborẹ avwanre ruẹ enẹna vwọ vwẹrote esẹ vẹ ini avwanre ukperẹ avwanre de vwọ vwẹ ukẹcha kẹ ayen vwo nẹ ugboko rhe.

Ann-Catrin: Vwẹ 1983, avwanre vwọ ga vwẹ Zaire, ọga rẹ cholera de mu vwe. Ọbo na da vuẹ Mats, “Muo nẹ ẹkuotọ na nonẹna!” Ọke vwo rhie, avwanre da ro aropleni re vwo muẹ eghwa ọvo kpo Sweden—ọyen ọvo yen aropleni rọ herọ.

Mats: Avwanre rorori nẹ iruo imishọnare avwanre vwoba re, ọtiọyena avwanre da viẹ gangan. Vwọ fẹnẹ oborẹ ọbo na tare, oma rẹ Ann-Catrin de rhi kpo. Ẹgbukpe ọvo vwọ wan nu, avwanre da rhoma rhiwin kpo Zaire, enẹna vwo kpo ukoko otete ọvo vwẹ Lubumbashi ra da jẹ ephẹrẹ ri Swahili.

Ann-Catrin: Avwanre vwọ hẹ Lubumbashi, evun de she nu vwe awọ. Dede nẹ avwanre vwo ẹwẹn rẹ avwanre vwo vwiẹ emọọ, jẹ ọ bẹn kẹ vwẹ mi vwo chirakon ughwu rẹ ọmọ avwanre rọ va avwanre abọ na. Jẹ, uvwrẹ ọke yena avwanre vwo muomaphiyọ na, Jihova da kẹ avwanre okẹ ọvo rẹ avwanre rhẹro rọyeen. Avwanre da ton uyono ri Baibol buebun phiyọ vrẹ oborẹ avwanre ruẹ jovwo. O te ẹgbukpe ọvoo, ighwoghwota 35 rehẹ ukoko na de rhi bun te 70, ihwo 40 re cha uyono avwanre jovwo de rhi bun te 220. Avwanre muomaphiyọ iruo aghwoghwo na mamọ, ebruphiyọ ri Jihova da je nẹrhẹ ẹwẹn mẹ totọ. Dedena, ọkieje yen ẹwẹn avwanre vwọ djẹ kpo ọmọ ọghanghanre avwanre na je ta ota kpahọn. Avwanre rhẹro ọke rẹ Jihova che vwo si ọmiaovwẹ rọhẹ ubuidu avwanre no kakare.

Mats: Ọke ọvo vwo te, oma rẹ Ann-Catrin de rhi bruku mamọ. A mrẹ ọga rẹ ikansa re se colon rọhẹ stage-four vwẹ oma mẹ, ọtiọyena me guọnọ omaẹbẹrẹ kpakpata. Enẹna oma mẹ ganre, jẹ Ann-Catrin ji ruẹ oborẹ ẹgba rọyen muru.

Avwanre rhe mrẹvughe re nẹ ọ dia avwanre ọvo yen nene edavwini muabọọ. Ohwekufia rọ vwomaphia vwẹ Rwanda ukpe ri 1994 vwọ wan nu, avwanre da ra mrẹ iniọvo avwanre evo vwẹ asan rẹ ihwo rẹ ofovwin djẹ nẹ iwevwin dia. Avwanre vwọ mrẹ esegbuyota, akoechiro kugbe uruemu re vwo dede erhorha rẹ ayen vwori, ọyena de yono avwanre nẹ Jihova vwo ẹgba rọ vwọ vwẹrote ihwo rọyen vwẹ kọdavwini kọdavwini rẹ ayen hirharoku.—Une 55:22.

Ann-Catrin: Egbabọse ọfa vwomaphia ọke rẹ avwanre vwo kpo Uganda vwẹ 2007 ra vwọ vwẹ oghọn ukoko rayen vwọ kpahotọ. Irueru na vwo kunphiyọ nu, avwanre da vwomaba ẹko rẹ imishọnare vẹ iniọvo re ga vwẹ Bẹtẹl ri te omarẹ 25 kpo Nairobi, Kenya. Tavwen avwanre ki te ughwru ri Kenya, obọ da chọ ohwo rọ djẹ imoto nẹ obaro cha, ọ da họrhọ nẹ ẹbẹre rọyen ro imoto avwanre. Ohwo rọ gua imoto na vẹ iniọvo avwanre iyorin de ghwu ugugege yena; ọke vwọ yanran na, oniọvo aye ọfa de rhe ghwu vwẹ họspito. Avwanre rhẹro ọke avwanre cha vwọ rhoma mrẹ igbeyan avwanre na.—Job 14:13-15.

Ememerha na, oma me wanre de rhi kpo. Jẹ, mẹvwẹ vẹ Mats usun rẹ ihwo rẹ ẹnwan vẹ oshọ rẹ obo re phiare na kpokpori ẹwẹn ọke grongron. Vwọ kẹ vwẹ, ason yen ẹnwan vẹ oshọ rẹ obo re phiare na ma vwọ kọn cha, kọ nẹrhẹ mi vrẹn udu ko ji nu vwẹ awọ. Uguegue rọyen dia ọmọrhiẹẹ. Ẹkẹvuọvo ẹrhovwo avwanre nẹ rhe Jihova vẹ ẹkpo ri Baibol evo re vwerhen avwanre oma cha avwanre uko vwo yerin ghene ebẹnbẹn na. Avwanre je mrẹ ukẹcha rẹ ọbo, ro fierere kẹ avwanre. Asaọkiephana, o yovwin re, jẹ avwanre rẹ Jihova nẹ ọ vwẹ ukẹcha kẹ ihwo efa ri ji vwo ọkpọ rẹ obẹnbẹn tiọna.

Wọ vwọ ta ota kpahen obo ru wo se vwo yerin ghene egbabọse buebun, wọ da tanẹ Jihova mu we “kerẹ ikọhọ kpokpọ.” Ọrhọ yen otọ rẹ ota wẹn na?

Mats: Eta na “Tumebebwa kama mayai mabichi,” yẹrẹ “E mu avwanre kerẹ ikọhọ kpokpọ” ọyen ota rẹ ihwo ri Swahili. Kirobo rẹ ohwo jomaotọ muẹ ikọhọ kpokpọ ri vwo je ghwo ye, ọtiọyen Jihova nabọ vwẹrote avwanre vwọrẹ ẹguọnọ vwẹ kasan kasan re ji avwanre ra. Ọkieje yen ọ vwọ kẹ avwanre oborẹ avwanre ghene guọnọ tobọ vrẹ ọtiọyen. Idjerhe ọvo avwanre vwọ mrẹ obicha vẹ ẹguọnọ ri Jihova yen womarẹ erorokẹ rẹ Ẹko Rọvwẹrote na dje vwọ kẹ avwanre.

Ann-Catrin: Me guọnọ djunute idjerhe ọvo rẹ Jihova vwo bicha avwanre. Ẹdẹ ọvo e de se vwe vwẹ ifonu nẹ Sweden rhe nẹ oma rẹ ọsẹ mẹ ganree, nẹ ọ hẹ họspito. Jẹ, o ji rhi kri Mats vrẹ nẹ ọga rẹ odoo. Ọtiọyena, avwanre rhe vwo igho ra vwọ dẹ itikẹti vwọ ro aropleni kpoo, avwanre de brorhiẹn avwanre vwọ shẹ imoto avwanre. E de se avwanre vwẹ ifonu abọ ivẹ; use ọvo nẹ obọ rẹ aye gbe ọshare ri nyo kpahen ẹdia rẹ avwanre hepha na re guọnọ hwa igho rẹ itikẹti ọvo. Use ro chekọ de rhe nẹ obọ rẹ oniọvo aye ọvo rọ kpakore ro koko igho phiyọ ekpeti ro si phiyọ nẹ “Vwọ kẹ ohwo rọ guọnọ ukẹcha.” Omarẹ ibrẹro evo, Jihova da rhe cha avwanre uko!—Hib. 13:6.

We de ni kpuko kpo ikpe re vrẹ 50 ovwan vwọ hẹ ẹga ọkieje re na, die yen we yonori?

Ann-Catrin: Me rhe mrẹvughe re nẹ “vwẹ oma ehwemuẹ kugbe ẹro ẹvwọ suọ” yen ogangan rẹ avwanre hepha. A da vwẹroso Jihova, kọ ghwa họhọ nẹ ofovwin avwanre, yen ofovwin rọyen. (Aiz. 30:15; 2 Ikun 20:15, 17) Jihova kẹ avwanre ebruphiyọ buebun rẹ avwanre rha sa mrẹ vwẹ asan ọfaa, kidie avwanre reyọ ẹgba avwanre eje vwọ ga Jihova vwẹ kasan kasan re mu avwanre ra.

Mats: Uyono ọvo kiriguo ri mi yonori yen me vwọ vwẹroso Jihova vwẹ kẹdia kẹdia je mrẹ obo rọ cha cha vwẹ uko wan. (Une 37:5) O ji vwo ọke vuọvo ro vwo jẹ ive rọyen eruo gbaa. Avwanre je mrẹ uyota rẹ ọnana vwẹ Bẹtẹl ri Myanmar rẹ avwanre da ga enẹna.

Avwanre rhẹro nẹ ighene re je guọnọ ru bunphiyọ vwẹ iruo rẹ Uvie na, ji che rhiẹromrẹ ọkpọ ẹguọnọ ri Jihova ro jẹ rhẹriẹ ro dje kẹ avwanre na. Avwanre vwo imuẹro nẹ ọ cha dia ọtiọyen siẹrẹ ayen da vwẹ uphẹn kẹ Jihova nẹ o ru ayen rho vwẹ asan rọ kọn ayen phiyọ.