Enọ Rẹ Ihwo Ri Se Ẹbe Avwanre Nọre

Ohwo ro siẹ Isẹ 30:18, 19 na tare nẹ “oborẹ ọshare ruẹ ọke rẹ ọ vẹ ọmọtẹ da herọ” ‘bẹn ẹriẹn.’ Die yen otọ rẹ ota rọyen na?

Eta yena gbe ihwo buebun unu, tobọ te ihwo ri yono ẹbe kodo. Ẹkpo ri Baibol nana vwẹ Efanfan rẹ Akpọ Kpokpọ rẹ Isiesi Ọfuanfon Na de se: “Erọnvwọn erha herọ re bẹn vwẹ ẹriẹn [yẹrẹ “ri gbe vwe unu mamọ,” eta rehẹ obotọ] kugbe ẹne ri mi vwo ẹruọ rayeen: Oborẹ ugo rhan wan vwẹ idjuvwu na, oborẹ ọrọdekọ kpana wan vwẹ oragha, oborẹ okuna biẹ wan vwẹ abadi, kugbe oborẹ ọshare ruẹ ọke rẹ ọ vẹ ọmọtẹ da herọ.”—Isẹ 30:18, 19.

Vwẹ obuko re, ẹro ọchọchọ yen avwanre vwo ni “oborẹ ọshare ruẹ ọke rẹ ọ vẹ ọmọtẹ da herọ” ra ta ota kpahen vwẹ owọrota nana. Diesorọ? Awọreta efa vwẹ uyovwirota na djunute erharhe erọnvwọn efa ri jẹ tanẹ “otere.” (Isẹ 30:15, 16) Owọ rẹ 20 ta ota kpahen “igberadja” aye ro me ruẹ nẹ ọyen ru emuọvo chọọ. Ọtiọyena, avwanre ki rorori nẹ kirobo rẹ ugo rha vwẹ obenu na, ọrọdekọ ro kpono vwẹ enu rẹ oragha, yẹrẹ okuna awanre biẹ vwẹ abadi jẹ a mrẹ idjerhe rọ wanree ye, ọtiọyen ọshare na ji se ru emuọvo rẹ ohwo vuọvo cha riẹn kpaheen. Fikirẹ ọnana, avwanre ki rorori nẹ eta na “oborẹ ọshare ruẹ ọke rẹ ọ vẹ ọmọtẹ da herọ” shekpahen obo re brare—eghene ọshare rọ guọnọ riẹriẹ eghene ọmọtẹ tobọ rere ọ vẹ ọyen vwo gbe ọfanrhiẹn vwọrẹ jẹ ẹriẹn.

Ẹkẹvuọvo, oyovwirin a vwọ vwẹ ẹro ro fori vwo ni owọrota yena. Ohwo ro si ọbe rẹ Isẹ na di djunute erọnvwọn ri gbe re unu.

Vwọba, imanuskripti ri Hibru rẹsosuọ je rhọnvwephiyọ nẹ owọrota yena mudiaphiyọ obo ri yovwirin. Vwo nene oborẹ Theological Lexicon of the Old Testament tare, ota ri Hibru ra fan phiyọ “gbe vwe unu” vwẹ Isẹ 30:18 “dje orọnvwọn rẹ ohwo mrẹre rọ vrẹ rẹ oma . . . ro niri nẹ ọ cha sa phiaa, ro gbe re unu mamọ.”

Ogbuọbe Crawford H. Toy ri Harvard University vwẹ United States je tanẹ ọ dia obo re brare yen ẹkpo ri Baibol nana ta ota kpaheen. Ọ da ta: “Igbevwunu rẹ erọnvwọn rẹ ohwo ro si ọbe rẹ Isẹ na mrẹre yen o djisẹ rọyen.”

Ọtiọyena, ọhọ herọ a da tanẹ eta rehẹ Isẹ 30:18, 19 djisẹ erọnvwọn re ghene vọn vẹ igbevwunu, rẹ avwanre che se vwo ẹruọ rayeen. Kerẹ ohwo ro si ọbe rẹ Isẹ na, o gbe avwanre unu a da mrẹ oborẹ ugo rhan wan, oborẹ ọrọdekọ ro vwo awọọ kpana wan oragha, oborẹ okuna vẹ ọnyẹ biẹ wan abadi kugbe oborẹ eghene ọshare vẹ aye vwo ẹguọnọ rẹ ohwohwo, ayen mi rhi yeren akpọ rẹ omavwerhovwẹn kugbe.