Ihwo “ri Vwo Omamọ Ẹwẹn” Che Rhiabọreyọ Ovuẹ Na

1. Idjerhe vọ yen oborẹ ihwo rhiabọreyọ iyẹnrẹn esiri na wan vwọ fẹnẹ ohwohwo? (Iruo rẹ Iyinkọn Na 13:47, 48; 16:14, 15)

IHWO buebun vwẹ ẹgbukpe ujorin rẹsosuọ rhiabọreyọ uyota na ugege rẹ ayen vwo nyo ovuẹ rẹ Uvie na. (Se Iruo rẹ Iyinkọn Na 13:47, 48; 16:14, 15.) Ọtiọyen ọ je hepha nonẹna, oma vwerhen evo ayen ke vwo nyo kpahen iyẹnrẹn esiri na. Ihwo evo re tobọ vwo omavwerhovwẹn kpahen ovuẹ rẹ Uvie na ẹsosuọọ sa rhoma vwo owenvwe rẹ ayen vwo nyo ọke vwọ yanran na. Die yen e se ru a da mrẹ ihwo ri “vwo omamọ ẹwẹn” vwẹ iruo aghwoghwo na?

2. Idjerhe vọ yen iruo odibo-egbe avwanre vwọ họhọ ọ rẹ ọghwẹrẹ?

² Roro kpahen udje nana. A sa reyọ iruo rẹ odibo-egbe avwanre vwo dje iruo rẹ ọghwẹrẹ. Omamọ urhe ọvo da vware, ọghwẹrẹ na sa kọrọ ọ da tobọ dianẹ o ji voro otọ na yẹrẹ kọn ekankọn phiyọ asan ọfa vwẹvwunrẹ ogba na. Vwẹ idjerhe vuọvo na, avwanre da mrẹ ohwo rọ guọnọ nyo ovuẹ rẹ avwanre, e jẹ a vwẹ ukẹcha kẹ kpakpata vwọ dia odibo ri Kristi. E vwo ru ọtiọyena, jẹ a je kọn urhurusivwe rẹ Ota Ọghẹnẹ phiyọ ẹwẹn rẹ ihwo re guọnọ ọke re ke mrẹ ọghanrovwẹ rẹ ota na. (Jọn 4:35, 36) Ọmrẹvughe cha vwẹ ukẹcha kẹ avwanre vwọ riẹn idjerhe ro me yovwin ra vwọ ta ota kẹ ihwo re guọnọ nyo. Enẹna, e jẹ a ta ota kpahen obo re se ru e de nene ihwo re guọnọ nyo ota na vwẹ obọ rẹsosuọ ta ota. A je cha ta ota kpahen obo ra sa vwọ vwẹ ukẹcha kẹ ihwo ọtiọyen vwọ yan obaro.

IHWO DE MUEGBE AYEN VWO RHIABỌREYỌ OVUẸ NA

3. Ọrhọ yen ona ọvo re se vwo ruiruo a da mrẹ ihwo ri dje omavwerhovwẹn phia vwẹ iruo aghwoghwo na? (1 Kọrẹnt 9:26)

³ A da mrẹ ihwo ri dje omavwerhovwẹn phia vwẹ iruo aghwoghwo avwanre, ugege yena e jẹ a cha ayen uko vwọ ro idjerhe ro suẹn ohwo kpo arhọ ri bẹdẹ na. Vwẹ obọ rẹsosuọ re ghwe vwo nene ayen ta ota nu, e jẹ e siomauko a vwọ vwẹ uyono ri Baibol vwo mu kẹ ayen yẹrẹ durhie ayen kpo emẹvwa rẹ avwanree.—Se 1 Kọrẹnt 9:26.

4. Gbikun ohwo ọvo ro muegbe kẹ uyono ri Baibol ugugege yena.

⁴ Vwẹ uyono vwo mu. Ihwo evo rẹ avwanre nene ta ota guọnọ uyono ri Baibol ugugege yena. Kerẹ udje, vwẹ Thursday rẹ ẹdẹ ọvo, eghene aye ọvo vwẹ Canada de kpo asan re mu imikpekpa phiyọ je reyọ ibroshọ ri Vwo Omavwerhovwẹn Bẹdẹ! na. Oniọvo aye rọhẹ aghwoghwo rẹ imikpekpa na da vuẹ nẹ vwọ vrẹ ibroshọ na, avwanre je vwẹ uyono ri Baibol vwo muẹ kẹ ihwo. Eghene aye na dje omavwerhovwẹn phia je reyọ ukeri ifonu rọyen vwọ kẹ oniọvo na. Vwẹ ẹdẹ vuọvo na, eghene aye na de si ovuẹ rhe oniọvo aye na kpahen uyono na. Ọke rẹ oniọvo aye na vwọ vuẹ nẹ ọyen che bro ra vwẹ oba udughwrẹn na, eghene aye na da nọ: “Kẹ odẹ rọ cha na vwo? Mi vwo uphẹn.” Ayen de ru uyono na vwẹ Friday ọke vwo rhie. Eghene aye na de kpo uyono obọ rẹsosuọ vwẹ oba udughwrẹn yena je yanphiaro ọkieje ghwraghwraghwra.

5. Mavọ yen e se vwo dje aghwanre phia a da reyọ uyono ri Baibol vwo muẹ? (Ni ihoho na.)

⁵ Vwọrẹ uyota, ọ dia ihwo eje re kerhọ rẹ ovuẹ avwanre yen che vwo owenvwe kerẹ aye yenaa. Ọ sa reyọ ọke evo ki dje omavwerhovwẹn phia. Ẹsosuọ, o fori a vwọ reyọ uyovwinrota ro che je ohwo na vwọ ton otaẹtakuẹgbe phiyọ. Jẹ, e de vwo ẹro abavo ji djephia nẹ e vwo ọdavwẹ rẹ ohwo na, ọkiọvo o rhe che kri a ke ton uyono ri Baibol phiyọọ. Die yen a sa ta a da guọnọ vwẹ uyono vwo muẹ? E jẹ a mrẹ iroroẹjẹ rẹ iniọvo eya vẹ eshare re tẹn ona rẹ obo ra reyọ uyono ri Baibol vwo muẹ vwọphia.

6. Mavọ yen a sa vwọ reyọ ona vwo nene ohwo ro dje omavwerhovwẹn phia ta ota kpobarophiyọ?

⁶ Ra vwọ nọ ighwoghwota vẹ ekobaro evo kpahen obo ra ton uyono phiyọ, ayen tare nẹ vwẹ ẹkuotọ evo, siẹrẹ wo de djisẹ rẹ uyono ri Baibol, o yovwin wọ da kẹnoma kẹ eta kerẹ “uyono,” “uyono ri Baibol,” yẹrẹ “yono uwe.” Ayen niroso nẹ a da reyọ eta kerẹ “otaẹtakuẹgbe,” “nene uwe ta ota” kugbe “obo ra sa vwọ riẹn Baibol na phiyọ” yen me yovwin. Wọ vẹ ohwo na sa vwọ ta ota kpobarophiyọ wọ sa vuẹ nẹ, “Oborẹ Baibol na kpahenphiyọ enọ eghanghanre rẹ akpeyeren gbe ohwo unu” yẹrẹ “Baibol ghwa dia ọbe rẹ ẹga ọvoo, ọ je vwẹ ukẹcha kẹ avwanre vwẹ kidjerhe kidjerhe.” Wọ je sa vwọba nẹ: “Ọ reyọ ọke ogrongroon; ibrẹro 10 fiẹ 15 te vwo yono orọnvwọn ọghanghanre ọvo.” Ohwo na vwo je no nẹ uyono na cha reyọ ọke rọyen, kẹnoma kẹ eta kerẹ wọ cha “rhuẹrẹ ọke phiyọ” yẹrẹ e che ruo “kudughwrẹn kudughwrẹn.”

7. Ọke vọ yen ihwo evo ka vwọ mrẹ uyota ri Baibol na vughe? (1 Kọrẹnt 14:23-25)

⁷ Durhie ayen kpo uyono. Vwẹ ọke rẹ ọyinkọn Pọl, ọ họhọre nẹ obọ rẹsosuọ ihwo evo ke vwo kpo omẹvwa rẹ Inenikristi yen ayen vwọ mrẹ uyota ri Baibol na vughe. (Se 1 Kọrẹnt 14:23-25.) Ọke buebun na, ọtiọyen ọ je hepha nonẹna. Kpakpata yen ihwo kpokpọ evo re tuẹn uyono ẹra phiyọ vwọ yanphiaro. Ọke vọ yen ofori nẹ e vwo durhie ayen? Uyono ri 10 rẹ ọbe ri Vwo Omavwerhovwẹn Bẹdẹ! na jiriro nẹ e durhie ayen, jẹ ofori wọ vwọ hẹrhẹ te ọke ovwan vwo yono te etiyin tavwen wo ki ru ọtiọyeen. Ghwe vwo nẹ ọke ovwan vwọ ton otaẹtakuẹgbe rẹsosuọ rẹ ovwan phiyọ, wọ sa reyọ ọke yena vwo durhie kpo uyono rẹ oba udughwrẹn na, wo se djunute uyovwinrota rẹ ota rotu na yẹrẹ ẹkpo ọvo vwẹ Uwevwin Orhẹrẹ rẹ udughwrẹn yena.

8. Die yen a sa kanrunumu siẹrẹ e de durhie ohwo cha uyono? (Aizaya 54:13)

⁸ Wo de durhie ohwo ro dje omavwerhovwẹn phia, nabọ dje fiotọ kẹ oborẹ emẹvwa rẹ avwanre vwọ fẹnẹ irueru rẹ ẹga efa rọ riẹnre. Ọke rẹ ohwo ọvo ra vwẹ Baibol yono ke vwo kpo uyono je mrẹ obo re ruẹ uyono Uwevwin Orhẹrẹ na wan, ọ da nọ ohwo ro yono na, “Ohwo rọ vwẹrote uyono na riẹn edẹ rẹ ihwo ejobi?” Oniọvo aye na da vuẹ nẹ, avwanre davwẹngba vwọ riẹn edẹ rẹ ihwo rehẹ ukoko avwanre eje, kirobo rẹ avwanre je riẹn edẹ rẹ ihwo orua avwanre. Ohwo ra vwẹ Baibol yono na da rhe mrẹ nẹ ọnana fẹnẹ oborẹ ayen ruẹ vwẹ ishọshi. Ọtiọyen ọ je hepha nẹ, oborẹ avwanre ruẹ emẹvwa wan ọyen emu ọrhora kẹ ihwo buebun. (Se Aizaya 54:13.) Avwanre kuomakuẹgbe vwọ ga Jihova, yono mie je bọn ohwohwo gan. (Hib. 2:12; 10:24, 25) Kọyensorọ, emẹvwa avwanre vwọ dia dẹndẹn ji nene ọrhuẹrẹphiyotọ, ọ dia ẹkuruemu ghevweghee. (1 Kọr. 14:40) Irhukpẹ nabọ lo vwẹ asan eje, kidie Ọguan Ruvie ọyen asan avwanre de re yono. Avwanre ji titẹ ẹbẹre ọvo rẹ usuon jẹ ọvo vwoo, kidie avwanre ka ẹbẹre vuọvo rẹ oseghe rẹ usuoon; yẹrẹ kẹ avwanre ta eta yẹrẹ phraphro kpahen oseghe rẹ usuoon. O yovwin siẹrẹ wo de ke dje ividio na Die Yen E Ruẹ Vwevunrẹ Ọguan Ruvie? kẹ ohwo ru wo yono na. Vwẹ idjerhe ọtiọna, kọ sa riẹn obo rọ cha mrẹ siẹrẹ ọ da rhe.

9-10. Die yen e se ru vwọ vwẹ imuẹro kẹ ohwo re durhie rhe uyono nẹ a cha gba vwo vwobọ vwẹ uyono na yẹrẹ vwomaba avwanree? (Ni uhoho na.)

⁹ Evo siomauko ayen vwo kpo uyono kidie oshọ mu ayen nẹ a cha vuẹ ayen nẹ ayen “vwomaba Iseri ri Jihova.” Vwẹ imuẹro kẹ ohwo na nẹ, oma vwerhen avwanre siẹrẹ avwanre da mrẹ erhorha, avwanre je gba ayen vwọ vwomaba avwanre yẹrẹ vwobọ vwẹ uyono naa. Avwanre dede erua, ji te ihwo ri vwo imitete. Vwẹ emẹvwa avwanre, o vwo asan ra rhuẹrẹre san re de yono emọọ. Ukperẹ ọtiọyen, esẹ vẹ ini kugbe emọ rayen chidia kuẹgbe ji yono vwẹ asan ọvo. Vwẹ idjerhe ọtiọna, esẹ vẹ ini ke mrẹ obo re yono emọ rayen nẹ oshọ herọọ. (Urhi 31:12) Avwanre nokpẹn arhọghọ yẹrẹ ghara ẹnvẹlopu kẹ ihwo rẹ ayen phi igho phiyọọ. Ukperẹ ọtiọyen, avwanre nene iji ri Jesu rọ tare nẹ: “Ọphẹ yen a vwerọ kẹ ovwan, ovwan je vwọ kẹ ihwo ọphẹ.” (Mat. 10:8) Wọ je sa vuẹ ohwo na nẹ ọ guọnọ iwun eghanghanre ọ ke sa rhe emẹvwa avwanree. Ubiudu na yen Ọghẹnẹ nẹ, ọ dia oborẹ ohwo kuphiyọọ.—1 Sam. 16:7.

¹⁰ Ohwo na da rhe uyono, ru obo wo se ru eje vwo dede sasasa. Dje kẹ ekpako na kugbe ighwoghwota efa. A da nabọ yeren je nabọ dede sasasa, ọnana se muo vwọ rhe ọke ofa. Wo de noso nẹ o vwo Baibol rẹ ovwan vwọ hẹ uyono naa, wẹ vẹ ọyen se ni owẹ ji dje kẹ obo re nene ọtota na yẹrẹ uyono na wan.

A DA TON UYONO RI BAIBOL PHIYỌ NU

11. Mavo yen wo se vwo djephia nẹ wo muọghọ kẹ ọrhuẹrẹphiyotọ vẹ ọke rẹ ọrovwuwevwin na?

¹¹ Ẹkpo vọ yen ofori nẹ a kọn phiyọ ẹwẹn kpahen uyono ri Baibol re ruẹ vwẹ uwevwin? Nene ọrhuẹrẹphiyotọ vẹ ọke rẹ ọrovwuwevwin na. Kerẹ udje, wọ vẹ ọyen da rhuẹrẹ ọke phiyọ, yanmuo, o toro ẹro rẹ ihwo rehẹ ekogho wẹn vwo nẹ ọkee. Vwọba, o yovwin uyono rẹsosuọ na da dia kprẹn. Ighwoghwota evo re tẹn ona tare nẹ ọ da tobọ dianẹ ohwo na guọnọ yono kpobarophiyọ, fobọ kuophiyọ. Wọ ta eta buẹn nọọ. Vwẹ uphẹn kẹ ọrovwuwevwin na ọ ta ẹwẹn rọyen.—Isẹ 10:19.

12. Ọrhọ yen ọdavwẹ avwanre ghwe vwo nẹ ọke ra vwọ tọn uyono ri Baibol phiyọ?

¹² Ghwe vwo nẹ ọke rẹ ovwan vwo ton uyono na phiyọ, vwo ọdavwẹ wọ vwọ vwẹ ukẹcha kẹ ohwo ru wo yono na vwọ riẹn Jihova vẹ Jesu ji vwo ẹguọnọ rayen. Wo se ru ọnana womarẹ wọ vwọ kpo iroro rọyen kpo Ota rẹ Ọghẹnẹ, ukperẹ oma wẹn yẹrẹ erianriẹn ri Baibol ru wo vwori. (Iruo 10:25, 26) Ọkieje yen ọyinkọn Pọl vwo mu uyono rọyen kpahen Jesu, rọ dia ohwo rẹ Jihova ji rhe nẹ ọ vwẹ ukẹcha kẹ avwanre vwọ riẹn ji vwo ẹguọnọ Rọyen. (1 Kọr. 2:1, 2) Pọl ji dje phephẹn obo rọ ghanre te ra vwọ vwẹ ukẹcha kẹ ihwo kpokpọ vwo vwo omamọ rẹ iruemu, re vwo dje oro, idọnọ ọfuanfon, kugbe eragha eghanghanre. (1 Kọr. 3:11-15) Emamọ rẹ iruemu tiọyena yen esegbuyota, aghwanre, eruọ kugbe oshọẹdjẹ ri Jihova. (Une 19:9, 10; Isẹ 3:13-15; 1 Pita 1:7) Vwẹrokere ona rẹ uyono ri Pọl womarẹ wọ vwọ vwẹ ukẹcha kẹ ihwo ru wọ vwẹ Baibol yono vwo vwo esegbuyota rọ ganre kugbe oyerinkugbe ọkpẹkpẹkpẹ vẹ Ọsẹ rayen ro vwo ẹguọnọ rọhẹ odjuvwu.—2 Kọr. 1:24.

13. Mavọ yen e se vwo dje ẹruọ vẹ erhiorin phia siẹrẹ a da vwẹ ukecha kẹ ihwo ri dje omavwerhovwẹn phia? (2 Kọrẹnt 10:4, 5) (Ni uhoho na.)

¹³ Vwẹrokere ona rẹ uyono ri Jesu womarẹ wo vwo vwo erhiorin vẹ ẹruọ rẹ ihwo ru wo yono. Kẹnoma kẹ uruemu ra vwọ nọ enọ re sa nẹrhẹ oma vo ohwo na. O de fo, wọ sa yanjẹ ẹkpo evo re bẹn kẹ vwo, ovwan rhoma rhivwin kpo ayen ọke ọfa. Ukperẹ wọ vwọ gba vwọ reyọ uyono ọvo ro ji rhi muegbe kẹẹ, vwẹ ọke kẹ uyota na vwọ nabọ vwẹ owọ muotọ vwẹ ubiudu rọyen. (Jọn 16:12; Kọl. 2:6, 7) Baibol na reyọ iyono rẹ efian ra guọnọre nẹ ihwo kpairoro vrẹ na vwo dje uwevwin ra vwẹ oragha vwọ bọn. (Se 2 Kọrẹnt 10:4, 5) Ukperẹ wo vwo kporo uwevwin na she teyen ohwo ru wo yono na, vwẹ ukẹcha kẹ vwọ reyọ Jihova vwo ru Adjarhọ rọyen.—Une 91:9.

IHWO KPOKPỌ DA RHE UYONO

14. Mavọ yen ofori nẹ e dede ihwo kpokpọ re rhe uyono avwanre?

¹⁴ Jihova guọnọre nẹ e dede ihwo kpokpọ re rhe uyono avwanre sasasa, o toro ẹkuruemu, ẹdia rẹ ayen hepha yẹrẹ asan rẹ ayen nurhee. (Jems 2:1-4, 9) Ọtiọyena, mavọ yen e se vwo dje ẹguọnọ kẹ ihwo re rhe omẹvwa rẹ avwanre?

15-16. Mavọ yen e se brọghọ phiyọ ihwo kpokpọ re rhe uyono avwanre oma?

¹⁵ Ihwo evo sa rhe omẹvwa avwanre kidie ayen guọnọ riẹn obo re ruẹ vwẹ etiyin yẹrẹ ohwo ọvo rọ dia asan ọfa yen durhie ayen. Ọtiọyena, e jẹ e siomauko e vwo bru ihwo tiọyen re rhe uyono avwanre na raa. Dede ayen, ẹkẹvuọvo wo ruo vrẹkaa. Vuẹ ayen nẹ ayen nene uwe chidia. Wọ vẹ ayen ni Baibol wẹn vẹ ẹbe re vwo ruẹ uyono na kugbe yẹrẹ kẹ ayen ọ romobọ rayen. Vwọba, roro kpahen erọnvwọn efa re sa nẹrhẹ ẹwẹn rayen totọ. Ọshare ọvo ro kpo uyono vwẹ Ọguan Ruvie vuẹ oniọvo ọshare ro dedire na nẹ ẹwẹn kpokpo ọyen fikirẹ iwun ro kuphiyọ. Oniọvo ọshare na da vuẹ nẹ e jẹ udu broo nẹ Iseri ri Jihova ihwo ghevweghe. Oborẹ oniọvo na vuẹ ọshare na ro muwan rẹ omaebrophiyame ukuko na chọrerọ ẹroo. Jokaphiyọ nẹ: O ghwe fo re vwo kpẹ ishosho rẹ eta rẹ omobọ siẹrẹ e de nene erhorha ta eta uyono ke tonphiyọ yẹrẹ e de ru uyono nuu.—1 Pita 4:15.

¹⁶ E ji se brọghọ phiyọ ihwo re rhe uyono rẹ avwanre oma a da ta ota kpahen ihwo re dia Iserii vẹ oborẹ ayen segbuyota, siẹrẹ a da kpahanphiyọ enọ, nene ayen ta ota yẹrẹ e de vwo ota vwẹ uyono. Kẹnoma kẹ eta re sa so ekprowọ kẹ ayen yẹrẹ ayen se ni kerẹ aroeyivwo. (Tai. 2:8; 3:2) Kerẹ udje, avwanre cha nama ta eta ọjẹfia kpahen esegbuyota rẹ ihwo re dia Iseri ri Jihovaa. (2 Kọr. 6:3) Vwọ kpahen ẹdia nana, ofori nẹ iniọvo re ta ota rotu nabọ jomaotọ. Vwọba ayen djephia nẹ ayen vwo ọdavwẹ rẹ ihwo rehẹ evunrẹ echidiotọ na, womarẹ ayen vwọ nabọ dje eta vẹ ọhọ rẹ eta rẹ ihwo re dia Iserii che se vwọ ẹruọ rayeen fiotọ.

17. Die yen ọdavwẹ rẹ avwanre a da mrẹ ihwo ri vwo “omamọ ẹwẹn” vwẹ iruo aghwoghwo na?

¹⁷ Kẹdi kẹdẹ yen iruo rẹ odibo-egbe avwanre na vwọ dia ọ rẹ okpakpa vrẹ obo ri jovwo, ọtiọyena ọkieje yen avwanre vwọ guọnọ ihwo ri vwo “omamọ ẹwẹn rẹ ayen vwọ dia idjerhe ro suẹn kpo arhọ ri bẹdi bẹdẹ” na. (Iruo 13:48) A vwọ guọnọ ayen na, e jẹ e siomauko ra vwọ reyọ uyono ri Baibol mu kẹ ayen yẹrẹ durhie ayen kpo emẹvwa rẹ avwanree. E de ru ọtiọyen, ka sa vwẹ ukẹcha kẹ ayen vwọ jowọ rẹsosuọ vwọ ro ‘idjerhe ro suẹn ohwo kpo arhọ na.’—Mat. 7:14.