Ighene Eshare—Ovwan Vwẹrokere Mak vẹ Timoti

1-2. Erhọ yen egbabọse evo re sa dobọ rẹ Mak vẹ Timoti ji ayen vwo jẹ ukẹcha ẹ vwọ kẹ ihwo efa?

INIỌVO eshare, ovwan guọnọ ru bunphiyọ vwẹ ẹga ri Jihova je vwẹ ukẹcha kẹ iniọvo rẹ ukoko rẹ ovwan? Aphro herọọ nẹ, ovwan guọnọ ru ọtiọyen. Mavọ yen ọ vwerhoma te ra vwọ mrẹ ighene eshare buebun ri vwo owenvwe rẹ ayen vwọ ga ihwo efa! (Une 110:3) Ọkiọvo, wo se hirharoku egbabọse. Wo siomauko wo vwo ru bunphiyọ vwẹ iruo aghwoghwo wẹn fikirẹ oshọ rẹ obo re cha vwẹ obaro? O vwo ọkiọvo wọ vwọ sen iruo ra vwọ kẹ wẹ kidie nẹ wo niro nẹ wo muwaan? Ọ da dia ọtiọyen, ọ dia owẹ yen ohwo rẹsosuọ ro ru ọtiọyeen.

² Mak vẹ Timoti hirharoku ọkpọ rẹ egbabọse tiọyena. Dedena, ayen vwẹ uphẹn kẹ oshọ rẹ obo re cha vwẹ obaro yẹrẹ nẹ ayen muwaan nẹ ọ dobọ rẹ ayen ji ayen vwo jẹ ukẹcha ẹ vwọ kẹ ihwo efaa. Ọ sa dianẹ omamọ rẹ uwevwin yen Mak vẹ oni rọyen dia ọke ra vwọ vuẹ nẹ o nene ọyinkọn Pọl vẹ Banabas kpo oyan rẹ imishọnare rayen rẹsosuọ. (Iruo 12:12, 13, 25) Dedena, Mak de vrẹn nẹ asan tiọyen rọ dia riẹrioma na o se vwo ru bunphiyọ vwẹ iruo aghwoghwo rọyen. Ẹsosuọ, ọ kpare oma kpo Antiọk. Ọke vwọ yanran na, o de rhe nene Pọl vẹ Banabas kpo asan ri sherabọ. (Iruo 13:1-5) Ọ je sa dianẹ Timoti nene ọsẹ vẹ oni rọyen dia ọke rẹ Pọl vwọ vuẹ nẹ ọ vwomaba ọyen vwẹ iruo aghwoghwo na. Ọ vwọ dianẹ Timoti je boba, o ji ghwe rhi vwo ọhọ tiọyenaa, o rhe se siomauko fikirẹ oshọ. (Ni 1 Kọrẹnt 16:10, 11 kugbe 1 Timoti 4:12.) Dedena, o de nene Pọl, je riavwerhen rẹ ebruphiyọ buebun.—Iruo 16:3-5.

3. (a) Idjerhe vọ yen Pọl vwo djephia nẹ Mak vẹ Timoti pha ghanghanre vwọ kẹ ọyen? (2 Timoti 4:6, 9, 11) (Ni ihoho na.) (b) Enọ vọ yen a cha ta ota kpahen vwẹ uyono nana?

³ Mak kugbe Timoti yono erọnvwọn eghanghanre ji mu eghwa buebun vwevunrẹ ukoko na ọke ayen vwọ hẹ ighene. Pọl nẹ oborẹ ighene eshare nana ruru ghanghanre te ẹdia rọ da vuẹ ayen nẹ ayen bru ọyen rhe ọke rẹ ughwu rọyen vwo siẹkẹrẹ re. (Se 2 Timoti 4:6, 9, 11.) Iruemu vọ yen Mak kugbe Timoti vwori rọ nẹrhẹ oma rayen vwerhen Pọl? Idjerhe vọ yen iniọvo eshare sa vwọ vwẹrokere iruemu rayen? Mavọ yen ighene eshare sa vwọ mrẹ erere vwo nẹ uchebro rẹ Pọl vwọ kẹ ayen kerẹ ọsẹ?

VWẸROKERE MAK—VWO OWENVWE WỌ VWỌ GA IHWO EFA

4-5. Idjerhe vọ yen Mak vwo djephia nẹ ọyen vwo owenvwe rọ vwọ ga ihwo efa?

⁴ Kirobo rẹ ọbe ọvo ra rionbọ ra djere, a vwọ ga yẹrẹ gbodibo kẹ ihwo efa, mudiaphiyọ nẹ e che vwo “erhiorin wian gangan” vwọ vwẹ ukẹcha kẹ ayen. Mak phi omamọ udje phiyotọ vwẹ ẹdia nana. Ọke rẹ Pọl vwọ sen nẹ o nene ọyen kpo oyan rẹ imishọnare rọyen rivẹẹ, ọ họhọre nẹ ivun miovwin Mak, o ji no nẹ e ku ọyen phiyotọ. (Iruo 15:37, 38) Jẹ, ọnana nẹrhẹ Mak tanẹ ọyen rha cha vwẹ ukẹcha vwọ kẹ iniọvo rọyeen.

⁵ Mak de rhiabọreyọ owian ra vwọ kẹ ji nene Banabas rọ vẹ ọyen gba dia emọ rẹ iniọvo wian kugbe. Omarẹ ẹgbukpe 11 vwọ wan nu, Mak ọvo usun ihwo ri bicha Pọl re ke vwo muo phiyọ uwodi vwẹ Rom ẹsosuọ. (Filim. 23, 24) Vwọrẹ uyota, Pọl dje ọdavwaro phia kpahen ukẹcha rọ vwọ kẹ te ẹdia ro de djisẹ rẹ Mak nẹ ọyen “esiri rẹ uchebro rode.”—Kọl. 4:10, 11.

6. Idjerhe vọ yen Mak vwọ mrẹ erere vwo nẹ oyerinkugbe ọkpẹkpẹkpẹ rọ vẹ iniọvo ri tedje vwori? (Ni eta rehẹ obotọ.)

⁶ Mak mrẹ erere vwo nẹ oyerinkugbe ọkpẹkpẹkpẹ rọ vẹ iniọvo ri tedje vwori. Ọ vẹ Pọl vwọ dia kugbe vwẹ ọmọke vwẹ Rom nu, Mak de bru ọyinkọn Pita ra vwẹ Babilọn. Oyerinkugbe rayen na kpẹkpẹ te asan rẹ Pita de se “Mak, ọmọ mẹ.” (1 Pita 5:13) Ayen vwọ wian kuẹgbe na, ọ sa dianẹ Pita gbe ikuegbe buebun re vwerhoma ri shekpahen akpeyeren ri Jesu kugbe iruo aghwoghwo rọyen kẹ, rẹ Mak si phiyọ ọbe ra vwẹ odẹ rọyen se vwẹ Baibol na ọke vwọ yanran na.a

7. Idjerhe vọ yen oniọvo ọshare ọvo rọ dia eghene re se Seung-Woo vwọ vwẹrokere udje ri Mak? (Ni uhoho na.)

⁷ Mak muomaphiyọ iruo aghwoghwo rọyen ji sikẹrẹ iniọvo ri tedje. Mavọ wọ sa vwọ vwẹrokere Mak? Ọ da dianẹ wo ji rhi muwan vwọ kẹ uphẹn rẹ ẹga ọvoo, vwo erhiorin wọ je gbẹn idjerhe efa wọ sa vwọ ga Jihova vẹ ukoko na. Jẹ a mrẹ obo re phia kẹ Seung-Woo, rọ ga kerẹ ọkpako enẹna. Ọ vwẹ oma rọyen vwọ vwanvwẹ ighene efa rehẹ ukoko na ọke rọ vwọ hẹ eghene. Evo usun rayen kare rọ vwo uphẹn rẹ ẹga. Seung-Woo ko roro nẹ a kpairoro vrẹ ọyen, ọtiọyena ọ da vuẹ iniọvo eshare ri tedje kpahọn. Ọkpako ọvo da vuẹ nẹ o ru obo ro se ru eje vwọ vwẹ ukẹcha kẹ ihwo efa, ọ da tobọ dianẹ ihwo vwo oniso rẹ emu esiri ru wo ruẹẹ. Uchebro yena da nẹrhẹ Seung-Woo vwẹ oma ze rọ vwọ vwẹ ukẹcha kẹ ihwo re kpakore kugbe ihwo re guọnọ ukẹcha ayen se vwo kpo uyono. O vwo ni kpuko, ọ da ta: “Mi de rhi vwo ẹruọ rẹ obo ro mudiaphiyọ ra vwọ nabọ ga ihwo efa. Me rhe mrẹ aghọghọ ro no cha siẹrẹ a da vwẹ ukẹcha ro fori vwọ kẹ ihwo efa.”

VWẸROKERE TIMOTI—DJEPHIA NẸ WO VWO ỌDAVWẸ RẸ IHWO

8. Diesorọ Pọl vwọ sanẹ Timoti nẹ o nene ọyen vwẹ oyan rọyen? (Filipae 2:19-22)

⁸ Pọl guọnọ iniọvo ri fiudugberẹ ri che nene ọke ro vwo rhivwin kpo irere ra da vwọsuọ. Ọ ka sanẹ oniọvo ro tedje re se Sailas nẹ o nene ọyen. (Iruo 15:22, 40) Ọke vwọ yanran na, Pọl da je vuẹ Timoti nẹ ọ vwomaba ọyen. Die yen ọ mrẹ vwẹ oma ri Timoti? O vwo omamọ rẹ odẹ. (Iruo 16:1, 2) O ji vwo ọdavwẹ rẹ ihwo mamọ.—Se Filipae 2:19-22.

9. Idjerhe vọ Timoti vwo djephia nẹ ọyen ghini vwo ọdavwẹ rẹ iniọvo na?

⁹ Ghwe vwo nẹ ọtonphiyọ rẹ iruo aghwoghwo rọyen vẹ Pọl, yen Timoti vwo djephia nẹ ọyen vwo ọdavwẹ rẹ ihwo efa vrẹ ọ rẹ oma rọyen. Ọtiọyena, Pọl ko se fiudugberi yan jovwo vwẹ Biria rere ọ sa vwọ vwẹ ọbọngan kẹ idibo kpokpọ rehẹ etiyin. (Iruo 17:13, 14) Aphro herọọ nẹ, vwẹ ọke yena Timoti nabọ mrẹ erere vwo nẹ udje ri Sailas rọ vẹ ọyen gba hẹ Biria rhe. Ọke vwọ yanran na, Pọl de ji Timoti nẹ ọyen ọvo kpo Tẹsalonaika ra vwẹ ọbọngan kẹ Inenikristi rehẹ orere yena. (1 Tẹsa. 3:2, eta rehẹ obotọ) Omarẹ ẹgbukpe 15 re vwọ kpahọn, Timoti de rhi vwo ẹguọnọ rẹ iniọvo na mamọ te ẹdia rẹ ọ da mrẹ iniọvo re viẹ fikirẹ oja rẹ ayen ria, ko “nene ayen viẹ.” (Rom 12:15; 2 Tim. 1:4) Idjerhe vọ yen iniọvo eshare re dia ighene sa vwọ vwẹrokere Timoti?

10. Idjerhe vọ yen oniọvo ọshare re se Woo Jae vwo yono obo re vwo ọdavwẹ rẹ ihwo efa?

¹⁰ Oniọvo ọshare re se Woo Jae nabọ yono obo re vwo ọdavwẹ rẹ ihwo efa. Ọke rọ vwọ hẹ eghene, Woo Jae mrẹ bẹnbẹn ro vwo nene iniọvo eya vẹ eshare re kpakore ta ota kugbe. Ọtiọyena, o de ghwe yeren ayen vwẹ Ọguan Ruvie nu, kọ yan ọ rọyen yanran. Ọkpako ọvo de jiro kẹ Woo Jae nẹ o se nene ayen ta ota kpahen obo rọ mrẹ vwẹ oma rayen ri je re. Ọkpako na je vuẹ nẹ o roro kpahen oborẹ ohwo ro chekọ na vwo omavwerhovwẹn kpahen. Woo Jae de ru nene uchebro ra vwọ kẹ na. Enẹna rọ vwọ hẹ ọkpako na, Woo Jae da ta: “Asaọkiephana ke me mrẹ lọlọhọ mi vwo nene ihwo rehẹ edje sansan ta ota kugbe. Oma vwerhen ovwẹ nẹ me nabọ rhi vwo ẹruọ rẹ ọdavwẹ rẹ ihwo efa re. Ọnana nẹrhẹ me sa vwẹ ukẹcha vwọ kẹ iniọvo mẹ.”

11. Idjerhe vọ yen ighene eshare se vwo vwo ọdavwẹ rẹ iniọvo rehẹ evunrẹ ukoko rayen? (Ni uhoho na.)

¹¹ Ovwan ighene eshare ji se yono obo re vwo ọdavwẹ rẹ ihwo efa. Siẹrẹ wọ dahẹ uyono, rhe nene ohwo ọvuọvo ta ota kuẹgbe, o toro ikpe yẹrẹ asan rẹ ayen nurhee. Nọ mie ayen sẹ erọnvwọn shephiyọ kẹ ayen, wọ je kerhọ rẹ ayen. Ọke vwọ yanran na, ku wọ cha mrẹ oborẹ wọ sa vwọ vwẹ ukẹcha kẹ ayen. Ọkiọvo wọ sa rhe mrẹvughe nẹ oniọvo rẹ aye gbe ọshare re kpakore guọnọ ukẹcha ayen sa vwọ reyọ aplikeshọni ri JW Library^® vwo ruiruo. Yẹrẹ wo se noso nẹ ayen vwo ọrhuẹrẹphiyotọ ayen vwo nene ohwo vuọvo yan vwẹ iruo aghwoghwo naa. Kẹ, wọ sa vwẹ ukẹcha kẹ ayen vwọ riẹn obo ra vwẹ ifonu yẹrẹ itablẹti rayen vwo ruiruo yẹrẹ ru ọrhuẹrẹphiyotọ wẹ vẹ ayen vwọ wian kugbe vwẹ iruo aghwoghwo na? Siẹrẹ wọ da jowọ wọ vwọ vwẹ ukẹcha phia, jẹ wo phi omamọ rẹ udje phiyotọ kẹ ihwo efa.

ERERE RỌHẸ UCHEBRO RI PỌL

12. Mavọ yen ighene eshare sa vwọ mrẹ erere nẹ uchebro rẹ Pọl vwọ kẹ Timoti?

¹² Pọl vwẹ uchebro ro fori kẹ Timoti rọ nẹrhẹ o vwo omavwerhovwẹn vwẹ akpeyeren vẹ iruo aghwoghwo rọyen. (1 Tim. 1:18; 2 Tim. 4:5) Ighene eshare je sa mrẹ erere vwo nẹ uchebro ri Pọl. Vwẹ idjerhe vọ? Se ileta ivẹ rẹ Pọl si rhe Timoti kerẹsiẹ a da mrẹ nẹ wẹwẹ yen e si ayen rhe, ji vwo oniso rẹ uchebro wo se vwo ruiruo vwẹ akpeyeren wẹn. Jẹ a mrẹ idje evo.

13. Die yen o churobọ si a vẹ Jihova se vwo vwo uvi rẹ oyerinkugbe rọ kpẹkpẹre?

¹³ ‘Yono oma wẹn wo se vwo vwo ẹwẹn ra vwọ vwẹ oma vwo ze.’ (1 Tim. 4:7b) Die yen omaevwoze? Ọyen oyerinkugbe rẹ avwanre vẹ Jihova vwori komobọ vẹ owenvwe re vwo ru obo re vwerhọn oma. Ọ vwọ dianẹ e vwiẹ ohwo vwiẹ uruemu tiọyena naa, kẹ ofori nẹ a davwẹngba e vwo vwo. Vwe idjerhe vọ? Ọkieje yen a vwọ reyọ ota ri Grik ra fan phiyọ “yono oma wẹn” vwo djisẹ re iyono eghanghanre edjonẹ muomaphiyọ ayen se vwo muegbe vwọ kẹ onẹdjẹ. Edjonẹ nana kẹnoma kẹ erọnvwọn buebun. Ọtiọyena o ji fo nẹ avwanre kẹnoma kẹ erọnvwọn evo, rere e se vwo vwo iruemu re cha nẹrhẹ e sikẹrẹ Jihova phiyọ.

14. Die yen ofori nẹ a kọn phiyọ ẹwẹn siẹrẹ e de se Baibol na? Djudje rọyen.

¹⁴ Vwo vwẹ ẹwẹn nẹ, obo re nẹrhẹ wo se Baibol na ọyen wo vwo sikẹrẹ Jihova phiyọ. Kerẹ udje, die yen wo se yono nẹ obo re phiare vwẹ uvwre rẹ Jesu vẹ ọdafe na? (Mak 10:17-22) Eghene ọshare nana vwo imuẹro nẹ Jesu yen Mesaya na, ẹkẹvuọvo esegbuyota rọyen gan te ẹdia ro de nenee. Dedena, Jesu “vwo ẹguọnọ rọyen.” Obo ri Jesu nene ọshare na ta ota wan vwerhen owẹ oma? Vwọrẹ uyota, Jesu guọnọre nẹ o brorhiẹn aghwanre. Ọtiọyena, Jesu de dje oka rẹ ẹguọnọ rẹ Jihova vwo kpahen eghene ọshare na phia. (Jọn 14:9) Siẹrẹ wo de roro kpahen ikuegbe na kugbe ẹdia ru wọ hepha, nọ oma wẹn, ‘Die yen ofori nẹ mi ru mi se vwo sikẹrẹ Jihova phiyọ je vwẹ ukẹcha vwọ kẹ ihwo efa?’

15. Diesorọ ọ vwọ ghanre oniọvo ọshare rọ dia eghene vwọ dia omamọ rẹ udje vwọ kẹ ihwo efa? Djudje rọyen. (1 Timoti 4:12, 13)

¹⁵ “Dia udje vwọ kẹ ihwo re fuevun.” (Se 1 Timoti 4:12, 13.) Ọ dia uruemu rẹ obo re se kugbe eyono ọvo yen Pọl jiri vwọ kẹ Timotii, ọ je vuẹ nẹ o vwo iruemu—kerẹ ẹguọnọ, esegbuyota kugbe ẹfuọn. Diesorọ? Kidie omamọ rẹ uruemu ghanre vrẹ eta. Ọ sa dianẹ wo vwo ota ro shekpahen obo re se vwo ru oruru re vwo kpahen iruo aghwoghwo na ganphiyọ. Wo che fiudugberi ta ota na ọ da dianẹ wọ davwẹngba wẹn eje vwẹ iruo aghwoghwo na. Ọtiọyena, udje wẹn yen che mu ihwo vwo ruru nene obo ru wọ tare.—1 Tim. 3:13.

16. (a) Ẹdia iyorin vọ yen Inenikristi re dia ighene sa vwọ dia uvi rẹ udje? (b) Mavọ yen oniọvo ọshare rọ dia eghene sa vwọ dia uvi rẹ udje “vwọrẹ ota ẹta”?

¹⁶ Pọl djunute ẹdia iyorin rẹ oniọvo ọshare rọ dia eghene da sa dia omamọ rẹ udje vwọ kẹ ihwo efa vwẹ 1 Timoti 4:12. Diesorọ wo rhe roro kpahen ẹdia ọvuọvo wo de ru uyono romobọọ? Kerẹ udje, ọ sa dianẹ wọ guọnọ dia uvi rẹ udje “vwọrẹ ota ẹta.” Roro kpahen idjerhe sansan ru wọ sa vwọ reyọ ota wẹn wọ bọn ihwo efa gan. Ọ da dianẹ wo ji nene ọsẹ vẹ oni wẹn dia, wo se dje ọdavwaro phia ọkieje kpahen oborẹ ayen ruẹ kẹ wẹ? Siẹrẹ uyono de kuphiyọ nu, wo se bru ọvo usun rẹ ihwo ri vwo ota vwẹ uyono na ra ji jiro kpahen ẹbẹre ro ruru na? Wọ je sa davwẹngba vwọ reyọ eta romobọ wen vwọ kpahenphiyọ enọ vwẹ uyono. Ẹgbaẹdavwọn wẹn wọ vwọ dia udje vwọrẹ ota ẹta, che djephia nẹ wọ yanphiaro.—1 Tim. 4:15.

17. Die yen sa vwẹ ukẹcha kẹ oniọvo ọshare vwọ yan mu ẹkẹn ro bru kẹ oma? (2 Timoti 2:22)

¹⁷ “Djẹ vwọ kẹ urhurusivwe rẹ ọke rẹ eghene, ẹkẹvuọvo vwọtua ophiọnphiọn.” (Se 2 Timoti 2:22.) Pọl vuẹ Timoti nẹ ọ họnre vwọso urhurusivwe ri se gbowophiyọ ẹga rọyen yẹrẹ miovwo oyerinkugbe rọyen vẹ ọ ri Jihova. Wo ji se noso nẹ o vwo erọnvwọn evo re ghwa bra komobọọ re reyọ ọke wọ vwọ vwẹ ẹga kẹ Jihova. Kerẹ udje, roro kpahen ọke ru wọ ghwọrọ phiyọ ehaẹha, hiẹ intanẹti, yẹrẹ te ividio gemu. Wọ sa vwẹ ọke ru wo vwo ruẹ erọnvwọn nana vwo ru bunphiyọ vwẹ iruo rẹ uvie na? Wọ sa vwẹ ukẹcha phia vwọ vwẹrote Ọguan Ruvie yẹrẹ bicha ọrhuẹrẹphiyotọ rẹ aghwoghwo rẹ imikpekpa. Wo de vwobọ vwẹ erọnvwọn yena, ọ sa nẹrhẹ wo mu igbeyan kpokpọ re cha vwẹ ukẹcha kẹ wẹ vwo bru ẹkẹn kẹ oma je yan mu ayen.

RA VWỌ VWẸ UKẸCHA KẸ IHWO EFA GHWA EBRUPHIYỌ CHA

18. Diesorọ a sa vwọ tanẹ Mak vẹ Timoti yeren akpọ rẹ omavwerhovwẹn?

¹⁸ Mak kugbe Timoti vwẹ erọnvwọn buebun vwo ze rere ayen sa vwọ ga ihwo efa vọnvọn ji yeren akpọ rẹ omavwerhovwẹn. (Iruo 20:35) Mak kpo ẹkuotọ sansan vwẹ akpọ na, ọ sa vwọ vwẹ ukẹcha vwọ kẹ iniọvo rọyen. O ji si kpahen ikuegbe rẹ akpeyeren ri Jesu kugbe iruo aghwoghwo rọyen. Timoti vwẹ ukẹcha kẹ Pọl vwọ vwẹ ikoko mu je vwẹ ọbọngan kẹ iniọvo na. Vwọrẹ uyota, ẹwẹn rẹ omaevwoze ro rhe Mak vẹ Timoti vwerhen Jihova oma.

19. Diesorọ iniọvo eshare vwọ reyọ uchebro rẹ Pọl vwọ kẹ Timoti te ẹwẹn, kẹ die yen che nẹ obuko rọyen rhe?

¹⁹ A sa mrẹ ẹguọnọ rẹ Pọl vwo kpahen Timoti vwẹ ileta ro si rhe. Ileta nana ẹwẹn ọfuanfon muro vwo si na djerephia nẹ Jihova vwo ẹguọnọ rẹ ovwan ighene eshare mamọ. Ọ guọnọ erhuvwu rẹ ovwan. Ọtiọyena, ovwan reyọ uchebro rẹ Pọl vwọphia kerẹ uchebro ọsẹ vwọ kẹ ọmọ te ẹwẹn ji vwo owenvwe wọ vwọ ga ihwo efa kpobarophiyọ. Wo de ru ọtiọyen, wo che yeren akpọ rẹ omavwerhovwẹn enẹna ji vwo “uvi arhọ” ro cha vwẹ obaro na.—1 Tim. 6:18, 19.