Wọ Karophiyọ?

Wọ nabọ frẹkotọ se ọbe Uwevwin Orhẹrẹ na eje ra teyenphia vwẹ enukpe na? Ọ da dia ọtiọyen, gba davwẹngba sẹ wọ sa kpahenphiyọ enọ nana:

Ebruphiyọ vọ yen che te avwanre obọ siẹrẹ a da ghwọrọ ọke vwo roro kpahen Jihova, ta ota kẹ je kerhọ rọyen?

Avwanre che bru omamọ rẹ orhiẹn, dia oyono rọ tẹn ona, esegbuyota rẹ avwanre cha ganphiyọ, ẹguọnọ re vwo kpahen Jihova ko ji che kodophiyọ.​—w22.01, aruẹbe 30-31.

Ukẹcha vọ yen avwanre cha mrẹ siẹrẹ a da vwẹroso Jihova vẹ ihwo ro vwo mu?

Ofori nẹ avwanre vwẹroso oborẹ Jihova ruẹ erọnvwọn wan enẹna womarẹ e vwo jẹ ẹwẹn ivivẹ e vwo kpahen odjekẹ rẹ ekpako na vwọphia vẹ orhiẹn sansan rẹ ayen brẹ. Vwẹ ọke rẹ ukpokpogho rode na, avwanre ke cha dia ihwo ri muegbe ri vwo nene odjekẹ ọ da tobọ dianẹ e niro nẹ a cha sa vwẹ odjekẹ rẹ a vwọ kẹ avwanre vwo ruiruo-o yẹrẹ e pha gedegede.​—w22.02, aruẹbe 4-6.

Die yen Amakashe na guọnọ ta ota kpahan rọ vwọ vuẹ Zekaraya kpahen ‘ovwanvwọn rẹ okokodo vwẹ obọ rẹ [Osun] Zẹrubabẹl’? (Zẹk. 4:​8-10)

Emramrẹ na vwẹ imuẹro kẹ ihwo rẹ Ọghẹnẹ nẹ, dede nẹ uwevwin rẹ ẹga na yovwin te ọ rẹ awanre na-a, e che ruo re a me je bọn nene obo ri Jihova guọnọre nẹ ọ dia.​—w22.03, aruẹbe 16-17.

Mavọ yen a sa vwọ dia omamọ rẹ “oniru . . . vwẹ ota” ẹta? (1 Tim. 4:12)

Ta ota dẹndẹn vẹ ọghọ vwẹ iruo rẹ aghwoghwo na, vwẹ ubiudu wẹn eje so une wọ je kpahenphiyọ enọ ọkieje vwẹ uyono. Ta uyota, wọ je ta eta re cha bọn ihwo efa gan. Kẹnoma kẹ koka koka rẹ ota omiomiovwi.​—w22.04, aruẹbe 6-9.

Diesorọ a vwọ reyọ iruemu rẹ eranvwe ẹne re djoma (usuon) re djunute vwẹ Daniẹl uyovwin 7 na vwo djisẹ rẹ eranvwe ọvo rọ djoma vwẹ Ẹvwọphia 13:​1, 2?

Ọ dia usuon ri Rom ọvo yen a vwẹ eranvwe rọ djoma rọhẹ Ẹvwọphia 13 na vwo dje-e. Ukperẹ ọtiọyen, eranvwe nana mudiaphiyọ ẹgba rẹ usuon eje ri sun ihworakpọ nẹ awanre rhe rhi te ọke nana.​—w22.05, aruọbe 9.

Ọrhọ yen idjerhe ọvo kiriguo e se vwo djephia nẹ a vwẹroso orhiẹn-abavo rẹ Ọghẹnẹ?

Ọ da dianẹ ohwo gbe avwanre ku, ta ota ọbrabra yẹrẹ ru umwemwu so avwanre, e jẹ a davwẹngba vwo si ophu nẹ evun rere a yanjẹ emu eje vwo vwẹ obọ ri Jihova. O che phi oba phiyọ kemu kemu rẹ umwemwu hwarhiẹ rhe.​—w22.06, aruẹbe 10-11.

Die yen ofori nẹ oniọvo ro suẹn ihwo vwẹ ẹrhovwo vwẹ emẹvwa karophiyọ?

E jẹ a rẹyọ uphẹn rẹ ẹrhovwo ro te avwanre obọ vwo ruẹ aghwoghwo yẹrẹ vwọ ghwọkuẹ iniọvo na-a. Ofori nẹ oniọvo rọ cha nẹrhovwo na kẹnoma kẹ eta ibuebun, marọ ọ da dia ẹrhovwo rọ tonphiyọ. (Mat. 6:7)​—w22.07, aruẹbe 24-25.

Die yen o mudiaphiyọ a vwọ rhọvwọn “otu ri ru umwemwu” vwo “kpo ẹdjọeguo”? (Jọn 5:29)

A cha vwẹ oborẹ ayen ruru tavwen ayen ki ghwu vwo gun ayen ẹdjọ-ọ. E che guẹdjọ rẹ ihwo ri jẹ ọsoso ẹdia na womarẹ Jesu cha vwọ fuẹrẹn ayen je davwen ayen ni vwo nene iruemu rẹ ayen che djephia ọke ra da rhọvwọn ayen nushi nu, sẹ ayen muwan.​—w22.09, aruọbe 18.

Ota rẹ uduephiyawọ vọ yen J. F. Rutherford vwọ phia vwẹ ọghwẹkoko re ruru vwẹ September 1922?

Vwẹ ọghwẹkoko re ruru vwẹ Cedar Point, Ohio, U.S.A., ọ da ta: “Ovie na suẹn re! Ovwan ke rha hẹ iruiruo rọyen. Ọtiọyena, ghwoghwo, ghwoghwo, ghwoghwo, Ovie na kugbe Uvie rọyen!”​—w22.10, aruẹbe 3-5.

Idjerhe erha vọ yen Aizaya uyovwin 30 djunute nẹ Ọghẹnẹ wan chọn avwanre uko vwo chirakon?

Uyovwinrota nana djerephia nẹ o ruẹ ọtiọyen womarẹ (1) ọ vwọ nabọ kerhọ je kpahanphiyọ ẹrhovwo rẹ avwanre, (2) ọ vwọ kẹ avwanre odjekẹ, kugbe (3) o vwo brẹba kẹ avwanre enẹna ji te ebruphiyọ re hẹrhẹ avwanre vwẹ obaro na.​—w22.11, aruọbe 9.

Diesorọ a sa vwọ tanẹ eta rehẹ Une Rẹ Ejiro 37:​10, 11, 29 rugba ọke awanre nẹ i ji che rugba vwẹ obaro na?

Eta rẹ Devid vwo djisẹ rẹ ufuoma vẹ oyovwen rẹ ihwo rẹ Izrẹl riavwerhen rọyen vwẹ otọ rẹ usuon ri Solomọn nabọ shephiyọ dẹn. Jesu je rionbọ kpo owọ 11 rọ vwọ ta ota kpahen Iparadaisi rọ cha vwẹ obaro. (Mat. 5:5; Luk 23:43)​—w22.12, aruẹbe 8-10, 14.