Enọ Rẹ Ihwo Ri Se Ẹbe Avwanre Nọre

Eta rẹ Devid tare nẹ ọyen che jiri odẹ rẹ Ọghẹnẹ ‘bẹdẹ’ ro si phiyọ Une Rẹ Ejiro 61:​8, mudiaphiyọ nẹ o rhe che ghwu-u?

Ẹjo. Oborẹ Devid siri na muẹro, ọ je gba.

Roro kpahen obo ro siri vwẹ owọrota yena vẹ efa re họherọ: “Me da so ine rẹ ejiro kẹ odẹ wẹn [bẹdẹ], kirobo re me hwa osa rẹ ive mẹ kẹdẹ kẹdẹ na.” “Me vwẹ ẹkpẹvwẹ kẹ wẹ, E Ọrovwohwo Ọghẹnẹ mẹ, vẹ udu mẹ ejobi, ki mi se jiri odẹ wẹn bẹdẹ.” “Mi jiri odẹ wẹn bẹdẹ bẹdẹ.”​—Une 61:8; 86:12; 145:​1, 2.

Ọke rẹ Devid vwo si eta nana, ọ dia o vwiro mudiaphiyọ nẹ ọyen che ghwu-u. Ọ riẹnre nẹ Jihova tare nẹ umwemwu rẹ ihworakpọ cha so ughwu kẹ ayen, Devid je rhọnvwe nẹ ọyen orumwemwu. (Jẹn. 3:​3, 17-19; Une 51:​4, 5) Ọ riẹnre nẹ eshare rẹ Ọghẹnẹ rhiabọreyọ kerẹ Ebraham, Aizik kugbe Jekọp ghwuru. Devid je riẹn nẹ ẹdẹ ọvo, ọyen che ghwu. (Une 37:25; 39:4) Ẹkẹvuọvo, eta rọyen rehẹ Une Rẹ Ejiro 61:8 dje owenvwe vẹ ọdavwẹ ro vwori ro vwo jiri Ọghẹnẹ bẹdẹ, kọyen uchọke rọ dia akpọ na kri te.​—2 Sam. 7:12.

Ọkiọvo, Devid si kpahen obo ro rhiẹromrẹ vwẹ akpeyeren, kirobo ra mrẹ vwẹ eta re si phiyọ obenu rẹ ọtonphiyọ rẹ Une Rẹ Ejiro 18, 51, kugbe 52. Vwẹ Une Rẹ Ejiro 23, Devid djisẹ rẹ Jihova kerẹ osuigodẹ rọ vwẹ odjekẹ, urovwonma vẹ ochọnvwe vwọ kẹ igodẹ rọyen. Devid ọyen oka rẹ osuigodẹ tiọyena. Ọ je guọnọ ga Ọghẹnẹ ‘vwẹ ẹdẹ rẹ akpọ rọyen ejobi.’​—Une 23:6.

Karophiyọ nẹ Jihova yen reyọ ẹwẹn ọfuanfon rọyen vwo mu Devid vwo si obo ro siri na. Eta ro siri na ji churobọ si aroẹmrẹ ri shekpahen obo re cha phia vwẹ obaro na. Kerẹ udje, vwẹ Une Rẹ Ejiro 110, Devid djunute ọke rẹ Ọrovworo na che vwo “tidia vwẹ obọrhe” rẹ Ọghẹnẹ vwẹ odjuvwu, Ọ me je vwẹ ogangan rode vwọ kẹ. Die yen ọ cha vwẹ ọgangan na vwo ru? O che vwo phi ivwighrẹn rẹ Ọghẹnẹ kparobọ ji “brorhiẹ vwẹ ohri rẹ ẹgborho” rehẹ otọrakpọ na. Devid, ọyen ọsẹ ri Mesaya na rode, ro che sun nẹ odjuvwu rhe je dia “orherẹn rhiri bẹdẹ.” (Une 110:​1-6) Jesu tare nẹ aroẹmrẹ rọhẹ Une Rẹ Ejiro 110 na shekpahen ọyen, nẹ o ji che rugba vwẹ obaro na.​—Mat. 22:​41-45.

E, ẹwẹn ọfuanfon na mu Devid vwo si kpahen ọke rọyen vẹ ọke ra cha vwọ kparọ nushi vwẹ obaro na, ro de che jiri Jihova bẹdẹ bẹdẹ. Ọtiọyena, obo ro si phiyọ Une Rẹ Ejiro 37:​10, 11, 29 se shekpahen ọke re vwo sio kugbe ọke rọ cha vwẹ obaro na. Awọreta yena rugba vwẹ ọke Izrẹl awanre, o ji che rugba vwẹ obaro na ọke rẹ Ọghẹnẹ de che ru ive rọyen gba.​—Ni ẹkorota 8 rẹ uyovwinrota na “Me vẹ Owẹ Dia Vwẹ Iparadaisi” rọhẹ Uwevwin Orhẹrẹ nana.

Une Rẹ Ejiro 61:8 kugbe awọreta efa re họherọ djerephia nẹ Devid guọnọ jiri Jihova vwẹ Izrẹl awanre rhi duvwu ẹdẹ ughwu rọyen. Ẹkpo ri Baibol yena ji dje oborẹ Devid che ru ugege rẹ Jihova da kparọ nushi rhe vwẹ obaro na.