Wo se Vwo Uvi rẹ Omavwerhovwẹn

1. Die yen “ọdavwẹ rẹ Ọta rẹ Ọghẹnẹ” mudiaphiyọ, idjerhe vọ yen o vwo churobọ si omavwerhovwẹn?

UVI rẹ omavwerhovwẹn ghwa dia ẹwẹn ri dọe ro rhe ohwo nonẹna ọ me rha va ohwo abọ oḍe rọ cha na-a. Ohwo se vwo uvi rẹ omavwerhovwẹn vwẹ ẹdẹ rẹ akpọ rọyen ejobi. Vwẹ idjerhe vọ? Jesu djisẹ rẹ obo re se vwo vwo uvi rẹ omavwerhovwẹn vwẹ ota rọ tare vwẹ enu rẹ ugbenu na: “Omavwerhovwẹn dia kẹ ihwo ri vwo ọdavwẹ rẹ Ota rẹ Ọghẹnẹ.” (Mat. 5:​3, NW.) Jesu riẹnre nẹ a ma ihworakpọ vẹ owenvwe ọgangan rẹ ayen vwọ riẹn je vwẹ ẹga kẹ ọmemama rayen Jihova Ọghẹnẹ. Ọ vwọ dianẹ Jihova ọyen “Ọghẹnẹ rẹ oma vwerhan na,” ihwo re vwẹ ẹga kẹ ji se vwo omavwerhovwẹn.​—1 Tim. 1:​11, NW.

2-3. Vwo nene obo rẹ Jesu tare, amono yen ji se vwo uvi rẹ omavwerhovwẹn? (b) Die yen a cha fuẹrẹn vwẹ uyono nana, kẹ diesorọ a vwọ guọnọ ayen?

² Erọnvwọn eje che shephiyọ tavwen e ki se vwo uvi rẹ omavwerhovwẹn ra ta ota kpahan na? Ẹjo. Jesu ta ota ọvo ro gbunu vwẹ ota rọ tare vwẹ enu rẹ ugbenu na. “Ihwo ri muomahọ” fikirẹ ẹwẹn rẹ abe ro rhe ayen kpahen umwemwu rẹ ayen ruru yẹrẹ ebẹnbẹn rẹ ayen hirharokuẹ ji se vwo omavwerhovwẹn. Jesu je tanẹ oma cha vwerhen “ihwo re muru ekueku fiki rẹ ọvwata” yẹrẹ ihwo ra “ghwọ ku” kidie nẹ ayen Inenikristi. (Mat. 5:​4, 10, 11) Ẹkẹvuọvo, kẹ mavọ ohwo rọhẹ ẹdia ọtiọyena se vwo vwo uvi rẹ omavwerhovwẹn?

³ Ọ dia Jesu yono avwanre nẹ erọnvwọn ejobi che shephiyọ tavwen e ki se vwo omavwerhovwẹ-ẹn, ẹkẹvuọvo e se vwo omavwerhovwẹn siẹrẹ e de se Baibol na ji siẹkẹrẹ Ọghẹnẹ phiyọ. (Jems 4:8) Kẹ mavọ yen e se vwo ru ọtiọyen? Vwẹ uyono nana, a cha fuẹrẹn erọnvwọn erha re che ru e se vwo vwo uvi rẹ omavwerhovwẹn.

MUOMAPHIYỌ ISESE VẸ EYONO RI BAIBOL NA

4. Ọrhọ yen owọẹjẹ rẹsosuọ ra cha jẹ tavwen e ki se vwo uvi rẹ omavwerhovwẹn? (Une Rẹ Ejiro 1:​1-3)

⁴ OWỌẸJẸ 1: E se vwo vwo uvi rẹ omavwerhovwẹn, kẹ ofori nẹ e se Ota rẹ Ọghẹnẹ ji yono ọkieje. Te ihworakpọ te eranvwe yen guọnọ emuọre rere ayen sa vwọ dia. Ẹkẹvuọvo ihworakpọ ọvo yen se se Baibol na ji yono. Ọnana yen obo ro fori nẹ avwanre ru. Ọyensorọ rẹ Jesu vwọ tanẹ, “ohwo sa vwẹ emu ọvo rhọ-ọ, jokpa rẹ ota ro nẹ unu rẹ Ọghẹnẹ rhe.” (Mat. 4:4) Ọtiọyena, e jẹ ẹdẹ vuọvo gbọ avwanre e vwo jẹ Ọta rẹ Ọghẹnẹ rọ dia Baibol na e se-e. Ọbuine na mrẹ ọnana vughe ọ da so: ‘Ebruphihọ kẹ ohwo na ro vwo aghọghọ vwẹ evun rẹ urhi rẹ Ọrovwohwo kọyen o roro te ason te uvo.’​—Se Une Rẹ Ejiro 1:​1-3.

5-6. (a) Die yen Baibol na se yono avwanre? (b) Idjerhe vọ yen isese ri Baibol sa vwọ chọn avwanre uko?

⁵ Vwẹ Baibol na, Jihova vwẹ ovuẹ ọghanghanre vwọphia kpahen obo re se vwo yeren akpọ rẹ omavwerhovwẹn. Baibol na vuẹ avwanre oboresorọ Jihova vwọ ma avwanre. O yono avwanre obo re se vwo sikẹrẹ Jihova vẹ obo re ru a sa vwọ mrẹ evwoghvwo rọyen. O ji yono avwanre kpahen iphiẹrophiyọ ro ve kẹ avwanre vwẹ obaro na. (Jer. 29:11) Uyota nana rẹ avwanre yono vwẹ Baibol na nẹrhẹ ubiudu rẹ avwanre vọn vẹ aghọghọ.

⁶ Kirobo rẹ avwanre riẹnre, Baibol na je vọn vẹ uchebro re se vwo ruiruo vwẹ akpeyeren ri kẹdẹ kẹdẹ. A da reyọ uchebro nana vwo ruiruo, ke se vwo uvi rẹ omavwerhovwẹn. Ofu de dje we fikirẹ ebẹnbẹn rẹ akpeyeren, gba ghwọrọ ọke vwo se Ota rẹ Ọghẹnẹ ji roro kpahọn. Jesu da ta: “Ebruba kẹ ihwo ri nyo eta rẹ Ọghẹnẹ re da yọnrọn.”​—Luk 11:28.

7. Die yen sa chọn wẹ uko vwọ mrẹ erere vwo nẹ ọke wọ ghwọrọ phiyọ isese rẹ Ota rẹ Ọghẹnẹ?

⁷ Wo de se Ota rẹ Ọghẹnẹ, wọ me nabọ ghwọrọ ọke vwọ riavwerhen rẹ obo wo se. Kerẹ udje, ọnana phia kẹ wẹ jovwore? Ohwo ọvo chere emu rọ vwerhen owẹ mamọ vwọ kẹ wẹ. Ẹkẹvuọvo, kidie nẹ wo brokpakpa yẹrẹ o vwo erọnvwọn buebun rẹ wo roro kpahan, wọ da riọ vẹ okpakpa wọ rha sa riavwerhen rẹ emu na-a. Jẹ, wọ vwọ ria emu na eje nu, wọ da rhe mrẹvughe nẹ wo brokpakpa re emu na ganọ, mane kẹ wọ jomaotọ riọ je riavwerhen emu na vwenẹ. Ọyena je sa phia kẹ avwanre ọke re de se Baibol na. Jẹ, wo ji se Baibol na vẹ okpakpa tẹdia wo rhe vwo ẹruọ rẹ ovuẹ rọhẹ evun rọye-en? Ghwọrọ ọke vwọ riavwerhen oborẹ wo se vwẹ Ota rẹ Ọghẹnẹ; mrẹ obo re phia na, nyo edo na, wo mi ji roro kpahen oborẹ wo seri na. Oma cha vwerhen owẹ mamọ wo de se ru ọnana.

8. Idjerhe vọ yen “odibo esiri na” vwọ vwẹrote iruo ra vwọ kẹ? (Ni eta rehẹ obotọ na.)

⁸ Jesu vwẹ “odibo esiri na” vwo mu rere ọ vwẹ Ota rẹ Ọghẹnẹ vwọ ghẹrẹ avwanre vwẹ ọke ro fori, avwanre ghene ria evun vọn womarẹ Ọta rẹ Ọghẹnẹ rọ vwọ ghẹrẹ avwanre na.b (Mat. 24:45) Baibol na yen odibo esiri na mu uyono rọ vwọphia eje na kpahan. (1 Tẹsa. 2:13) Emu yena ro chere kẹ avwanre na chọn avwanre uko vwọ riẹn iroro rẹ Jihova kirobo re djere vwẹ Baibol na. Ọnana yensorọ avwanre vwo se Uwevwin Orhẹrẹ vẹ Awake! kugbe iyovwinreta ra vwọphia vwẹ jw.org. Avwanre muegbe vwọ kẹ uyono rẹ uvwre rẹ udughwrẹn na vẹ ọ rẹ oba rẹ udughwrẹn na. Avwanre ji ni JW Broadcasting^® ra vwọphia kemeranvwe kemeranvwe na. A da davwẹngba vwo se ji yono Baibol na ọkieje, kọ sa chọn avwanre uko vwọ jẹ owọẹjẹ rivẹ rọ cha nẹrhẹ e vwo uvi rẹ omavwerhovwẹn.

YEREN AKPỌ NENE IWAN RI JIHOVA

9. Ọrhọ yen owọẹjẹ rivẹ rọ cha nẹrhẹ e vwo uvi rẹ omavwerhovwẹn?

⁹ OWỌẸJẸ 2: E se vwo vwo uvi rẹ omavwerhovwẹn, kẹ ofori nẹ e eyeren akpọ nene iwan ri Jihova. Ọbuine na de si: “Ebruphihọ kẹ ohwo kohwo rọ djẹ oshọ rẹ Ọrovwohwo na, rọ yan phihọ idjerhe rọye!” (Une 128:1) A vwọ djoshọ rẹ Jihova mudiaphiyọ nẹ e che muọghọ okokodo kẹ je kẹnoma kẹ korọnvwọn korọnvwọn ro vwo utuoma kpahen. (Isẹ 16:6) Ọtiọyena, kẹ avwanre davwẹngba avwanre ọkieje vwo yerẹn nene iwan ri Jihova ri shekpahen obo ri yovwinrin vẹ obo ri miovwinrin rehẹ Baibol. (2 Kọr. 7:1) Oma cha vwerhen avwanre mamọ siẹrẹ e de ru oborẹ Jihova vwo ẹguọnọ kpahen je kẹnoma kẹ erọnvwọn ro vwo utuoma kpahen.​—Une 37:27; 97:10; Rom 12:9.

10. Vwo nene obo rehẹ Rom 12:​2, ọrhọ yen oghwa ro te avwanre?

¹⁰ Se Rom 12:2. Ohwo sa riẹn nẹ Jihova vwo uturhi ro vwo brorhiẹn obo re gbare vẹ obo re chọre, ẹkẹvuọvo, o ji fo nẹ o rhiabọreyọ iwan rẹ Ọghẹnẹ komobọ. Kerẹ udje, ohwo sa riẹn nẹ igọmẹti jurhi kpahen uche imaili rẹ imoto yẹrẹ imashini cha djẹ vwẹ idjerhe vwẹ unọke 1. Jẹ ọkiọvo, ọ cha rhọnvwe yọnrọn urhi na-a. Ukuotọ rọyen, ọ me rhe djẹ vrẹn obo ra guọnọre. Avwanre reyọ uruemu vwo djephia nẹ o mu avwanre ẹro nẹ e de yeren akpọ nene iwan ri Jihova, ọyen akpeyeren ro me yovwin. (Isẹ 12:28) Ọna yensorọ rẹ Devid vwọ ta kpahen Jihova: “Wẹ ri se dje idjerhe rẹ arhọ kẹ vwẹ; vwẹ obaro wẹn yẹ aghọghọ ọvọnvọn epha, vwẹ obọrhe wẹn yẹ omavwerhe ri bẹdẹ epha.”​—Une 16:11.

11-12. (a) Die yen ofori nẹ e niso ọke re de hirharokuẹ ebẹnbẹn yẹrẹ ofu de dje avwanre? (b) Mavọ yen eta rehẹ Filipae 4:8 sa vwọ chọn avwanre uko ọke ra da sane erọnvwọn ra vwọ diotọ?

¹¹ Ọkiọvo e de hirharoku ebẹnbẹn yẹrẹ ofu de dje avwanre, ka guọnọ idjerhe ra vwọ vrabọ rẹ ebẹnbẹn na. Ọyena ghini uyota, ẹkẹvuọvo ofori nẹ a jomaotọ rere e vwo jẹ obo ri tuẹn Jihova oma eruo.​—Ẹfe. 5:​10-12, 15-17.

¹² Vwẹ ileta rẹ ọyinkọn Pọl si rhe iniọvo rehẹ Filipae, o de jiro kẹ ayen nẹ, ayen vwẹ ọkieje vwo roro kpahen erọnvwọn re “dia ọsoso, emu ro yovwiri, emu ejobi ro vwo ẹguọnọ” kugbe “uyoyovwi.” (Se Filipae 4:8.) Dede nẹ ọ ghwa dia erọnvwọn ra vwọ diotọ yen Pọl ta ota kpaha-an, jẹ obo ro siri na sa chọn avwanre uko vwọ sane erọnvwọn ra vwọ diotọ. Davwen ona nana: Kasan kasan ota na “emu ejobi” da vwomaphia reyọ eta nana “ine,” “ifimu,” “ẹbe rẹ ikuegbe,” yẹrẹ “ividio gemu” vwo wene. Ọnana sa chọn wẹ uko vwọ riẹn i ri shephiyọ vwẹ obaro rẹ Ọghẹnẹ vẹ i ri shephiyọ-ọ. Avwanre guọnọ yeren akpọ nene iwan ri Jihova ri me kpenu na. (Une 119:​1-3) Ọtiọyena, e di rhi vwo ẹwẹn rọ fonro re, ka sa jowọ rọ vwọ kpahọn rọ cha nẹrhẹ e vwo uvi rẹ omavwerhovwẹn.​—Iruo 23:1.

PHI ẸGA RI JIHOVA PHIYỌ ẸDIA RẸSOSUỌ

13. Ọrhọ yen owọẹjẹ rerha rọ cha nẹrhẹ e vwo uvi rẹ omavwerhovwẹn? (Jọn 4:​23, 24)

¹³ OWỌẸJẸ 3: Jẹ o muwẹro nẹ ẹga ri Jihova yen emu rẹsosuọ vwẹ akpeyeren wẹn. Kerẹ Ọmemama rẹ avwanre, Jihova yen fo ohwo rẹ avwanre ga. (Ẹvwọ. 4:11; 14:​6, 7) E jẹn obo re ma ghanre vwẹ akpeyeren avwanre dia ọ ra vwọ ga Jihova vwo nene obo rọ guọnọre ‘vwẹ ẹwẹn vẹ uyota.’ (Se Jọn 4:​23, 24.) Avwanre guọnọre nẹ ẹwẹn ọfuanfon Ọghẹnẹ sun ẹga avwanre rere ọ vẹ uyota rehẹ Baibol na vwọ dia ọvuọvo. O fori nẹ ẹga avwanre dia orọnvwọn rẹsosuọ vwẹ akpeyeren rẹ avwanre ọ da tobọ dianẹ ẹkuotọ re de si oborẹ iruo rẹ avwanre kpotọ yẹrẹ dobọ rọyen ji yen avwanre dia. Asaọkiephana, iniọvo avwanre re vrẹn 156 yen mu phiyọ uwodi kidie nẹ ayen Iseri ri Jihova.c Dedena, oma je vwerhen ayen rẹ ayen vwọ davwan asan rẹ ẹgba rayen teri eje vwọ nẹrhovwo, yono je vuẹ ihwo efa kpahen Ọghẹnẹ avwanre kugbe Uvie rọyen! Ọke ra da reyọ avwanre vwọ jehwẹ yẹrẹ muẹkpahan avwanre, oma sa vwerhen avwanre ra vwọ riẹn nẹ Jihova vẹ avwanre herọ, nẹ ọ je cha hwosa kẹ avwanre.​—Jems 1:12; 1 Pita 4:14.

UDJE RẸ OBO RE GHENE PHIA

14. Die yen phia kẹ eghene oniọvo ọshare ọvo vwẹ Tajikistan, kẹ diesorọ?

¹⁴ Idje rẹ obo re rhiẹromrẹ djerephia nẹ owọẹjẹ erha ra ghwa ta ota kpahen na, nẹrhẹ e se vwo uvi rẹ omavwerhovwẹn o toro ẹdia rẹ avwanre hepha-a. Roro kpahen obo re phia kẹ Jovidon Bobojonov rọhẹ ẹgbukpe 19 ro nẹ Tajikistan rhe rọ rhọnvwe vwomaba iruo rẹ isodje-e. Vwẹ October 4, 2019, e de muo jẹ orua rọyen vwo re mu phiyọ uwodi vwẹ emeranvwe evo ji gboja kẹ re kerẹ oji. A niyẹnrẹn rẹ uruemu rẹ oshenyẹ nana vwẹ TV vwo nene ẹkuotọ buebun. A niyẹnrẹn rọyen nẹ e hwere kidie ọ rhọnvwe yeren aphiala-a, ọ je sen nẹ ọyen che ku ewun rẹ isodje phiyọ-ọ. Ọyena vwọ wan nu, e de bru orhiẹn hwe ji muophiyọ uwodi rhi te ọke rẹ iprẹnsidẹnti na vwọ reyọ vwo ghovwo je tanẹ e siobọno. Vwẹ uvwre ọke rẹ ebẹnbẹn na, Jovidon sẹro rẹ ọyọnregan kugbe omavwerhovwẹn rọyen. Vwẹ idjerhe vọ? Womarẹ o vwo vwo ọdavwẹ rẹ Ota rẹ Ọghẹnẹ ọkieje.

15. Idjerhe vọ yen Jovidon vwọ mrẹ Ota rẹ Ọghẹnẹ vẹ ẹbe rẹ ukoko na se ọke rọ vwọ hẹ uwodi?

¹⁵ Jovidon vwọ hẹ uwodi, ọ vwọ ọkieje vwo se ji yono kpahen Jihova dede nẹ o vwo Baibol yẹrẹ ẹbe rẹ ukoko na efa-a. Kẹ mavọ o se vwo ru ọtiọyen? Ọke rẹ iniọvo eya vẹ eshare rehẹ ekogho na de muẹ emuọre bro ra, kẹ ayen siẹ ẹkpo rẹ isese ri kẹdẹ kẹdẹ tanmuẹ ekpu rẹ emuọre na. Ọtiọyena, ko se se Baibol na ji roro kpahọn kẹdẹ kẹdẹ. E vwo siobọno nu, ọ da vwẹ uchebro nana kẹ ihwo ri ji rhiẹromrẹ ọdavwini ọgangan ọtiọyena dẹvo-o. Ọ da ta: “Ọyen obo re ghanre mamọ ra vwọ reyọ ugbomọphẹ re vwori vwo ruiruo vọnvọn, rere erianriẹn re vwo kpahen Jihova se vwo kodophiyọ womarẹ e vwo se Baibol na vẹ ẹbe rẹ ukoko na.”

16. Die yen Jovidon tẹnrovi?

¹⁶ Oniọvo avwanre na yeren akpọ nene iwan ri Jihova. Ukperẹ o vwo roro kpahen obo re chọre ji vwobọ vwẹ iruemu ebrabra, ọ da tẹnrovi Jihova kugbe obo re ma ghanre kẹ. Erhuvwu rẹ erọnvwọn sansan rẹ Ọghẹnẹ mare gbe Jovidon unu mamọ. Kurhiọke kurhiọke yen o vwo vrẹn rere ọ sa kerhọ kẹ emephran na re suine. Ọke de rhe kpore, ughe rẹ emeranvwe vẹ isio na kọyen o nẹ. Ọ da ta: “Okẹ sansan nana ri nẹ obọ ri Jihova rhe na nẹrhẹ oma vwerhen ovwẹ ji phiuduphiyọ ovwẹ awọ.” Avwanre de vwo ọdavwaro kpahen Ota rẹ Ọghẹnẹ vẹ emuọre rọ vwọ kẹ avwanre, kọ nẹrhẹ udu rẹ avwanre ghọghọ, aghọghọ ọtiọyena chọn avwanre uko vwo chirakon.

17. Mavọ yen a sa reyọ eta rehẹ 1 Pita 1:​6, 7 vwo ruiruo siẹrẹ ohwo da mrẹ oma rọyen vwẹ ẹdia rọ họhọ ọ rẹ oniọvo Jovidon na?

¹⁷ Jovidon ji phi ẹga ri Jihova phiyọ ẹdia rẹsosuọ. Ọ riẹn obo rọ ghanre te rọ vwọ sẹro rẹ ọyọnregan ro vwo kpahen Ọghẹnẹ rẹ uyota na. Jesu da ta: “Ọrovwohwo Ọghẹnẹ wẹn ọvo ọye wọ ga, ọye ọvo wo shiguẹ kẹ.” (Luk 4:8) Ilori isodje na vẹ isodje efa guọnọre nẹ Jovidon brorhiẹn nẹ ọyen rha cha dia Oseri ri Jihova-a. Ọtiọyena, ọ da nẹrhovwo te ason te uvo, rọ vwọ rẹ Jihova rere o vwo jẹ esegbuyota rọyen ẹsiọn. Jovidon fuevun ghene dede nẹ e gboja kẹ re gangan. Ukuotọ rọyen, ko se rhi vwo aghọghọ kidie o rhi vwo obo re kanre rọ jovwo tavwen re ki muo jẹ orua rọyen vwo, hwe ehwe rẹ oja ji muo phiyo uwodi rọ dia esegbuyota rọyen ra davwen ni.​—Se 1 Pita 1:​6, 7.

18. Mavọ yen a sa vwọ sẹro rẹ aghọghọ rẹ avwanre?

¹⁸ Jihova riẹn oborẹ avwanre guọnọre e se vwo vwo uvi rẹ omavwerhovwẹn. Wo de nene owọẹjẹ erha re sa nẹrhẹ e vwo uvi rẹ omavwerhovwẹn na, kẹ wọ sa sẹro rẹ aghọghọ wẹn vwẹ ọke rẹ ebẹnbẹn re pha gangan. Ọtiọyena, kẹ wọ je sa tanẹ: “Aghọghọ kẹ ihwo rẹ Ọghẹnẹ dia Ọrovwohwo kẹ!”​—Une 144:15.