Omavwerhovwẹn kẹ Ihwo re Sẹro rẹ Ọyọnregan Rayen Vwọ kẹ Jihova

1-2. (a) Idjerhe vọ yen ihwo evo rehẹ ẹdia rẹ usuon vwọ reyọ vwọsua ihwo ri Jihova, kẹ die yen ihwo ri Jihova ruẹ vwẹ ẹdia nana? (b) Die yen nẹrhẹ oma vwerhen avwanre ọke re de mukpahen avwanre? (Je ta ota kpahen uhoho rọhẹ opharo ọbe na.)

ASAỌKIEPHANA, e siobọ rẹ owian avwanre kpotọ yẹrẹ dobọ rọyen ji vwẹ ẹkuotọ re vrẹ 30 vwẹ akpọ na. E mu iniọvo avwanre eya vẹ eshare phiyọ uwodi vwẹ evo usun rẹ ẹkuotọ yena re. Die yen ayen ru chọ? Ayen ru emuọvo rọ chọre vwẹ obaro ri Jihova-a. Oborẹ ayen ruru rha vrẹ e se vẹ eyono ri Baibol na, je vuẹ ihwo efa kpahen oborẹ ayen se gbuyota, ji te uyono rẹ ayen vẹ iniọvo rayen ra-a. Ayen je sen nẹ ayen cha ka ẹbẹre vuọvo vwẹ oseghe rẹ usuon rẹ akpọ na-a. Dede nẹ ayen hirharokuẹ ẹvwọsuọ ọgangan, jẹ idibo rẹ Ọghẹnẹ nana re fuevun na sẹro rẹ ọyọnregan rayenb rẹ ayen vwo djephia nẹ Jihova ọvo yen ayen cha vwẹ ẹga kẹ. Ọnana rẹ ayen ruẹ na nẹrhẹ oma vwerhen ayen!

² Ọkiọvo wọ mrẹ ihoho rẹ iniọvo nana ri fiudugberi ji noso nẹ ayen hwẹ. Ayen ghọghọ kidie ayen riẹnre nẹ oma rayen vwerhen Jihova ayen vwọ sẹro rẹ ọyọnregan rayen na. (1 Ikun 29:17a) Jesu da ta: “Ebruba kẹ ihwo re muru ekueku fiki rẹ ọvwata . . . Ghọghọ re oma vwerhe ovwan, kidie osa rẹ ovwan vwa rhuarho.”​—Mat. 5:​10-12.

UDJE RẸ AVWANRE SA VWẸROKERE

3. Kirobo ra niyẹnrẹn rọyen phiyọ Iruo Rẹ Iyinkọn Na 4:​19, 20, die yen iyinkọn na ruru ọke re vwo mukpahen ayen vwẹ ẹgbukpe ujorin rẹsosuọ, kẹ diesorọ?

³ Iniọvo rẹ avwanre ji hirharokuẹ oborẹ iyinkọn na chirakon rọyen vwẹ ẹgbukpe ujorin rẹsosuọ ọke re vwo mukpahen ayen kidie nẹ ayen ghwoghwo kpahen Jesu. Abọ buebun yen iguẹdjọ rẹ aguare rode rẹ ihwo ri Ju vwo “ji urhi kẹ ayen nẹ ayen gbi se odẹ ri Jesu-u.” (Iruo 4:18; 5:​27, 28, 40) Die yen iyinkọn na ru kpahen ẹdia nana? (Se Iruo Rẹ Iyinkọn Na 4:​19, 20.) Ayen riẹnre nẹ ohwo ro me kpenu vrẹn iguẹdjọ rẹ ihwo ri Ju yen vuẹ ayen ‘nẹ ayen ghwoghwo kẹ ihwo, ayen ji se oseri’ ro fiotọ kpahen Kristi. (Iruo 10:42) Ọtiọyena, Pita vẹ Jọn re dia etota rayen de fiudugberi tanẹ ayen che nyupho rẹ Ọghẹnẹ nọ iguẹdjọ yena nẹ ayen cha dobọ ji rẹ ayen vwo ghwoghwo kpahen Jesu-u. Kọ ghwa họhọ nẹ ayen nọ iguẹdjọ na nẹ, ‘Kẹ ovwan gbaudu tanẹ irhi rẹ ovwan yen me kpenu nọ ọ rẹ Ọghẹnẹ?’

4. Kirobo ra niyẹnrẹn rọyen phiyọ Iruo Rẹ Iyinkọn Na 5:​27-29, udje vọ yen iyinkọn na phiyotọ kẹ Inenikristi rẹ uyota, kẹ mavọ yen a sa vwọ vwẹrokere ayen?

⁴ Iyinkọn na phi omamọ rẹ udje phiyotọ kẹ Inenikristi rẹ uyota eje rẹ ayen vwẹrokere rhi duvwu nonẹna rọ dia ọ rẹ ayen vwo “mu ọghọ kẹ Ọghẹnẹ nọ ihwo rẹ akpọ.” (Se Iruo Rẹ Iyinkọn Na 5:​27-29.) E vwo hwe ayen fikirẹ ọyọnregan rayen nu, iyinkọn na de vrẹn nẹ aguare rode rẹ ihwo ri Ju na, jẹ ayen “ghọghọ fiki robo re vwo kere ayen phihọ ihwo re reoja rẹ ophọphọvwe fiki rẹ Odẹ [ri Jesu],” ayen de ji rhe ghwoghwo kirobo rẹ ayen ruẹ jovwo!​—Iruo 5:​40-42.

5. Enọ vọ yen ofori nẹ avwanre kpahenphiyọ?

⁵ Udje rẹ iyinkọn na nẹrhẹ enọ evo vwomaphia. Kerẹ udje, idjerhe vọ yen orhiẹn rẹ ayen bruru rẹ ayen vwo muọghọ kẹ Ọghẹnẹ nọ ihworakpọ vwọ rhọnvwephiyọ iji ra vwọ “vwẹ oma kpotọ kẹ otu ra vwẹ ogangan rẹ isuesun kẹ?” (Rom 13:1) Mavọ yen avwanre sa vwọ “vwẹ oma kpotọ kẹ ayen otu ri suẹn ihwo” kirobo rẹ ọyinkọn Pọl tare je sẹro rẹ ọyọnregan rẹ avwanre vwọ kẹ Ọghẹnẹ rọ dia Osun rẹ avwanre rọ ma rho kparobọ na?​—Taitọs 3:1.

“OTU RA VWẸ OGANGAN RẸ ISUESUN KẸ”

6. (a) Amono yen “otu ra vwẹ ogangan rẹ isuesun kẹ” re djunute vwẹ Rom 13:​1, kẹ die yen ofori nẹ e ru kẹ ayen? (b) Imuẹro vọ yen e vwo kpahen ẹgba rẹ ihwo ri suẹn vwori?

⁶ Se Rom 13:1. Vwẹ owọrota nana, ota na “otu ra vwẹ ogangan rẹ isuesun kẹ” mudiaphiyọ ihworakpọ ri suẹn ri vwo ẹgba rẹ ayen vwo sun ihwo efa. Inenikristi vwomakpotọ kẹ ihwo nana ri suẹn na. Isun nana davwan rere e vwo nene ọrhuẹrẹphiyotọ re vwo mu, ayen je vwẹ irhi muẹ, ọkiọvo dede ayen je chochọn rẹ ihwo ri Jihova. (Ẹvwọ. 12:16) Ọtiọyena, e je iji kẹ avwanre nẹ a hwosa rẹ uyovwin, jẹ arhọghọ, djoshọ ji muọghọ ro fori kẹ ayen. (Rom 13:7) Ẹkẹvuọvo, a vwẹ ogangan kẹ ihwo ri suẹn, kidie Jihova yen vwẹ uphẹn kẹ ayen nẹ ayen sun. Jesu ru ẹkpo yena phẹn ọke rẹ Osun rẹ Rom re se Pọntiọs Pailet vwọ nọ enọ rọ vwọ kpare ẹrẹnvwe rọyen. Ọke rẹ Pailet vwọ tanẹ ọyen vwo ogangan ro vwo brorhiẹn rẹ ughwu hwe Jesu yẹrẹ sivwon, Jesu da kpahen kẹ, “wo vwo ogangan vwẹ enu mẹ-ẹ jokpa nẹ a vwe rọ kẹ wẹ nẹ obenu rhe.” (Jọn 19:11) Kirobo rẹ ẹgba ri Pailet vwo asan rọ bare ye, ọtiọyen ẹgba rẹ ihwo ri suẹn vẹ ihwo ri sivwin oseghe rẹ usuon nonẹna ji vwo asan rọ bare.

7. Erhọ yen ẹdia evo ro de fo nẹ e nyupho rẹ ihwo ri suẹ-ẹn, kẹ, die yen ofori nẹ ayen riẹn?

⁷ Inenikristi nene irhi rẹ ihwo ri suẹn vwo mu, jokpanẹ kẹ e vwọso irhi rẹ Ọghẹnẹ. Avwanre che se muọghọ kẹ ihwo ri suẹ-ẹn siẹrẹ ayen da vuẹ avwanre nẹ e ru orọnvwọn rẹ Ọghẹnẹ gha yẹrẹ ayen da tanẹ a kẹnoma kẹ oborẹ Ọghẹnẹ tare nẹ e ru. Kerẹ udje, ayen se jurhi nẹ ighene eshare vwomaba isodje rere ayen họnre kẹ ẹkuotọ na.c Yẹrẹ ayen sa dobọ rẹ Baibol ẹgharọ vẹ ẹbe rẹ ukoko na ji, ji jurhi nẹ e rhe ghwoghwo yẹrẹ kuomakuẹgbe ga ẹga-a. Ọghẹnẹ cha nọ ihwo ri suẹn orhiẹn siẹrẹ ayen da reyọ ẹgba rayen vwo ruiruo vwẹ idjerhe rọ chọre womarẹ ayen vwo muẹkpahen idibo ri Kristi na, kidie Jihova mrẹ oborẹ ayen ruẹ na!​—Aghwo. 5:8.

8. Die yen ofẹnẹ rẹ “ọ ro me kpenu” vẹ “ọ ro me kpenu kparobọ,” kẹ diesorọ ọ vwọ ghanre a vwọ riẹn ofẹnẹ na?

⁸ A da reyọ ota na “ọ ro me kpenu” vwo ruiruo, o mudiaphiyọ “ọ ro me yovwin, ọ rọ ma rho yẹrẹ ọ rọ me kpenu vwẹ ẹdia.” Ẹkẹvuọvo, ọ dia ọyen o vwo mudiaphiyọ “ọ ro me yovwin kparobọ-ọ, ọ rọ ma rho kparobọ-ọ yẹrẹ ọ ro me kpenu kparobọ-ọ.” Jẹ enana eje na mudiaphiyọ ota ọfa “ọ ro me kpenu kparobọ.” Dede nẹ e se ihwo ri suẹn kerẹ “otu ra vwẹ ogangan rẹ isuesun kẹ,” jẹ ohwo ọvo herọ rẹ ogangan rọyen kpenu nọ ọ rayen. A vwẹ odova na “Ọ ro Me Kpenu ejobi” vwo se Jihova abọ ẹne soso vwẹ Baibol na, ọyehẹ ohwo ro me vwo ogangan ro me kpenu kparobọ.​—Dan. 7:​18, 22, 25, 27.

“Ọ RO ME KPENU EJOBI”

9. Die yen ọmraro Daniẹl mrẹre vwẹ emramrẹ?

⁹ Ọmraro Daniẹl mrẹ emramrẹ ri djerephia phenphẹn nẹ Jihova yen me vwo ẹgba kparobọ vwọ vrẹn isun efa. Ẹsosuọ, Daniẹl mrẹ eranvwe ride ẹne ri mudiaphiyọ egba rẹ uson re wanre vẹ i ri suẹn asaọkiephana, eyehẹ Babylon, Medo-Persia, Greece, Rome vẹ Anglo-America ri suẹn asaọkiephana. (Dan. 7:​1-3, 17) Ọyena vwọ wan nu, Daniẹl da mrẹ Jihova ro chidia ekete vwẹ aguare rọhẹ odjuvwu. (Dan. 7:​9, 10) Ofori nẹ oborẹ ọmraro na rhoma mrẹ dia orhọn-esio vwọ kẹ ihwo ri suẹn nonẹna.

10. Kirobo rehẹ Daniẹl 7:​13, 14, 27, amono yen Jihova vwẹ isuesun rẹ akpọ na kẹ, kẹ die yen ọnana djephia kpahen ẹgba ro rhe Jihova?

¹⁰ Se Daniẹl 7:​13, 14, 27. Ọghẹnẹ mie isun rẹ ihworakpọ eje ogangan rẹ isuesun, ọ da vwọ kẹ ihwo efa ri muwan ri ji me vwo ẹgba. Amono yen ọ vwerọ kẹ? Ọ vwerọ kẹ “ọmọ rẹ ohwo” ọyehẹ Jesu Kristi kugbe “ihwo efuanfon rẹ Ọ ro Me kpenu ejobi” na re dia 144,000 ri che sun “rhiri bẹdẹ.” (Dan. 7:18) O phẹnre nẹ Jihova yen “Ọ ro Me Kpenu ejobi” na, ọyen ọvo yen vwo uturhi ro se vwo mie ihworakpọ isuesun.

11. Die ọfa yen Daniẹl siri ro dje ẹdia rẹ Jihova hepha kerẹ ọ ro me kpenu ejobi?

¹¹ Obo re phiare rẹ Daniẹl mrẹre vwẹ emramrẹ na ghwe shephiyọ vẹ obo rọ tare vwẹ obuko jovwo re. Daniẹl da ta nẹ “Ọghẹnẹ rẹ odjuvwu . . . . ọye ri siẹ ivie nẹ ọ me rha vwẹ ivie ma.” O de ji si nẹ: “Ọ ro Me Kpenu ejobi ri suẹn uvie rẹ ihwo, ohwo ro jere ọye ọ vwọ kẹ.” (Dan. 2:​19-21; 4:17) O vwo ọkievo rẹ Jihova vwo si ivie nẹ ẹdia je reyọ efa vwo mu jovwo re? E!

12. Djudje rẹ oborẹ Jihova si ivie nẹ ekete rayen vwẹ ọke re wanre. (Ni uhoho.)

¹² Jihova djerephia phenphẹn nẹ ọyen me vwo ẹgba ro kpenu kparobọ vwẹ enu rẹ “otu ra vwẹ ogangan rẹ isuesun kẹ.” Roro kpahen idje erha nana. Fero rẹ ovie ri Ijipt reyọ ihwo ri Jihova vwo ru eviẹn, ọ je sen abọ buebun nẹ ọyen che siobọ nẹ ayen kpo-o. Ẹkẹvuọvo, Ọghẹnẹ de ruo rere ihwo rọyen se vwo kpo je nẹrhẹ Fero ghwu phiyọ Abadi Ọvwavware na. (Eyan. 14:​26-28; Une 136:15) Bẹlshaza rẹ Ovie ri Babilọn da re orẹ, o “de mu oma kpenu Ọrovwohwo ro vwo odjuvwu” o “de ji jiri eghẹnẹ rẹ idọnọ efuanfon vẹ oro” ukperẹ Jihova. (Dan. 5:​22, 23) Ẹkẹvuọvo, Ọghẹnẹ da vwẹ ọshare yena rọ kparoma kpenu na vwo kpotọ. Vwẹ “ason yena ọvuọvo na,” a da teyen Bẹlshaza hwe je reyọ uvie rọyen vwọ kẹ ihwo ri Mid vi Pẹsha. (Dan. 5:​28, 30, 31) Ovie Herọd Agripa I ri Palestine de hwe ọyinkọn Jems ji mu ọyinkọn Pita phiyọ uwodi vẹ ẹwẹn rọ je vwọ teyọn hwe. Ẹkẹvuọvo, Jihova da dobọ ri Hẹrọd ji rere iroro royen na vwo shefia. “Amakashe rẹ Ọrovwohwo da ghwiẹ,” o de ghwu.​—Iruo 12:​1-5, 21-23.

13. Djudje rẹ oborẹ Jihova vwo phi ivie ri kuomakugbe vwọ họnre ihwo rẹ Izrẹl kparobọ?

¹³ Jihova ji dje oborẹ ẹgba rọyen rho te vwẹ enu rẹ ivie buebun ri kuomakugbe. Ọ họnre kẹ ihwo rẹ Izrẹl, je chọn ayen uko vwọ ghwọrọ ivie 31 rẹ ihwo ri Kenan ri kuomakugbe, ọ je vwẹ ukẹcha kẹ ayen vwọ reyọ ẹbẹre rọ ma rho kparobọ vwẹ Otọ rẹ Uve na. (Josh. 11:​4-6, 20; 12:​1, 7, 24) Jihova je vwẹ ukẹcha kẹ ihwo rẹ Izrẹl vwo phi Ovie Bẹnhedad kugbe ivie 32 vẹ ihwo rẹ Siria efa kparobọ.​—1 Ivie 20:​1, 26-29.

14-15. (a) Die yen Ovie Nẹbukadreza vẹ Dariọs ta kpahen ẹgba rẹ usuon ri Jihova? (b) Die yen ọbuine na ta kpahen Jihova vẹ ihwo Rọyen?

¹⁴ Ọke buebun yen Jihova vwo djephia nẹ ọyehẹ Ọ ro Me Kpenu ejobi na! Ọke Ovie Nẹbukadreza ri Babilọn vwọ yeyan kpahen ‘ẹgba vẹ ogangan, urinrin vẹ ọrho rọyen’ ukperẹ o vwo jiri Jihova rọ dia ohwo rẹ ujiri na fori, Ọghẹnẹ da vwẹ orhuẹ fro. Ọke rẹ ọhọ rọyen vwo bro rhe, Nẹbukadreza “de jiri ọ ro Me Kpenu ejobi” na je mrẹvughe nẹ isuesun rẹ Jihova “isuesun ri bẹdẹ.” Ọ da je ta: “O vwo ohwo ọvuọvo rọ sa da obọ rọye jẹ-ẹ.” (Dan. 4:​30, 33-35) Ọke ra vwọ davwen ọyọnregan ri Daniẹl ni rẹ Jihova vwo sivwon nẹ unu rẹ ikpohrokpo nu, Ovie Dariọs de jurhi: “E jẹn ihwo phariẹ re ayen rha djẹ oshọ vwẹ obaro rẹ Ọghẹnẹ ri Daniẹl, kidie ọye Ọghẹnẹ ro jeghwo, Ọ rọ herọ bẹdẹ; uvie rọye a sa guọghọ-ọ, isuesun rọye dia re te oba.”​—Dan. 6:​7-10, 19-22, 26, 27.

¹⁵ Ọbuine na da so: “Ọrovwohwo hirhe umẹ rẹ ẹgborho na phihọ emu diodi; ọ hra iroro rẹ ihwo na kufia.” Ọ da je so: “Ebruba kẹ orere rẹ Ọghẹnẹ rọye dia Ọrovwohwo, ihwo rọ jẹreyọ nẹ a dia ireuku rọye!” (Une 33:​10, 12) Ọnana omamọ orọnvwọn rọ nẹrhẹ avwanre sẹro rẹ ọyọnregan avwanre kẹ Jihova!

OFOVWIN RỌ KOBA

16. Imuẹro vọ yen avwanre se vwo kpahen ‘ukpokpogho rode’ na, kẹ diesorọ? (Ni uhoho.)

¹⁶ Avwanre se kpahen oborẹ Jihova ruru vwẹ ọke rọ wanre. Kẹ, die yen avwanre sa rhẹro rọyen nẹ ọ cha phia vwẹ obaro na? Avwanre se vwo imuẹro nana nẹ Jihova che sivwin ihwo rọyen re fuevun kẹ ọke rẹ ‘ukpokpogho rode’ na. (Mat. 24:21; Dan. 12:1) O che ru ọnana ọke rẹ okugbe rẹ ẹgborho na ra rien phiyọ Gọg ri Magọg cha vwọ reyọ vwọso idibo ri Jihova re fuevun kẹ vwẹ akpọneje. Ọ da tobọ dianẹ ẹkuotọ ri te 193 rehẹ ukoko rẹ United Nations na eje yen kuomakugbe, ayen cha sa họnre vwọso Ọ ro Me Kpenu ejobi vẹ ituofovwin rẹ odjuvwu rọyen na-a. Jihova veri: “Ọtiọye ke me cha vwẹ ọrho mẹ vẹ ẹfuọn mẹ phia ra da riẹn vwẹ irharo rẹ ẹgborho buebu na. Etiyin ayen ke cha riẹn nẹ mẹvwẹ Ọrovwohwo na.”​—Izi. 38:​14-16, 23; Une 46:10.

17. Die yen Baibol na mraro rọyen kpahen ivie rẹ akpọ na kugbe ihwo re sẹro rẹ ọyọnregan rayen vwọ kẹ Jihova?

¹⁷ Ẹvwọsua rẹ Gọg cha ghwa ofovwin rẹ Amagidọn rhe rọ dia ọke rẹ Jihova cha vwọ ghwọrọ “ivie rẹ akpọ na ejobi.” (Ẹvwọ. 16:​14, 16; 19:​19-21) Vwọ fẹnẹ ọyena, “ihwo rẹ udu rayen dia ọsoso cha dia evun rẹ otọ na, ihwo ri vwo evun ọfuanfon [ihwo re sẹro rẹ ọyọnregan rayen, NW ] re cha dia otọ na bẹdẹ.”​—Isẹ 2:​21, eta rehẹ obotọ.

OFORI NẸ A SẸRO RẸ ỌYỌNREGAN RẸ AVWANRE

18. Orhiẹn vọ yen Ineniskristi rẹ uyota buebun bruru, kẹ diesorọ? (Daniẹl 3:28)

¹⁸ Vwẹ ikpe buebun rhire na yen Ineniskristi rẹ uyota buebun vwo phiẹ ugbomọphẹ vẹ arhọ rayen phiyọ ẹdia rẹ imuoshọ fikirẹ ẹguọnọ rẹ ayen vwo kpahen Jihova rọ dia Osun rayen. Ihwo nana sẹro rẹ ọyọnregan rayen ji bru ọkpọ rẹ orhiẹn rẹ ighene ri Hibru erha re sivwin vrabọ rẹ ogidi erhanre na kidie ayen fuevun kẹ Ọ ro Me Kpenu ejobi na.​—Se Daniẹl 3:28.

19. Die yen Jihova che ni vwo guẹdjọ rẹ ihwo rọyen, kẹ die yen ofori nẹ avwanre ru asaọkiephana?

¹⁹ Ọbuine Devid si kpahen obo rọ ghanre te ra vwọ sẹro rẹ ọyọnregan vwọ kẹ Ọghẹnẹ: “Ọrovwohwo guẹdjo rẹ ihwo na; brorhiẹ mẹ, E Ọrovwohwo, kirobo rẹ evun ọfuanfon mẹ epha kirobo rẹ ọsoso rọ hẹ evun mẹ epha.” (Une 7:8) Devid da rhoma si: “Jẹn evun ọfuanfon vẹ ọsoso sẹro mẹ, kidie me herhẹ owẹ.” (Une 25:21) Akpeyeren ro me yovwin ọyen ra vwọ fuevun kẹ Jihova a me je sẹro rẹ ọyọnregan re vwo kpahọn ọkieje otoro obo re phiare-e. Kẹ avwanre sa dia kerẹ ọbuine na ro siri nẹ, “Ebruphihọ kẹ ayen otu rẹ idjerhe rọye vwo abe-e [ihwo re sẹro rẹ ọyọnregan rayen, NW ], re yan phihọ evun rẹ urhi rẹ Ọrovwohwo na!”​—Une 119:​1, eta rehẹ obotọ.