1922 Ẹgbukpe Ujorin Re Wan re

“IROROẸJẸ RỌ VWERHEN OMA”

Iniọvo ri vwobọ vwẹ iruo rẹ aghwoghwo na vwo buẹnphiyọ na, ayen da rhe mrẹvughe nẹ a guọnọ ẹbe buebun re vwo ruiruo na. Iniọvo rehẹ Bẹtẹl ri Brooklyn teyen imagazini sansan, ẹkẹvuọvo, ikọmpini efa keyen chọn ayen uko vwọ teyọn e rẹ obuko rayen ganre. Vwẹ emeranvwe buebun, ikọmpini na rha sa teyen ẹbe ro te vwo ruiruo rẹ aghwoghwo na-a, ọtiọyena Oniọvo Rutherford da nọ Robert Martin, rọ dia ohwo rọ vwẹrote ifatri na sẹ ayen sa teyen ẹbe rayen komobọ.

Oniọvo Martin karophiyọ ọke ọyen vwọ tanẹ, “ọyen omamọ rẹ iroroẹjẹ kidie o mudiaphiyọ nẹ ayen che rhie ifatri romobọ rayen ra da sa teyen ẹbe.” Iniọvo na da yare asan ọvo vwẹ ukeri 18 vwẹ Urhuvwu ri Concord vwẹ Brooklyn je dẹ ekuakua ra guọnọre re se vwo ruiruo na.

Ọ dia ihwo eje yen oma vwerhenre nẹ iniọvo na cha teyen ẹbe rayen komobọ-ọ. Iprẹsidẹnti rẹ ikọmpini rọ teyen ẹbe kẹ avwanre jovwo, da rhe mrẹ asan kpokpọ ra da teyen ẹbe na. Ọ da ta: “Ovwan nabọ vwo ekuakua ra vwọ teyen ẹbe, jẹ, ohwo vuọvo vwẹ usun rẹ ovwan na riẹn obo ra reyọ ayen vwo ruiruo-o. Vwẹ emeranvwe esan, ovwan che miovwin ekuakua na eje kufia.”

Oniọvo Martin da kpahen nẹ, “Ota na sa dia uyota, ẹkẹvuọvo ọ karophiyọ nẹ Ọrovwori na vẹ avwanre yen gba herọ-ọ, jẹ ọkieje yen ọ vẹ avwanre vwọ herọ.” Oborẹ oniọvo Martin tare na gbare dẹn. Okriri-i, imashini na kọ sa gba ẹbe ri te 2,000 koko vwẹ ẹdọke.

E VWO GHWOGHWO OTA KẸ IHWO RI TE URIORIN BUEBUN WOMARẸ IRADIO

Vwọba ẹteyọn re ẹbe rayen rẹ ayen ọvo teyan, ihwo ri Jihova da je tuẹn ona kpokpọ re vwo ruiruo rẹ aghwoghwo na phiyọ, ọyen aghwoghwo re ruẹ womarẹ iradio. Vwẹ oghẹruvo ri Sunday, February 26, 1922, Oniọvo Rutherford da ta ota vwẹ iradio vwẹ obọrẹsosuọ. Ọ da ta ota rotu ro vwo uyovwinrota na “Iduduru rẹ Ihwo ri Yẹnrẹn Asaọkiephana Che Ghwu-u” vwẹ iradio station ọvo rọhẹ KOG vwẹ Los Angeles, California, U.S.A.

Omarẹ ihwo ri te 25,000 yen kerhọ rẹ ota na. Evo usun rayen de si ileta vwo dje ọdavwaro phia fikirẹ ota na. Ọvo usun rẹ ihwo ri si ileta yen Willard Ashford rọ dia Santa Ana, California. Ọ kpẹvwẹ Oniọvo Rutherford vwọ kẹ ota “rọ vwerhen oma” rọ vwọphia na. Ọ da je tanẹ, “vwẹ orua mẹ, ihwo erha yen muọga vwọ. Ọtiọyena, ọ rha bẹn avwanre vwọ rhe kerhọ rẹ ota na ọ da tobọ dianẹ uwevwin rọ kẹrẹ avwanre yen wọ da ta.”

A je vwẹ eta rotu efa phia vwẹ idughwrẹn re vwọ kpahọn ọnana. Vwẹ oba rẹ ukpe ri 1922, Uwevwin Orhẹrẹ Na de djephia nẹ ihwo ri te omarẹ 300,000 yen rhiabọreyọ ovuẹ na womarẹ iradio.

Eta rẹ ihwo tare kugbe ileta rẹ ayen siri kpahen aghwoghwo re ruẹ womarẹ iradio na bọn Emọ-uyono ri Baibol na gan, ayen de brorhiẹn ayen vwọ bọn uwevwin rẹ iradio phiyọ otọ rẹ ayen dẹre vwẹ Staten Island, rọ kẹrẹ Bẹtẹl rọhẹ Brooklyn. Vwẹ ikpe re cha na, Emọ-uyono ri Baibol na cha reyọ uwevwin rẹ iradio nana WBBR, vwo ghwoghwo ovuẹ rẹ Uvie na kẹ ihwo buebun vwẹ asan sansan.

“ADV”

Uwevwin Orhẹrẹ ri June 15, 1922 de ghwoghwo nẹ, e che ru ọghwẹkoko vwẹ Cedar Point, Ohio vwo nẹ September 5 re te 13, 1922. Oma nabọ vwerhen Emọ-uyono ri Baibol na rẹ ayen vwo rhurie kpo Cedar Point.

Vwẹ ota rẹsosuọ rẹ Oniọvo Rutherford vwọphia, ọ da vuẹ otu na nẹ, “O mu vwe ẹro dẹn nẹ Orovwori na che . . . bruphiyọ ọghwẹkoko nana, nẹ e ji che soseri ra je rhe mrẹ oghẹre rọyen vwẹ akpọ na dẹvo-o.” Etota na nabọ kanrunumu ọghanrovwẹ rẹ iruo rẹ aghwoghwo na vwẹ eta rẹ ayen vwọphia.

Vwẹ Friday, September 8, omarẹ ihwo 8,000 yehẹ ọguan na ri nẹ kiọkiọkiọ rẹ ayen vwọ kerhọ rẹ ota Oniọvo Rutherford cha vwọphia. Kẹ ayen rhẹro rọyen nẹ ọ cha fan otọ rẹ oborẹ “ADV” re si phiyọ ọbe re vwo durhie ayen na mudiaphiyọ. Ayen vwo chidia, buebun rayen da jokaphiyọ ọbe ọhẹhẹre re kpirhirin ra gba si enu rẹ umukpe na. Arthur Claus ro nẹ Tulsa, Oklahoma U.S.A. rhe ro kpo ọghwẹkoko na, da guọnọ asan ro che chidia rọ da sa nabọ nyo ota na fiotọ. Ọnana guọnọ ẹgbaẹdavwọn kidie imaikrofonu vẹ erọnvwọn efa re nẹrhẹ eta sa mran herọ vwẹ ọke yena-a.

E vwo jẹ ọrhuẹrẹphiyotọ na egbowọphiyọ, ochi diagbara na de ghwoghwo nẹ, a rha cha vwẹ uphẹn kẹ ihwo re fobọ rhe-e nẹ ayen ro ọguan na ọke Oniọvo Rutherford da tuẹn ota ẹta phiyọ nu-u. Vwẹ 9:30 urhiọke, Oniọvo Rutherford da tonphiyọ rọ vwọ ta eta ri Jesu rehẹ Matiu 4:17: “Uvie rẹ odjuvwu si kẹre re.” Ọ vwọ ta ota kpahen oborẹ ihworakpọ se vwo nyo kpahen Uvie nana, ọ da ta: “Jesu komobọ ghwoghwori nẹ vwẹ uvwre rẹ ọke rẹ ọyen cha vwọ rhe na, ọyen che vun orhọ rẹ ihwo rọyen rọ dia ro che vwo koko ihwo rẹ uyota re je fuevun kẹ oma rọyen.”

Oniọvo Claus ro chidia uherevie rẹ ọguan na da ta: “Avwanre nabọ nene vwẹ eta na eje.” Siẹvuọvo na, oma rọyen de ghwe wene, o de vrẹn nẹ ọguan na dede nẹ ọ guọnọ yanra-an, ọ riẹnre nẹ a rha cha rhọnvwe nẹ ọyen ruọ o de rhivwin rhe-e kidie Oniọvo Rutherford tuẹn ota phiyọ re.

Imibrẹro evo vwọ wan nu, oma na da rhe kẹ uphẹn. Ọ tare nẹ, ọyen vwo rhivwẹn cha ọguan na, ọyen de nyo edo rẹ abọ ẹteyọn ọgangan. Ọnana vwerhenrọ oma gangan! O de brorhiẹn nẹ, ọ da tobọ dianẹ enu rẹ uwevwin na yen ọyen che yerin rere ọyen sa vwọ kerhọ eta na re, o che ru ọtiọyen. Oniọvo Claus rọ dia eghene ọshare rọhẹ ẹgbukpe 23 ọke yena, da kantiẹ kpo obenu uwevwin na. E rhie uherevie rẹ ikpamaku na phiyọ, jẹ o vwo siẹkẹrẹ asan ro rhiephiyọ na, ọ da tanẹ ọyen “nyo eta na phenphẹn.”

Ẹkẹvuọvo, ọ dia Arthur ọvo yen etiyi-in. Igbeyan rọyen evo je hẹ etiyin. Ọvo usun rẹ ayen yen Frank Johnson, rọ djẹ bro ra, ọ da nọ, “Wo vwo amaphia otete vwẹ ekpu wẹn?”

Arthur da ta kẹ, “e, mi vwori.”

Frank da ta, owẹ yen Jihova ghwa vwọ kpahenphiyọ ẹrhovwo rẹ avwanre na. “Wọ mrẹ ọbe ọhẹhẹre nana? Ọyen ibana ra gba mu ipẹnrẹn nana. Nabọ kerhọ rẹ Oguẹdjọ na.a Ọke rọ da tanẹ, ‘we mi ghwoghwo, ghwoghwo,’ we mi bru irihrẹ ẹne na.”

Arthur da yọnrọn aphia na vwẹ obọ rọ vẹ igbeyan rọyen vwọ hẹrhẹ ọke rẹ ayen che vwo nyo eta re cha dia oka vwọ kẹ ayen rẹ ayen che vwo bru irihrẹ na. Okriri-i, Oniọvo Rutherford da ta eta rọyen na te ẹbẹre okuphiyọ rọ dia ẹbẹre re ma ghanre vwẹ eta rọyen na eje. O muẹro nẹ oruru mu Oniọvo Rutherford vwọ ta eta na gangan rọ vwọ tanẹ, “Fuevun, ovwan me je dia iseri rẹ uyota vwọ kẹ Ọrovwori na. Ovwan họnre ọkieje bẹsiẹ a vwọ ghwọrọ ẹga rẹ efian nẹ otọ na riẹriẹriẹ. Ghwoghwo ovuẹ na nene akpọneje. Jẹ ihwo na riẹn nẹ Jihova yen Ọghẹnẹ, Jesu Kristi ke rha hẹ Ovie rẹ ivie kugbe Ọrovwori rẹ irivwori. Ọnana ẹdẹ rode vwẹ ikuegbe rẹ ihworakpọ. Nighere, Ovie na suẹn re! Ovwan ke rha hẹ iruiruo rọyen. Ọtiọyena, ghwoghwo, ghwoghwo, ghwoghwo, Ovie na kugbe Uvie rọyen!”

Arthur da tanẹ ọyen vẹ iniọvo ri chekọ de bru irihrẹ rẹ ibana na. O de rhiephiyọ ememerha. Ọna yen oborẹ ibieta na “ADV” mudiaphiyọ, “ghwoghwo Ovie na vẹ Uvie rọyen.”

OWIAN ỌGHANGHANRE

Ọghwẹkoko re ruru vwẹ Cedar Point na chọn iniọvo na uko vwọ tẹnroviẹ ọghanrovwẹ rẹ iruo aghwoghwo rẹ Uvie na. Ọnana da nẹrhẹ iniọvo ri vwo owenvwe vwobọ vwẹ iruo aghwoghwo na vẹ oruru. Ọkobaro ọvo ro nẹ Oklahoma, U.S.A rhe de si: “Avwanre ghwoghwori vwẹ asan rẹ ihwo buebun da wiowian ra vwọ tọn ikota nẹ otọ cha, ihwo rehẹ ekogho yena igbere.” Ọ tare nẹ kọke kọke rẹ ihwo de nyo ovuẹ rọhẹ imagazini rẹ Golden Age na, “kẹ ayen savwẹn ugoroviẹ.” Ọ da vwẹ eta nana vwo kuophiyọ, “Oma nabọ vwerhen avwanre kidie avwanre sa bọn ayen gan.”

Emọ-uyono ri Baibol na riẹn ọghanrovwẹ rẹ eta ri Jesu rehẹ Luk 10:2 rọ tare nẹ, “orhọ na pha buebu, ẹkẹvuọvo otu rẹ iruo na gbi bu-u.” Vwẹ oba rẹ ukpe ri 1922, oruru rẹ ayen vwo ghwoghwo ovuẹ rẹ Uvie na vwo nene akpọeje da rhe ganphiyọ vrẹn obo ri jovwo.