OBO RE SE VWO PHI UTUOMA KPAROBỌ

1 | Wọ Ghwẹ Oma Phiyọ Ẹbẹre Ọvo-o

Baibol na da ta:

“Ọghẹnẹ ghwẹ oma hẹ abọvo jẹ ọvo vwo-o; ẹkẹvuọvo vwẹ ẹgborho kẹgborho ohwo rọ djẹ oshọ rọye ro de ru obo ri shehọ ọye ọ reyọ.”—IRUO RẸ IYINKỌN NA 10:34, 35.

Obo ro Mudiaphiyọ:

Ọ dia ẹkuotọ, asan re nurhe, ohọroma yẹrẹ ẹkuruemu rẹ avwanre yen Jihovaa Ọghẹnẹ vwo guẹ avwanre ẹdjọ-ọ. Ukperẹ ọtiọyen, obo re ma ghanre yen Ọghẹnẹ tẹnroviẹ, kọyen iroro vẹ ojevwe rẹ avwanre. Vwọrẹ uyota, “ohwo rẹ akpọ nẹ ekroma, ẹkẹvuọvo Ọrovwohwo nẹ evun rẹ udu.”—1 Samuẹl 16:7.

Obo Wo Se Ru:

Dede nẹ avwanre cha sa riẹn obo rehẹ udu rẹ ihwo-o, jẹ a sa vwẹrokere Ọghẹnẹ je vwẹ ẹro abavo vwo ni ihwo. Davwẹngba vwọ riẹn ohwo ọvuọvo ukperẹ ẹko. Wo de noso nẹ wo vwo orharhe rẹ iroro kpahen ihwo, ọkiọvo ihwo rẹ ẹkuotọ yẹrẹ asan ọfa, nẹrhovwo rhe Ọghẹnẹ wọ vuẹ nẹ ọ chọn wẹ uko vwo si orharhe rẹ iroro tiọyen nẹ ẹwẹn. (Une Rẹ Ejiro 139:23, 24) Wọ da vuẹ Jihova nẹ ọ kẹ wẹ ẹgba wọ vwọ dia ohwo rọ ghwẹ oma phiyọ ẹbẹre ọvo-o, vwo imuẹro nẹ o che nyo ẹrhovwo wẹn je chọn wẹ uko.—1 Pita 3:12.

a Jihova yen oderhi rẹ Ọghẹnẹ.—Une Rẹ Ejiro 83:18.

“Me vẹ oyibo ji chidia vwọrẹ ufuoma dẹvo-o . . . Asaọkiephana me rhe dia ẹbẹre ọvo rẹ iniọvo akpọeje ra mrẹ vwo dje-e.”—TITUS

Oborerhiẹromrẹ Vwẹ Akpeyeren—TITUS

Phi Utuoma Kparobọ

Ivun rẹ irhi ri shephiyọ-ọ miovwo ọshare ọvo re se Titus, ọtiọyena ọ da vwomaba ẹko rẹ inogbozighi evo ri ji vwo oka rẹ iroro rọyen na. Ọ da ta: “Avwanre kpo asan evo re de vwo utuoma kpahen ihwo ibiebi, kerẹ ihotẹl vẹ asan ra da da udi, rere avwanre vwọ so ohọre.” Titus tare nẹ utuoma yen nẹrhẹ ivun miovwẹ ọyen, ọ da je ta: “Me vẹ ohwo de vwo ota, te ọ dia ọshare yẹrẹ aye, mẹvwẹ yen ka ghwiẹ ohwo na.”

Titus da ton ewene phiyọ ọke rọ vẹ Iseri ri Jihova vwọ ton uyono ri Baibol phiyọ. Ọke ro vwo se Baibol na, ọ da rhe nẹrhẹ iroro rọyen wene. Ive ro shekpahen obaro na rọ tare nẹ, “ughwu gbe cha dia ọfa-a, eyẹ omaemuohọ eyẹ oviẹ eyẹ odjadja ọfa-a,” yen me te ẹwẹn.—Ẹvwọphia 21:3, 4.

Ẹsosuọ, ọ bẹn vwọ kẹ Titus ro vwo siobọnu uruemu rẹ utuoma ro vwori na. Ọ da ta: “Ọ ghene bẹn vwọ kẹ vwẹ mi vwo wene iroro vẹ obo ri mi ruẹ wan.” Ẹkẹvuọvo, obo ro yonori vwẹ Iruo Rẹ Iyinkọn Na 10:34, 35 rọ tare nẹ Ọghẹnẹ ghwẹ oma phiyọ ẹbẹre ọvo-o na, vwẹ ukẹcha vwọ kẹ.

Die yen nẹ obuko rọyen rhe? Titus tare nẹ, “O muvwẹro nẹ Iseri ri Jihova yen ga ẹga rẹ uyota ọke me vwọ mrẹ oborẹ ayen dje ẹguọnọ kẹ ohwohwo wan, o toro oka asan rẹ ayen nurhe yẹrẹ ohọroma rẹ ayen vwori-i. Tavwen mi ki bromaphiyame kerẹ Oseri, oyibo ọvo rọhẹ ukoko re me hepha de durhie uvwe kpo uwevwin rọyen kẹ emuọre. Kọ ghwa họhọ nẹ evwerhẹn yen me hepha. Me vẹ oyibo ji chidia vwọrẹ ufuoma dẹvo-o, yẹrẹ ke gba riemu kugbe vwẹ uwevwin rọye-en. Asaọkiephana me rhe dia ẹbẹre ọvo rẹ iniọvo akpọeje ra mrẹ vwo dje-e.”