Ru Ona Rẹ Aghwoghwo Wẹn Yovwin Phiyọ—Aghwoghwo re Ruẹ Womarẹ Ifonu

OBORESORỌ Ọ VWỌ GHANRE: Aghwoghwo re ruẹ womarẹ ifonu ọyen idjerhe ọghanghanre re se vwo “se oseri kẹ iyẹnrẹ esiri” na. (Iruo 20:24)a Ọ nẹrhẹ avwanre se ghwoghwo ota kẹ ohwo siẹrẹ e rhe se brora fikirẹ ẹdia evo-o.

OBO RE CHE RUO WAN:

• 

  Muegbe. Sanẹ uyovwinrota ro shephiyọ. Gbe si obo wọ cha ta phiyotọ. Wo ji se muegbe rẹ ota ro che dje oboresorọ wo vwo se, ọ da dianẹ wọ guọnọ phi ovuẹ phiyotọ womarẹ ifonu na. Ofori nẹ wo chidia agbara wọ me vwẹ ọbe wo siri na vẹ erọnvwọn efa wo che vwo ruiruo kẹrẹ oma, kere udje wọ sa vwẹ ifonu wẹn vwo rhie JW Library^® yẹrẹ jw.org^® phiyotọ

• 

  Hwomamu. Ta ota kirobo wọ ta ota jovwo. Hwẹ wo ji ru kere asan a da mrẹ nẹ ohwo na mrẹ wẹn. Kẹnoma kẹ re vwo muẹ dunujẹ. O che yovwin wẹ vẹ ihwo efa da wian kugbe. Ọrovwuwevwin na da nọ wẹ onọ, wọ me rhoma ta phia rere ọrivẹ wẹn sa vwọ chọn wẹ uko vwọ guonọ ẹkpahenphiyọ na

• 

  Gbẹn idjerhe phiyotọ vwọ kẹ orhivwinbrura. Ohwo na de dje omavwerhovwẹn phia, wọ sa yanjẹ onọ vwo wọ cha kpahenphiyọ ọke ọfa wo de se. Wọ sa vuẹ nẹ wọ cha vwẹ ọbe ọvo rhe komobọ yẹrẹ womarẹ e-mail. Wọ je sa vuẹ nẹ wo che si ovuẹ vwo rhe kpahen asan rọ da sa mrẹ ividio yẹrẹ uyovwinrota ọvo. O de shephiyo, vuẹ ohwo na kpahen orọnvwọn ọvo rọhẹ wẹbsaiti rẹ avwanre