Iroroẹjẹ Oborẹ Avwanre se Vwo Ruiruo rẹ Aghwoghwo na Fiotọ

Ọvo usun rẹ emẹvwa re ruẹ vwẹ ukoko na yen emẹvwa rẹ aghwoghwo na, ọnana ọrhuẹrẹphiyotọ ro nẹ obọ ri Jihova rhe rọ nẹrhẹ a jẹjẹ ohwohwo oma vwẹ ẹguọnọ kugbe iruo rẹ esiri. (Hib. 10:24, 25) E jẹ ọ dia ibrẹro iyorin fi ighwrẹn, ọnana churobọsi re vwo muegbe ihwo rehẹ ẹko na, kẹ ayen asan rẹ ayen da cha wian je nẹrhovwo. (Ofori nẹ omẹvwa rẹ aghwoghwo na krẹn phiyọ ọ da dianẹ uyono ọfa herọ re ji che ru.) Ofori nẹ ohwo rọ vwẹrote omẹvwa rẹ aghwoghwo na muegbe orọnvwọn ọvo kiriguo rọ cha vwẹ ukẹcha kẹ ihwo ri che vwobọ vwẹ iruo rẹ aghwoghwo na ẹdẹ yena. Kerẹ udje, ọ da dianẹ buebun rẹ iniọvo na kpo aghwoghwo vwẹ Saturday rọ wanre na-a, o yovwin siẹrẹ a da vwẹ iroroẹjẹ obo ra sa ta vwọphia vwẹ Saturday nana. Erhọ yen iyovwinreta evo re sa chọn avwanre uko siẹrẹ a da fuẹrẹn ayen?

• Udje rẹ obo wọ sa ta vwo nẹ Ọbe Uyono rẹ Akpeyeren Avwanre vẹ Iruo Ruvie Na

• Obo ra sa vwọ reyọ emu rọ phiare obọ yẹrẹ iyẹnrẹn kpokpọ vwọ ton aghwoghwo phiyọ

• Obo ra sa vwọ kpahen kẹ ohwo rọ guọnọ gbowọphiyọ aghwoghwo na

• Obo ra sa kpahen kẹ ohwo ro vwo esegbuyota nẹ Ọghẹnẹ herọ-ọ, ohwo ro vwo imuẹro nẹ arhọ mamarhe, ohwo rọ jẹ ejajẹ ọrhorha, yẹrẹ ohwo rọhẹ ẹga ro ghwe titi vwẹ ekogho ovwan de ghwoghwo-o

• Obo ra sa vwọ reyọ orọnvwọn ọvo ra vwọphia vwẹ jw.org, aplikeshọni ri JW Library^® yẹrẹ Baibol na vwo ruiruo

• Obo ra sa vwọ reyọ ọvo usun rẹ ekuakua rehẹ Ekpeti rẹ Uyono na vwo ruiruo

• Obo re se vwo vwobọ vwẹ ẹbẹre evo kiriguo rẹ iruo rẹ aghwoghwo na kerẹ aghwoghwo re ruẹ vwẹ ifonu, ileta esio, aghwoghwo rẹ azagba, orhivwinbrura yẹrẹ uyono ri Baibol

• Ẹkarophiyọ kpahen omaẹkẹnẹ, ra vwọ nuẹ, ra vwọ riẹn oma ghwa, omamọ uruemu, yẹrẹ erọnvwọn efa tiọyen

• Uyono yẹrẹ ividio ọvo vwo nẹ ibroshọ rẹ Muomaphiyọ Isese vẹ Eyono na

• Obo re se vwo bicha ohwo a vẹ ọyen gbe ghwoghwo

• Ẹkpo ri Baibol rọ ta ota kpahen iruo rẹ aghwoghwo na yẹrẹ ikuegbe obo re rhiẹromrẹ vwẹ aghwoghwo na