“Me Rha Mrẹ Vwẹ Uwevwin Ọfa-a!”

Wọ tota ọtiọyen kpahen ohwo ro dje omavwerhovwẹn phia jovwo re? Ọ sa dianẹ wọ davwẹngba vwọ rhoma rhivwin bro ra abọ buebun re, ju wo ji se ri ku ame ku okankọn rẹ uyota ru wọ kọnre na-a. (1 Kọr. 3:⁠6) Ọkeọvo, ighwoghwota re ton ona rẹ aghwoghwo si ileta vwo rhe ihwo rẹ ayen mrẹ vwẹ uwevwin ọfa-a, yẹrẹ ayen phi ọmọbe phiyọ ẹchẹ rẹ ihwo na. Ighwoghwota evo vwẹ ẹwẹn roro nẹ a vwọ rhoma mrẹ ohwo na vwẹ uwevwin cha bẹn, ọtiọyena kẹ ayen nokpẹ ukeri rẹ ifonu rẹ ohwo na. Ayen me nọ ohwo na, “Wọ sa vwẹ ifonu si ovuẹ rhe ohwo?” Siẹrẹ avwanre de bru ohwo na ra yẹrẹ ghwoghwo ota kẹ womarẹ ileta, i-mel, ovuẹ yẹrẹ use rẹ ifonu, phi ọmọbe rẹ ovuẹ phiyọ ẹchẹ rọyen, e se kere phiyọ orhivwinbrura. Ọ da tobọ dianẹ a fobọ mrẹ vwẹ uwevwi-in, avwanre ji se nenesi rẹ ọdavwẹ rọyen.