Enọ Rẹ Ihwo Ri Se Ẹbe Avwanre Nọre
Diesorọ ọ vwọ chọ re vwo mu ẹbe vẹ erọnvwọn efa rẹ Iseri rẹ Jihova ruru phiyọ wẹbsaiti romobọ yẹrẹ i re de muẹ igbeyan?
Kidie nẹ avwanre shẹ ẹbe vẹ erọnvwọn efa rẹ avwanre ruru-u na, ihwo evo ki roro nẹ ọ brare siẹrẹ ayen de mu erọnvwọn tiọyena phiyọ wẹbsaiti efa yẹrẹ wẹbsaiti re de muẹ igbeya-an. Ẹkẹvuọvo, ọyena vwọso irhi rẹ Obo Revwo Ruiruo Wana re si phiyọ wẹbsaiti rẹ avwanre. Uruemu tiọyena tobọ so eta buebun phiyotọ enẹna re. Kirobo re djere vwẹ urhi na, a vwẹ uphẹn kẹ ohwo vuọvo nẹ ọ “rhoma phi erọnvwọn [ro] si nẹ wẹbsaiti nana phiyọ asan efa vwevunrẹ Intanẹti-i (owenẹ ọ diẹ wẹbsaiti diodi, wẹbsaiti ra da ghara evuẹ, yẹrẹ e ra da guọnọ igbeyan).” Diesorọ a vwọ jurhi tiọyena?
E jẹ ohwo vuọvo phi erọnvwọn rẹ avwanre teyenphia phiyọ asan efa vwẹ Intanẹti-i
Irhi herọ ri suẹn kemu kemu rọhẹ wẹbsaiti rẹ avwanre. Ivwighrẹn vẹ ihwo ri she nẹ ukoko na re vwọsuọ, phiẹ ekuakua rẹ ukoko na phiyọ wẹbsaiti rayen rere ayen sa vwọ phiẹn avwanre vẹ ihwo efa. Evuẹ re sa nẹrhẹ ohwo vwo ẹwẹn ivivẹ kpahen uyono rẹ ukoko na yen ayen vwọphia vwẹ wẹbsaiti rayen. (Une 26:4; Isẹ 22:5) Ihwo evo tobọ reyọ erọnvwọn rehẹ wẹbsaiti rẹ avwanre yẹrẹ oka rẹ jw.org vwọ tanmu ekuakua rẹ ayen shẹ. Ayen ji phio phiyọ aplikeshọni rẹ ifonu rayen. Irhi ri suẹn ekuakua rehẹ wẹbsaiti rẹ avwanre vẹ oka re vwo vughe ayen nẹrhẹ ihwo nomasua rere ayen vwo jẹ ekuakua na evwo ruiruo vwẹ idjerhe rọ chọre. (Isẹ 27:12) Ẹkẹvuọvo, avwanre da vwẹ uphẹn vwọ kẹ ihwo efa ji te iniọvo rẹ avwanre nẹ ayen mu ekuakua rehẹ wẹbsaiti rẹ avwanre phiyọ wẹbsaiti efa, yẹrẹ reyọ oka rẹ jw.org vwọ shẹ oborẹ ayen shẹ, aguare rẹ gọmẹti rha cha sa chochọn rẹ avwanre vwo nẹ abọ rẹ ihwo re vwọsua vẹ ineki-i.
Imuoshọ rode herọ siẹrẹ a da danlodu rẹ ẹbe vẹ ividio rẹ avwanre vwo nẹ wẹbsaiti efa ukperẹ jw.org. “Odibo esiri na” ọvo yen Jihova vwo mu nẹ ọ vwẹ Ota rọyen vwọ ghẹrẹ avwanre. (Mat. 24:45) Websaiti rẹ www.jw.org, tv.jw.org, vẹ wol.jw.org ọvo yen “odibo” yena vwo ruiruo. Vwọba, aplikeshọni rẹ ukoko na ruru re se phiẹ phiyọ ifonu yen JW Language®, JW Library®, vẹ JW Library Sign Language®. A sa vwẹroso ekuakua nana kidie ọ dia igho yen a vwẹ ayen guọnọ-ọ, akpọ rẹ Eshu na ji che se miovwo aye-en. Noso nẹ uyono rẹ odibo esiri na da wan asan ọfa te avwanre obọ, a sa gua rọ da so omaẹwan kẹ ohwo.—Une 18:26; 19:8.
Vwọba, e de mu ẹbe rẹ avwanre phiyọ wẹbsaiti ra da vwẹ uphẹn kẹ ihwo nẹ i si obo rehẹ ẹwẹn rayen, ọ cha nẹrhẹ ivwighrẹn vẹ ihwo ri she nẹ ukoko na re vwọsuọ mrẹ asan da hra eta re sa nẹrhẹ ihwo vwo ẹwẹn ivivẹ kpahen ukoko rẹ Jihova. Iniọvo evo she ufi nana re. Ayen toroba ophọphọvwe ra ghwa vwo rhe odẹ rẹ Jihova fikirẹ aphro okamuka rẹ ayen nene ihwo phra vwẹ intanẹti. Ọ dia womarẹ aphro ra phra vwẹ intanẹti yen a sa vwọ “vwẹ aghwanre bru otu re ghwọ [uche-e].” (2 Tim. 2:23-25; 1 Tim. 6:3-5) E rhi noso nẹ ihwo evo vwẹ odẹ rẹ ukoko na, Ẹko Rọvwẹrote na, yẹrẹ edẹ rẹ evo usun rẹ iniọvo re ga kerẹ Ẹko Rọvwẹrote na, vwo rhie wẹbsaiti romobọ yẹrẹ rhie akantu vwẹ wẹbsaiti re de muẹ igbeyan. Ẹkẹvuọvo, jokaphiyọ nẹ o vwo ohwo vuọvo usun rẹ Ẹko Rọvwẹrote na ro vwo wẹbsaiti romobọ yẹrẹ rhie akantu vwẹ wẹbsaiti re de muẹ igbeya-an.
“Iyẹnrẹ esiri” na che te ihwo buebun obọ siẹrẹ e de dje jw.org kẹ ayen. (Mat. 24:14) Kọke kọke yen e ruẹ ẹbe vẹ ividio rehẹ wẹbsaiti rẹ avwanre yovwẹnphiyọ. Avwanre guọnọre nẹ kohwo kohwo mrẹ erere nẹ ayen rhe. Ẹkẹvuọvo, kirobo re djere vwẹ irhi ri suẹn Obo Revwo Ruiruo Wan, wọ sa vwẹ ọbe yẹrẹ ilinki rẹ asan rẹ ọbe na hepha vwẹ jw.org vwo rhe ohwo womarẹ i-mel. Avwanre de dje wẹbsaiti rẹ avwanre kẹ ihwo rẹ urhuru rẹ uyota na siẹ, ọyena cha nẹrhẹ ayen riẹn “odibo esiri na” rẹ Ọghẹnẹ wan oma rọyen ghẹrẹ avwanre.
a Wọ cha mrẹ asan ọvo vwẹ obotọ rẹ aruọbe rẹsosuọ rẹ jw.org/urh ro che mu we kpo asan ru wọ da sa mrẹ irhi rẹ Obo Revwo Ruiruo Wan; irhi na djobọte erọnvwọn eje rehẹ wẹbsaiti rẹ avwanre.