E Ku Ẹwẹn Ọfuanfon Ku Kọniliọs

Vwẹ Sizaria, o vwo ohwo rẹ Rom ọvo rọ dia onotu rẹ ofovwin re se Kọniliọs. Dede nẹ ọ dia ohwo rẹ Ju-u, jẹ ihwo rẹ Ju na muọghọ kẹ. O ruẹse kẹ ivwiogbere gangan. Kọniliọs vwẹ esegbuyota kpahen Jihova, ọ je nẹrhovwo rhe ọkieje. Ẹdẹ ọvo, amakashe da vwomaphia kẹ Kọniliọs, ọ da ta: ‘Ọghẹnẹ nyo ẹrhovwo wẹn. Asaọkiephana, gbe ji ihwo kpo orere rẹ Jọpa, rere e se Pita rhe we.’ Ugege yena, Kọniliọs de ji eshare erha kpo Jọpa rọhẹ omarẹ imaili 30 rẹ obotọ ọnre.

Pita da je mrẹ emramrẹ vwẹ Jọpa. Ọ mrẹ eranvwe rẹ ihwo rẹ Ju gha, o de nyo urhuru rọ vuẹrẹ nẹ ọ re ayen. Pita senre, ọ da ta: ‘Me je riẹ eranvwe ri jẹfuọn dẹvo-o.’ Urhuru na da vuẹ nẹ, ‘Wo se eranvwe nana erọnvwọn ri jẹfuọ-ọn. Ọghẹnẹ ru ayen fonre.’ A da je vuẹ Pita: ‘Eshare erha hẹ anurhoro wẹn. Nene ayen.’ Pita de rhie ẹchẹ kẹ ayen, ọ da nọ ayen obo ri mu ayen rhe. Ayen da ta: ‘Kọniliọs yen ji avwanre, ọyen ohwo rẹ Rom rọ je dia onotu rẹ ofovwin. Ọ guọnọre nẹ wọ rhe uwevwin rọyen vwẹ Sizaria.’ Pita de phi erhorha na phiyọ uwevwin. Ọke vwo rhie, o de nene ayen kpo Sizaria, iniọvo evo rehẹ Jọpa ji nene ayen.

Kọniliọs vwọ mrẹ Pita, o de shiguẹ. Ẹkẹvuọvo, Pita da ta: ‘Vrẹn! Mẹvwẹ ohworakpọ kerẹ owẹ. Ọghẹnẹ yen vuẹ vwẹ nẹ me rhe uwevwin wẹn, dede nẹ ihwo rẹ Ju ro uwevwin rẹ ihwo rẹ ẹkuotọ efa-a. Biko gba vuẹ vwẹ oboresorọ wo vwo se vwe.’

Kọniliọs da vuẹ Pita: ‘Ẹdẹ ẹne re wanre, me vwọ nẹrhovwo kẹ Ọghẹnẹ, amakashe ọvo da vuẹ vwẹ nẹ mi se we. Biko yono uvwe eta rẹ Jihova.’ Pita da ta: ‘Me riẹnre nẹ Ọghẹnẹ nẹ ohwo ruẹ-ẹ. O rhiabọreyọ kohwo kohwo rọ guọnọ vwẹ ẹga kẹ.’ Pita de yono ayen erọnvwọn buebun kpahen Jesu. Ẹwẹn ọfuanfon na da ro oma rẹ Kọniliọs, ọtiọyen ji te ihwo rehẹ etiyin, e de bru ayen eje phiyame.