Ega rẹ Inenikristi Hrabọ ro Ẹkuotọ Buebun

Iyinkọn na nene iji rẹ Jesu re vwo ghwoghwo iyẹnrẹn esiri rẹ Uvie na wan akpọneje. Vwẹ ukpe rẹ 47 C.E., iniọvo rehẹ Antiọk de ji Pọl vẹ Banabas kpo ota eghwoghwo. Ayen ghwoghwo ota vwẹ ubrakpọ rẹ Esha ejobi, irere kerẹ Dabe, Listra vẹ Aikoniọm.

Kohwo kohwo yẹn Pọl vẹ Banabas ghwoghwo ota kẹ, edafe, igbere, imiragua kugbe imitete. Ihwo buebun kerhọ, ayen de se Kristi gbuyota. Ọke rẹ Pọl vẹ Banabas vwo ghwoghwo kẹ Sajọs Pọlọs rọ dia osun rẹ Saiprọs, ọboepha ọvo da davwẹngba rọ vwọ da ayen obọ ji. Pọl da vuẹ ọboepha na: ‘Jihova cha vwẹ oja re wẹ.’ Ugege yena, ẹro rẹ ọboepha na de ghwe rhu. Obo re phiare na da nẹrhẹ Pọlọs kurhẹriẹ.’

Kasan kasan yen Pọl vẹ Banabas de ghwoghwo, vwo nẹ uwevwin kpo uwevwin, vwevunrẹ eki, urhuvwu, idjerhe kugbe Sinegọg. Ọke rẹ ayen vwo sivwin ukpono ọvo vwẹ Listra, ihwo rehẹ etiyin da vwẹ ayen roro eghẹnẹ, ayen ke guọnọ vwẹ ẹga kẹ ayen. Ẹkẹvuọvo, Pọl vẹ Banabas da dobọ rayen ji, je vuẹ ayen nẹ, ‘Ovwan ga Ọghẹnẹ! Avwanre ihworakpọ ghevweghe.’ Ọyena vwọ wan nu, ihwo rẹ Ju evo da rhe, ayen da nẹrhẹ ihwo na reyọ vwọso Pọl. Ayen da vwẹ ikpokpo phio, ayen de ji kpono nẹ orere na, ayen da yan jovwo kidie ayen rorori nẹ o ghwure. Ẹkẹvuọvo Pọl ghwuru-u. Kpakpata, iniọvo na da rhe, ayen da reyọ rhivwin ro orere na. Ọke evo vwọ wan nu, Pọl de rhivwin kpo Antiọk.

Pọl kpo oyan aghwoghwo rọyen rivẹ vwẹ ukpe rẹ 49 C.E. O vwo rhivwin ra mrẹ iniọvo rehẹ ubrakpọ rẹ Esha nu, o de ghwoghwo kpo asan ri sherabọ, obẹ Europe. O kpo Atẹns, Ẹfesọs, Filipae, Tẹsalonaika kugbe asan efa. Sailas, Luk kugbe eghene re se Timoti nene Pọl vwẹ oyan nana. Ayen vwẹ ikoko vwo mu, je bọn iniọvo na gan. Pọl dia Kọrẹnt ẹgbukpe ọvo gbẹ ubro rọ vwọ bọn iniọvo na gan. Pọl ghwoghwori, o yonori, o ji si ileta rhe ikoko buebun. O ji ruiruo rẹ ibọkpọ erhuon rọ vwọ ghẹrẹ oma rọyen. Ọke vwọ yanran na, Pọl de rhivwin kpo Antiọk.

Vwẹ ukpe rẹ 52 C.E., Pọl de kpo oyan rẹ aghwoghwo rọyen rerha, ọ tonphiyọ vwẹ ubrakpọ rẹ Esha. O kpo Filipae vẹ Kọrẹnt. Pọl ghwọrọ ikpe buebun vwẹ Ẹfesọs ro vwo yono, sivwin ihwo, je vwẹ ukẹcha kẹ ukoko na. Ọ je ta ota rotu kẹdẹ kẹdẹ vwẹ ọguan rode rẹ isikuru ọvo. Ihwo buebun kerhọ rọyen, ayen de kurhẹriẹ. Pọl vwo ghwoghwo iyẹnrẹn esiri na vwẹ ẹkuotọ buebun nu, o de rhivwin kpo Jerusalẹm.