Jesu Jẹ Sọl Reyọ

Sọl, ọyen ọmotọ rẹ Rom re vwiẹre vwẹ Tasọs. Ọyen ohwo rẹ Farisi rọ nabọ riẹn Irhi rẹ Ihwo rẹ Ju, o ji vwo utuoma kpahen Inenikristi. O kpono iniọvo na nẹ uwevwin rayen ko do ayen phiyọ uwodi. Ọ tobọ mudia ji nughe rẹ ihwo ri phi Stivin hwe.

Dedena, Sọl je guọnọ re mu Inenikristi rehẹ asan efa, ọ ghwa dia e rehẹ Jerusalẹm ọvo-o. Ọ da vuẹ orherẹn rode na nẹ ọ kẹ ọyen ẹgba vwo kpo orere rẹ Damaskọs re mu Inenikristi rehẹ oboyin. Sọl vwo siẹkẹrẹ orere na, urhukpẹ ọgangan de lo muo siẹvuọvo, o de she totọ. O de nyo urhuru ọvo rọ tare nẹ, ‘Sọl, diesorọ wo vwo kpokpo uvwe?’ Sọl da nọ: ‘Wẹwẹ ono?’ Ọ da kpahen: ‘Mẹvwẹ Jesu. Kpo Damaskọs, a cha vuẹ wẹ obo wo che ru.’ Vwẹ ọke yena, jẹ Sọl rhuẹro nure, a da yọnrọn obọ rọyen vwọ ro orere na.

Vwẹ Damaskọs, o vwo Onenikristi ọvo re se Ananayas. Jesu da ta ota kẹ womarẹ emramrẹ: ‘Kpo uwevwin rẹ Judas rọhẹ urhuvwu re se Streit, wọ nokpẹn rẹ Sọl.’ Ananayas da ta: ‘Ọrovwohwo, me nabọ vughe ọshare yena! O mu idibo wẹn phiyọ uwodi!’ Ẹkẹvuọvo, Jesu da ta: ‘Bro ra. Me jẹ Sọl reyọ, o vwo ghwoghwo iyẹnrẹn esiri na kẹ ẹgborho buebun.’

Ananayas da ghene mrẹ Sọl, ọ da vuẹ nẹ, ‘Oniọvo Sọl, Jesu ji vwe bruwerhe rhi vwo rhie ẹro wẹn.’ Ugege yena, ẹro rẹ Sọl de rhie. E de yono kpahen Jesu, ọ da rhe dia Onenikristi. O vwo bromaphiyame nu, ko nene iniọvo icheko ghwoghwo vwẹ uwevwin ẹga na. Vwẹ ẹwẹn roro obo ro che gbe ihwo rẹ Ju unu te siẹrẹ ayen da mrẹ Sọl ro yono ihwo kpahen Jesu! Ayen ke ta: ‘Ọnana dia ọshare na ro mu idibo rẹ Jesu phiyọ uwodi yen?’

Sọl ghwoghwo ota kẹ ihwo rehẹ Damaskọs vwẹ ẹgbukpe erha. Ihwo rẹ Ju vwo utuoma kpahen Sọl, ọtiọyena kẹ ayen guọnọ hwe. Iniọvo na vwọ riẹn kpahen ọnana, ayen da vwẹ ukẹcha kẹ Sọl vwọ djẹ. Ayen muro phiyọ akpẹrẹ, ayen da wan unu ọvo rọhẹ igbẹhẹ rẹ orere na muo phiyotọ.

Sọl vwo te Jerusalẹm, kọ guọnọ vwomaba iniọvo na. Ẹkẹvuọvo, iniọvo na ke djoshọ rọyen. Ọke yena, odibo ọvo re se Banabas da reyọ Sọl vwo rhe iyinkọn na, ọ da je vuẹ ayen nẹ Sọl ghini wene re. Sọl kọ nabọ nene ukoko rọhẹ Jerusalẹm ghwoghwo ota na vẹ oruru. Ọke vwọ yanran na, ka rhe riẹn phiyọ Pọl.