Idjerhe ra sa Vwọ Hẹre Iruo rẹ Ẹga na Phiyọ

ỌKE rẹ Jesu che vwo ji idibo rọyen re ghwoghwo Uvie na vwo te, ọ da vuẹ ayen: “Orhọ na buru gangan, ẹkẹvuọvo otu rẹ owian rhe bu-u.” Owian buebun ghini herọ, ọtiọyena ọ da je ta: “Rẹ Ọghẹnẹ ro vwo orhọ rere a mrẹ ihwo vwo vun orhọ na.” (Mat. 9:37, 38) Jesu da vuẹ idibo rọyen oborẹ ayen che ruiruo na wan. Eta nana djerephia nẹ iruo na guọnọ okpakpa: “Ovwan sa djẹ vrẹn irere rẹ Izrẹl na ejobi re tavwe rẹ Ọmọ rẹ ohwo ke rhe-e.”—Mat. 10:23.

² Nonẹna, iruo buebun je herọ re che ru vwẹ iruo aghwoghwo na. E che ghwoghwo iyẹnrẹn esiri rẹ Uvie na tavwen oba na ke rhe, jẹ oba na sikẹre mamọ re! (Mak 13:10) Ọ vwọ dianẹ akpọ na yen udju na, avwanre ji hirharokuẹ ẹdia vuọvo rẹ Jesu vẹ idibo rọyen hirharoku, ẹkẹvuọvo ọnana kọyen ma rho. Dede nẹ avwanre pha hanhanvwe vwẹ akpọ rọ vọnre vẹ ihwo ri te iduima na, jẹ avwanre vwo imuẹro nẹ Jihova cha chọn avwanre uko. E che ghwoghwo iyẹnrẹn esiri rẹ Uvie na vwọ wan akpọneje, ọke rẹ Jihova rhuẹrẹphiyọ de te, oba na kọ cha rhe. E che phi Uvie rẹ Ọghẹnẹ phiyọ ẹdia rẹsosuọ vwẹ akpeyeren rẹ avwanre rere e se vwo ruiruo rẹ ẹga na vọnvọn? Die yen a sa vwọ tua vwẹ ẹga ri Jihova e se vwo ruo?

³ Jesu vwọ ta ota kpahen oborẹ Jihova guọnọ mie idibo rọyen, ọ da ta: “Wọ me vwẹ udu wẹn ejobi guọnọ Ọrovwohwo Ọghẹnẹ vwẹ ẹnwẹn wẹn ejobi, kugbe iroro wẹn ejobi ji kugbe ogangan wẹn ejobi.” (Mak 12:30) Ofori nẹ a vwẹ ẹgba avwanre eje vwọ ga Jihova. Ọnana mudiaphiyọ nẹ a da davwẹngba avwanre eje vwẹ ẹga ri Jihova jẹ avwanre djephia nẹ ẹguọnọ avwanre kodori dẹn, omaẹvwọkpahotọ avwanre je nabọ gan. (2 Tim. 2:15) Uphẹn sansan rhiephiyọ kẹ avwanre vwo nene oborẹ ẹdia vẹ ẹgba rẹ avwanre hepha. Roro kpahen uphẹn nana evo, wo mi ji brorhiẹn rẹ obo wọ cha vwọ tua vwẹ ẹga ri Jihova wo se vwo ruiruo rẹ ẹga na vọnvọn.

RA VWỌ GA KERẸ OGHWOGHWOTA

⁴ Kohwo kohwo rọ mrẹ uyota na vughe vwo uphẹn ro vwo ghwoghwo iyẹnrẹn esiri na. Ọnana yen iruo rẹ Jesu vwọ kẹ idibo rọyen. (Mat. 24:14; 28:19, 20) Odibo ri Jesu de ghwe nyo iyẹnrẹn esiri na, kọ ghwa vuẹ ihwo efa kpahọn. Ọtiọyen Andru, Filip, Kọniliọs, vẹ ihwo efa ruru. (Jọn 1:40, 41, 43-45; Iruo 10:1, 2, 24; 16:14, 15, 25-34) Ọnana ko mudiaphiyọ nẹ ohwo sa vuẹ ihwo efa kpahen iyẹnrẹn esiri na tavwen o ki bromaphiyame? Dẹn! Ohwo de ghwe muwan rọ vwọ dia oghwoghwota ro bromaphiyame-e, uphẹn ro vwo vwobọ vwẹ aghwoghwo ri nẹ uwevwin kpo uwevwin ko che rhiephiyọ vwọ kẹ. Vwọba, o se vwobọ vwẹ idjerhe efa re vwo ruiruo aghwoghwo na vwo nene oborẹ ẹgba vẹ ẹdia rọyen hepha.

⁵ Oghwoghwota de bromaphiyame, kọ cha davwẹngba rọyen eje vwọ vwẹ ukẹcha kẹ ihwo efa vwọ riẹn uyota na. Te eya te eshare vwo uphẹn rẹ ayen vwo ruiruo aghwoghwo na. Ọyen okpuphẹn rode re vwo toroba ẹyan obaro rẹ iruo rẹ Uvie na. Kohwo kohwo ro se ruiruo rẹ ẹga na hẹrephiyọ che vwo omavwerhovwẹn dẹn.

RA VWỌ GA VWẸ ASAN RA DA GUỌNỌ UKẸCHA

⁶ Ọ sa dianẹ kọke kọke yen a vwọ wian asan rẹ ukoko wẹn de ghwoghwo, a je nabọ ghwoghwo ota na kẹ ihwo buebun re. Ọ da dia ọtiọyen, wo se vwo ẹwẹn wo vwo kpo asan ra da guọnọ ukẹcha vwẹ iruo rẹ ẹga na. (Iruo 16:9) Wọ da dia ọkpako yẹrẹ odibo rowian, ukoko ọfa sa guọnọ ukẹcha wẹn. Oniruo okinriariẹ wẹn sa kẹ wẹ iroroẹjẹ evo ri shekpahen oborẹ wọ sa vwọ vwẹ ukẹcha kẹ ukoko ọfa vwẹ okinriariẹ na. Wọ da guọnọ ga vwẹ ẹkuotọ ọfa, oghọn ukoko na sa vwẹ evuẹ eghanghanre evo vwọphia re cha chọn wẹ uko.

⁷ Wọ guọnọ ga vwẹ ẹkuotọ ọfa? Ọ da dia ọtiọyen, ofori nẹ wọ nabọ frẹkotọ roro kpahen oyan nana. Wẹ vẹ ekpako rẹ ukoko wẹn sa ta ota kpahọn. Oyan tiọyena che djobọte we vẹ ihwo efa ri che nene uwe. (Luk 14:28) Ẹkẹvuọvo, ọ da dianẹ wọ cha dia kri-i, o che yovwin wọ da ga vwẹ asan ọvo vwevunrẹ ẹkuotọ wẹn.

⁸ Vwẹ ẹkuotọ evo, iniọvo ri mu oghwa rẹ ukoko na ghwa dia ihwo rehẹ ukoko na krire-e. Iniọvo tiọyen re vwomakpotọ na rhiabọreyọ ukẹcha rẹ ekpako ri tedje re rhe ukoko rayen. Wọ da dia ọkpako rọ guọnọ kpo ẹkuotọ tiọyen, noso nẹ ọ dia wọ cha yanran ra reyọ ẹdia rẹ iniọvo rehẹ asan na-a. Ukperẹ ọtiọyen, nene ayen ga kugbe. Chọn ayen uko vwọ yan phiaro, ji rhiabọreyọ ewian rẹ ukoko na. (1 Tim. 3:1) Vwo odirin siẹrẹ oborẹ ayen ruẹ erọnvwọn wan da fẹnẹ obo re ruẹ vwẹ ẹkuotọ wẹn. Vwẹ erianriẹn wẹn kerẹ ọkpako vwọ chọn iniọvo na uko. Ọke yena, wọ da guọnọ rhivwin kpo ẹkuotọ wẹn, ekpako rehẹ etiyin ke sa nabọ vwẹrote ukoko na.

⁹ Tavwen oghọn ukoko ke cha kẹ wẹ edẹ rẹ ikoko re guọnọ ukẹcha, Umẹ Rọvwẹrote Iruo rẹ Ẹga rẹ Ukoko wẹn che si ileta vwọ kpahen owẹ vwo rhe ayen. A guọnọ ileta nana ọ da tobọ dianẹ wẹwẹ ọkpako, odibo rowian, ọkobaro, yẹrẹ oghwoghwota. Umẹ rọvwẹrote iruo rẹ ẹga na cha vwẹ ileta na vẹ oyare wẹn vwo rhe oghọn ukoko rẹ ẹkuotọ ru wọ da cha ga na.

RE VWO GHWOGHWO OTA VWẸ EJAJẸ ỌFA

¹⁰ Wo se vwo ẹwẹn wo vwo yono ejajẹ ọfa, ji te ejajẹ rẹ idin, rere wọ sa vwọ hẹre iruo rẹ ẹga na phiyọ. Wọ da guọnọ yono obo wo se vwo ghwoghwo ota na vwẹ ejajẹ ọfa, wọ sa vuẹ ekpako na vẹ oniruo okinriariẹ kpahọn. Ayen sa vwẹ iroroẹjẹ evo vwọ kẹ wẹ ji phiuduphiyawọ wẹn. Vwo nene odjekẹ rẹ oghọn ukoko na, ikinriariẹ evo vwẹ iklasi vwo mu re de yono ighwoghwota vẹ ekobaro ri muwan oborẹ ayen se vwo ghwoghwo ota vwẹ ejajẹ ọfa.

IRUO RẸ ỌKOBARO

¹¹ Ofori nẹ ighwoghwota eje nabọ riẹn iwan ra guọnọ mie ohwo rọ cha dia ọkobaro ubrọke, ọ rẹ ọkieje, kugbe ọ rẹ oghẹresan ọtiọyen ji te oka rẹ iruo rẹ ẹga ọkieje efa. Ofori nẹ ọkobaro dia Onenikristi ro bromaphiyame re, ra sa vwẹrokere uruemu rọyen, ro ji vwo uphẹn rọ vwọ ghwọrọ uche inọke evo kiriguo vwẹ iruo aghwoghwo na. Umẹ Rọvwẹrote Iruo rẹ Ẹga rẹ Ukoko na yen ghwobọphiyọ ifọmu rẹ ekobaro ubrọke vẹ ekobaro ọkieje, ẹkẹvuọvo oghọn ukoko yen vwẹ ekobaro oghẹresan vwo muẹ.

¹² Ekobaro ubrọke sa ga vwẹ emeranvwe ọvo siẹrẹ ọ da hanvwe mamọ, ọ je sa ga vwẹ emeranvwe evo re vwọ kpahen ohwohwo, yẹrẹ rhirin rhirin kirobo rẹ ẹdia rọyen rhọnvwe kẹ. Ighwoghwota buebun ga kerẹ ekobaro ubrọke vwẹ ọke rẹ oghẹresan kerẹ ọke rẹ Ẹkarophiyọ na yẹrẹ vwẹ emeranvwe rẹ oniruo okinriariẹ de kin ukoko na. Evo ru ọtiọyen vwẹ ọke rẹ omaerovwon vwo nẹ iruo. Emọ isikuru ri bromaphiyame re sa ghwobọphiyotọ kerẹ ọkobaro ubrọke vwẹ ọke rẹ họlide. Inọke ra guọnọ mie ekobaro ubrọke se kpotọ vwọ kẹ ighwoghwota re guọnọ dia ekobaro ubrọke vwẹ emeranvwe ri March vẹ April kugbe emeranvwe rẹ oniruo okinriariẹ vwo kin ukoko na. Kẹdia kẹdia wọ hepha eje, wo de vwo omamọ uruemu vẹ uvi rẹ emudia vwẹ obaro rẹ Ọghẹnẹ, wo de se ru ọrhuẹrẹphiyotọ wọ vwọ yan mu inọke evo kiriguo, wo de ji vwo imuẹro nẹ wọ sa dia ọkobaro ubrọke vwẹ emeranvwe ọvo siẹrẹ ọ da hanvwe, oma cha vwerhen ekpako na ayen vwọ ghwobọphiyọ ifọmu rẹ ọkobaro ubrọke wẹn.

¹³ Ohwo ki se muwan rọ vwọ dia ọkobaro ọkieje, ko fori nẹ o muegbe ro vwo ru inọke ra guọnọre na gba kukpe kukpe. Kerẹ ọkobaro ọkieje, ofori nẹ wo nene ukoko wẹn wiankugbe kpẹkpẹkpẹ. Ekobaro ri vwo oruru eyen ebruphiyọ vwọ kẹ ukoko na, ayen phi ejọghwa phiyọ iruo aghwoghwo na, je vwẹ ukẹcha kẹ ihwo efa vwọ dia ekobaro. Ẹkẹvuọvo, tavwen wọ ke ghwobọphiyotọ kerẹ ọkobaro ọkieje, ofori nẹ wọ dia oghwoghwota ra sa vwẹrokere uruemu rọyen, ro bromaphiyame te emeranvwe esan kpenu re.

¹⁴ A reyọ ekobaro ọkieje evo ri djephia nẹ ayen tẹn ona rẹ aghwoghwo na vwo muẹ kerẹ ekobaro oghẹresan. Ayen che vwo ẹwẹn rẹ ayen vwọ ga vwẹ kasan kasan rẹ ukoko na ji ayen ra. Ọke buebun, e ji ayen kpo asan ri sherabọ rẹ ayen da sa mrẹ ihwo ri dje omavwerhovwẹn phia ji vwẹ ikoko kpokpọ vwo mu. Ọke evo, e ji ekobaro oghẹresan kpo ikoko re mrẹ bẹnbẹn rẹ ayen vwọ wian ekogho rẹ ayen de ghwoghwo na re. E ji ekobaro oghẹresan evo re dia ekpako vwo kpo ikoko rẹ ighwoghwota rayen ghwe bu-un rere ayen vwẹ ukẹcha phia, dede nẹ ukoko na ghwa guọnọ ukẹcha vwẹ ekogho rẹ ayen de ghwoghwo na-a. A vwẹ imigho vwọ kẹ ekobaro oghẹresan rẹ ayen vwọ vwẹrote oma rayen. A vwẹ ekobaro oghẹresan evo vwo muẹ vwẹ ubrọke.

IRUO RẸ IMISHỌNARE

¹⁵ Umẹ Rọvwẹrote Iruo rẹ Ẹga rẹ Ẹko Rọvwẹrote na yen vwẹ imishọnare vwo muẹ, Umẹ Rọvwẹrote Oghọn Ukoko kọyen rhe ji ayen kpo asan rẹ ihwo vọnre mamọ. Ayen nẹrhẹ iruo aghwoghwo na vẹ iruo rẹ ukoko na efa nabọ ghwotọ. Ọke buebun, imishọnare na eyen ihwo ri wontọ nẹ Isikuru rẹ Ihwo ri Ghwoghwo Uvie Na re. A vwẹ iwevwin kẹ ayen kugbe imigho rẹ ayen sa vwọ vwẹrote oma rayen.

IRUO RẸ INIRUO OKINRIARIẸ

¹⁶ Tavwen Ẹko Rọvwẹrote na ke reyọ oniruo okinriariẹ vwo mu, ọ ka ga kerẹ ọchuko oniruo okinriariẹ rere e se vwo yono phiyọ iruo na je dia ọwena. Eshare nana vwo ẹguọnọ rẹ iruo rẹ ẹga na vẹ iniọvo rayen. Ayen ekobaro ri vwo oruru, iniọvo re nabọ yono Baibol na, re je tẹn ona rẹ ota vẹ uyono. Ayen nabọ dje omamọ rẹ ẹwẹn ọfuanfon na phia, vwẹ ẹro abavo vwo nẹ erọnvwọn, ji vwo iroro ro fiotọ vẹ ẹruọ. Oniọvo na da rọvwọn re, ofori nẹ aye rọyen rọ dia ọkobaro na dia omamọ udje vwẹ uruemu rọyen vẹ obo ro nene ihwo efa yerẹn. Aye na me dia oghwoghwota rọ tẹn ona. Ọ me je riẹn ẹdia ro tere kerẹ aye uwevwin rọ vwomakpotọ, ọ dia ohwo rọ reyọ ẹdia rẹ ọshare rọye-en, ohwo rọ je vwẹ uphẹn kẹ ihwo nẹ ayen ta ota. Ọ dia ọmọrhiẹ owian iniruo okinriariẹ vẹ eya rayen ruẹ-ẹ, ọtiọyena ka guọnọre nẹ ihwo re guọnọ uphẹn rẹ ẹga nana vwo omakpokpọ. Ekobaro ghwobọphiyotọ kerẹ iniruo okinriariẹ-ẹ. Ukperẹ ọtiọyen, ayen vuẹ oniruo okinriariẹ rayen kpahen ẹwẹn rẹ ayen vwo ruiruo rẹ oniruo okinriariẹ, ọke yena oniruo okinriariẹ na kọ cha vwẹ iroroẹjẹ vwọ kẹ ayen.

ISIKURU RẸ UKOKO NA

¹⁷ Isikuru rẹ Ihwo ri Ghwoghwo Uvie Na: A guọnọ ighwoghwota rẹ Uvie na re cha wian ekogho ra fobọ wia-an kugbe i ri che bicha ukoko na. Ọtiọyena, iniọvo eya vẹ eshare re je rọvwọ-ọn vẹ e re rọvwọnre sa ghwobọphiyotọ vwo kpo isikuru nana vwọ kẹ uyono rẹ oghẹresan. E ji iniọvo ri wontọ nẹ isikuru nana vwo kpo asan ra da ma guọnọ ukẹcha vwẹ ẹkuotọ rẹ ayen nurhe kerẹ ekobaro ọkieje. Ẹkẹvuọvo a sa vwẹ iruo efa vwọ kẹ iniọvo re vwomakpahotọ rẹ ayen che ru vwẹ ẹkuotọ rayen yẹrẹ vwẹ ẹkuotọ ọfa. E se ji evo ra ga kerẹ ekobaro oghẹresan yẹrẹ ekobaro oghẹresan rẹ ubrọke. Ekobaro ri vwo owenvwe rẹ ayen vwo kpo isikuru nana sa riẹn kpahen obo ra guọnọ mie ayen vwẹ omẹvwa re muegbe rọyen fikirẹ ẹdia nana vwẹ ọghwẹkoko.

¹⁸ Isikuru ri Gilead: Iniọvo eya vẹ eshare re je rọvwọ-ọn vẹ e re rọvwọnre re durhie kpo isikuru nana jẹ Oyibo, ayen ji ruiruo rẹ ẹga ọkieje rẹ oghẹresan. Ayen ihwo re sa nẹrhẹ iruo aghwoghwo na vẹ iruo rẹ ukoko na efa nabọ ghwotọ. Ayen ji djephia nẹ ayen guọnọ ga iniọvo rayen je vwẹ ukẹcha kẹ ihwo efa vwọ riẹn odjekẹ ri Baibol vẹ e rẹ ukoko na rere ayen se vwo nene ayen. Umẹ Rọvwẹrote Oghọn Ukoko yen durhie iniọvo ri muwan nẹ ayen ghwobọphiyotọ. Ihwo ri wontọ nẹ isikuru na, e ji ayen kpo iruo aghwoghwo na yẹrẹ oghọn ukoko vwẹ ẹkuotọ ọfa yẹrẹ vwẹ ẹkuotọ rayen.

ẸGA RI BẸTẸL

¹⁹ Ra vwọ ga vwẹ Bẹtẹl ọyen uphẹn rẹ oghẹresan. Odẹ na Bẹtẹl mudiaphiyọ “Uwevwin rẹ Ọghẹnẹ,” odẹ yena ghini fo asan re de ruiruo rẹ Ọghẹnẹ. Iniọvo re ga vwẹ Bẹtẹl ruiruo ọghanghanre ro churobọ si efanfan vẹ ẹteyọn rẹ ẹbe ukoko na, e mi ji mu ayen kpo asan sansan. Ẹko Rọvwẹrote na ni iruo rayen ghanghanre dẹn, Ẹko Rọvwẹrote na vwẹrote iruo rẹ ikoko rehẹ akpọeje ji vwẹ odjekẹ vwọ kẹ ayen. Iniọvo re ga vwẹ Bẹtẹl ri ruiruo rẹ efanfan dia ekogho ra da jẹ ejajẹ rẹ ayen fan na. Ọnana nẹrhẹ ayen nyo ejajẹ na kẹdẹ kẹdẹ. Ayen je sa mrẹvughe komobọ sẹ ihwo na vwo ẹruọ rẹ ejajẹ rẹ ayen reyọ vwọ fan ẹbe na.

²⁰ Iruo buebun re ruẹ vwẹ Bẹtẹl guọnọ ẹgba. Ọtiọyena, ihwo buebun re se kpo Bẹtẹl eyen ighene eshare ri bromaphiyame re, re gan oma, ri ji vwo omakpokpọ. Ọ da dianẹ oghọn ukoko rọ vwẹrote ẹkuotọ wọ dia guọnọ ihwo re cha ga vwẹ Bẹtẹl, jẹ wọ guọnọ vwomakpahotọ, wọ sa nọ ekpako rẹ ukoko wẹn kpahen obo wo se vwo muwan.

IRUO RẸ EBABỌN

²¹ Iruo rẹ ebabọn rẹ iwevwin rẹ ẹga, ọyen ẹga ọfuanfon ra vwọ kẹ Jihova, kirobo rọ hepha vwẹ ọke ra vwọ bọn uwevwin rẹ ẹga vwẹ ọke ri Solomọn. (1 Ivie 8:13-18) Iniọvo eya vẹ e rẹ eshare nabọ vwo oruru ọgangan rẹ ayen vwọ reyọ ọke vẹ ekuakua vwo ze rere ayen vwo vwobọ vwẹ iruo nana.

²² Wọ sa vwẹ ukẹcha phia? Wọ da dia oghwoghwota ro bromaphiyame re, rọ guọnọ vwobọ vwẹ iruo nana, gba riẹn nẹ iniọvo re vwẹrote iruo rẹ ebabọn vwẹ ekogho wẹn che rhiabọreyọ ukẹcha wẹn, ayen ji muegbe rẹ ayen vwo yono uwe ọ da tobọ dianẹ ona wo vwori te emuọvo-o. Vuẹ ekpako na nẹ wọ guọnọ vwẹ ukẹcha phia. Ighwoghwota evo ri bromaphiyame re ri ji muwan tobọ vwo uphẹn rẹ ayen vwo ruiruo rẹ ebabọn na vwẹ ẹkuotọ efa.

²³ Uphẹn buebun rhiephiyọ re vwo vwobọ vwẹ iruo rẹ ebabọn. Ighwoghwota ri bromaphiyame re, re dia omamọ udje, ri vwo ena evo, ri ji se bicha iruo rẹ ebabọn rọ kẹrẹ asan rẹ ayen dia sa ga kerẹ iniọvo re vwomakpahotọ kẹ Iruo Ebabọn rẹ ukoko na. O ji vwo efa re sa ghwọrọ ọmọke vwo bicha iruo rẹ ebabọn vwẹ asan oshesheri, ọtiọyena, oghọn ukoko kọ reyọ ayen vwo muẹ kerẹ iniọvo re vwomakpahotọ kẹ iruo ebabọn rẹ ukoko na vwo nẹ idughwrẹn ivẹ fiẹ emeranvwe erha. I re vwo mu nẹ e ga krekri, e se ayen iniọvo ri ruiruo rẹ ebabọn. Oniọvo ro ruiruo rẹ ebabọn ra vwẹ iruo kẹ vwẹ ẹkuotọ ọfa, e se oniọvo ro nẹ ẹkuotọ ọfa rhe iruo rẹ ebabọn. Iniọvo ri ruiruo rẹ ebabọn kugbe iniọvo re vwomakpahotọ kẹ iruo rẹ ebabọn vwẹ ọmọke eyen e se Ẹko ro Ruiruo rẹ Ebabọn. Ayen yen kobaro rẹ iruo rẹ ebabọn, iniọvo re vwomakpahotọ kẹ iruo rẹ ebabọn vwẹ ọmọke kugbe iniọvo rehẹ ukoko na re vwomakpahotọ ke iruo na yen vwẹ ukẹcha kẹ ayen. Ẹko ro Ruiruo rẹ Ebabọn yan nẹ asan kpo asan vwẹ ekogho rẹ oghọn na vwẹrote.

DIE WỌ VWỌ TUA VWẸ ẸGA RI JIHOVA?

²⁴ Ọ da dianẹ wọ vwomakpahotọ kẹ Jihova re, kọyen wo vwo ẹwẹn wọ vwọ ga Jihova bẹdẹ. Kẹ, die yen wọ vwọ tua vwẹ ẹga ri Jihova? Wo de vwo obo wọ vwọ tua, ọ cha nẹrhẹ wọ vwẹ ẹgba vẹ ekuakua wo vwori vwo ruiruo vwẹ idjerhe rẹ aghwanre. (1 Kọr. 9:26) Ọna na cha nẹrhẹ wo tedje, ọ je cha chọn wẹ uko vwọ tẹnrovi obo re ma ghanre, ku wo ji che vwo uphẹn rẹ ẹga efa.—Fil. 1:10; 1 Tim. 4:15, 16.

²⁵ Ọyinkọn Pọl phi omamọ udje phiyotọ vwọ kẹ avwanre vwẹ ẹga rẹ Ọghẹnẹ. (1 Kọr. 11:1) Pọl nabọ rhanre oma rọyen vi vwẹ ẹga ri Jihova. Ọ mrẹvughe nẹ Jihova vwẹ uphẹn buebun vwọ kẹ. Pọl de si vwo rhe iniọvo rehẹ Kọrẹnt: “Ẹchẹ ọhẹhẹre rẹ iruo rọ ghwaotọ rhie phihọ kẹ vwẹ.” Ọ dia ọtiọyen ọ je hepha kẹ avwanre nonẹna? Vwọrẹ uyota, uphẹn buebun rhiephiyọ kẹ avwanre vwevunrẹ ukoko ri Jihova, ma rho vwẹ aghwoghwo rẹ iyẹnrẹn esiri rẹ Uvie na. Ẹkẹvuọvo, kirobo rọ hepha kẹ Pọl, e che rhiẹromrẹ “ukọn buebu” vwevunrẹ “ẹchẹ ọhẹhẹre” yena. (1 Kọr. 16:9) Pọl vwo owenvwe rọ vwọ ghwọku oma rọyen. Jokaphiyọ obo rọ tare: “Me nyẹ oma mẹ mi mi vwo kpotọ.” (1 Kọr. 9:24-27) Ọtiọyen wo ji ruẹ?

²⁶ E jiriro vwọ kẹ kohwo kohwo nẹ o vwo obo rọ vwọ tua vwẹ ẹga ri Jihova kirobo rẹ ẹdia rọyen muru. Ihwo buebun rehẹ ẹga ọkieje nonẹna fobọ vwo oboratẹnrovi. Tobọ vwẹ ọke rẹ ayen vwọ hẹ imitete, ọyen esẹ vẹ ini rayen kugbe iniọvo efa vwo jiro kẹ ayen. Ọtiọyena, ayen nabọ rhe riavwerhen rẹ iruo rayen vwẹ ẹga ri Jihova re, ayen viẹ idiekpọvwẹ-ẹ. (Isẹ 10:22) Oboravwọtua efa sa dia re vwo kpo iruo aghwoghwo na kudughwrẹn kudughwrẹn, ra vwọ ton uyono ri Baibol phiyọ, yẹrẹ ra vwọ ghwọrọ ọke vwo muegbe vwọ kẹ uyono. Obo re ma ghanre kẹ ọna, e jẹ e mudia gan ji ruiruo rẹ ẹga na vọnvọn. E de ru ọtiọyen, kẹ avwanre che brọghọphiyọ Jihova oma je vwẹ ẹga kẹ bẹdẹ.—Luk 13:24; 1 Tim. 4:7b, 8.