Bicha Iruo rẹ Uvie na Vwẹ Ekogho Wẹn Kugbe Vwẹ Akpọneje

ISERI RI JIHOVA ru orugba rẹ aroẹmrẹ ri Jesu ro shekpahen ẹdẹ rẹ oba na, rẹ ayen vwo ghwoghwo iyẹnrẹn esiri na vwẹ kasan kasan “re te oba rẹ akpọ na.” (Iruo 1:8; Mat. 24:14) E se vwo ru ọnana, ayen vwẹ ọke vẹ ẹgba rayen vwọ kpahotọ vwo vwobọ vwẹ iruo rẹ ẹga na. Ayen vwẹroso Jihova nẹ o che ru ọdavwẹ rẹ idibo rọyen, ọtiọyena kẹ ayen phi Uvie rẹ Ọghẹnẹ phiyọ ẹdia rẹsosuọ vwẹ akpeyeren rayen. (Mat. 6:25-34; 1 Kọr. 3:5-9) Ayen ghini rhiẹromrẹ ebruphiyọ ri Jihova.

ẸROEVWOTE RẸ EDAVWẸ RẸ UVIE NA VWẸ AKPỌNEJE

² Ihwo da mrẹ oborẹ avwanre ruiruo aghwoghwo na wan, ayen da je mrẹvughe nẹ avwanre vwẹ Baibol na vẹ ẹbe efa vwọ kẹ ihwo ọphẹ, kẹ ayen nọ: “Mavọ ovwan se vwo ru enana eje?” Vwọrẹ uyota, ọ guọnọ igho a ke sa teyen Baibol na vẹ ẹbe ukoko na. A je guọnọ igho a ke sa bọn je vwẹrote eghọn ukoko vwọ kẹ iniọvo re teyen ẹbe, re vwẹrote iruo aghwoghwo na vẹ iruo efa ri toroba ẹyan obaro rẹ iyẹnrẹn esiri na. Vwọba, a je vwẹ ukẹcha rẹ igho vwọ kẹ iniruo okinriariẹ, imishọnare, ekobaro oghẹresan, vẹ iniọvo efa rehẹ ẹga ọkieje rẹ oghẹresan rere ayen sa vwọ gbomavwra iruo rayen na. Ọtiọyena, iruo aghwoghwo rẹ iyẹnrẹn esiri na re ruẹ nonẹna guọnọ igho buebun tẹ ọ dia vwevunrẹ ekogho avwanre yẹrẹ vwẹ akpọneje. Kẹ tivọ yen igho na eje nẹcha?

³ Ihwo buebun ri vwo omavwerhovwẹn kpahen iruo rẹ Iseri ri Jihova toro itetoro vwo biẹcha iruo rẹ akpọeje. Ẹkẹvuọvo, Iseri ri Jihova yen me ru itetoro vwo biẹcha iruo rẹ ukoko na, evo tobọ vwẹ itetoro rayen vwo rhe oghọn ukoko rẹ Iseri ri Jihova phiọngun. Ayen vwẹrokere ẹwẹn rẹ omaevwoze ro rhe idibo rẹ Ọghẹnẹ vwẹ ọke awanre ri bicha ebabọn rẹ asan ra da vwẹ ẹga kẹ Jihova. (Eyan. 35:20-29; 1 Ikun 29:9) Itetoro evo sa dia iwevwin ra vwọ kẹ ukoko na siẹrẹ ohwo ro vworo de ghwu, efa ke rha hẹ itetoro rẹ ihwo, ikoko, yẹrẹ ikinriariẹ toro, ọke buebun imigho rẹ ohwo ọvuọvo toro ghwe buẹ-ẹn. E de ku ayen eje kugbe, eyen e vwo ruiruo rẹ ẹga na.

⁴ Iseri ri Jihova niro nẹ ọyen uphẹn rode rẹ ayen vwọ reyọ igho vẹ ekuakua rayen vwo bicha iruo aghwoghwo na. Jesu vẹ idibo rọyen vwo ekpeti rẹ igho, etiyin kọyen ayen vwọ mrẹ igho vwo ru oborẹ ayen guọnọ ru. (Jọn 13:29) Baibol na vuẹ avwanre kpahen eya ri gbe odibo kẹ Jesu vẹ idibo rọyen. (Mak 15:40, 41; Luk 8:3) Ọyinkọn Pọl je nabọ rhiabọreyọ ekuakua rẹ ihwo re guọnọ bicha iyẹnrẹn esiri na re je guọnọ vwobọ vwẹ iruo rẹ ẹga na toro vwọ kẹ. (Fil. 4:14-16; 1 Tẹsa. 2:9) Iseri ri Jihova je vwẹrokere ihwo rẹ ọke awanre ri ruiruo vẹ oruru, ri ji vwo ẹwẹn rẹ okẹ. Ọtiọyena, kẹ ayen sa vwẹ “ame rẹ arhọ na” vwọ kẹ ihwo ri vwo omamọ ẹwẹn vwẹ kasan kasan.—Ẹvwọ. 22:17.

ẸROEVWOTE RẸ EDAVWẸ RẸ UKOKO ỌVUỌVO

⁵ Itetoro ro nẹ otọ rẹ ubiudu rhe ọyen a je vwọ vwẹrote eghwaghwọrọ rẹ ukoko ọvuọvo. E mu imize-e; e ji bru igho kẹ ohwo-o yẹrẹ a yare igho-o. Ekpeti rẹ itetoro hẹ evunrẹ asan rẹ avwanre da ga ẹga rere kohwo kohwo se vwo toro “kirobo rẹ udu rọye dje kẹ.”—2 Kọr. 9:7.

⁶ Ẹsosuọ, a vwẹ igho re torori vwọ dẹ erọnvwọn sansan ra guọnọre vwẹ Ọguan Ruvie, a je reyọ vwọ vwẹrote ọguan na. Ekpako na se brorhiẹn nẹ a vwẹ igho evo vwo rhe oghọn ukoko fikirẹ iruo rẹ akpọeje na. Ukoko ọvuọvo yen che brorhiẹn rẹ uche igho ra cha reyọ yanran na. Idjerhe nana yen ikoko buebun vwo ru itetoro kọke kọke vwọ kẹ iruo rẹ akpọeje. Ihwo eje da nabọ riẹn kpahen edavwẹ rẹ ukoko na nọke ra ruọke, e rhe che ru aghwoghwo rẹ itetoro kọke kọke-e.

ẸROEVWOTE RẸ ITETORO

⁷ E de ku uyono phiyọ nu, iniọvo ivẹ ki che kere igho ra mrẹre vwẹ ekpeti na, ji sio phiyotọ. (2 Ivie 12:9, 10; 2 Kọr. 8:20) Ekpako na che ru omamọ ọrhuẹrẹphiyotọ rẹ obo ra cha sẹro rẹ igho na wan tavwen a ke reyọ vwo rhe oghọn ukoko yẹrẹ vwo ru edavwẹ rẹ ukoko na. Kemeranvwe kemeranvwe, oniọvo rọ vwẹrote igho rẹ ukoko na muegbe rẹ iyẹnrẹn rẹ igho vwọ kẹ ukoko na, emeranvwe erherha ọrọvwẹrote iruo rẹ ekpako na ko che vwo ọrhuẹrẹphiyotọ ra vwọ fuẹrẹn iyẹnrẹn rẹ igho rẹ ukoko na.

EGHWAGHWỌRỌ RẸ OKINRIARIẸ

⁸ Iniọvo rehẹ okinriariẹ ọvuọvo yen toro igho ra vwọ vwẹrote eghwaghwọrọ rẹ isikoko vẹ eghwaghwọrọ efa vwẹ okinriariẹ na. E mu ekpeti rẹ itetoro phiyọ asan sansan vwẹ asan re de ru osikoko rere e se vwo toro igho vwọ kẹ okinriariẹ na. Vwọba, ikoko sansan se toro igho vwẹ ọke efa fikirẹ eghwaghwọrọ re vwomaphia nọke ra ruọke.

⁹ Ofori nẹ ikinriariẹ vwẹrote eghwaghwọrọ sansan re vwomaphia, ji toro igho efa vwọ kẹ iruo rẹ akpọeje. Okinriariẹ na rha sa hwa igho ra ghwọrọre vwẹ osikoko na-a yẹrẹ igho rẹsosuọ ro fori nẹ ayen ghwọrọ vwọ kẹ osikoko rọ cha-a, kerẹ igho ro fori nẹ ayen hwa phiyọ asan re de che ru osikoko na, oniruo okinriariẹ na sa vuẹ ikoko na kpahen uphẹn rẹ ayen vwo ru itetoro. Ẹko rẹ ekpako ọvuọvo yen che brorhiẹn rẹ igho rẹ ukoko rayen che toro phiyọ ekpu rẹ okinriariẹ na. Ayen ki che ru itetoro na vwo nene orhiẹn rẹ ukoko na bruru.

¹⁰ Eta rẹ igho de she vwẹ okinriariẹ na, o de ji fo nẹ ekpako rẹ okinriariẹ na nyo kpahọn, ke che se echidiotọ rẹ ekpako vwẹ ẹdẹ rẹ osikoko na. Ofori nẹ ekpako na eje rhọnvwephiyọ korhiẹn korhiẹn re bruru jokpanẹ orhiẹn ro churobọ si eghwaghwọrọ rẹ okinriariẹ na evo. Ofori nẹ e si orhiẹn rẹ ayen rhọnvwephiyọ na phiyotọ, a me je ghwobọphiyọ kọke kọke a da hwa igho na.

¹¹ E ji vwo ọrhuẹrẹphiyotọ ra vwọ fuẹrẹn iyẹnrẹn rẹ igho rẹ okinriariẹ na nọke ra ruọke.

ẸROEVWOTE RẸ IVWIOGBERE

¹² Ọdavwẹ ọvo kiriguo rẹ ekpeti rẹ igho rẹ Jesu vẹ idibo rọyen vwori yen, ayen vwọ vwẹ ukẹcha kẹ ivwiogbere na. (Mak 14:3-5; Jọn 13:29) Ọnana jẹ oghwa rẹ Onenikristi rhi te nonẹna, kọyensorọ Jesu vwọ ta: “Ovwan vẹ igbere na re gba herọ vwẹ ọke ejobi.” (Mak 14:7) Die yen Iseri ri Jihova ruẹ kpahen ẹdia nana nonẹna?

¹³ Ọke evo, iniọvo ri fuevun vwẹ ukoko na sa guọnọ ukẹcha fikirẹ ọghwo, ọga, yẹrẹ ebẹnbẹn efa. Ihwo rẹ orua vẹ ihwo efa re riẹn kpahen ẹdia nana sa vwẹ ukẹcha phia. Ọnana ghwa rhọnvwephiyọ eta rẹ ọyinkọn Jọn: “Ọ da dianẹ ohwo vwo efe rẹ akpọ na ejobi rọ da mrẹ omoni rọye rẹ akpọ bẹn, ro de chuko kuo, komavọ ẹguọnọ rẹ Ọghẹnẹ vwọ sa dia evun rọye? Emọ na, we vwo ẹguọnọ rẹ unu ọvo-o eyẹ unu ẹrarọ-ọ ẹkẹvuọvo ọ rẹ uruemu kugbe uyota.” (1 Jọn 3:17, 18; 2 Tẹsa. 3:6-12) Ẹga rẹ uyota churobọ si ra vwọ vwẹ ukẹcha kẹ iniọvo ri fuevun vwẹ ukoko na.—Jems 1:27; 2:14-17.

¹⁴ Vwẹ ileta rẹsosuọ rẹ ọyinkọn Pọl si rhe Timoti, Pọl de dje obo ra sa vwọ vwẹ ukẹcha kẹ ihwo re guọnerọ. Wo se se uchebro nana vwẹ 1 Timoti 5:3-21. Ẹsosuọ, Onenikristi ọvuọvo yen vwo oghwa rọ vwọ vwẹrote evwruwevwin rọyen. Emọ, ivwrọmọ, vẹ ihwo rẹ orua efa yen vwo oghwa re vwọ vwẹrote emare vẹ ihwo re muọga. Ọke evo, ihwo ri suẹn sa vwẹ ukẹcha phia, ọtiọyena ihwo rẹ orua yẹrẹ ihwo efa sa vwẹ ukẹcha kẹ ihwo tiọyena rere ayen sa vwọ mrẹ ukẹcha vwo mie ihwo ri suẹn. Ẹdia ọvo sa vwomaphia, a me vuẹ ihwo ukoko na eje kpahen oborẹ ayen sa vwọ vwẹ ukẹcha kẹ iniọvo evo ri fuevun ga krẹre. Ihwo re orua rha herọ re sa vwẹ ukẹcha kẹ ihwo tiọyena-a, ihwo ri suẹn rha je sa vwẹ ukẹcha phia-a, ekpako na sa jiroro rẹ obo ra sa vwọ vwẹ ukẹcha phia. Inenikristi niro nẹ ọyen uphẹn rode ra vwọ vwẹ ukẹcha kẹ ihwo re guọnọ ukẹcha.

¹⁵ Iniọvo buebun se rhiẹromrẹ ẹdia ọgangan fikirẹ omukpahen, ofovwin, etọ re bẹrẹre, oghwe, ọke owẹnvwe, yẹrẹ ẹdia efa re rhiẹromrẹ vwẹ ọke ọgangan nana. (Mat. 24:7-9) Emu sa kanre iniọvo rehẹ ikoko sansan, ọtiọyena, Ẹko Rọvwẹrote na se vwo ọrhuẹrẹphiyotọ rere iniọvo rehẹ asan efa vwọ vwẹ ukẹcha phia. Ọtiọyen ọ je hepha vwọ kẹ Inenikristi rehẹ Asia Minor, ayen mu emuọre vwo rhe iniọvo rayen rehẹ Judia vwẹ ọke rẹ owẹnvwe vwo fi. (1 Kọr. 16:1-4; 2 Kọr. 9:1-5) Avwanre da vwẹrokere udje rayen, jẹ avwanre djephia nẹ avwanre vwo ẹguọnọ rẹ iniọvo avwanre, rọ dia obo re vwo vughe idibo ri Jesu Kristi.—Jọn 13:35.

ẸGHARỌ RẸ ẸBE

¹⁶ Baibol na vẹ ẹbe ukoko na pha ghanghanre vwẹ iruo aghwoghwo na. Ọke buebun, ekpako na vwẹ odibo rowian vwo muẹ rọ cha vwẹrote ẹbe rẹ ukoko na. Ofori nẹ iniọvo re vwo mu ẹdia nana reyọ iruo na ghanghanre. Ayen nabọ vwo imuẹro nẹ ẹbe herọ rẹ iniọvo rẹ ukoko na che vwo ruiruo.

¹⁷ Kerẹ Inenikristi ri bromaphiyame re, avwanre riẹnre nẹ ọke, ẹgba, ena, ekuakua rẹ avwanre vwori, ji te arhọ rẹ avwanre dede, obọ rẹ Ọghẹnẹ yen i nurhe, ko ji fo nẹ a reyọ ayen vwọ ga. (Luk 17:10; 1 Kọr. 4:7) A da vwẹ ekuakua rẹ avwanre vwori vwo ruiruo vwẹ idjerhe abavo, jẹ avwanre djephia nẹ avwanre vwo ẹguọnọ okokodo kpahen Jihova. Avwanre vwo owenvwe ra vwọ vwẹ oborẹ avwanre vwori vwo brọghọphiyọ Jihova oma, kidie avwanre riẹnre nẹ oma vwerhọn kpahen kemu kemu rẹ avwanre vwọ kpahotọ vwo nẹ otọ rẹ ubiudu rhe. (Isẹ 3:9; Mak 14:3-9; Luk 21:1-4; Kọl. 3:23, 24) Jesu da ta: “Ọphẹ ovwan mrẹrẹ, ọphẹ ovwan je vwọ kẹ rhe.” (Mat. 10:8) Avwanre da vwẹ oma avwanre vwọ kpahotọ je reyọ oborẹ avwanre vwori vwo ruiruo vwẹ ẹga ri Jihova, kẹ avwanre cha mrẹ aghọghọ gbidiki.—Iruo 20:35.