Orhan vẹ Imajiki Eyẹn Obo re Brare

Eshu guọnọre nẹ wo vwobọ vwẹ imajiki. Ihwo buebun ze izobo vwọkẹ esẹ ride rayen vẹ ihwoefa ri ghwuru siẹnẹ ihwo ri ghwuru na sa vwẹ ukẹcha kẹ ayen. Ayen ruẹ ọnana fikiridie ayen djoshọ rẹ ihwo ri ghwuru na. Ayen kuẹ ubiosa vẹ erọnvwọn rẹ imajiki efa phiyọ. Ayen da “ihuvwun” rẹ ayen rori nẹ i vwo ẹgba rẹ imajiki, je reyọ ayen vwo ghworo oma. Ayen ji sẹro rẹ erọnvwọn evọ vwẹ iwevwin rayen, ayen ton efa phiyọ otọ fikiridie ayen roro nẹ ekuakua nana sa vwẹ ukẹcha kẹ ayen. Ihwoefa reyọ “ihuvwun” rẹ imajiki vwọ chueki, vwo siẹ ọdavwini, vwọ sẹn ohwo rẹ ayen cha rọvwọn phiyotọ fikiridie ayen roro nẹ ihuvwun nana cha nẹrhẹ ayen phikparobọ.

Jihova ọvo yin che se sivwin uwe nẹ obọ rẹ Eshu siẹrẹ wọ da dia ugbeyan rọyen. Jihova vẹ emekashe rọyen vwo ẹgba vrẹ Eshu vẹ emekashe rọyen dibi dibi. (Jems 2:19; Ẹvwọphia12:9) Jihova che dje ẹgba rọyen phia fikirẹ igbeyan rọyen, ihwo re nabọ fuevun vwọkẹ.—2 Ikun Rivie 16:9.

Ota rẹ Ọghẹnẹ tare nẹ: “Ovwan rhe yono epha ẹbọ-ọ.” Jihova vwo utuoma kpahen orhan vẹ imajiki, fikiridie iruemu nana sa nẹrhẹ ohwo she phiyọ ufi rẹ Eshu rọ dia Idẹbono na.—Livitikọs 19:26.