Umiovwo rẹ Utuoma vẹ Omaẹfẹnẹ Ghwa Cha Se Ghini Vwoba—Die Yen Baibol na Ta kpahọn?

Ihwo buebun gbe ozighi nonẹna fikirẹ utuoma ọgangan rẹ ayen vwo kpahen ihwo efa. Ayen gboja kẹ ihwo fikirẹ ohọroma rayen, ẹga rayen, asan rẹ ayen nurhe, oka rẹ ohwo rẹ ayen hepha, yẹrẹ ẹdia efa tiọyena. Ozighi tiọyena phie oshọ phiyọ ihwo oma marho vwẹ asan re da phia, ọ je sua omaẹwan kẹ ihwo, nẹrhẹ ayen she ọkuọrọn, ọ tobọ je sua ughwu kẹ ihwo evo dede.

Baibol na tarọ phiyotọ jovwore nẹ ihwo “cha djoma, che vwo ẹguọnọ rẹ emu esiri-i,” ayen ji “che vwo ẹguọnọ-ọ.” (2 Timoti 3:1-5) Ọtiọyena, umiovwo rẹ utuoma vẹ omaẹfẹnẹ ghwa cha se ghini vwọba? Die yen Baibol na ta kpahọn?

Oborẹ umiovwo rẹ utuoma vẹ omaẹfẹnẹ ghwa cha che vwo vwoba

Baibol na kẹ avwanre imuẹro nẹ Ọghẹnẹ se phioba phiyọ umiovwo tiọyena, jẹ avwanre vwo imuẹro nẹ o che ruo.

• “A cha ghwọrọ ihwo umwemwu . . . Ẹkẹvuọvo ihwo dẹndẹn cha vwẹ otọrakpọ na vwọ riuku, Oma cha vwerhen ayen gangan kidie ayen che vwo ufuoma gbidiki.” (Une rẹ Ejiro 37:9-11) Ọghẹnẹ cha vwo uphẹn kẹ ihwo re gbe ozighi nẹ e sua omaẹwan kẹ ihwo bẹdẹẹ.

• “[Ọghẹnẹ] che rien ameoviẹ eje vwo nẹ ẹro rayen, ughwu rha cha dia ọfa-a, uvweri yẹrẹ oviẹ yẹrẹ ọmiaovwẹ rha cha dia ọfa-a.” (Ẹvwọphia 21:4) Ọghẹnẹ cha rhuẹrẹ umiovwo rẹ ihwo ri gbe ozighi tiọyena so vwọ kẹ ihwo efa kerẹ omaẹwan, ọga iroro vẹ omaemuophiyọ.

• “Evrẹnushi cha dia.” (Iruo 24:15) Ọghẹnẹ cha rhọvwọn iduduru rẹ ihwo nẹ ushi ji te ihwo ri ghwuru fikirẹ utuoma vẹ omaẹfẹnẹ.

Obo re se vwo yerin ghene utuoma nonẹna

Vwọ vrẹ iphiẹrophiyọ rẹ Baibol na vwọ kẹ avwanre kpahen obaro na, ọ je vwẹ ukẹcha kẹ avwanre vwo yerẹn ghene utuoma nonẹna. Mrẹ oborẹ Baibol na kpahenphiyọ enọ eghanghanre nana wan:

• Die yen e se ru vwo phi utuoma rọ sua ozighi kparobọ? Mrẹ ẹkpahọnphiyọ rẹ Baibol na vwọ phia vwẹ uwevwin orhẹrẹ na “E Se Phi Utuoma Kparobọ!.”

• Diesorọ ọghẹnẹ vwọ vwẹ uphẹn kẹ ojaẹriọ rhi te nonẹna? Mrẹ oborẹ Baibol na kpahenphiyọ onọ nana wan vwẹ ividio rẹ, Diesorọ Ọghẹnẹ Vwọ Vwẹ Uphẹn kẹ Ojaẹriọ?