Oborẹ Emiọvwọn sa Vwọ Vwẹ Odjekẹ kẹ Emọ Rayen

• Obo ro fori nẹ wọ riẹn

• Obo wo se ru

• Oborẹ emiọvwọn tare

Obo ro fori nẹ wọ riẹn

Vwẹ asan evo nonẹna, emọ vwo omamọ oyerinkugbe vẹ esẹ kugbe ini rayen, ayen bru esẹ vẹ ivi rayen ra vwọ kẹ uchebro. Vwẹ asan efa, emọ bru igbeyan rayen ra vwọ kẹ uchebro.

Emọ da vwẹroso igbeyan rayen ọ cha nẹrhẹ ayen vwẹ ẹro okueku vwo ni uchebro rẹ esẹ vẹ ini rayen. Emọ tiọyena da rho te ighene re, esẹ vẹ ini rayen ki che no nẹ ayen che se sun aye-en. Ọnana gbe ohwo unu-u! Kidie emọ na de nene ohwohwo ghwọrọ ọke buebun kugbe, kọ sa họhọ nẹ ayen yen yọnre ohwohwo ghwanre ukperẹ esẹ vẹ ini rayen.

Diesorọ ọ vwọ lọhọ kẹ emọ, rẹ ayen vwo sikẹrẹ igbeyan rayen ukperẹ esẹ vẹ ini? Je roro kpahen oboresorọ.

• Isikuru. Emọ da ghwọrọ ọke buebun vẹ emọ efa, ayen mi rhi sikẹrẹ ohwohwo mamọ, te asan rẹ ayen de nyo ota rẹ igbeyan rayen vwọ vrẹ e rẹ esẹ vẹ ini. Uruemu nana sa rhe braphiyọ ọke rẹ ayen de te ighene re.

  

• Ovwan nabọ ghwọrọ ọke kuẹgbe-e. Vwẹ orua buebun, emọ de nẹ isikuru rhe ayen mrẹ ohwo vuọvo vwẹ uwevwi-in. Ọkiọvo esẹ vẹ ini rayen kpo iruo.

• Oborẹ ighene yeren akpọ wan. Emọ de te ighene re, kẹ ayen ta ota, sẹn osẹnvwe, ji ruẹ họhọ ighene efa. Oborẹ emọ efa ta kpahen ayen yen ma ghanre kẹ ayen vwọ vrẹ oborẹ esẹ vẹ ini rayen rorori.

• Ekiẹchuọ. Ighe, ine, vẹ ekuakua buebun ra mrẹ vwẹ eki nonẹna, e ruẹ ayen fikirẹ ighene, ọnana kọ nẹrhẹ ọ bẹn kẹ esẹ vẹ ini, rẹ ayen vẹ emọ rayen vwo vwo ẹruọ rẹ ohwohwo. Dr. Robert Epstein da ta: “Ikọpini buebun che she siẹrẹ ighene buebun de wene oborẹ ayen yeren akpọ wan.”a

Obo wo se ru

• Sẹro rẹ omamọ oyerinkugbe vẹ ọmọ wẹn.

  Baibol na da ta: “Eta nana ri mi jiji kẹ wẹ nonẹ na, me dia evun rẹ udu wẹn, wọ me vwẹ ayen yono emọ wẹn, wo mi gbe ikun rayen siẹ wo de tidia vwẹ uwevwi wẹn vẹ ọke ru wọ da yan vwẹ idjerhe, vẹ ọke wo de shevwerhe totọ, kugbe ọke wo de vrẹn.”—Urhi Rivẹ 6:6, 7.

  Emọ wẹn sa vwẹ ighene efa vwo ru igbeyan, ẹkẹvuọvo wo jẹ ayen reyọ ẹdia wẹn kerẹ ọsẹ yẹrẹ oni-i. Omamọ iyẹnrẹn rọ herọ kọna: Egberianriẹn tare nẹ buebun rẹ emọ vẹ ighene muọghọ kẹ esẹ vẹ ini rayen, ayen je guọnọ ru obo re cha nẹrhẹ oma vwerhen ayen. Wo de vwo omamọ oyerinkugbe vẹ emọ wẹn, uchebro wẹn ko se vwo ọkpan vwọ vrẹ e rẹ igbeyan rayen.

  

  “Ofori nẹ wo nene emọ wẹn ghwọrọ ọke kugbe, nene ayen ru erọnvwọn sansan kugbe kẹdẹ kẹdẹ, kerẹ emu echere, orufon rẹ uwevwin, kugbẹ iruo ra vwọ kẹ ayen vwẹ isikuru. Nene ayen te igemu, ji ni ifimu, yẹrẹ TV. Wo ghwe roro nẹ ‘unọke ọvo yẹrẹ ivẹ’ teri-i. Wo che se vwo omamọ rẹ oyerinkugbe siẹrẹ wọ rha ghwọrọ omamọ ọke vẹ emọ wẹ-ẹn!”—Lorraine.

• Wo jẹ emọ wẹn reyọ edjedje rayen ọvo vwo ruẹ igbeya-an.

  Baibol na da ta: “Ughẹnghẹn vọn evun rẹ udu rẹ omotete.”—Isẹ 22:15.

  Oma vwerhen emiọvwọn evo siẹrẹ emọ rayen de vwo igbeyan buebun. Karophiyọ nẹ dede nẹ ọmọ sa nabọ nene edjedje rọyen ru kugbe, ọ cha sa vwẹ edjedje rọyen ọvo vwo ru igbeya-an. Ighene cha sa vwẹ uchebro vẹ odjekẹ rẹ ighene efa guọnọre vwọ kẹ aye-en, emiọvwọn ọvo yen sa vwẹ omamọ uchebro kẹ emọ rayen.

  “Igbeyan rẹ emọ wẹn sa riẹn erọnvwọn evo, ẹkẹvuọvo ayen vwo ona rẹ akpeyerẹn, yẹrẹ ọhọ vẹ aghwanre rẹ ayen sa vwọ chọn ighene efa uko vwo bru omamọ rẹ orhiẹ-ẹn. Emọ de nene uchebro rẹ esẹ vẹ ini rayen, ememerha na, ayen mi rhi yerin tedje.”—Nadia.

• Vwẹ omamọ uchebro kẹ ayen.

  Baibol na da ta: “Ohwo rọ yan nene evwaghwanre ko vwo aghwanre.”—Isẹ 13:20.

  Emọ wẹn vwọ ghwanra cha na, ayen cha mrẹ erere mamọ siẹrẹ ayen de nene uwe ghwọrọ ọke kugbe. Dia omamọ udje kẹ ayen.

  “Udje rẹ esẹ vẹ ini yen ma ghanre kparobọ rẹ emọ sa vwẹrokere. E de yono emọ oborẹ ayen se vwo vwo ẹguọnọ ji muọghọ kẹ esẹ vẹ ini rayen, kẹ ayen che vwẹ ẹwẹn rẹ ayen vwọ dia kerẹ esẹ vẹ ini rayen siẹrẹ ayen da ghwanre re.”—Katherine.