Emọ Eyen ‘Ughwẹ rẹ Ọrovwohwo Vwọ Ghare Avwanre’

WO DE nyo ota na “ughwẹ,” die yen djẹ ro owẹ ẹwẹn? Ẹwẹn wẹn se kpo igho, otọ, uwevwin yẹrẹ orọnvwọn ọghanghanre ọvo rẹ ohwo rẹ orua yan jovwo kẹ wẹ. O toro obo rọ hephaa, ughwẹ ọyen obo re ghanre mamọ, ọtiọyena ofori nẹ wọ nabọ vwẹrote.

Baibol na tare nẹ emọ eyen ‘ughwẹ rẹ Ọrovwohwo vwọ ghare avwanre.’ (Une 127:3) Vwọrẹ uyota, emiọvwọn re dia Inenikristi nẹ emọ rayen kerẹ okẹ ọghanghanre ro nẹ obọ rẹ Ọsẹ rayen rọhẹ odjuvwu rhe, ọtiọyena kẹ ayen ruẹ oborẹ ayen se ru eje vwọ chochọn rayen je vwẹrote ọdavwẹ rẹ ugboma rayen, obo ri kpokpo ayen ẹwẹn, je vwẹ ukẹcha kẹ ayen vwo siẹkẹrẹ Jihova.

Jẹ, ọ da ohwo mamọ nẹ emiọvwọn evo nonẹna nẹ emọ rayen kerẹ ughwẹ ro nẹ obọ rẹ Ọghẹnẹ rhee. (Aiz. 49:15; 2 Tim. 3:1-3) Efa ghene guọnọ vwẹrote emọ rayen, jẹ ayen mrẹ bẹnbẹn ayen vwo ru ọtiọyen fikirẹ egbabọse sansan. Erhọ yen egbabọse evo re nẹrhẹ ọ bẹn kẹ emiọvwọn ayen vwọ vwẹrote emọ rayen? Die yen Jihova guọnọ mie esẹ vẹ ini? Kẹ mavọ yen emiọvwọn re dia Inenikristi sa vwọ yọnrọn emọ rayen ghwanre vwo nene oborẹ Jihova guọnọre?

EGBABỌSE NA

Okeke ro nẹ obọ rẹ orua vẹ ihwo efa cha. Vwẹ asan evo vwẹ akpọ na, ihwo ri vwiẹ emọ buebun yen e me muọghọ kẹ vwevunrẹ orere na. Ọtiọyena, aye gbe ọshare se hirharoku okeke ro nẹ obọ rẹ ihwo orua vẹ irivẹ cha rẹ ayen vwo vwiẹ emọ ibuebun—ọkiọvo e sa tobọ bun vrẹ e rẹ aye gbe ọshare na sa vwẹrote.
Oshọ rẹ obaro na. Vwẹ ẹkuotọ evo rẹ ughwu rẹ imitete da gan mamọ fikirẹ ega, emu ra mrẹ riaa yẹrẹ kidie omamọ re họspito herọọ, ọnana kọ nẹrhẹ emiọvwọn evo davwẹngba ayen vwo vwiẹ emọ buebun, nẹ ọ da tobọ dianẹ evo ghwuru dede, ayen je sa mrẹ emọ vwo yeren akpọ. Efa se brorhiẹn ayen vwo vwiẹ emo ibuebun vẹ ẹwẹn nẹ emọ na cha vwẹrote ayen siẹrẹ ayen da ghwo nu. A mrẹ ọnana mamọ vwẹ ẹkuotọ rẹ igọmẹti rayen vwo ọrhuẹrẹphiyotọ ra vwọ vwẹrote ihwo re ghworee.
Ọrhuẹrẹphiyotọ re vwo jẹ emọ evwiẹ buẹn. Vwẹ asan efa, eya re guọnọ vrabọ rẹ evun ẹmrẹ fobọ mrẹ asan ro fori nẹ ayen ra a da sa vwẹ ena tiọyena kẹ ayeen. Oshọ mu ihwo evo kpahen obo ri nẹ obuko rẹ ena ra vwọ vrabọ rẹ evun ẹmrẹ re dia emamọọ cha. Vwọ kẹ efa, ayen cha sa dẹ erọnvwọn nanaa kidie e pha ghanghanre.a

DIE YEN JIHOVA GUỌNỌ MIE ESẸ VẸ INI?

Orua re riakpọ kuẹgbe. Ọsẹ na nabọ kerhọ rẹ ọmọtẹ rayen ọke rọ vwọ ta ota kẹ, jẹ oni na vẹ ọmọshare rayen do ibọrọ kẹ ohwohwo. — Nene ọmọ wẹn ọvuọvo ghwọrọ ọke kugbe

Vwẹrote ọdavwẹ rẹ emọ wẹn. Oghwa ra vwọ vwẹrote emọ, esẹ vẹ ini yen Jihova vwerọ kẹ. Ọ guọnọre nẹ ayen wian gangan rere ayen sa vwọ dẹ emu, iwun kugbe asan rẹ emọ na cha dia. Jihova je guọnọ nẹ emiọvwọn yono emọ rayen. Ọtiọyena, ọ dia ayen di siobọnẹ emọ na kpo isikuru ra diaa. Ukperẹ ọtiọyen, emọ na ki nẹ uwevwin kpo isikuru rẹ ayen vwọ ghwanra na vwẹ otọ rẹ ẹroevwote rẹ esẹ vẹ ini na, ọnana kọ cha nẹrhẹ emọ na riẹn nẹ ayen vwo ẹguọnọ rayen, oshọ rhe che mu ayeen. Dedena, ọ dia ọyen Jihova vwọ rhẹro nẹ emiọvwọn fe mamọọ kidie ọyen ohwo ro nuẹ. Ọyensorọ, Jihova vwọ sane emiọvwọn re dia ivwiogbere re wian gangan nẹ e yọnrọn Ọmọ rọyen ghwanre.—Mat. 13:55, 56; Luk 2:24.

Odjekẹ ri Baibol: “Vwọrẹ uyota, ọ da dianẹ ohwo ọvo sa vwẹrote e robọ rọye-en, ma rho kẹ ihwo rẹ evwruwevwin rọyen, kọyen ọ sen esegbuyota na, ọ je bra vrẹ ohwo ro jẹ esegbuyota evwo.”—1 Tim. 5:8.

Jihova riẹnre nẹ emiọvwọn sa guọnọ ukẹcha rẹ ayen vwọ ghwanra na. Vwọrẹ uyota, idjerhe ọvo rẹ emọ se vwo brọghọ phiyọ esẹ vẹ ini rayen oma yen ayen vwo ru ọrhuẹrẹphiyotọ rẹ oborẹ ayen cha vwẹrote ayen wan vwẹ ọke ọghwo rayen. (Ẹyan. 20:12; 1 Tim. 5:4) Jẹ, siẹrẹ emiọvwọn da vwẹ oborẹ ayen cha vwẹrote emọ rayen wan vwọ karo ukpe oborẹ emọ rayen cha vwẹrote ayen wan, ọnana ghwa omavwerhovwẹn bru Jihova ra.—2 Kọr. 12:14.

Vwẹ ukẹcha kẹ ayen vwo sikẹrẹ Jihova. Emiọvwọn re dia Inenikristi vwo oghwa rẹ ayen vwo yono emọ rayen vwo vwo ẹguọnọ ri Jihova je vwẹ ẹga kẹ. Jihova ni uyono nana kerẹ uyono rọ ma ghanre vwẹ uyono ra vwọ yọnrọn rẹ emọ.—Diut. 6:6, 7.

Odjekẹ ri Baibol: “Ovwan vwẹ ọghwọku kugbe uchebro ri Jihova vwọ yọnrọn [emọ rẹ ovwan].”—Ẹfe. 6:4.

JIHOVA GUỌNỌRE NẸ WỌ YỌNRỌN EMỌ VWO NENE OBO RỌ GUỌNỌRE

Aye gbe ọshare re ta ota kuẹgbe vwevunrẹ uwevwin rayen. Baibol ro rhie phiyọ hẹ enu rẹ imẹjẹ vwẹ obaro rayen. — Ovwan ta ota kpahen uche emọ rẹ ovwan guọnọ vwiẹ phiyotọ

Jiroro kpahen obaro na. Ọ da dianẹ wọ jiroro wo vwo vwiẹ emọ, jomaotọ roro kpahen ẹdia ru wọ hepha. Kerẹ udje, wo vwo igho ru wọ cha vwọ dẹ emu, iwun ji yono emọ buebun vwẹ isikuru? Ọ rha dia ọtiọyeen, wẹ vẹ ọrivẹ orọnvwe wẹn gba ta ota kpahọn se ovwan che si uche emọ rẹ ovwan che vwiẹ kpotọ rere ovwan sa vwọ vwẹrote ayen vwo nene oborẹ Jihova guọnọre. Uyota nẹ, Jihova riẹnre nẹ ọ dia erọnvwọn eje wọ jiroro kpahen vwẹ akpeyeren yen phia vwo nene obo ra jiroro rayeen. (Aghwo. 9:11) Ẹkẹvuọvo, o che bruba ẹgbaẹdavwọn rẹ ovwan vwọ dia omamọ emiọvwọn ri ru obo rọ guọnọre.

Odjekẹ ri Baibol: “Iroro rẹ ohwo rọ vwẹ ẹro te otọ je yovwo-o, ẹkẹvuọvo ohwo ro bru okpakpa che fiabọ.”—Isẹ 21:5.

“Ono vwẹ usun rẹ ovwan na rọ guọnọ bọn uwevwin ro kpenu, ro che je chidia totọ tavwen rere o roro uchunu rọ cha ghwọrọ ọ sa vwọ riẹn sẹ o vwo igho ro che te vwọ bọn re?”—Luk 14:28.

Vwẹ Jihova kobaro vwevunrẹ orua wẹn. Jẹ ẹga ri Jihova dia obo re ma ghanre vwẹ orua wẹn. Ọ da dianẹ wo vwiẹ emọ re, davwẹngba vwo yono ayen ọvuọvo vwo vwo ẹguọnọ ri Jihova. Vwẹ ukẹcha kẹ ayen vwo yono je nabọ kerhọ siẹrẹ ayen dahẹ uyono. Nene ọrhuẹrẹphiyotọ rẹ Ẹga rẹ Orua kudughwrẹn kudughwrẹn. Yono emọ wẹn wọ vẹ ayen dahẹ iruo aghwoghwo na. Wo mu oghwa ro te we kerẹ ọsẹ yẹrẹ oni vwọ kẹ emọ re kpakore yẹrẹ vwọ kẹ ihwo rẹ oruaa. Ra vwọ yọnrọn emọ rere i se vwo vwo ẹguọnọ ri Jihova guọnọ ọke vẹ ẹgbaẹdavwọn, ẹkẹvuọvo a mrẹ vwo dje erere no chaa.

Odjekẹ ri Baibol: “O vwo orọnvwọn ọfa rọ kẹ vwẹ aghọghọ vrẹ ọnana-a: ri mi vwo nyo nẹ emọ mẹ yan vwevunrẹ uyota na.”—3 Jọn 4.b

Vwẹroso Jihova. Owenẹ wọ guọnọ tuẹn emọ evwiẹ phiyọ yẹrẹ wo vwiẹ emọ re, jẹ o muwẹro nẹ iwan ri Jihova ghanre vrẹ irueru yẹrẹ ẹkuruemu rehẹ ekogho rẹ avwanre dia.

Ifoto: 1. Ọse vẹ oni kugbe ọmọshare rayen chidia asan ọvo vwẹ uyono. Ọmọ na rionbọ kpenu rọ guọnọ kpahanphiyọ onọ. 2. Orua ri ruiruo rẹ aghwoghwo na kuẹgbe. Ọsẹ na vẹ ọmọtẹ rayen yen gba yan, oni na vẹ emọ rayen ivẹ ke rha usun. — Ọ guọnọ ọke vẹ ẹgbaẹdavwọn ra sa vwọ vwẹ ukẹcha kẹ emọ vwo vwo ẹguọnọ ri Jihova

Wọ da jojẹ wo vwo siobọ rẹ uche emọ ru wọ guọnọ vwiẹ kpotọ, vwẹroso Jihova nẹ ọ cha vwẹ obo ru wọ guọnọre vwẹ ọke ọghwo wẹn vwọ kẹ wẹ. Kẹnoma kẹ uruemu ra vwọ reyọ emọ vwo ruẹ obo ra cha “ghwo kẹ.” Wo jẹ oshọ mu we nẹ e che gbobọnyẹ wẹẹn. Jihova veri nẹ ọyen cha vwẹrote we, o vwo ọke vuovọ ro che vwo jẹ ive rọyen eruo gbaa.—Jos. 23:14.

Odjekẹ ri Baibol: “Vwẹ udu wẹn ejobi vwọ kpahe Ọrovwohwo, wọ vwẹ ẹro suọ oma obọ wẹ-ẹn. Vwẹ idjerhe wẹn ejobi rhọvwọ; kọ cha kpọ idjerhe wẹn ejobi vi.”—Isẹ 3:5, 6.

“Me dia omotete jovwo re, vwẹ asakiephana me rha ghwore; ẹkẹvuọvo me je mrẹ ọvwata ra senre-e eyẹ emọ rọye re yare emu re ke ria-a.”—Une 37:25.

“Ọtiọyena, ovwan gba rha guọnọ Uvie na vẹ ophiọnphiọn rọyen ẹsosuọ, ka vwẹ erọnvwọn nana ejobi ri chekọ na vwọ ba kẹ ovwan.”—Mat. 6:33.

Emọ eyen okẹ ọghanghanre rẹ Jihova vwọ kẹ esẹ vẹ ini. Mavọ yen oma cha vwerhen Jihova te siẹrẹ esẹ vẹ ini de nene obo rọ guọnọre! Ayen vwẹrote ọdavwẹ rẹ ugboma, obo ri kpokpo ayen ẹwẹn je vwẹ ukẹcha kẹ emọ rayen vwo siẹkẹrẹ Jihova; ayen jiroro rẹ uche emọ rẹ ayen che vwiẹ, je vwẹ iwan rẹ Ọghẹnẹ kobaro kẹ irueru yẹrẹ ẹkuruemu rehẹ ekogho rayen. Ayen de ru enana eje, jẹ ayen djephia nẹ emọ rayen eyen okẹ ọghanghanre—‘ughwẹ rẹ Ọrovwohwo ghare ayen.’

Ayen Viẹ Idiekpọvwẹẹ

O vwo ebẹnbẹn rẹ emiọvwọn ri siobọ rẹ emọ rẹ ayen che vwiẹ kpotọ hirharokuẹ? Onọ nana kpokpo ẹwẹn rẹ emiọvwọn evo re dia asan sansan rẹ uweren ọgangan hepha vwẹ akpọ na. Jokaphiyọ oborẹ igbuyovwin re dia irere evo tare ra vwọ nọ ayen enọ nana.

Wo hirharoku okeke ru wo vwo vwiẹ emọ ibuebun?

“E, tobọ vwevunrẹ ukoko na. Aye gbe ọshare ọvo da vuẹ avwanre nẹ, ‘Diesorọ wo vwo vwiẹ ọmọ ọvo? Vwẹ Africa obonẹ, wo de vwiẹ ọmọ ọvo, ọ ghwa họhọ nẹ wo vwiẹre kakakaa. Wo de rhe vwiẹ emọ ivẹ, kọ ghwa họhọ nẹ ọvo yen wo vwori.’ Avwanre vwọ tobọ vwiẹ ọmọ avwanre rivẹ nu, ọ dia ọyen okeke na vwọ tobọ vwo obaa.”—Jeremias

Wo vwo ebẹnbẹn kidie nẹ wo vwiẹ buun?

“Ẹjo, kakaka. Kidie nẹ avwanre vwiẹ buun, mẹvwẹ vẹ aye mẹ ke sa nabọ vwẹrote ọdavwẹ rẹ emọ rẹ avwanre, ma rhọ vwẹ ukẹcha kẹ ayen vwo sikẹrẹ Jihova. Orua rẹ emọ buebun hepha yen a da yọnrọn ovwẹ ghwanre, me mrẹ oborẹ ọsẹ vẹ oni mẹ si ukpanukpa te rẹ ayen vwọ vwẹrote avwanre je hwosa rẹ isikuru rẹ avwanre.”—Jeremias

Ẹro vọ yen emọ rẹ ovwan vwo ni orhiẹn rẹ ovwan na?

“Oma vwerhen emọ rẹ avwanre kidie ayen rhiẹromrẹ ọbẹnvwẹ rẹ emọ efa hirharokuẹẹ rẹ esẹ vẹ ini rayen si ukpanukpa re vwọ vwẹrote ayen kidie nẹ ayen pha buebun.”—Filipe

“Oma vwerhen emọ rẹ avwanre mamọ rẹ ayen vwọ ghwanra cha, oma fu ayen kidie avwanre nabọ vwẹrote ayen vwọrẹ ẹguọnọ. Nọke ra ruọke yen iniọvo ri tedje vwọ kọn bru avwanre cha, ayen jiriro kẹ avwanre nẹ avwanre vwo oborẹ avwanre vwọtua vwẹ ẹga ri Jihova. Nonẹna, avwanre mrẹ idje iyoyovwin rayen vwẹ oma rẹ emọ avwanre.”—Carlos

Erere vọ yen te ovwan obọ kidie nẹ we vwiẹ buun?

“Orhiẹn rẹ avwanre nẹrhẹ avwanre sa nabọ vwẹrote ọdavwẹ rẹ orua avwanre. Iruo ra da hwa okposa kẹ vwẹ va vwẹ abọ omarẹ ẹgbukpe erha re wanre. Avwanre se yerin ghene ewene yena rọ vwomaphia na kidie orua rẹ avwanre pha hanhanvwe, ọtiọyena avwanre rha guọnọ igho ibuebun ra vwọ vwẹrote omaa.”—Jeremias

“Orhiẹn rẹ avwanre na nẹrhẹ avwanre sa vwẹrote ọdavwẹ rẹ emọ rẹ avwanre je vwẹ ukẹcha kẹ ayen vwo sikẹrẹ Jihova. Ọnana nẹrhẹ avwanre sa ga vwẹ asan ra da ma guọnọ ukẹcha. Kọ je rhe lọhọ kẹ avwanre ra vwọ vwẹrote ọdavwẹ rẹ ọmọ ọvuọvo. Emọ avwanre eje ga Jihova, ayen je vwẹ ọdavwẹ rẹ Uvie na ka obaro.”—Lenadi

Uchebro vọ yen wọ guọnọ vwọ kẹ emiọvwọn?

“Me mrẹ uyota rọhẹ Une rẹ Ejiro 34:10b re, rọ tare nẹ: ‘Ayen otu re guọnọ Ọrovwohwo emu esiri sa kare aye-en.’ Jihova vwẹ kemu kemu re me vẹ orua mẹ guọnọre vwọ kẹ avwanre.”—Rafael

a Aye gbe ọshare yen che brorhiẹn rẹ uche emọ rẹ ayen che vwiẹ, ọke rẹ ayen che vwo vwiẹ yẹrẹ sẹ ayen reyọ ena ra vwọ vrabọ evun-ẹmrẹ re nẹrhẹ evun shee vwo ruiruo. E jẹ ohwo vuọvo vwẹ ayen guẹdjọ kpahen orhiẹn rẹ ayen bruruu. (Rom 14:4, 10-13) Vwọba, e jẹ Inenikristi re rọvwọnre kọn eta rehẹ 1 Kọrẹnt 7:3-5 phiyọ ẹwẹn.

b Dede nẹ emọ re djunute vwẹ ẹkpo ri Baibol nana Inenikristi rẹ Jọn vwẹ ukẹcha kẹ yen ọ rionbọ ra, ọmiọvwọn je sa vwẹ ẹro tiọyen vwo ni emọ rọyen.