Eranvwe Kpo Odjuvwu?

Ẹkpahọnphiyọ ri Baibol na

Baibol na yonori nẹ usun rẹ emama na eje rehẹ otọrakpọ na, imihwo krẹn yen che kpo udjuvwu. (Ẹvwọphia 14:1, 3) Ayen che nene Jesu sun kerẹ ivie kugbe erherẹn vwẹ oboyin. (Luk 22:28-30; Ẹvwọphia 5:9, 10) A me rha kpare otu gbidi gbidi rẹ ihwo nushi vwọ rhe otọrakpọ re ru phiyọ paradaisi.—Une Rẹ Ejiro 37:11, 29.

O vwo asan vuọvo rẹ Baibol na da ta ota kpahen odjuvwu rẹ eranvwe-e; o vwo oboresorọ. Eranvwe che se ru obo ra guọnọ mie ihwo ri che vwo “use rẹ obo odjuvwu” na-a. (Hibru 3:1) Ọnana churobọ si re vwo dje esegbuyota phia, je yọnre irhi rẹ Ọghẹnẹ. (Matiu 19:17; Jọn 3:16; 17:3) Ihworakpọ ọvo yen a mare vẹ iphiẹrophiyọ rẹ ayen vwọ dia bẹdẹ.—Jẹnẹsis 2:16, 17; 3:22, 23.

A cha kpare ohwo nushi rhe tavwen o ki se kpo odjuvwu. (1 Kọrẹnt 15:42) Baibol na ta ota kpahen evrẹnushi evo re phiare. (1 Ivie 17:17-24; 2 Ivie 4:32-37; 13:20, 21; Luk 7:11-15; 8:41, 42, 49-56; Jọn 11:38-44; Iruo Rẹ Iyinkọn Na 9:36-42; 20:7-12) Ẹkẹvuọvo, ayen eje shekpahen ihworakpọ, ọ dia eranvwe-e.

Eranvwe vwo erhi?

Baibol na yonori nẹ ihworakpọ vẹ eranvwe ri yerẹn “ekpokpọ,” eriyina arhọ rẹ ohworakpọ vwori yen eranvwe ji vwo. Erọnvwọn ivẹ kiriguo yen e vwo ru ayen: “ekpẹn rẹ otọ na” vẹ “ẹwẹn rẹ arhọ.”—Jẹnẹsis 1:24; 2:7,19.

Die yen phia kẹ eranvwe siẹrẹ ayen de ghwu?

Baibol je tanẹ ihworakpọ vẹ eranvwe se ghwẹ. (Eyanno 19:13; Izikiẹl 18:20) Ayen de ghwu, te eranvwe te ihworakpọ ki rhivwin kpo ekpẹn rẹ otọ na. (Aghwoghwo 3:19, 20) Otọ rọyen, ayen rha herọ yerẹn vwẹ asan vuọvo-o.a

Eranvwe ru umwemwu?

Ẹjo. E vwo ru umwemwu, mudiaphiyọ e vwo ru yẹrẹ roro kpahen orọnvwọn rọ vwọso urhi rẹ Ọghẹnẹ. Ohwo ro se brorhiẹn rẹ obo ri yovwirin yen se ru umwemwu, eranvwe vwo ẹgba yena-a. Eroma yen sun ayen vwẹ uvwre ọke rẹ ayen dia akpọ kri te. (2 Pita 2:12) Vwẹ oba rẹ akpeyeren rayen, kẹ ayen ghwẹ, dede nẹ ayen ru umwemwu vuọvo-o.

Ofori ne gboja kẹ eranvwe?

Ẹjo. Ogangan rẹ Ọghẹnẹ vwọ kẹ ihworakpọ vwẹ enu rẹ eranvwe, dia ọ re vwo gboja kẹ aye-en. (Jẹnẹsis 1:28; Une Rẹ Ejiro 8:6-8) Ọghẹnẹ vwo ọdavwẹ rẹ eranvwe, ji te emephran dede. (Jona 4:11; Matiu 10:29) O jurhi kẹ idibo rọyen nẹ ayen nabọ vwẹrote ichuru rayen.—Eyanno 23:12; Urhi Rivẹ 25:4; Isẹ 12:10.

Ẹkpo ri Baibol ra da ta ota kpahen eranvwe

Jẹnẹsis 1:28: “Ọghẹnẹ da ta kẹ [ihworakpọ ẹsosuọ], We vwiẹ ri we bun phihọ, re wa vọn akpọ na, ru we phio kparobọ, kugbe re we vwo ogangan vwẹ enu rẹ erin rẹ urhie, ephran ri obenu kugbe enu ri kemu kemu rọ yan vwẹ otọ na ejobi.”

Obo ro mudiaphiyọ: Ọghẹnẹ vwẹ ogangan kẹ ihworakpọ vwẹ enu rẹ eranvwe.

Aghwoghwo 3:19, 20: “Kidie emu rọ phia kẹ emọ rẹ ihwo rẹ akpọ ọye je phia kẹ eranvwe; tiobo rẹ ọvo ghwẹ, ọtiọye ọrivẹ ji ghwẹ rhe. Ayen ejobi na ẹnwẹn ọvuọvo ayen wẹn, ohwo rẹ akpọ na yovwi nọ eranvwe-e; enana ejobi na odiodi iruẹ. Asan ọvo ayen ejobi ra; iwurhie ayen ejobi nurhe, iwurhie ayen je cha rhoma ra.”

Obo ro mudiaphiyọ: Ihworakpọ vẹ eranvwe de ghwu, kẹ ayen rhivwin kpo ekpẹn rẹ otọ na.

Isẹ 12:10: “Ọvwata nabọ sẹro rẹ arhọ rẹ uchuru rọye.”

Obo ro mudiaphiyọ: Ihwo esiri nabọ vwẹrote eranvwe rayen, ji te eranvwe re dia uwevwin.

Matiu 10:29 “Ọ dia igue ivẹ eye a shẹ anini? yẹ ọvuọvo sa va Ọghẹnẹ abọ she-e.”

Obo ro mudiaphiyọ: Ọghẹnẹ vwo oniso ji vwẹrote eranvwe na eje—tobọ te emephran.

a Wọ da guọnọ evuẹ efa, ni uyovwinrota 6 rẹ ọbe re se Die Yen Baibol na Se Yono Avwanre?