Ihwo re Gha Eranvwe​—Die Yen Baibol na Tare?

Vwẹ akpọneje, uruemu ra vwọ gha eranvwe kọ rhoma titẹ phiyọ.

• “A vwọ gha eranvwe churobọ si oka iroro vẹ oka rẹ akpọ rẹ ihwo yerẹn, rẹ ayen de ru oborẹ ayen se ru eje vwọ kẹnoma kẹ uruemu ra vwọ so omaẹwan vwọ kẹ eranvwẹ, yẹrẹ reyọ ayen vwo ru emu, emwa vẹ erọnvwọn efa.”​—The Vegan Society.

Ọ diẹ fikirẹ ọdavwẹ rẹ ihwo evo vwo kpahen eranvwe ọvo yen mu ayen vwọ gha eranvwe-e, ẹkẹvuọvo, ayen ji ru ọtiọyen kidie ayen guọnọ ru akpọ na yovwinphiyọ, toroba omakpokpọ rayen, yẹrẹ ji ru ọtiọyen fikirẹ iroro ọvo yẹrẹ ọfa ro churobọ si ẹga.

• “Uruemu ra vwọ gha eranvwe fẹnẹ orhiẹn rẹ ihwo brẹ vwọ kpahen emu rọ fori nẹ ayen re, kidie ayen niro phiyọ oborẹ ayen segbuyota, orhiẹn romobọ, vẹ idjerhe rẹ ayen se vwo ru akpọ na yovwinphiyọ.”​—Britannica Academic.

Ra vwọ gha eranvwe se phioba phiyọ ebẹnbẹn rẹ akpọ na? Die yen Baibol na tare?

Ẹro rẹ Ọmemama rẹ avwanre vwo ni ihworakpọ vẹ eranvwe

Baibol na djerephia nẹ Ọmemama rẹ avwanre, Jihova Ọghẹnẹ,a niro nẹ ihworakpọ kpenu vrẹ eranvwe, kọyensorọ ọ vwọ kẹ ihworakpọ uturhi vwẹ enu rẹ eranvwe. (Jẹnẹsis 1:​27, 28) Ọke vwọ yanran na, Ọghẹnẹ da rhọnvwe kẹ ihworakpọ nẹ ayen reyọ eranvwe vwo ru emu. (Jẹnẹsis 9:3) Ẹkẹvuọvo, ọ vwọso uruemu re vwo gboja kẹ eranvwe.​—Isẹ 12:10.

Vwo nene oborẹ Baibol na tare, a vwọ ria eranvwe ọyen ojẹ romobọ.b Ọ dia ojẹ avwanre yen cha nẹrhẹ a dia omamọ ohwo vwẹ obaro rẹ Ọghẹnẹ-ẹ. (1 Kọrẹnt 8:8) E jẹ ohwo vuọvo vwọso ojẹ rẹ ohwo ọfa jẹre vwọ kpahen emu rọ cha re-e.​—Rom 14:3.

Idjerhe ro sun ohwo kpo omamọ rẹ akpọ vwẹ obaro na

Baibol na djerephia nẹ ojẹ avwanre kpahen oborẹ avwanre che yeren akpọ wan che se si ebẹnbẹn rẹ akpọ na no-o. Oseghe rẹ usuon, vẹ obo ra rhuẹrẹ ekuakua wan vwẹ akpọ na yen so ebẹnbẹn buebun, rọ dia oborẹ ohwo vuọvo sa rhuẹrẹ-ẹ. Baibol na da ta:

• “Emu ro gunuru nure asan phiọ-ọ.”​—Aghwoghwo 1:15.

Ọmemama rẹ avwanre che si ebẹnbẹn rẹ avwanre hirharokuẹ enẹna no. Baibol na vwẹ eta rẹ udje vwo dje obo ro che ru.

• “Me da mrẹ odjuvwu kpokpọ kugbe akpọ kpokpọ; kidie odjuvwu awanre na kugbe akpọ awanre na wanvrẹ re, abadi na rha herọ-ọ.”​—Ẹvwọphia 21:1.

Ọghẹnẹ cha vwẹ “odjuvwu kpokpọ” rọ dia Uvie rọyen rọhẹ odjuvwu vwo wene usuon rẹ ihworakpọ, yẹrẹ “odjuvwu awanre na.” Uvie rọyen che si “akpọ awanre na” no, rọ dia irumwemwu rẹ ihwo na, o mi rhi sun “akpọ kpokpọ” na, kọyen ihwo re guọnọ dia otọ rẹ usuon rọyen.

Vwẹ otọ rẹ usuon rẹ Uvie rẹ Ọghẹnẹ yen ihworakpọ che vwo yono oborẹ ayen vẹ eranvwe cha vwọ dia kugbe vwọrẹ ufuoma vwevunrẹ akpọ oyoyovwin.​—Aizaya 11:​6-9.