Die Yen Baibol na Yono Kpahen Ẹgba ra Vwọ Jẹ Ephẹrẹ Sansan?
Ẹkpahọnphiyọ rẹ Baibol na
“Ẹgba ra vwọ “phẹrẹ ephẹrẹ” sansan ra vwọ kẹ Inenikristi rẹ ẹgukpe ujorin ẹsosuọ, nẹrhẹ ayen sa jẹ ephẹrẹ rẹ ayen yonori-i. (Iruo Rẹ Iyinkọn Na 10:46, New International Version) Kohwo kohwo ro nyo ephẹrẹ na se vwo ẹruọ rẹ oborẹ ayen ta. (Iruo Rẹ Iyinkọn Na 2:4-8) Ra vwọ jẹ ephẹrẹ sansan, ọyen ọvo usun rẹ okẹ rẹ Ọghẹnẹ vwọ kẹ Inenikristi rẹ ẹgbukpe ujorin ẹsosuọ womarẹ ẹwẹn ọfuafon na.—Hibru 2:4; 1 Kọrẹnt 12:4, 30.
Ọke vọ vẹ tivọ yen ihwo vwo tu vwo ẹgba ra vwọ jẹ ephẹrẹ sansan?
Igbevwunu na tonphiyọ vwẹ Jerusalẹm vwẹ urhiọke rẹ ẹdẹ orẹ rẹ ihwo rẹ Ju ruru vwẹ Pẹntikọst 33 C.E. Idibo rẹ Jesu ri te omarẹ 120 yen siomakoko, ọke rẹ “[“ẹwẹn,” NW] Ọfuanfon na [vwọ] ro ayen oma kẹ ayen jẹ ephẹrẹ efa.” (Iruo Rẹ Iyinkọn Na 1:15; 2:1-4) Otu buebun ri nẹ “ẹgborho kẹgborho rẹ akpọ na rhe” de koko, “ayen ohwo ọvuọvo [de] nyo eta rẹ ayen ta vwẹ ephẹrẹ re de vwiẹ ayen.” Iruo Rẹ Iyinkọn Na 2:5, 6.
Diesorọ Ọghẹnẹ vwọ kẹ ihwo ẹgba ra vwọ jẹ ephẹrẹ sansan?
O ru ọtiọyen vwo djephia nẹ ọyen hẹ obuko rẹ Inenikristi. Vwẹ ọke awanre, Jihova ru igbevwunu sansan vwo djephia nẹ ọyen hẹ obuko rẹ Mosis kugbe idibo rọyen efa. (Eyanno 4:1-9, 29-31; Ukeri 17:10) Ọnana yen sorọ rẹ Jihova vwọ kẹ ihwo ẹgba ra vwo jẹ ephẹrẹ sansan, rere o se vwo djephia nẹ ọyen hẹ obuko rẹ ukoko rẹ Inenikristi kpokpọ re vwo mu na. Ọyinkọn Pọl de si: “Ephẹrẹ kẹ oka ọ dianẹ kẹ ihwo ri segbuyota-a ẹkẹvuọvo kẹ otu ri je segbuyota.”—1 Kọrẹnt 14:22.
O ru ọtiọyen rere Inenikristi se vwo se oseri rọ ghwotọ. Ihwo ri nyo ephẹrẹ sansan rẹ idibo rẹ Jesu jẹre vwẹ ẹdẹ rẹ Pẹntikọst na da ta: “Avwanre de nyo rẹ ayen vwọ jẹ ephẹrẹ rẹ avwanre vwo gbe ikun rẹ iruo egangan rẹ Ọghẹnẹ.” (Iruo Rẹ Iyinkọn Na 2:11) Orọnvwọn ọfa rọ nẹrhẹ Ọghẹnẹ kẹ iyinkọn na ẹgba yena ọyen rere ayen se vwo “se oseri” ji “yono ihwo rẹ akpọ na ejobi” vwo nene iji rẹ Jesu vwọ kẹ ayen. (Iruo Rẹ Iyinkọn Na 10:42; Matiu 28:19) Omarẹ ihwo 3,000 re rhiẹromrẹ igbevwunu yena, re je kerhọ rẹ aghwoghwo rẹ iyinkọn na da rhe dia idibo rẹ Jesu ẹdẹdẹ yena.—Iruo Rẹ Iyinkọn Na 2:41.
Ẹgba ra vwọ jẹ ephẹrẹ sansan na cha dia bẹdẹ?
Ẹjo. Ẹgba ra vwọ jẹ ephẹrẹ sansan kugbe okẹ rẹ ẹwẹn ọfuanfon na efa, ghwa ọrhuẹrẹphiyotọ rẹ ọmọke. Baibol na da ta: “Vwọ kẹ aroẹmrẹ, ọ cha wanvrẹn; vwọ kẹ ephẹrẹ, i che fue.”—1 Kọrẹnt 13:8.
Ọke vọ yen ẹgba ra vwo jẹ epherẹ sansan vwọ dobọji?
Iyinkọn na yen muabọ kpahen Inenikristi efa tavwen ayen ki se vwo okẹ rẹ ẹwẹn ọfuanfon na. (Iruo Rẹ Iyinkọn Na 8:18; 10:44-46) Ọtiọyena, ihwo ri vwo okẹ rẹ ẹwẹn ọfuanfon na womarẹ ẹrhovwo rẹ iyinkọn na, cha sa reyọ vwọ kẹ ihwo efa-a. (Iruo Rẹ Iyinkọn Na 8:5-7, 14-17) Kerẹ udje, ohwo rode rẹ igọmẹti sa kẹ ohwo ilaisẹnsi ra vwọ djẹ imoto, ẹkẹvuọvo ohwo ra vwẹ ilaisẹnsi kẹ na vwo uturhi rọ vwọ vwẹ ilaisẹnsi kẹ ohwo ọfa-a. Ọtiọyena, ẹgba ra vwọ jẹ ephẹrẹ sansan dobọji ọke rẹ iyinkọn na vẹ ihwo rẹ ayen reyọ ẹgba na kẹ vwo ghwu nu.
Kẹ, ihwo ri vwo ẹgba ra vwọ jẹ ephẹrẹ sansan nonẹna vwo?
Ẹgba ra vwọ jẹ ephẹrẹ sansan dobọji vwẹ oba rẹ ẹgbukpe ujorin ẹsosuọ. Ọtiọyena, o vwo ohwo vuọvo nonẹna rọ sa tanẹ ẹgba rẹ Ọghẹnẹ yen ọyen vwọ jẹ ephẹrẹ sansa-an.a
Mavọ yen e se vwo vughe Inenikristi rẹ uyota?
Jesu tare nẹ ẹguọnọ rẹ omaevwoze yen e che vwo vughe idibo rọyen. (Jọn 13:34, 35) Ọyinkọn Pọl da je tanẹ ẹguọnọ yen e che vwo vughe Inenikristi rẹ uyota. (1 Kọrẹnt 13:1, 8) Ọ nabọ kanrunumuo nẹ ẹwẹn ọfuanfon na yen cha nẹrhẹ Inenikristi sa mọ “omamọ rẹ [“ẹwẹn,” NW] na” rẹ ẹbẹre ẹsosuọ rọyen dia ẹguọnọ.—Galesha 5:22, 23.
a Ni uyovwinrota na “Speaking in Tongues—Is It From God?”