Aroẹmrẹ ri Shekpahen Mesaya na Djerephia nẹ Jesu Yen Mesaya Na?

Ẹkpahọnphiyọ ri Baibol na

E. Jesu vwọ hẹ otọrakpọ, o ru orugba rẹ aroẹmrẹ eje ri shekpahen “Ọ ra vwẹ ori te na Osun,” ọ rọ cha dia “Osivwi rẹ akpọ na.” (Daniẹl 9:25; 1 Jọn 4:14) Jẹ, o vwo ghwu nu dede, Jesu ji ru orugba rẹ aroẹmrẹ ri shekpahen Mesaya na.—Une Rẹ Ejiro110:1; Iruo Rẹ Iyinkọn Na 2:34-36.

Die yen “Mesaya” mudiaphiyọ?

Ubiota ri Hibru Ma·shiʹach (Mesaya) kugbe ota ri Grik Khri·stos (Kristi) ivẹ na mudiaphiyọ “Ọ re ku evwri ku.” Ọtiọyena, “Jesu Kristi” mudiaphiyọ “Jesu re ku evwri ku,” yẹrẹ “Jesu Mesaya na.”

Vwẹ ọke ri Baibol na, a da cha vwẹ ohwo mu ẹdia rọ rhoro, ke kuẹ evwri kuẹ uyovwin rọyen. (Livitikọs 8:12; 1 Samuẹl 16:13) Ọghẹnẹ yen vwẹ Jesu mu kerẹ Mesaya rọ dia ẹdia rọ vọnre vẹ ogangan. (Iruo 2:36) Jẹ ukpe rọ vwọ vwẹ evwri ghworo Jesu, Ọghẹnẹ de ku ẹwẹn ọfuanfon kuo.—Matiu 3:16.

Ihwo buebun yen a guọnọre ri che ru orugba rẹ aroẹmrẹ ro shekpahen Mesaya na?

Ẹjo. Omoka ọvo yen e che vwo vughe ohwo na, orugba rẹ aroẹmrẹ ri Baibol riẹn obọ kpo Mesaya yẹrẹ Kristi vuọvo. Ẹkẹvuọvo, Baibol na tare nẹ “Kristi rẹ efian cha rhe kugbe emraro rẹ efian ayen cha vwẹ eka buebun phia kugbe emu rẹ igbunu buebu, rere ayen vwọ phiẹn ihwo buebu ghwru.”—Matiu 24:24.

Mesaya na cha vwomaphia vwẹ obaro na?

Ẹjo. Baibol na mraro phiyotọ nẹ, Mesaya na che nẹ uvwiẹ rẹ Ovie Devid vwẹ Izrẹl rhe. (Une Rẹ Ejiro 89:3, 4) Jẹ, ọbe rẹ iyẹnrẹn rẹ uvwiẹ ri Devid ghwru re, ọkiọvo ọ sa dianẹ ọ guọghọre ọke rẹ ihwo ri Rom vwọ ghwọrọ Jerusalẹm vwẹ 70 C.E.a Vwo nẹ ọke yena rhe, ọ ra lọhọ vwọ kẹ ohwo vuọvo rọ vwọ riẹn sẹ uvwiẹ ri Devid yen o nurhe-e. Vwọ vrẹ ọyena, dede nẹ ọbe rẹ ikuegbe na herọ vwẹ ọke ri Jesu, ohwo vuọvo vwo ẹwẹn ivivẹ kpahen uvwiẹ ri Devid ro nurhe-e tobọ ji te ivweghrẹn rọyen.—Matiu 22:41-46.

Bro aroẹmrẹ ri Baibol na yen shekpahen Mesaya na?

Ọ cha bẹn ra vwọ riẹn uchunu rẹ aroẹmrẹ ri shekpahen Mesaya na. Kerẹ udje, ona re vwo phiẹ ukeri phiyọ aroẹmrẹ sansan sa fẹnẹ vwẹ awọreta ọvuọvo ma rho siẹrẹ aroẹmrẹ na de shekpahen Mesaya na. Awọreta rọhẹ Aizaya 53:2-7 djunute aroẹmrẹ buebun ri shekpahen Mesaya na. Ihwo evo se kere eje phiyọ aroẹmrẹ ọvo, ihwo efa mi rhe no nẹ aroẹmrẹ na eje fẹnẹre.

Aroẹmrẹ evo ri shekpahen Mesaya na rẹ Jesu rugba

Aroẹmrẹ	Ra mrẹ vwẹ	Orugba
Ọmọ rẹ Ebraham	Jẹnẹsis 22:17, 18	Matiu 1:1
Ọmọ rẹ Aizik rọ dia ọmọ rẹ Ebraham	Jẹnẹsis 17:19	Matiu 1:2
Uvwiẹ ri Juda vwẹ Izrẹl yen e de vwiẹ	Jẹnẹsis 49:10	Matiu 1:1, 3
Uvwiẹ rẹ Ovie Devid yen o nurhe	Aizaya 9:7	Matiu 1:1
Ọmọtobẹ yen vwiẹrẹ	Aizaya 7:14	Matiu 1:18, 22, 23
E vwiẹrẹ vwẹ Betlẹhẹm	Maika 5:2	Matiu 2:1, 5, 6
E de se Imanuẹlb	Aizaya 7:14	Matiu 1:21-23
Ọtonphiyọ ro kperusi-i	Aizaya 53:2	Luk 2:7
Imitete ra teyen hwe re vwo vwiẹ nu	Jerimaya 31:15	Matiu 2:16-18
E de se nẹ Ijipt rhe	Hosia 11:1	Matiu 2:13-15
E che se ohwo ri Nazarẹtc	Aizaya 11:1	Matiu 2:23
Ikọn cha kobaro kẹ	Malakae 3:1	Matiu 11:7-10
A Jẹrẹ reyọ kerẹ Mesaya na vwẹ 29 C.E.d	Daniẹl 9:25	Matiu 3:13-17
Ọghẹnẹ sere Ọmọ rọyen	Une Rẹ Ejiro 2:7	Iruo Rẹ Iyinkọn Na 13:33, 34
Oruru rẹ uwevwin rẹ Ọghẹnẹ muro rọ	Une Rẹ Ejiro 69:9	Jọn 2:13-17
Oghwoghwota rẹ iyẹnrẹn esiri na	Aizaya 61:1	Luk 4:16-21
Aghwoghwo rọyen vwẹ Galili urhukpẹ rode	Aizaya 9:1, 2	Matiu 4:13-16
O ru emu rẹ eka kerẹ Mosis	Urhi Rivẹ 18:15	Iruo Rẹ Iyinkọn Na 2:22
Kerẹ Mosis, ọ ta eta romobọ rọye-en	Urhi Rivẹ 18:18, 19	Jọn 12:49
O sivwin ega buebun	Aizaya 53:4	Matiu 8:16, 17
Ọ guọnọ ujiri romobọ rọye-en	Aizaya 42:2	Matiu 12:17, 19
O che gbe arodọnvwẹ kẹ ihwo re shenyẹ	Aizaya 42:3	Matiu 12:9-20; Mak 6:34
O djerephia nẹ Ọghẹnẹ ohwo ro brorhiẹn ọsoso	Aizaya 42:1, 4	Matiu 12:17-20
Ọgba-Aghwanre	Aizaya 9:6, 7	Jọn 6:68
O ghwoghwo odẹ ri Jihova	Une Rẹ Ejiro 22:22	Jọn 17:6
O kpe itẹ buebun	Une Rẹ Ejiro 78:2	Matiu 13:34, 35
Osun	Daniẹl 9:25	Matiu 23:10
Buebun sere gbuyota-a	Aizaya 53:1	Jọn 12:37, 38
Uchukurhe umwemwu	Aizaya 8:14, 15	Matiu 21:42-44
Ihworakpọ senrọ	Une Rẹ Ejiro 118:22, 23	Iruo Rẹ Iyinkọn Na 4:10, 11
E vwo utuoma kpahọn ekueku	Une Rẹ Ejiro 69:4	Jọn 15:24, 25
Ọ ro Jerusalẹm vẹ ekẹtẹkẹtẹ	Zekaraya 9:9	Matiu 21:4-9
Imitete jiriro	Une Rẹ Ejiro 8:2	Matiu 21:15, 16
Ọ rhere vwẹ odẹ ri Jihova	Une Rẹ Ejiro 118:26	Jọn 12:12, 13
Ugbeyan rọ kẹrerẹ shẹrẹ	Une Rẹ Ejiro 41:9	Jọn 13:18
A shẹrẹ ikpahọ gbẹ isene ihwe rẹ idọnọ ọfuanfone	Zekaraya 11:12, 13	Matiu 26:14-16; 27:3-10
Idibo rọyen yan jovwo	Zekaraya 13:7	Matiu 26:31, 56
E se oseri rẹ eku hwe	Une Rẹ Ejiro 35:11	Matiu 26:59-61
E vwo gun efian nyẹ, ọ kpahe ota vuọvo-o	Aizaya 53:7	Matiu 27:12-14
E dje enya kuo	Aizaya 50:6	Matiu 26:67; 27:27, 30
A teyerọ uyovwin	Maika 5:1	Mak 15:19
A farọ	Aizaya 50:6	Jọn 19:1
Ọ họnre ihwo re ghwiẹrẹ-ẹ	Aizaya 50:6	Jọn 18:22, 23
Isun chahen urhi muo	Une Rẹ Ejiro 2:2	Luk 23:10-12
E hwe awọ vẹ abọ rọyen mu urhe	Une Rẹ Ejiro 22:16	Matiu 27:35; Jọn 20:25
Ihwo vwẹ iwun rọyen duvwu itẹ	Une Rẹ Ejiro 22:18	Jọn 19:23, 24
E kerire ba irumwemwu	Aizaya 53:12	Matiu 27:38
A vwerọ jehwẹ, e mienu kuo	Une Rẹ Ejiro 22:7, 8	Matiu 27:39-43
Ọ rioja kẹ irumwemwu	Aizaya 53:5, 6	1 Pita 2:23-25
Kọ họhọre nẹ Ọghẹnẹ senrọ	Une Rẹ Ejiro 22:1	Mak 15:34
A vwẹ udi rọ yara korokoro kẹ da	Une Rẹ Ejiro 69:21	Matiu 27:34
Urhuru rẹ ame hwere tavwen o ki ghwu	Une Rẹ Ejiro 22:15	Jọn 19:28, 29
O phi erhi rọyen phiyọ obọ rẹ Ọghẹnẹ	Une Rẹ Ejiro 31:5	Luk 23:46
Ọ vwẹ arhọ rọyen kpahotọ	Aizaya 53:12	Mak 15:37
Ọ hwa osa rẹ ọtanhirhe na ro vwo si umwemwu no	Aizaya 53:12	Matiu 20:28
E vwirhi ibeku rọye-en	Une Rẹ Ejiro 34:20	Jọn 19:31-33, 36
E duvwiro	Zekaraya 12:10	Jọn 19:33-35, 37
E shiro phiyọ ushi rẹ edafe	Aizaya 53:9	Matiu 27:57-60
A kparerọ nẹ ushi	Une Rẹ Ejiro 16:10	Iruo Rẹ Iyinkọn Na 2:29-31
E wene ọ rọ shẹrẹ na	Une Rẹ Ejiro 109:8	Iruo Rẹ Iyinkọn Na 1:15-20
O chidia phiyọ obọrhen rẹ Ọghẹnẹ	Une Rẹ Ejiro 110:1	Iruo Rẹ Iyinkọn Na 2:34-36

a Ọbe ri McClintock vẹ Strong’s Cyclopedia da ta: “Ọ pha bẹnbẹn a vwọ sen nẹ ọke ra vwọ ghwọrọ Jerusalẹm yen a vwọ guọghọ ọbe rẹ uvwiẹ rẹ ihwo ri Ju, ọ dia tavwen oghwọrọ na ke phia-a.”

b Odẹ ri Hibru re se Imanuẹl, ro mudiaphiyọ “Ọghẹnẹ vẹ avwanre herọ,” nabọ djisẹ rẹ ẹdia ri Jesu kerẹ Mesaya. Iruo ro ruru ọke rọ vwọ hẹ akpọ na djerephia nẹ Ọghẹnẹ vẹ idibo rọyen herọ.—Luk 2:27-32; 7:12-16.

c A reyọ ubiota na “Nazarẹt” vwo nẹ ota ri Hibru neʹtser, ro mudiaphiyọ “tan.”

d Vwọ kpahen evuẹ ri Baibol na efa re rionbọ kpo 29 C.E. rọ dia ukpe rẹ Mesaya na cha vwọ vwomaphia, ni uyovwinrota na “How Daniel’s Prophecy Foretells the Messiah’s Arrival.”

e Aroẹmrẹ nana hẹ evunrẹ ọbe ri Zekaraya, ẹkẹvuọvo ọbe ri Matiu tare nẹ “ọmraro Jerimaya yen tarọ.” (Matiu 27:9) Ọ họhọre nẹ ọbe ri Jerimaya yen e ke phiẹ phiyọ ẹdia rẹsosuọ vwẹ ẹbẹre re Baibol na re se “Emraro na.” (Luk 24:44) Ọ sa dianẹ Matiu djunute “Jerimaya” rọ vwọ ta ota kpahen ẹbe na eje, ro ji churobọ si ọbe ri Zekaraya.