Die Yen O Mudiaphiyọ A Vwọ Dia Fuanfon?

Ẹkpahọnphiyọ rẹ Baibol na

A vwọ dia fuanfon shekpahen e vwo siomanu yẹrẹ hẹrioma nẹ ẹgua. A reyọ ota rẹ Hibru ra fan kpo “Ọfuanfon” vwo nẹ ota ro mudiaphiyọ “siomanu yẹrẹ hẹrioma” rhe. Kọyensorọ a vwọ hẹriẹ obo re fonro vwo nẹ erọnvwọn ra reyọ vwo ruiruo ọkieje, yẹrẹ no ghanghanre kidie ọ fonro gangan.

Ọghẹnẹ yen afunre. Baibol na da ta: “O vwo ohwo ọvuọvo rọ fonro kerẹ [“Jihova-a,” NW].”a (1 Samuẹl 2:2) Ọghẹnẹ kọyen vwo ẹgba rọ vwọ jurhi rẹ obo re fonro.

A sa reyọ ota na “ọfuanfon” vwo ruiruo kpahen kemu kemu ro shekpahen Ọghẹnẹ phiọgun, marho kẹ erọnvwọn ra vwọ kpahotọ kẹ ẹga rọyen. Kerẹ udje, Baibol na ta ota kpahen:

• Asan efuanfon: Ọghẹnẹ da vuẹ Mosis vwẹ aghwa rọ tuan: “Asan ru wo mudia na otọ ọfuanfon.”—Eyanno 3:2-5.

• Irueru rẹ efuanfon: Ihwo rẹ Izrẹl rẹ ọke awanre ga Jihova ọkieje vwẹ erẹ rẹ ẹga rẹ ayen ruẹ re se “ọghwẹgbe ọfuanfon.”—Livitikọs 23:37.

• Ekuakua efuanfon: E se ekuakua re vwo ruiruo rẹ ẹga Ọghẹnẹ vwẹ uwevwin rẹ ẹga rọhẹ Jerusalẹm “ekuakua efuanfon.” (1Ivie 8:4) Dede nẹ a vwẹ ẹga kẹ ekuakua eghanghanre tiọyena-a, jẹ a nabọ vwẹrote ayen vẹ ọghọ.b

Ohwo rọ gbare-e sa dia fuanfon?

E. Ọghẹnẹ vwẹ iji kẹ Inenikristi: “Ovwan ke fon, kidie me fonro.” (1 Pita 1:16) Vwọrẹ uyota, ihworakpọ ri jẹgba cha sa yan mu uwan rẹ Ọghẹnẹ vwọ kẹ ẹfuọn gbagba-a. Jẹ, e se ni ihworakpọ re yọnrọn urhi rẹ Ọghẹnẹ kerẹ ihwo re “fonro [ri] fo ẹreyọ kẹ Ọghẹnẹ.” (Rom 12:1) Ohwo rọ davwẹngba rere ọ sa vwọ dia fuanfon dje ọnana phia womarẹ eta vẹ iruemu rọyen. Kerẹ udje, ohwo tiọyena yan nene uchebro rẹ Baibol na rọ vwọ dia fuanfon, ji “siobọ nẹ igberadja,” je “fon vwẹ oma [rọyen] vwẹ uruemu [rọyen] ejobi.”—1 Tẹsalonaika 4:3; 1 Pita 1:15.

Ohwo se ku emudia ọfuanfon rọyen vwẹ ẹro rẹ Ọghẹnẹ kufia?

E. Ohwo rha yan nene iwan rẹ Ọghẹnẹ kpahen uruemu rọ fonro-o, Ọghẹnẹ rhe che ni ohwo yena kerẹ ohwo rọ fonro ọfa-a. Kerẹ udje, e si ọbe rẹ Hibru rhe “imoni re fonro,” dedena a vwẹ orhọesio phia nẹ e se vwo “udu ro jẹ esegbuyota evwo, ro de si ovwan she nẹ idjerhe rẹ Ọghẹnẹ ro jeghwo na.”—Hibru 3:1, 12.

Ororochọ kpahen a vwọ dia fuanfon

Ororochọ: Ra vwọ gha ehware vẹ orọnvwe sa nẹrhẹ ohwo dia fuanfon.

Uyota: Dede nẹ OneniKristi se brorhiẹn ro vwo jẹ ẹrọnvwọn, jẹ a vwọ gha ehware vẹ orọnvwe ọvo cha sa nẹrhẹ ohwo dia fuanfon vwẹ ẹro rẹ Ọghẹnẹ-ẹ. Ghini uyota nẹ ihwo re rọnvwọnre-e se mu ẹwẹn phiyọ ẹga rẹ Ọghẹnẹ vọnvọn, kidie ayen ghwe vwo obo ri mu ẹwẹn rayen reyọ-ọ. (1 Kọrẹnt 7:32-34) Jẹ, Baibol na djerephia nẹ ihwo re rọnvwọnre je sa dia fuanfon. Pita rọ tobọ dia ọvo usun rẹ idibo rẹ Jesu rọnvwọnre.—Matiu 8:14; 1 Kọrẹnt 9:5.