Meri Oni rẹ Ọghẹnẹ?

Ẹkpahọnphiyọ rẹ Baibol na

Ẹjo, Baibol na vwẹ ọke vuọvo vwo yono nẹ Meri oni rẹ Ọghẹnẹ-ẹ, jẹ ọ je vwọ ọke vuọvo tanẹ Inenikristi ga Meri yẹrẹ muọghọ rẹ oghẹresan kẹ-ẹ.a Roro kpahọn:

• O vwo ọke vuọvo rẹ Meri vwọ tanẹ ọyen oni rẹ Ọghẹnẹ-ẹ. Baibol na nabọ djephia nẹ “Ọmọ rẹ Ọghẹnẹ” yen o vwiẹri, ọ dia Ọghẹnẹ komobọ-ọ.—Mak 1:1; Luk 1:32.

• Jesu Kristi vwẹ ọke vuọvo tanẹ Meri oni rẹ Ọghẹnẹ-ẹ, yẹrẹ nẹ o fo ohwo ra vwẹ ẹga kẹ-ẹ. Vwọrẹ uyota, ọ tobọ kpọ aye ọvo vi ọke ro vwo titi ẹdia rẹ Meri kerẹ oni rọyen vrẹka, rọ vwọ ta: “Ofori wọ vwọ ta, Ebruba kẹ ihwo ri nyo eta rẹ Ọghẹnẹ re da yọnrọn.”—Luk 11:27, 28.

• TEta na “Oni rẹ Ọghẹnẹ” vẹ “Theotokos” (Ọ ro vwiẹ Ọghẹnẹ) hẹ evunrẹ Baibol na-a.

• Ọ dia Meri yen ota na “Ovie-aye rẹ Enu” rọ evunrẹ Baibol na shekpahe-en, ẹkẹvuọvo o shekpahen ọghẹnẹ rẹ aye rẹ efian rẹ ihwo rẹ Izrẹl ri she nẹ ẹga rẹ uyota vwẹ ẹga kẹ. (Jerimaya 44:15-19) “Ovie-aye rẹ Enu” na sa dia Ishtar (Astarte) rọ dia ọghẹnẹ rẹ aye rẹ ihwo rẹ Babilọn.

• Inenikristi rẹsosuọ ga Meri, yẹrẹ muọghọ roghẹresan kẹ-ẹ. Ogbikuegbe ọvo tare nẹ Inenikristi rẹsosuọ na “rha sen ukoko eje re de muọghọ roghẹresan kẹ Meri kidie ayen niro nẹ ọnana sa nẹrhẹ ihwo roro nẹ ayen vwẹ ẹga kẹ ọghẹnẹ rẹ aye.”—In Quest of the Jewish Mary.

• Baibol na tare nẹ Ọghẹnẹ herọ rhabae rhe. (Une Rẹ Ejiro 90:1, 2; Aizaya 40:28) Rọ vwọ dianẹ Ọghẹnẹ vwo ọtonphiyọ na-a, kọyen o che se vwo oni-i. Vwọba, Meri rhe se mu Ọghẹnẹ phiyọ evun rọye-en; kidie Baibol na tobọ tanẹ idjuvwu na dede sa gba Ọghẹnẹ-ẹ.—1 Ivie 8:27.

Meri Oni rẹ Jesu Ọ Dia “Oni rẹ Ọghẹnẹ-ẹ”

Meri ọyen ohwo rẹ Ju, ro nẹ uvwiẹ rẹ Ovie David rhe. (Luk 3:23-31) Ọghẹnẹ dje ẹserọphẹ kẹ fikirẹ esegbuyota vẹ omaẹvwọkpahotọ rọyen vwọ kẹ ẹga rẹ Ọghẹnẹ. (Luk 1:28) Ọghẹnẹ sanerọ nẹ ọ dia oni rẹ Jesu. (Luk 1:31, 35) Meri vẹ ọshare rọyen Josẹf ji vwiẹ emọ efa.—Mak 6:3.

Dede nẹ Baibol na djerephia nẹ Meri rhe dia odibo rẹ Jesu, a rha ghwa vwẹ evuẹ efa vwọ phia kpahọ-ọn.—Iruo rẹ Iyinkọn Na 1:14.