Ono Yen Ohwo rọ Vwọsua Kristi Na?

Ẹkpahọnphiyọ ri Baibol Na

Ohwo rọ vwọsua Kristi na ghwa dia ohwo ọvo yẹrẹ ukoko ọvoo, kidie Baibol na tare nẹ “ihwo buebun re vwọsua Kristi vwomaphia re.” (1 Jọn 2:18) Ukperẹ ọtiọyen, ota na “ohwo rọ vwọsua kristi” ra reyọ vwo nẹ ephẹrẹ ri Grik rhe na mudiaphiyọ “ohwo ro muẹ kpahan Kristi.” E se vughe ihwo ọtiọyena womarẹ iruemu rehẹ obotọ na:

• Ọ sian nẹ Jesu dia Kristi naa (Mesayaa) je sian nẹ Jesu dia Ọmọ rẹ Ọghẹnẹẹ.—1 Jọn 2:22.

• Ọ vwọsua Kristi na rọ dia Ohwo rẹ Ọghẹnẹ Jẹreyọ.—Une rẹ Ejiro 2:1, 2; Luk 11:23.

• Ayen me ruẹ kerẹsiẹ ra da mrẹ nẹ ayen yen Kristi na.—Matiu 24:24.

• Ayen vwọsuo Inenikristi kidie Jesu tare nẹ e de mu kpahen idibo rọyen, ọyen yen e ji muẹkpahan.—Iruo 9:5.

• Ayen guẹn efian nẹ ayen Inenikristi dede nẹ ayen ru obo re brare yẹrẹ phiẹn ihwo.—Matiu 7:22, 23; 2 Kọrẹnt 11:13.

Dede nẹ Baibol na se ohwo ọvuọvo ro vwo uruemu re djunute na ohwo rọ vwọsua Kristi, jẹ kerẹ ẹko, o se ayen eje ‘ihwo re vwọsua Kristi na.’ (2 Jọn 7) Ihwo rẹ vwọsua Kristi na ka vwomaphia vwẹ ọke rẹ iyinkọn na, ayen je herọ rhi te nonẹna. Baibol na mraro rọyen phiyotọ jovwo nẹ erọnvwọn tiọyena cha phia.—1 Jọn 4:3.

Obo re se vwo vughe ihwo re vwọsua Kristi na

• Ayen titẹ uyono rẹ efian kpahen Jesu. (Matiu 24:9, 11) Kerẹ udje, ihwo ri yono uyono rẹ Eghẹnẹ erha ri kuomakugbe dia ọvo yẹrẹ yono nẹ Jesu yen Ọghẹnẹ Ro Me vwo Ẹgba na, vwọso uyono ri Jesu, rọ vwọ tane: “Ọsẹ na rho nọ vwẹ.”—Jọn 14:28.

• Ihwo rẹ vwọsua Jesu rhọnvwenphiyọ obo rọ ta kpahen oborẹ Uvie rẹ Ọghẹnẹ ru erọnvwọn waan. Kerẹ udje, ilori ẹga evo tare nẹ Kristi suẹn womarẹ igomẹti rẹ ihworakpọ. Dedena, uyono nana vwọso Jesu, rọ tarẹ nẹ: “Uvie mẹ dia ẹbẹre ọvo rẹ akpọ nana-a.”—Jọn 18:36.

• Ayen tanẹ Jesu yen Ọrovwori rayen, ẹkẹvuọvo ayen nene iji rọyeen, ji te ọ rọ tare nẹ e ghwoghwo iyẹnrẹn esiri rẹ Uvie na.—Matiu 28:19, 20; Luk 6:46; Iruo 10:42.