Die Yen Ofovwin rẹ Amagidọn?

Ẹkpahọnphiyọ ri Baibol na

Ofovwin rẹ Amagidọn ọyen ofovwin rọ koba vwẹ uvwre rẹ Ọghẹnẹ vẹ usuọn rẹ ihworakpọ. Usuon nana vẹ ihwo ri biẹcha ayen vwọso Ọghẹnẹ rhi te nonẹna kidie ayen guọnọ vwomakpotọ kẹ usuon rẹ Ọghẹnẹ-ẹ. (Une Rẹ Ejiro 2:2) Ofovwin rẹ Amagidọn che phioba phiyọ usuon rẹ ihworakpọ eje.​—Daniẹl 2:44.

Obọ ọvo yen ubiota na “Amagidọn” vwomaphia vwẹ Baibol na, ọ hẹ Ẹvwọphia 16:16. Ọbe rẹ Ẹvwọphia mraro rọyen nẹ vwẹ “asan ọvo ra vwi Hibru se nẹ Amagidọn,” “ivie rẹ akpọ na ejobi” che “koko ra hẹrhẹ ofovwi rẹ ẹdẹ rode rẹ Ọghẹnẹ Ọrovwoẹgba na.”​—Ẹvwọphia 16:14.

Amono yen cha họnre vwẹ ofovwin na? Jesu Kristi yen che sun otuofovwin rẹ odjuvwu na vwo phi ivwighrẹn rẹ Ọghẹnẹ kparobo. (Ẹvwọphia 19:11-16, 19-21) Ivwighrẹn nana churobo si ihwo re vwọso ọgangan rẹ Jihova, ri ji muọghọ vwọ kẹ-ẹ.​—Izikiẹl 39:7.

Ubrakpọ ri Middle East yen e de che phi ofovwin rẹ Amagidọn na? Ejo. Ọ dia asan ọvo kiriguo yen e de che phi ofovwin nana-a, ukperẹ ọtiọyen, vwẹ akponeje.​—Jerimaya 25:32-34; Izikiẹl 39:17-20.

Amagidọn, re ji se “Har–​Magedon” (Hibru Har Meghiddohnʹ) ọkiọvo, mudiaphiyọ “Ugbenu ri Megiddo.” Megiddo ọyen orere vwẹ otọ rẹ Izrẹl awanre jovwo. Ikuegbe vuẹ avwanre nẹ a phi ifovwin mamọ vwẹ ekogho yena, e si evo rayen phiyọ Baibol na. (Iguẹdjọ 5:​19, 20; 2 Ivie 9:27; 23:29) Ẹkẹvuọvo, Amagidọn cha sa dia ekogho rọ kẹrẹ Megiddo rẹ oke awanre-e. Ugbenu rode vuọvo hẹ etiyi-in, iyara ri Jezreel dede cha sa gba ayen eje re cha họnre vwọso Ọghẹnẹ na-a. Ukperẹ ọtiọyen, ọnana ẹdia rẹ ẹgborho na eje de che kuomakugbe vwọ họnre vwọso usuon rẹ Ọghẹnẹ.

Die yen cha phia vwẹ ofovwin rẹ Amagidọn? Dede nẹ avwanre riẹn oborẹ Ọghẹnẹ cha vwẹ ẹgba rọyen vwo ruiruo wa-an, ẹkẹvuọvo, avwanre riẹnre nẹ o vwo ẹkuakua rẹ ofovwin kerẹ e ro vwo ruiruo vwẹ ọke rẹ awanre​—osio rẹ imicho, otọ rọ bẹrẹ, oghwe ro kuẹ, erhanre vẹ ibiosio rẹ erhanre, enu rọ nyavwaro, kugbe ega. (Job 38:​22, 23; Izikiẹl 38:19, 22; Habakọk 3:10, 11; Zekaraya 14:12) Ve ẹwẹn rẹ otighi, evo usun rẹ ivwighrẹn rẹ Ọghẹnẹ che hwe omoma rayen, kẹ ayen cha mrẹvughe nẹ Ọghẹnẹ yen họnra vwọso ayen na.​—Izikiẹl 38:21, 23; Zekaraya 14:13.

Ofovwin rẹ Amagidọn yen che phioba phiyọ akpọ na? Ọ dia ọyen yen che phioba phiyọ otọrakpọ na-a, kidie otọrakpọ na yen ihwo cha dia bẹdẹ bẹdẹ. (Une Rẹ Ejiro 37:29; 96:10; Aghwoghwo 1:4) Amagidọn che sivwin ihworakpọ ukperẹ ọ vwọ ghwọrọ, kidie “urogho rẹ ihwo buebu” re dia idibo rẹ Ọghẹnẹ che sivwin rhọ.​—Ẹvwọphia 7:9, 14; Une Rẹ Ejiro 37:34.

Vwẹ Baibol na, ubiota na, “akpọ na” se mudiaphiyọ otọrakpọ na, jẹ vwẹ oke evo e vwo dje irumwemwu rẹ ihwo re vwọso Ọghẹnẹ. (1 Jọn 2:​15-17) Vwẹ ọhọ yena, Amagidọn yen cha dia “oba rẹ akpọ na.”​—Matiu 24:3, King James Version.

Ọke vọ yen e che vwo phi ọfovwin rẹ Amagidọn? Ọke ri Jesu vwọ ta ota kpahen ‘ukpokpogho rode’ ro che sun kpo ofovwin rẹ Amagidọn na, ọ da ta: “Ọke na eyẹ ẹdẹ na ohwo ọvuọvo sa riẹ-ẹn, emakashe rẹ obo odjuvwu sa riẹ-ẹn, ekpuyovwi rẹ Ọmọ re ohwo je sa riẹn dede-e, jokpa rẹ Ọsẹ na ọvo.” (Matiu 24:21, 36) Dede nẹ Baibol na vuẹ avwanre ọke re che vwo phi ofovwin rẹ Amagidọni-i, jẹ ọ vuẹ avwanre nẹ ọ cha phia ọke ri Jesu de rhivwin rhe, a mrẹ oka rẹ ẹcha ri Jesu vwo nẹ ukpe ri 1914 rhe.​—Matiu 24:37-39.