Uvie rẹ Ọghẹnẹ Hẹ Ubiudu Wẹn?
Ẹkpahọnphiyọ ri Baibol na
Ẹjo, Uvie rẹ Ọghẹnẹ evun rẹ ubiudu rẹ Inenikristi-i.a Baibol na vuẹ avwanre asan rọ ghene hepha rọ vwọ tanẹ “uvie rẹ odjuvwu.” (Matiu 4:17, King James Version) E jẹ a fuẹrẹn oborẹ Baibol na vwo djephia nẹ Uvie rẹ Ọghẹnẹ ọyen obọdẹn rẹ usuon ro suẹn nẹ odjuvwu cha.
Uvie rẹ Ọghẹnẹ vwo isun, ihwo ro suẹn kugbe irhi, o ji vwo ogangan ro vwo ru ọhọre rẹ Ọghẹnẹ vwẹ odjuvwu vẹ otọrakpọ na.—Matiu 6:10; Ẹvwọphia 5:10.
Usuon yẹrẹ Uvie rẹ Ọghẹnẹ che sun vwẹ enu rẹ “ihwo ejobi, vẹ ẹgborho ejobi vẹ ephẹrẹ ejobi” vwẹ otọrakpọ na. (Daniẹl 7:13, 14) Obọ rẹ Ọghẹnẹ yen ogangan rẹ usuon na nẹ cha, ọ dia ihwo ro suẹ-ẹn.—Une Rẹ Ejiro 2:4-6; Aizaya 9:7.
Jesu vuẹ iyinkọn rọyen ri fuevun nẹ ayen cha vwomaba ọyen vwẹ Uvie rẹ odjuvwu vwo “tidia ekete” rẹ usuon.—Luk 22:28, 30.
Uvie na vwo ivwighrẹn rọ cha ghwọrọ.—Une Rẹ Ejiro 2:1, 2, 8, 9; 110:1, 2; 1 Kọrẹnt 15:25, 26.
Baibol na yono avwanre nẹ Uvie rẹ odjuvwu na hẹ evun rẹ ubiudu rẹ ohwo-o, kerẹsiẹ ra da mrẹ nẹ o suẹn nẹ udu rẹ ohwo cha. Ẹkẹvuọvo, o djephia nẹ ofori rẹ “ikun rẹ Uvie” na yẹrẹ “iyẹnrẹ esiri” rẹ Uvie na vwo djobọte ubiudu rẹ avwanre.—Matiu 13:19; 24:14.
Die yen ota na, “uvie rẹ Ọghẹnẹ na ọ hẹ ohri rẹ ovwan” mudiaphiyọ?
Obo ra fan Luk 17:21 wan vwẹ efanfan ri Baibol evo tighi ẹwẹn rẹ ihwo evo kpahen asan Uvie rẹ Ọghẹnẹ na ghene hepha. Kerẹ udje, Baibol ri King James Version tare nẹ “uvie rẹ Ọghẹnẹ na hẹ evun rẹ ovwan.” E se vwo vwo ẹruọ rẹ oborẹ owọrota nana mudiaphiyọ, ofori nẹ a fuẹrẹn ikuegbe na.
Uvie rẹ Ọghẹnẹ hẹ evun rẹ udu rẹ ivwighrẹn ri Jesu re vwọsuọ re je guọnọ hwe na-a
Jesu ta ota kẹ ihwo ri Farisi na, re dia ẹko rẹ ilori ẹga re vwọso ọyen, ri ji jiroro kpahen oborẹ ayen vwo hwe. (Matiu 12:14; Luk 17:20) Ọyen oborẹ ọhọ hepha re vwo roro nẹ Uvie rẹ Ọghẹnẹ hẹ evun rẹ udu rẹ erharhe ihwo tiọyena? Jesu ta kẹ ayen: “Obo evun rẹ ovwan vọnre vẹ efian kugbe umwemwu.”—Matiu 23:27, 28.
Efanfan ri Baibol efa nabọ dje obo rehẹ Luk 17:21 na phephẹn: “Uvie rẹ Ọghẹnẹ vẹ ovwan yen gba hẹ etinẹ.” (E phi italics ba; Contemporary English Version) “Uvie rẹ Ọghẹnẹ na ọ hẹ ohri rẹ ovwan.” (New World Translation, eta rehẹ obotọ) Kọyen a sa ta nẹ Uvie rẹ odjuvwu rọhẹ “ohri” rẹ ihwo ri Pharisee yẹrẹ rọ “vẹ” ayen gba herọ na mudiaphiyọ nẹ Jesu ri Jihova vwo mu Ovie rẹ Uvie na yen ayen vẹ ọyen gba hẹ etiyin.—Luk 1:32, 33.
a Ishọshi buebun yono ihwo nẹ Uvie rẹ Ọghẹnẹ hẹ evun rẹ ohwo yẹrẹ ubiudu rẹ ohwo. Kerẹ udje, Southern Baptist Convention rọhẹ United States tare nẹ ẹbẹre ọvo rẹ Uvie rẹ Ọghẹnẹ na, ọyen “usuon rẹ Ọghẹnẹ vwẹ ubiudu vẹ akpeyeren rẹ ohwo.” Oka rẹ ota tiọyena yen Pope Benedict XVI je ta vwẹ ọbe rọyen Jesus of Nazareth nẹ, “Uvie rẹ Ọghẹnẹ cha rhe e de vwo ubiudu ro nyẹme.”