Ẹkpahọnphiyọ rẹ Enọ ri Baibol Na / Arhọ vẹ Ughwu / Oshọ rẹ Ughwu—Mavọ Yen Wo Se Vwo Phio Kparobọ?
Ẹkpahọnphiyọ ri Baibol na
Avwanre djoshọ rẹ ughwu kidie ọvweghrẹn yen o ruẹ, ọtiọyena kẹ avwanre davwẹngba vwọ sẹro rẹ arhọ rẹ avwanre. (1 Kọrẹnt 15:26) Ẹkẹvuọvo, oshọ rẹ ughwu rọ vrẹka fikirẹ iyono rẹ efian yẹrẹ ẹkuruemu ro churobọ si orhan sa nẹrhẹ ihwo dia ‘eviẹn vwẹ akpeyeren rayen.’ (Hibru 2:15) Wọ da riẹn uyota kpahen ẹdia rẹ ihwo ri ghwuru hepha, wọ rha cha djoshọ rẹ ọkamuka kpahen ughwuu, rọ dia oshọ rọ sa nẹrhẹ ofu rẹ akpeyeren dje ohwo.—Jọn 8:32.
Oborẹ Baibol na ta kpahen ughwu
Ihwo ri ghwuru riẹn emu vuọvoo. (Une rẹ Ejiro 146:4) Ofori nẹ oshọ mu we nẹ wọ cha rioja wo de ghwu nuu, kidie Baibol na vwẹ ughwu dje ovwerhẹn.—Une rẹ Ejiro 13:3; Jọn 11:11-14.
Ihwo ri ghwuru cha sa wan avwanre omaa. Ihwo re tobọ dia inogbozighi ri sianro de ghwu, ayen rhe vwo ẹgba vuọvoo. (Isẹ 21:16) Baibol na tare nẹ “ometuo rayen vẹ omẹriọ rayen ghwọrọ kufia nure.”—Aghwoghwo 9:6.
Ọ dia ohwo de ghwu nu jẹ ọrọyen ghwe ree. Kidie Ọghẹnẹ cha rhọvwọn ihwo ri ghwuru vwẹ ọke rẹ evrẹnushi na.—Jọn 5:28, 29; Iruo rẹ Iyinkọn Na 24:15.
Ọghẹnẹ veri nẹ ọke cha rẹ “ughwu rha cha dia ọfa-a.” (Ẹvwọphia 21:4) Baibol na tare nẹ vwẹ ọke yena, “Ọvwata cha re ughwẹ rẹ otọ na, kọ dia enu rọye bẹdẹ,” a rha cha djoshọ rẹ ughwu ọfaa.—Une rẹ Ejiro 37:29.