Ufuoma Cha Dia Akpọ Na Eje

Ihwo buebun guọnọ dia akpọ rẹ ufuoma hepha. Nẹ awanre rhe yen ihwo re suẹn vwọ davwẹngba rẹ ayen vwọ phi oba phiyọ ofovwin je nẹrhẹ ufuoma dia. Ọke buebun na, erere rẹ ọmọke yen ẹgbaẹdavwọn rayen na ghwa cha. Kidie ọmọke da wan nu, ayen me rhoma phi ofovwin. Kẹ, akpọ na se ghini vwo ufuoma? E! Ja fuẹrẹn erọnvwọn evo rẹ avwanre se yono mie Jesu.

Oborẹ Jesu che ru

Baibol na tare nẹ kẹrẹkpẹ Jesu cha nẹrhẹ ufuoma dia akpọ na.

• “E che se [Jesu] . . . Osun rẹ Ufuoma. Usuon rọyen che nene asan eje Ufuoma che vwo obaa.” (Aizaya 9:6, 7) Jesu rọ dia Osun rẹ Uvie rẹ Ọghẹnẹ cha nẹrhẹ ufuoma dia akpọ na bẹdẹ.

• “O che sivwin ogbere rọ viẹ kẹ vwọ kẹ ukẹcha . . . kugbe kohwo kohwo ro vwo ọchukoo.” (Une rẹ Ejiro 72:12-14) Jesu cha vwẹ ẹgba rọyen vwo phi oba phiyọ, ofovwin, ozighi vẹ oja je brorhiẹn rẹ ọsoso.

• “Ẹgborho rha cha kpare ọlọkọ vwọso ẹgborhoo, Ayen rhe che yono obo re phiẹ ofovwin ọfaa.” (Aizaya 2:4) Ọke rẹ Jesu de suẹn ọtọrakpọ na, ihwo re che yono obo re phi ofovwiin, ukperẹ ọtiọyen ayen che yono oborẹ ayen sa vwọ dia kugbe vwọrẹ ufuoma.

Wọ sa wọ mrẹ obori Jesu cha ghwa ufuoma rhe akpọ na vẹ obo ro che vwo fierere kẹ wẹ, ni ividio na Die Yen Uvie rẹ Ọghẹnẹ?

Obori Jesu Yonori

Iyono ri Jesu vwẹ ukẹcha vwọ kẹ ihwo buẹbun nonẹna vwọ yerẹn kuẹgbe vwọrẹ ufuoma. Vwẹ Ota ri Jesu vwẹ enu rẹ Ugbenu na, Jesu yono ihwo obo re sa vwẹ ukẹcha kẹ ayen vwo vwo ufuoma ji nene ohwohwo yerin kugbe. Ja fuẹrẹn idje evo.

• “Omavwerhovwẹn dia vwọ kẹ ihwo re guọnọ ufuoma.” (Matiu 5:9) Jesu jiriro kẹ idibo rọyen nẹ ayen kẹnoma kẹ ohọnre jẹ dia ihwo rẹ ufuoma.

• “Ẹsosuọ, wẹ vẹ oniọvo wẹn rhuẹrẹ kugbe, wo de ru ọtiọyen nu, gbe rhivwin rhe rhe vwẹ okẹ wẹn kpahotọ.” (Matiu 5:23, 24) Jesu jiriro vwọ kẹ otu ri kerhọ rọyen nẹ ayen fobọ rhuẹrẹ kugbe siẹrẹ ayen vẹ ohwo ọfa da ghwọ. O yonori nẹ a vẹ Ọghẹnẹ se vwo vwo omamọ rẹ oyerinkugbe, ofori nẹ a vẹ ihwo efa dia vwọrẹ ufuoma.

• “Ovwan rha vwẹ ihwo guẹdjọ-ọ rere e vwo jẹ ovwan evwo guẹdjọ.” (Matiu 7:1) Jesu si avwanre orhọ nẹ avwanre vwẹ ihwo efa guẹdjọọ kidie ọnana sa ghwa ẹghwọ rhe. Ukperẹ ayen vwọ tẹnrovi echobọ rẹ ihwo efa, Jesu da vuẹ ayen nẹ “Ovwan rhe vwo ghovwo” ihwo efa.—Luk 6:37.

Nonẹna, ihwo buebun yen vwẹ iyono ri Jesu na vwo ruiruo vwẹ akpọ na eje. Vwẹ ẹkuotọ evo rẹ ozighi yẹrẹ ohẹriẹ hepha dede, ihwo buebun yono oborẹ ayen sa vwọ rhuẹrẹ ẹghwọ phiyọ ababọ rẹ ophu, vwo ghovwo ohwohwo, ji dje ẹguọnọ kẹ ihwo re dje uruẹmu esiri kẹ ayeen.

Wọ sa vwọ mrẹ oborẹ iyono ri Jesu vwẹ ukẹcha kẹ ihwo evo vwọ mrẹ ufuoma, se uyovwinrota nana “Obo re se Vwo Vwo Ufuoma Dede nẹ e Phiẹ Ofovwin ji Gbe Ozighi.”