Ofovwin vẹ Aruọke ri Wene Ghwa Ọkanrovwẹ rẹ Emu ro Akpọeje​—Die Yen Baibol na Tare?

Ọkieje yen ofovwin ri Ukraine vẹ imuoshọ rẹ aruọke ri wene soro vwọ nẹrhẹ ọkanrovwẹ rẹ emu vwẹ akpọneje kpenu phiyọ. Ọnana ghwa obo re phia vwẹ ẹkuotọ ri ghwe rhiẹro mamọ-ọ, rẹ ihwo rẹ ẹkuotọ na da mrẹ bẹnbẹn rẹ ayen vwọ mrẹ emu re.

• “Ofovwin, aruọke ri wene, igho rẹ ipẹtro vẹ efa ri kpenu phiyọ nẹrhẹ ọ bẹn a vwọ kọn je vwo emu.”​—António Guterres, UN secretary-general, July 17, 2023.

• “Kidie nẹ Russia sioma reyọ vwo nẹ ọrhuẹrẹphiyotọ rẹ emu ra fan vwo kpo ẹkuotọ efa, ihwo evo ri yono ẹbe kodo da ta nẹ ọnana cha nẹrhẹ emu kanre akpọ na, je nẹrhẹ emu ghanre vrẹka vwẹ ẹkuotọ ri ghwe fe-e, marho kẹ ẹkuotọ ri North Africa vẹ Middle East.”​—Atalayar.com, July 23, 2023.

Roro kpahen obo ri Baibol na ta kpahen obaro na vẹ ọkanrovwẹ rẹ emu.

Baibol na mraro rẹ ọkanrovwẹ rẹ emu

• Jesu da mraro: “Ẹkuotọ cha vwọso ẹkuotọ, uvie cha vwọso uvie, emu cha kanre.”​—Matiu 24:7.

• Ọbe rẹ Ẹvwọphia vwẹ Baibol na ta ota kpahen iguiyesi ẹne re vwo ru udje. Ọvo usun rẹ iguiyesi na mudiaphiyọ ofovwin. Ọ rọ vwọ kpahọn vwẹ obuko de rhe mudiaphiyọ owẹnvwe, rọ dia ọke ra cha vwọ vwanvwa emu je shẹ ghanre vrẹka. “Me da mrẹ, nighere! iyesi obiebi, ohwo ro chidia enu rọyen vwẹ ovwanvwọ vwọ yọnrọn obọ. Mi de nyo obo re họhọ urhuru ọvo . . . rọ tanẹ: ‘Ikuati ọvo rẹ iwiti idinarọs ọvo, ikuati erha rẹ ibali idinarọs ọvo.’ ”​—Ẹvwọphia 6:​5, 6.

Aroẹmrẹ ri Baibol ri shekpahen ọkanrovwẹ rẹ emu ruẹgba enẹna vwẹ ọke ri Baibol na seri “ẹdẹ re koba na.” (2 Timoti 3:1) Wo vwo yono kpobarophiyọ kpahen “ẹdẹ re koba na” vẹ iguiyesi ẹne rehẹ ọbe rẹ Ẹvwọphia, nughe rẹ ividio na, Akpọ na Wenere Rhanvwẹ Ukpe ri 1914, wo ji se uyovwinrota na, “Iguiyesi Ẹne Na​—Die Yen Ayen Mudiaphiyọ?”

Obo ri Baibol na sa vwọ vwẹ ukẹcha phia

• Baibol na vọnre vẹ uchebro rẹ aghwanre re sa cha avwanre uko vwo yerin ghene ebẹnbẹn kugbe emu re ghanra phiyọ ọkieje vẹ ọkanrovwẹ rẹ emu. Mrẹ idje evo vwẹ uyovwinrota na, “How to Live on Less.”

• Baibol na je kẹ avwanre iphiẹrophiyọ nẹ erọnvwọn che yovwin. O ve ive rẹ ọke rẹ “ọka buebu [cha vwọ] dia otọ na.” (Une rẹ Ejiro 72:16) Wo vwo yono kpahen iphiẹrophiyọ rẹ obarọ na kpobarophiyọ vẹ oboresorọ wọ sa vwọ vwẹrosuọ, se uyovwinrota na, “A Real Hope for a Better Tomorrow.”