Die Yen Baibol na Ta Kpahen Ọkanrovwẹ rẹ Emu ra mrẹ Nonẹna?

“Owẹnvwe che no karekare.” Eta nana dje oborẹ isun rẹ akpọ na guọnọ ru vwọ kpahen ọvo usun rẹ ebẹnbẹn rẹ ihworakpọ rọ ma rho, ọyen obo ra sa vwọ vwẹ emu kẹ ihwo eje vwẹ otọrakpọ na.a Ẹkẹvuọvo, owẹnvwe se ghini nẹ akpọ na? Die yen Baibol na tare?

Baibol na mraro kpahen ọkanrovwẹ rẹ emu ra mrẹ nonẹna

Baibol na tare nẹ ọkanrovwẹ rẹ emu cha vwomaphia vwẹ ọke avwanre na, ọke re seri “ẹdẹ re koba na.” (2 Timoti 3:1) Ọ dia Ọghẹnẹ yen so ọkanrovwẹ rẹ emuu, o ji si avwanre orhọ kpahọn jovwo re nẹ ọ dia ọyen yen suọọ. (Jems 1:13) Vwo oniso rẹ aroẹmrẹ ri Baibol ivẹ.

“Emu cha kanre, . . . nẹ asan ọvo vwo kpo ọfa.” (Matiu 24:7) Baibol na mraro rọyen nẹ owẹnvwe che fi vwẹ asan buebun. Ihwo ri yono kpahen emu niyẹnrẹn rọyen nẹ, “Owẹnvwe ọgangan rọhẹ akpọ na enẹna, vẹ omamọ emu ra mrẹ rhia-a kugbe ọkanrovwẹ rẹ emu rhoma ganphiyọ ganphiyọ.”b Ihwo uriorin ujorin buebun vwẹ ẹkuotọ sansan nonẹna mrẹ emu rẹ ayen guọnọ ree. Ọ da ohwo mamọ nẹ buebun rayen ghwẹ fikirẹ owẹnvwe ọgangan na.

“Nighere! iyesi obiebi, ohwo ro chidia enu rọyen vwẹ ovwanvwọ vwọ yọnrọn obọ.” (Ẹvwọphia 6:5) Vwẹ aroẹmrẹ nana, iyesi re vwo ru udje vẹ ohwo rọ gua na mudiaphiyọ owẹnvwe ro che fi vwẹ ẹdẹ re koba na.c Ovwanvwọ rọhẹ obọ rẹ ọguiyesi na mudiaphiyọ emu ra cha vwanvwe ro tumukuu, rere ihwo eje sa vwọ mrẹ emerha re. Ọguiyesi na vwọ hẹ enu rẹ iyesi na, urhurhu ọvo de ghwoghwo phia nẹ emu cha ghanre mamọ, ọ da je vwẹ orhọ-esio kẹ ihwo nẹ ayen ghwọrọ emuu. (Ẹvwọphia 6:6) Ọnana ghwe dje ọkanrovwẹ rẹ emu ra mrẹ vwẹ akpọnejẹ enẹna, rẹ iduduru rẹ ihwo da mrẹ bẹnbẹn rẹ ayen vwọ mrẹ emu re yẹrẹ mrẹ omamọ rẹ emu rẹ ayen cha re.

Oborẹ ọkanrovwẹ rẹ emu che vwo vwoba

Ewena evo tare nẹ emu rẹ otọrakpọ na vwọphia bun vrẹ obo re sa ghẹrẹ ihwo eje rehẹ akpọ na. Ọ da dia ọtiọyen, kẹ, die kọyen ghwa ọkanrovwẹ emu na cha? Die yen Baibol na tare nẹ Ọmemama rẹ avwanre Jihovad che ru vwọ rhuẹrẹ ebẹnbẹn na phiyọ?

Ebẹnbẹn: Igọmẹti che se phioba phiyọ ọbẹnvwẹ vẹ oshenyẹ rọ so owẹnvwe ọgangan kẹ ihwo naa.

Obo ra cha rhuẹrẹ ebẹnbẹn na wan: Usuon ọgbagba rọ dia Uvie rẹ Ọghẹnẹ che wene usuon rẹ ihworakpọ. (Daniẹl 2:44; Matiu 6:10) Nonẹna, ihwo buebun mrẹ bẹnbẹn rẹ ayen vwọ mrẹ emu re ẹkẹvuọvo, vwẹ otọ rẹ Uvie rẹ Ọghẹnẹ, ọnana che wene. Baibol na da ta kpahen Jesu rọ dia Ovie rẹ Uvie rẹ Ọghẹnẹ: “O che sivwin ogbere rọ viẹ vwọ kẹ ukẹcha, ọtiọyen ji te ohwo re shenyẹ kugbe kohwo kohwo ro vwo ọchukoo. . . . Eka buebun cha dia otọrakpọ na; E cha vọn enu rẹ igbenu na mwavwe hwẹ.”—Une rẹ Ejiro 72:12, 16.

Ebẹnbẹn: Ifovwin so ọghwọrọ, ọ je ghwa ebẹnbẹn rẹ igho cha, ri siobọ rẹ emu kpotọ yẹrẹ dajẹ.

Obo ra cha rhuẹrẹ ebẹnbẹn na wan: “[Jihova che] phioba phiyọ ifovwin vwẹ akpọ na ejobi. O vwirhin umurhabọ je guọghọ oshuẹ; Ọ vwẹ erhanre torhẹ ekpẹrẹ rẹ ofovwin rẹ isodje.” (Une rẹ Ejiro 46:9) Ọghẹnẹ cha ghwọrọ ekuakua ofovwin vẹ ihwo re so ofovwin. Ukuotọ rọyen, ihwo eje ke cha mrẹ omamọ emu re. Baibol na veri nẹ “evwata cha djẹ kerẹ odin, ufuoma ji che bunphiyọ.”—Une rẹ Ejiro 72:7.

Ebẹnbẹn: Aruọke ri muoshọ vẹ oghwọrọ ri kpregede re vwomaphia hwe eranvwẹ ji miovwo ekankọn.

Obo ra cha rhuẹrẹ ebẹnbẹn na wan: Ọghẹnẹ che sun aruọke na vẹ erọnvwọn efa re so oghwọrọ, vwẹ idjerhe ro de yovwin kẹ ekankọn. Baibol na da ta: “[Jihova] de ru ogiribo fọ, ọsẹghe rẹ abadi de rhurhu unu. . . . Ọ rhẹriẹ aton phihọ ẹtẹrhe rẹ ame, otọ ọyaya phihọ ogbugbu rẹ ame. Kẹ etiyin ọ vwọ kẹ ọ rẹ owẹvwe hwe nẹ ọ dia, . . . ayen de voro udju, ayen da kọn ugbo ri vain, etiyin i de yovwi kẹ ayen.”—Une rẹ Ejiro 107:29, 35-37.

Ebẹnbẹn: Ihwo ebrabra re je dia ivwurhurhu ruẹ emu re sa so imuoshọ vwọ kẹ ugboma na, ayen ji si omamọ rẹ emu nẹ vwọ kẹ ihwo re guọnerọ.

Obo ra cha rhuẹrẹ ebẹnbẹn na wan: Uvie rẹ Ọghẹnẹ che si ivwurhurhu vẹ ihwo ebrabra no. (Une rẹ Ejiro 37:10, 11; Aizaya 61:8) Baibol na dje Jihova Ọghẹnẹ phiyọ ohwo ro “brorhiẹn rẹ ọsoso kẹ ihwo re shenyẹ; rọ vwẹ emuọre kẹ otu rẹ owẹnvwe hwe.”—Une rẹ Ejiro 146:7.

Ebẹnbẹn: Kukpe kukpe yen a vwọ ghwọrọ ẹkẹn ọvo rẹ ẹkẹn erha rẹ emuọre rehẹ akpọ na kuẹfia.

Obo ra cha rhuẹrẹ ebẹnbẹn na wan: Vwẹ Uvie rẹ Ọghẹnẹ, ihwo re vwẹrote emu cha nabọ vwẹrote. Ọke ri Jesu vwọ hẹ akpọ na, ọ kẹnoma kẹ emu ẹghwọrọ. Kerẹ udje, vwẹ ẹdia ọvo, ọ da ghẹrẹ otu buebun re vrẹ 5,000 vwẹ idjerhe rẹ igbevwunu. Ọmọke evo vwọ wan nu, ọ da vuẹ idibo rọyen: “Ovwan koko e ra re chekọ na rere e vwo jẹ ọvuọvo ẹghwọrọ kuẹfia.”—Jọn 6:5-13.

Kidie nẹ Uvie rẹ Ọghẹnẹ che si kemu kemu rọ so owẹnvwe no, ihworakpọ eje cha riavwerhen rẹ omamọ emu rọ vọn asan eje, ro ji yovwin kẹ ugboma na. (Aizaya 25:6) Wo se vwo yono kpahen oborẹ Uvie rẹ Ọghẹnẹ che vwo ru ọnana, ni uyovwinrota na, “Ọke vọ Yen Uvie rẹ Ọghẹnẹ Che Vwo Sun Akpọ Na?”