E+/taseffski/via Getty Images (Stock photo. Posed by model.)
OVWAN RA RHẸRẸ!
Ebẹnbẹn ri Djobọte Iroro rẹ Ighene Rhoma Buẹnphiyọ—Die Yen Baibol na ta Kpahọn?
Vwẹ Monday, February 13, 2023, Centers for Disease Control and Prevention (CDC) vwẹ United States da niyẹnrẹn ro shekpahen ebẹnbẹn ri djobọte iroro rẹ ighene rehẹ U.S. Ọ tare nẹ emọ rẹ isikuru ri bun vrẹ ẹkẹn 40 rẹ ujorin yen vwẹ ọkieje vwo muomaphiyọ ji no nẹ ayen vwo iphiẹrophiyọ-ọ.
Dr. Kathleen Ethier, rọ dia ọga rẹ CDC’s Division of Adolescent and School Health (DASH) da ta: “Vwẹ ẹgbukpe 10 re wanre na, avwanre rhe mrẹvughe nẹ ebẹnbẹn ri djobọte iroro rẹ ighene buẹnphiyọ. Ẹkẹvuọvo, vwọ kpahen emetẹ, a rhe mrẹvughe nẹ ebẹnbẹn ri djobọte iroro rayen kugbe ẹwẹn rẹ ayen vwọ teyen oma rayen hwe rhoma rhe ganphiyọ vrẹ obo rọ hepha jovwo.”
Iyẹnrẹn na da ta:
Emetẹ ri bun vrẹ ẹkẹn 14 rẹ ujorin yen a gba nene bru ehware, jẹ ayen guọnọre-e. Dr. Ethier da ta: “Ọnana muoshọ mamọ. Vwẹ asan rẹ emetẹ ihwe rẹ wo vugheri hepha, ọvo usun rayen siẹrẹ ọ da hanvwe mamọ, yẹrẹ vrẹ ọtiọyen yen a gba du re.”
Emetẹ re vrẹ ẹkẹn 30 rẹ ujorin yen vwo ẹwẹn rẹ ayen vwọ teyen oma rayen hwe.
Emetẹ ri bun vrẹ ẹkẹn 57 rẹ ujorin yen vwẹ ọkieje vwo muomaphiyọ yẹrẹ no nẹ ayen vwo iphiẹrophiyọ-ọ.
Iyẹnrẹn nana da ohwo mamọ. Ofori nẹ ọke eghene dia ọke rẹ aghọghọ vẹ omavwerhovwẹn. Die yen sa chọn ighene uko vwo yerin ghene ofudjevwe rẹ ayen hirharokuẹ nonẹna? Die yen Baibol na tare?
Baibol na vwẹ ukẹcha kẹ ighene
Baibol na ta ota kpahen ọke rọ vọnre vẹ ebẹnbẹn rẹ avwanre de yerẹn enẹna. O sere “ọke ọgangan rọ bẹn eyeren.” (2 Timoti 3:1-5) Ẹkẹvuọvo, Baibol na vwẹ uchebro ro fo aruọke vwọphia, rọ vwẹ ukẹcha kẹ ighene iduduru rehẹ akpọneje vwo chirakon, o toro ebẹnbẹn rẹ ayen hirharokuẹ-ẹ. Roro kpahen iyovwinreta vẹ ividio rehẹ obotọ na.
Ukẹcha vwọ kẹ ighene ri vwo ẹwẹn rẹ ayen vwo hwe oma rayen
Ukẹcha vwọ kẹ ighene rẹ ofu dje, ri vwo iroro ọchọchọ, yẹrẹ muomaphiyọ
Vwo nẹ Omaemuophiyọ Kpo Omavwerhovwẹn (ikatunu re siẹ phiyọ ophapha)
Ukẹcha vwọ kẹ ighene re shenyẹ
Vwẹ Aghwanre Vwo Phi Oshenyẹ Kparobọ (ikatunu re siẹ phiyọ ophapha)
Ukẹcha vwọ kẹ ighene re gberi ẹgua
Baibol na vwẹ omamọ rẹ uchebro vwọ kẹ emiọvwọn
Baibol na je vwẹ uchebro vwọ kẹ emiọvwọn rọ sa nẹrhẹ ayen chọn emọ rayen uko vwo phi ebẹnbẹn rẹ ayen hirharokuẹ vwẹ akpeyeren kparobọ. Roro kpahen iyovwinreta rehẹ obotọ na.