Thai Liang Lim/E+ via Getty Images
OVWAN RHA RHẸRẸ!
Ihwo Buebun Ruẹ Ẹnwan Kpahen Imuoshọ rẹ Sosha Midia Sua Vwọ kẹ Ighene Nonẹna
Vwẹ ukpe ri 2025 ihwo ri igọmẹti vwẹ akpọ na eje ruẹ ẹwan kpahen oborẹ sosha midia ruẹ vwẹ oma rẹ ighene. Ẹkuotọ ọvo dobọrẹ ighene rehẹ ẹgbukpe 16 kpotọ nẹ ayen rha reyọ sosha midia vwo ruiruoo, ẹkuotọ efa ji roro oborẹ ayen che vwo ru ọtiọyen.
Ọ vwerhen oma nẹ, ighene evo riẹnre nẹ sosha midia sa sua imuoshọ kẹ ayen. Ehiahiẹ ọvo rẹ Pew Research Center ruru vwẹ United State, ra vwọ phia vwẹ April 2025, tare nẹ “A da ghara ighene rehẹ ẹkuotọ rẹ United State kpọ asakuivẹ, ẹkẹn ọvo(48%) tare nẹ [sosha midia] sua imuoshọ kẹ ighene rehẹ ẹgbukpe 13 fiẹ 17.”
Ihwo evo re tona rẹ omaesivwon vwo orhọesio phia kpahen oborẹ sosha midia yanghan iroro rẹ ighene wan. Vwẹ ukpe rọ wanre na, Dr. Vivek Murthy, rọ dia olori rẹ ihwo re bẹrẹ oma vwẹ United State tare nẹ: “Ofori nẹ a jowọ kpakpata re vwo ru orọnvwọn kpahen ebẹnbẹn re yanghan iroro rẹ ighene buebun nonẹna—jẹ a rhe mrẹvughe nẹ orọnvwọn ọvo rọ so ebẹnbẹn nana yen sosha midia.”
Mavọ yen esẹ vẹ ini sa vwọ sẹro rẹ emọ rayen vwo nẹ imuoshọ rehẹ sosha midia? Baibol na vwẹ uchebro rẹ aghwanre vwọphia.
Oborẹ esẹ vẹ ini se ru
E ja fuẹrẹn odjekẹ ri Baibol nana.
“Ohwo ro vwo iroro obọ rọ ra ọye o nẹ.”—Isẹ 14:15.
Kidie nẹ sosha midia vọnre vẹ imuoshọ, wọ vwẹ uphẹn kẹ ọmọ wẹn nẹ ọ ghwa reyọ vwo ruiruoo. Wọ ke vwẹ uphẹn kẹ ọmọ wẹn, gbe jo muwẹro nẹ o te ohwo rọ sa yanmu ọke re bruru nẹ ọ reyọ vwo ruiruo te, ohwo rọ sa sane omamọ rẹ igbeyan je kẹnoma kẹ erọnvwọn ri je fo.
Wo vwo yono kpobarophiyọ, se iyovwinreta na “Ofori nẹ Ọmọ Mẹ Reyọ Sọsha Midia Vwo Ruiruo?” vẹ “Idjerhe ro Fori nẹ A Reyọ Sosha Midia Vwo Ruiruo Wan.”
“[Ovwan] rha vwẹ ọke rẹ ovwan vwo ruiruo vwẹ idjerhe ro me yovwin.”—Ẹfesọs 5:16.
Wọ da rhọnvwe nẹ ọmọ wẹn reyọ sosha midia vwo ruiruo vwẹ urhi obo rọ cha reyọ vwo ruiruo wan vwo mu kẹ, wo mi ji dje oborẹ irhi na sa vwọ sẹro rọyen vwo nẹ imuoshọ. Vwo oniso rẹ ewene sansan re sa vwomaphia vwẹ uruemu rẹ ọmọ wẹn, ri se djephia nẹ ofori wo vwo siobọ oborẹ ọmọ wẹn reyọ sosha midia vwo ruiruo wan kpotọ.
Reyọ ikatunu re siẹ phiyọ ophapha na Vwẹ Aghwanre Vwọ Reyọ Sosha Nẹtwọk Vwo Ruiruo vwọ vwẹ ukẹcha kẹ ọmọ wẹn vwọ riẹn oboresorọ ro vwo fo nẹ e sun obo ra reyọ sosha midia vwo ruiruo wan.
Wọ da guọnọ odjekẹ ri Baibol efa ri shekpahen oborẹ emiọvwọn sa vwọ vwo ukẹcha kẹ emọ rayen, se uyovwinrota na “Ihwo rẹ Igọmẹti ri Kpenu Vwẹ Orhọesio Phia Kpahẹn Imuoshọ ri Sosha Midia Sua kẹ Ighene—Die Yen Baibol na Tare?”
Yono kpobarophiyọ
Baibol na tare nẹ avwanre yerẹn vwẹ “ọke ọgangan rọ bẹn eyeren.” (2 Timoti 3:1-5) Vwẹ ọke vuọvo na, ọ kẹ avwanre uchebro rẹ aghwanre rọ sa cha avwanre uko vwo yerin ghene ọke ọgangan nana. A sa mrẹ iyovwinreta sansan re mu kpahen Baibol na re vrẹ 20 vwọ kẹ esẹ vẹ ini kugbe emọ rayen vwẹ uyovwinrota nana “Ebẹnbẹn ri Djobọte Iroro rẹ Ighene Rhoma Buẹnphiyọ—Die Yen Baibol na ta Kpahọn?”