Ozighi-Egbe Che Vwoba Ẹdẹ Ọvo?

Ọkieje re vwo nyo kpahen oghwọrọ rẹ inogbozighi soro yen a vwọ nọ oma sẹ: ‘Ọghẹnẹ ghene davwerhọn avwanre? Diesorọ erọnvwọn ọtiọna vwọ phia? Ozighia che Ghini Vwoba? Mavọ mi se vwo yerin ghene oshọ ro muvwe?’ Baibol na nabọ kpahenphiyọ enọ nana.

Ẹro vọ yen Ọghẹnẹ vwo nẹ ozighi egbe?

Ọghẹnẹ vwo utuoma kpahen oyangha vẹ ozighi. (Une 11:5; Isẹ 6:​16, 17) Jesu vwẹ ẹro rẹ Ọghẹnẹ vwo nẹ emu vwọ ghwọku idibo rọyen evo, ọke ayen vwọ jowọ rẹ ozighi. (Matiu 26:​50-52) Dede nẹ ihwo buebun vwẹ odẹ rẹ Ọghẹnẹ vwo gbozighi, ọ dia Ọghẹnẹ yen ji ayen uwevwi-in. Vwọrẹ uyota, ọ tobọ kerhọ rẹ ẹrhovwo raye-en.​—Aizaya 1:15.

Ọghẹnẹ vwo ọdavwẹ rẹ otu re rioja, ji te ihwo rẹ ozighi egbe te oma. (Une 31:7; 1 Pita 5:7) Baibol na djerephia nẹ o che phi oba phiyọ ozighi egbe.​—Aizaya 60:18.

Obo re sua ozighi egbe

Baibol djerephia nẹ ohwo yen “tua ohwo muotọ kẹ umiovwo rọye.” (Aghwoghwo 8:9) Ikuegbe rẹ ihworakpọ djerephia nẹ ihwo ri vwo ẹgba reyọ oshọ vwo shenyẹ ihwo efa. Oshenyẹ na da rhe ganọ re, ihwo re shenyẹ na ki rhe gbozighi.​—Aghwoghwo 7:7.

Oba rẹ ozighi egbe

Ọghẹnẹ veri nẹ ọyen cha reyọ ufuoma vwo wene oshọ vẹ ozighi vwẹ akpọ na eje. (Aizaya 32:18; Maika 4:​3, 4) O che:

• Ghwie ozighi nẹ esiri. Ọghẹnẹ cha reyọ usuon rọyen rẹ akpọeje vwo wene usuon rẹ ihworakpọ. Osun rẹ usuon yena, Jesu Kristi, cha vwẹ ẹro abavo vwo nene ihwoeje yerin, o ji che siẹ oshenyẹ vẹ ozighi no. (Une 72:​2, 14) Vwẹ ọke yena, o rhe vwo ohwo ro che gbe ozighi-i. Ihwo ke cha gọlọ “vwẹ evun rẹ oyovwe rode.”​—Une 37:​10, 11.

• Siẹ ọmiaovwẹ rẹ ozighi sua no. Ọghẹnẹ che siẹ ọmiaovwẹ nẹ oma vẹ iroro rẹ ihwo ri rhiẹromrẹ ozighi jovwo re. (Aizaya 65:17; Ẹvwọphia 21:​3, 4) Ọ tobọ ve nẹ ọyen cha kpare ihwo ri ghwuru eje nẹ ushi, vwọ rhe akpọ rẹ ufuoma.​—Jọn 5:​28, 29.

Baibol na vuẹ avwanre oboresorọ o vwo muẹro nẹ Ọghẹnẹ che ru ọnana kẹrẹkpẹ. Ọkiọvo wo se roro, ‘Diesorọ Ọghẹnẹ ji rhi siẹ ozighi no-o?’ Wọ cha mrẹ ẹkpahọnphiyọ rẹ onọ nana, wo de ni ividio na Diesorọ Ọghẹnẹ Vwọ Vwẹ Uphẹn kẹ Ojaẹriọ?