UKẸCHA VWỌ KẸ ORUA | ORỌNVWE
Obo re se Vwo Phi Iruo Phiyọ Ẹdia ro Foro
Vwẹ akpọ rẹ ikọmputa re yerin te enẹna, ohwo wọ wian kẹ, ihwo wo nene wian vẹ ineki wẹn che rhẹro rọyen nẹ wo che vwo uphẹn ọkieje, ọnana me nẹrhẹ ọ dia bẹnbẹn wo vwo phi iruo phiyọ ẹdia ro foro, o vwo jẹ erọnvwọn efa vwẹ akpeyeren wẹn kerẹ orọnvwe wẹn ekpokpo.
Obo ro fori nẹ wọ riẹn
Ekuakua rẹ ikọmputa sa nẹrhẹ wọ ghwọrọ ọke ro fori nẹ wẹ vẹ ọrivẹ rẹ orọnvwe wẹn ghwọrọ kugbe phiyọ iruo. Ọtiọyena, kuse kuse re se we, e-mail yẹrẹ ovue re si rhe we kpahen iruo ju wọ hẹ obiruo-o sa dia emu rẹ okpakpa ro fori nẹ wọ rhuẹrẹphiyọ.
“E vwo nẹ iruo kpo, a me ghwọrọ ọke kugbe vẹ ihwo rẹ orua avwanre pha bẹnbẹn ẹnẹna, kidie use vẹ evuẹ ri shekpahen iruo me rhe nẹrhẹ wo gbobọnyẹ orọnvwe wẹn.”—Jeanette.
Rere wọ sa vwọ vwẹ ẹro abavo vwo nẹ iruo vẹ orua wẹn, ofori nẹ wọ jowọ kpahọn. Wo rhe vwo ọrhuẹrẹphiyotọ-ọ, ọ sa nẹrhẹ iruo wẹn gbowọphiyọ orọnvwe wẹn.
“Ọrivẹ rẹ orọnvwe wẹn yen ohwo rẹsosuọ wo ke gbobọnyẹ, kidie wo roro nẹ, ‘O che vwo ẹruọ mẹ. O che vwo ghovwo uvwe. Mẹ vẹ ọyen cha ghwọrọ ọke kugbe siẹfa.’”—Holly.
Iroroẹjẹ vwọ kpahen re vwo phi iruo phiyọ ẹdia ro foro
Ni orọnvwe wẹn ghanghanre. Baibol na da ta: “Oborẹ Ọghẹnẹ tan kugbe nu, e jẹ ohworakpọ vuọvo hẹriẹ-ẹ.” (Matiu 19:6, New American Bible, Revised New Testament) Ọ vwọ dianẹ wọ cha rhọnvwe kẹ ohworakpọ vuọvo nẹ ọ ‘hẹriẹ’ owẹ nẹ orọnvwe wẹ-ẹn na, wọ vwẹ uphẹn kẹ iruo wẹn nẹ o ru ọtiọye-en.
“Ineki evo rori nẹ kidie nẹ ayen hwa osa kẹ wẹ, kẹ ayen rhẹro rọyen nẹ wọ cha wian kẹ ayen kọke kọke rẹ ayen guọnọre. Kidie nẹ orọnvwe mẹ ghanre vrẹ iruo, ke me vuẹ ayen nẹ me cha sa wian vwẹ ẹdẹ rẹ omaerovwon mẹ-ẹ, ẹkẹvuọvo, me cha mrẹ ayen kẹrẹkpẹ.”—Mark.
Nọ oma wẹn, ‘Oborẹ mi ruẹ djephia nẹ mi nẹ orọnvwe mẹ ghanghanre vrẹ iruo mẹ?’
Sen iruo vwẹ ọke ro fori. Baibol na da ta: “Omaevwokpotọ ọ vẹ aghwanre gba yan.” (Isẹ 11:2) Omaevwokpotọ cha nẹrhẹ wọ mrẹvughe nẹ wọ vwọ sen iruo evo yẹrẹ vwọ kẹ ihwo efa ru yin me yovwin.
“Mẹvwẹ iplọmba, ọtiọyena, ihwo evo se se vwe use okpakpa ọkiọvo. Mi rhe se bru ayen ra-a, ki mi ji ohwo ọfa.”—Christopher.
Nọ oma wẹn: ‘Me sa sen iruo evo ọ da dianẹ ọ cha nẹrhẹ mi gbobọnyẹ ọrivẹ rẹ orọnvwe mẹ? Die yen ọrivẹ rẹ orọnvwe mẹ cha ta kpahọn?’
Rhuẹrẹ ọke phiyotọ rẹ ovwan sa ghwọrọ kugbe. Baibol na da ta: “Kidie vwọ kẹ kemu kemu o vwo eghẹre.” (Aghwoghwo 3:1) Vwẹ ọke rẹ owian da vọn owẹ abọ yen ọke ro me fo wọ vwọ rhuẹrẹ ọke phiyọ vwọ kẹ orọnvwe wẹn.
“Ọke rẹ iruo da vọn obọ avwanre, kẹ avwanre rhuẹrẹ ọke phiyotọ rẹ avwanre sa ghwọrọ kugbe ababọ rẹ ukpokpoma, ọkiọvo ọ sa dia emu ra cha re kugbe yẹrẹ oyan ra cha yan kugbe vwẹ orhoma rẹ abadi.”—Deborah.
Nọ oma wẹn: ‘Me sa rhuẹrẹ ọke phiyotọ re mẹ vẹ ọrivẹ rẹ orọnvwe mẹ sa ghwọrọ kugbe ababọ rẹ ukpokpoma? Die yen ọrivẹ rẹ orọnvwe mẹ cha ta kpahọn?’
Fun ifonu, ikọmputa yẹrẹ itablẹti wẹn. Baibol na da ta: “Vughe obo ri yovwiri [“re ma ghanre,” NW ].” (Filipae 1:10) Wo se fun ifonu, ikọmputa yẹrẹ itablẹti wẹn rere evuẹ vẹ use ri nẹ iruo wẹn cha se vwo ju we ekpokpo?
“Me davwan sẹ me sa dobọ rẹ iruo ji vwẹ ọke me rhuẹrẹ phiyotọ. Ọke na de te re, ki mi fuẹn ifonu mẹ.”—Jeremy.
Nọ oma wẹn: ‘Me yanjẹ ifonu mẹ vwo sẹ ọga mẹ yẹrẹ ineki mẹ se se vwe vwẹ ọke rẹ ayen da guọnọ ovwẹ? Die yen ọrivẹ rẹ orọnvwe mẹ cha ta kpahọn?’
Dia ohwo rọ nuẹ. Baibol na da ta: “E jẹn ihwo riẹn akoechiro rẹ ovwan [“nẹ ovwan ihwo re nuẹ,” NW ].” (Filipae 4:5) A vwọ ta uyota, ọkiọvo iruo se gbowọphiyọ orọnvwe wẹn. Kerẹ udje, ọkiọvo, oka rẹ iruo rẹ ọrivẹ rẹ orọnvwe wẹn ruẹ sa nẹrhẹ ọ je wian dede nẹ o nẹ iruo rhire. Ọtiọyena, wọ vuẹ ọrivẹ rẹ orọnvwe wẹn nẹ o ru vrẹ ẹgba rọye-en, ukperẹ ọtiọyen, roro kẹ.
“Ọshare mẹ vwo emeki ọvo rọ chua, jẹ ọke buebun na, o vwo iruo re guọnọ okpakpa ro ruẹ vwẹ ọke rẹ omaerovwon. Ọkievo, ivun miovwo uvwe, ẹkẹvuọvo, mi de roro kpahen ọke rẹ avwanre ghwọrọ kuẹgbe, o gbi fiota-a.”—Beverly.
Nọ oma wẹn: ‘Mi djephia kẹ ọrivẹ rẹ orọnvwe mẹ nẹ mi vwo ẹruọ rẹ oghwa rẹ owian ro muẹ? Me rhẹro ọke buebun mie ọrivẹ rẹ orọnvwe mẹ? Die yen ọrivẹ rẹ orọnvwe mẹ cha ta kpahọn?’
Oborẹ ovwan ta ota kpahen
Ẹsosuọ, ovwan ohwo vuọvo se roro kpahen enọ nana komobọ. Ovwan de ru ọtiọyen nu, ovwan me ta ota kpahen ẹkpahọnphiyọ rẹ ovwan.
Ọrivẹ rẹ orọnvwe wẹn brenu kẹ wẹ jovwore nẹ wo mu owian cha uwevwin? Ọ da dia ọtiọyen, wọ rhọnvwephiyọ?
Ẹbẹre vọ kiriguo yen wo rori nẹ ofori nẹ wọ wian phiyọ a da ta ota vwọ kpahen ẹro abavo re vwo nẹ iruo?
Wo rori jovwore nẹ ọrivẹ rẹ orọnvwe wẹn che se phi iruo phiyọ ẹdia ro foro-o? Ọ da dia ọtiọyen, ẹdia vọ yen wọ karophiyọ?
Ewene vọ yen wọ guọnọre nẹ ọrivẹ rẹ orọnvwe wẹn ru kpahen re vwo phi iruo phiyọ ẹdia ro foro?