Ayen ga Jihova Vwẹ Ọke rẹ Erọnvwọn Vwọ Gan Vwẹ Venezuela

Vwẹ ikpe evo rhire na yen eyeren vwọ gan vwọ kẹ ihwo rehẹ ẹkuotọ ri Venezuela. Oseri ri Jihova ọvo re se Edgar da ta: “Vwẹ uvwre rẹ imikpe evo, eyeren da rhe gan mamọ tẹdia rọ da họhọ nẹ avwanre kua kpo ẹkuotọ ọfa, jẹ Venezuela yen avwanre hepha!”

Die yen vwẹ ukẹcha kẹ Edgar se vwo yerin ghene ẹdia na? Ọ da ta: “Mẹ vẹ aye mẹ Carmen de roro kpahen imishọnare re kua kpo ẹkuotọ ri ghwe vwo igho-o, jẹ ayen se yerin ghene ẹdia na. Ọyena de mu avwanre vwo ru akpeyeren rẹ avwanre lọhọ je davwen erọnvwọn kpokpọ ni, kerẹ avwanre vwọ kọn emuọre avwanre komobọ.”

Ẹkẹvuọvo, Edgar vẹ Carmen ji ru erọnvwọn efa. Ayen jowọ rẹ ayen vwọ nẹrhẹ ẹwẹn rẹ iniọvo na te otọ, ji te ihwo rehẹ ẹdia rẹ omaemuophiyọ ọgangan. (1 Tẹsalonaika 5:11) Edgar da ta: “Vwọ vrẹ ọ rẹ avwanre vwọ nẹrhẹ ẹwẹn rayen te otọ, avwanre ji jiro kẹ ayen nẹ ayen vwẹ ukẹcha kẹ ihwo efa kidie ọ cha nẹrhẹ oma vwerhen ayen.”​—Iruo rẹ Iyinkọn Na 20:35.

Ẹgbaẹdavwọn Rayen Vwẹ Iruo rẹ Aghwoghwo na Fierere

Ọke rẹ ọga ri COVID-19 ghwa vwọ tonphiyọ, Argenis de brorhiẹn ro vwo ghwoghwota kẹ ihwo rẹ orua rọyen. Evo vwẹ usun rayen da rhọnvwe nẹ ayen che yono Baibol na womarẹ ifonu.

Argenis je guọnọ nẹ ihwo rẹ orua rọyen ri vwo nẹtwọku-u je mrẹ erere vwo nẹ ọrhuẹrẹphiyotọ rẹ ọghwẹkoko ri 2020 na rhe. Oniọvo ọshare ọvo rọ dia orere rọ kẹrẹ ayen da vwẹ uhworo rẹ ọghwẹkoko na vwọ kẹ ayen. Ihwo rẹ orua rẹ Argenis de momo TV rode vẹ agboro. Argenis da vwẹ ifonu vwo se ayen rere ọ vẹ ayen nẹrhovwo tavwen rẹ ayen ke tonphiyọ. Ẹgbaẹdavwọn rẹ Argenis da nẹrhẹ ihwo 4 vwẹ orua rọyen kugbe ihwo 15 efa vwomaba ọrhuẹrẹphiyotọ na.

Esegbuyota vẹ Ẹguọnọ mu Ayen Vwo Ruiruo

Aye gbẹ ọshare ọvo re se Jairo vẹ Johana ọvo yen vwo imoto vwẹ ukoko rayen, ọtiọyena, kẹ ayen reyọ vwọ vwẹ ukẹcha kẹ ihwo efa. Ẹkẹvuọvo, ayen vwo ebẹnbẹn ọvo rọ dia oborẹ ayen sa vwọ mrẹ fuẹl dẹ. Jairo da ta: “Avwanre ghwọrọ inọke buebun vwẹ urhiẹ, ọkiọvo avwanre tobọ reyọ ọsoso asọn na vwọ hẹrhẹ ọke ro che vwo te avwanre.”

Jairo niro nẹ ẹgbaẹdavwọn rẹ ayen vwọ vwẹ ukẹcha kẹ ihwo efa ghene ghanre. Ọ da ta: “Ọke rẹ avwanre de mu erọnvwọn kẹ iniọvo na, ọ kẹ avwanre omavwerhovwẹn kidie ọnana mu ayen vwọ kpẹvwẹ Jihova rọ vwẹ oborẹ ihwo rọyen guọnọre eje vwọ kẹ ayen.”​—2 Kọrẹnt 9:​11, 14.

Kohwo Kohwo sa Vwẹ Ukẹcha Phia

Dede nẹ oniọvo aye ọvo re se Norianni hẹ ẹgbukpe 28, jo no nẹ ihwo che roro nẹ ọyen hanvwe nọ kẹ ohwo rọ sa vwẹ ukẹcha kẹ ihwo efa. Ẹkẹvuọvo, o de se 1 Timoti 4:12: “E jẹn ohwo ọvuọvo ni we saka fiki rẹ obo wọ vwọ hẹ omotete-e, ẹkẹvuọvo gba vwẹ oma wẹn ru oniru kẹ otu ri segbuyota na.”

Ẹkpo ri Biabol yena nẹrhẹ Norianni ghwọrọ ọke vẹ iniọvo rẹ ukoko rọyen re kpakore, ọ vwẹ ukẹcha kẹ ayen vwo vwobọ vwẹ aghwoghwo rẹ ileta esio je tobọ durhie ayen vwọba oma siẹrẹ ọ da guọnọ yono ohwo Baibol na. Ọ je reyọ ifonu vwo se ayen ji si ovuẹ rẹ ọbọngan vwo rhe ayen. Norianni da ta: “Jihova nẹrhẹ me riẹn nẹ mi se ru erọnvwọn buebun.”

Iniọvo avwanre rehẹ Venezuela hirharoku egbabọse buebun vwẹ ọke ọgangan nana. Dedena, ayen ji ruiruo rẹ aghwoghwo na vẹ oruru, “ayen ke rha je dia ivwiroro” kẹ ohwohwo.​—Kọlose 4:11; 2 Timoti 4:2.