Obo ra Sa Vwọ Vwẹ Ukẹcha kẹ Ihwo rẹ Orua rẹ Avwanre re Ga Jihovaa

1-2. Die yen se gbowọphiyọ oyerinkugbe avwanre vẹ ihwo rẹ orua a ka vwọ mrẹ uyota na vughe?

JESU vuẹ ọshare ọvo rọ guọnọ dia idibo rọyen nẹ: “Bru ihwo rẹ orua wẹn ra, rere wọ vuẹ ayen erọnvwọn eje ri Jihova ru kẹ wẹ.” (Mak 5:19) Eta yena rọ tare na dje uruemu ọvo rọhẹ oma ihworakpọ phia​—owenvwe ra vwọ vuẹ ihwo re vwo ẹguọnọ kpahen obo re vwerhan avwanre oma.

² Wọ karophiyọ oborẹ oma ru we wọ ka vwọ mrẹ uyota na? Ọ sa dianẹ wo se rhurho ba omaa! Jẹ ọkiọvo oma vwerhen ihwo rẹ orua wẹn kpahọọn. Yẹrẹ oborẹ wo ta ota kẹ ayen wan so ẹghwọ phiyọ uvwre wẹn vẹ ayen. Ọ da dia ọtiọyen, die wo se ru wọ vẹ ihwo rẹ orua wẹn se vwo vwo uvi oyerinkugbe je rhuẹrẹ ẹghwọ na phiyọ dede nẹ wọ je yọnrọn iwan rẹ Onenikristi?

3. Die yen a cha ta ota kpahen vwẹ uyono nana?

³ Vwẹ uyona nana, a cha mrẹ: (1) Oborẹ erorokẹ se vwo mu avwanre vwo dje ọdavwẹ kẹ ihwo rẹ orua avwanre re vwẹ ẹga kẹ Jihovaa,a ọ da tobọ dianẹ ayen dje omavwerhovwẹn phiaa; (2) obo ra sa vwọ kpairoro vrẹ erharhe eta vẹ iruemu rayen; (3) oborẹ ẹroerhe vẹ erhiorin sa vwẹ ukẹcha kẹ ihwo rẹ orua avwanre vwọ mrẹ uyota na vughe; kugbe (4) obo re se vwo djephia nẹ e vwo ẹguọnọ rayen.

JẸ EROROKẸ MU WE VWỌ VWẸ UKẸCHA KẸ AYEN

4. Die yen Jesu ru ihwo ri vwo omavwerhovwẹn kpahen ovuẹ rọyeen?

⁴ Jesu fobọ kpairoro vrẹ ihwo ri vwo omavwerhovwẹn kpahen ovuẹ rọyeen. Ọ reyọ oma rọyen vwo dje ohwo rọ wiowian vwẹ ogba rẹ ivaini rọ davwẹngba rọyen eje rere urhe rẹ ifigi rọ mọ emamọ jovwoo sa vwọ mọ. (Luk 13:6-9) Ọke ri Jesu vwọ ta eta yena, jẹ ọ vrẹn ẹgbukpe erha re rọ vwọ davwẹngba rọ vwọ kọn esegbuyota phiyọ ẹwẹn rẹ ihwo ri Ju na. Diesorọ ọ vwọ davwẹngba rọ vwọ vwẹ ukẹcha kẹ ayen? Kidie Jesu ọyen ohwo vẹ erorokẹ, ọ da vwẹ ọke kẹ ayen kidie ọ riẹn ẹdia rẹ ayen hepha.

5. Die yen mu Jesu vwo dje erorokẹ vwọ kẹ ihwo ri Ju na?

⁵ Kidie nẹ ilori rẹ ẹga na rhọnvwe vwẹ ukẹcha kẹ ihwo ri Ju na vwo vwo uvi rẹ esegbuyota kpahen Ọghẹnẹẹ, Jesu de dje erorokẹ kẹ ayen. Ọ mrẹre nẹ ihwo na “họhọ igodẹ ri vwo osu-un.” (Mak 6:34) Ọmọke krẹn tavwen Jesu ki ghwu, ọ viẹ kẹ Jerusalẹm kidie ọ riẹnre nẹ ihwo buebun rehẹ evun rọyen che ku arhọ rayen kufia fikirẹ jẹ esegbuyota evwo. (Luk 19:41-44) E de vwo ọkpọ ẹwẹn tiọyena vwọ kẹ ihwo orua rẹ avwanre, o che mu avwanre vwọ vwẹ ukẹcha kẹ ayen.

6. Diesorọ o vwo fo a vwọ vwẹ ọke kẹ ihwo rẹ orua rẹ avwanre re vwẹ ẹga kẹ Jihovaa? (Galesha 6:9)

⁶ Se Galesha 6:9. Ọ da tobọ dianẹ ihwo rẹ orua rẹ avwanre vwo omavwerhovwẹn kpahen oborẹ avwanre segbuyotaa, e jẹ a vwẹ ọke kẹ ayen, e jẹ oma “emu esiri eruo” rhọ avwanree. Avwanre riẹnre nẹ ọ reyọ ọke ohwo ki se siẹ ẹkuruemu rẹ omaẹfẹnẹ re vwẹ awọ muotọ re nẹ oma ji vwo uvi rẹ esegbuyota kpahen Ọghẹnẹ. O vwo ọke ọvo vwẹ obuko re rẹ wọ vwọ họhọ ihwo ri ‘vwo iphiẹrophiyọọ, re je riẹn Ọghẹnẹ vwẹ akpọ naa’? (Ẹfe. 2:12) Aphro herọọ nẹ ọ da dia ọtiọyen o vwo ohwo rọ vwẹ ukẹcha kẹ wẹ. Ọ da dia obo wo se ru, o rhe fo nẹ wọ je vwẹ ukẹcha kẹ ihwo rẹ orua wẹn vwọ riẹn Jihova?

KPAIRORO VRẸ ERHARHE ETA VẸ IRUEMU RAYEN

7. Die yen sa nẹrhẹ iniọvo ri Jesu jẹ esegbuyota evwo kpahọn?

⁷ Ọ sa dianẹ iniọvo ri Jesu nyo kpahen igbevwunu ri Jesu ruru vwẹ Galili. (Luk 4:14, 22-24) Dedena, ayen vwo esegbuyota kpahọn ẹsosuọọ. (Jọn 7:5) Diesorọ? Baibol na vuẹ avwanree. Ẹkẹvuọvo, o vwo erọnvwọn ivẹ re sorọ ihwo ri Ju evo rhe nene Jesuu. Oshọ mu evo nẹ a cha vwọso ayen. (Jọn 9:18-22) Efa nama roro nẹ Jesu cha sa dia ohwo Ọghẹnẹ ji rhee kidie ayen vughire vwo nẹ ọkiemọ rhe. (Mak 6:1-4) Ọ je sa dianẹ oka iroro tiọyena yen ji rhe iniọvo ri Jesu. Oka iroro tiọyena ji se rhe ihwo orua avwanre?

8. Die yen sa nẹrhẹ ihwo rẹ orua re vwẹ ẹga kẹ Jihovaa ta eta ji ru erọnvwọn ri je avwanree?

⁸ Vwo oniso rẹ obo ri mu ayen vwọ ta eta ji ru oborẹ ayen ruẹ. Ọ sa dianẹ iniọvo ri Jesu jehẹ usun rẹ ihwo re tare nẹ “uyovwin rọyen gbare-e.” (Mak 3:21) Die yen nẹrhẹ ayen ta ọtiọyen? Awọreta re riariẹ ẹkpo yena phiyọ djerephia nẹ Jesu vwo erọnvwọn buebun ro ruẹ tẹ ẹdia rẹ ọ rha mrẹ ọke vwọ riemuu. (Mak 3:20) Ọ sa dianẹ ihwo rẹ orua rọyen niro nẹ o muomaphiyọ iruo rẹ aghwoghwo rọyen na gan nọ? Ayen se roro ọtiọyen. Aphro herọọ nẹ ihwo rẹ orua rẹ avwanre ji se roro nẹ avwanre mu ẹga avwanre kpahen uyovwin gan nọ. Avwanre sa vwẹ uruemu djephia nẹ avwanre ihwo re ghene nuẹ, ọ da dianẹ ẹro tiọyen yen ayen vwo nẹ avwanre.

9. Die yen sa vwẹ ukẹcha kẹ ihwo rẹ orua rẹ avwanre vwo wene ẹro rẹ ayen vwo nẹ avwanre? (1 Pita 3:1, 2) (Ni ifoto na.)

⁹ Vwẹ uruemu vwo dje oka rẹ ohwo ru wọ hepha phia. Oborẹ avwanre ruẹ vẹ eta esiri avwanre se mu ihwo rẹ orua rẹ avwanre vwo wene ẹro rẹ ayen vwo nẹ avwanre. (Se 1 Pita 3:1, 2.) Ivun se miovwon ọshare rẹ aye rọyen hẹ ukoko na nẹ ọ yanjẹ ọyen vwo kpo uyono yẹrẹ iruo rẹ aghwoghwo na. Kidie nẹ ọ guọnọre nẹ o vwo ẹwẹn ọtiọyeen, o se ru ewene phiyọ ọrhuẹrẹphiyotọ rọyen rere ọ vẹ ọshare rọyen sa vwọ ghwọrọ ọke kugbe. Kerẹ udje, iruo dahẹ ọshare na obọ yẹrẹ ọ rha hẹ uwevwiin, ọ sa reyọ ọke yena vwo kpo aghwoghwo. Oniọvo rẹ aye ro vwo uruemu ra vwọ nuẹ ro ji vwo ọhọ sa vwẹ ukẹcha kẹ ọshare rọyen vwo wene ẹro ro vwo nẹ Iseri ri Jihova.

10. Mavọ yen a sa vwọ vwẹrokere Jesu siẹrẹ a da reyọ avwanre vwo guẹdjọ?

¹⁰ A da vwẹ owẹ guẹdjọ, wọ kpahan otaa. Ọke re vwo mu efian bare Jesu nẹ ọ ria emu je da udi gan nọ, ọ chochọn oma rọyeen. Ẹkẹvuọvo, o jiriro kẹ ihwo nẹ ayen reyọ uruemu rọyen vwo brorhiẹn. (Mat. 11:19) O djephia womarẹ udje rọyen nẹ ọ vwẹ ẹro abavo vwo nẹ akpeyeren. (Ni Jọn 2:2, 6-10.) Ọtiọyen ọ je hepha nẹ kọke kọke a da reyọ owẹ vwo guẹdjọ, ọ dia ọyen wọ cha vwọ kpaheen. Ukperẹ ọtiọyen, vwe uruemu vwo djephia kẹ ihwo rẹ orua wẹn nẹ wẹwẹ ohwo rọ nuẹ rẹ oma je vwerhan rere wọ vwẹ uphẹn kẹ ayen, ayen ọvo vwẹ ẹwẹn rẹ obọ rayen vwo brorhiẹn. Ọnana se mu ayen vwo sen kemu kemu rẹ ayen nyo kpahen avwanre rọ dia efian.

VWO ERHIORIN VẸ ẸROERHE ỌKIEJE

11. Mavọ yen Jesu nene iniọvo rọyen ri sere gbuyotaa yerin wan?

¹¹ Ẹbe ẹne rẹ ikuegbe akpeyeren ri Jesu djerephia nẹ ọ vwẹ erhiorin nene iniọvo rọyen yerin. Kerẹ udje, ayen etiyin ọke rẹ Jesu vwo ru igbevwunu rọyen rẹsosuọ vwẹ Kana. (Jọn 2:11, 12) Kirobo ra tare siẹvure, iniọvo rọyen vwo esegbuyota kpahọọn. Dedena, Jesu vẹ ayen ji vwo oyerinkugbe. Baibol na tare nẹ omarẹ ẹgbukpe erha ro vwo ru igbevwunu rẹsosuọ rọyen vwẹ Kana nu, ọ vẹ iniọvo rọyen je ta ota bọrọbọrọ.​—Jọn 7:5-8.

12. Die yen sa nẹrhẹ e rhẹro nẹ ihwo rẹ orua avwanre evo che wene ẹwẹn?

¹² A da nabọ vwo ẹruọ rẹ arodọnvwẹ ri Jihova, ọnana sa nẹrhẹ ẹroerhe avwanre kpahen ayen ganphiyọ. Siẹrẹ a da ghwọrọ ẹga refian nu, ihwo rẹ orua avwanre sa karophiyọ nẹ a vuẹ ayen kpahen oghwọrọ nana.b (Ẹvwọ. 17:16) Ayen sa tobọ vwomaba avwanre vwẹ ẹga ruyota siẹrẹ ukpokpogho rode na da tonphiyọ nu. Ọ da dianẹ ihwo rẹ orua avwanre vwo ebẹnbẹn enẹna, avwanre che ru oborẹ avwanre se ru eje vwọ vwẹ ukẹcha kẹ ayen. Ayen se rhiabọreyọ uyota na ayen da mrẹ nẹ uruemu esiri vẹ ẹguọnọ rẹ avwanre dje kẹ ayen ghini obọdẹn.

DJEPHIA NẸ WO VWO ẸGUỌNỌ RAYEN

13. Die yen ofori nẹ a jomaotọ kpahen dede nẹ avwanre muomaphiyọ ẹga ri Jihova?

¹³ Dede nẹ avwanre muomaphiyọ ẹga ri Jihova, avwanre guọnọre nẹ ihwo orua avwanre roro nẹ e vwo ọke yẹrẹ ẹguọnọ rayeen. (Mat. 7:12) Mavọ yen e se vwo djephia nẹ e vwo ọdavwẹ rayen? E jẹ e roro kpahen idjerhe evo.

14-15. Ọrhọ yen idjerhe ọvo e se vwo djephia nẹ e vwo ẹguọnọ rẹ ihwo orua rẹ avwanre re ga Jihovaa? Djudje rọyen.

¹⁴ Nokpẹn rayen nọke ra ruọke, wo ji dje ẹguọnọ kẹ ayen. A sa vuẹ ihwo orua rẹ avwanre kọke kọke nẹ erọnvwọn eje shephiyọ vwo djephia nẹ e vwo ẹguọnọ rẹ ayen. Kerẹ udje, e se si ovuẹ, ifoto ra reyọre vwẹ ọke re vwo kpo oyan, omaerovwon, yẹrẹ ọke a vẹ igbeyan vwọ riakpọ kuẹgbe vwo rhe ayen. Ileta yẹrẹ ẹmẹse re ru kẹ ayen yen ghwa obo ra guọnọre oyerinkugbe rẹ avwanre vẹ ọ rẹ ayen sa vwọ ghwotọphiyọ. E de ru enana eje, jẹ avwanre dje kẹ ayen nẹ e vwo ẹguọnọ rayen.

¹⁵ Roro kpahen udje rẹ oniọvo aye ọvo re se Anna vwẹ Armenia. Ọ vẹ ọrua rọyen ghwọrọ ọke kuẹgbe mamọ, ma rho vwẹ uvwre rẹ ọke rẹ ayen de ruẹ orẹ rẹ ẹde re vwie ohwo yẹrẹ erẹ efa. Jẹ Anna vwọ mrẹ ukoko na vughe nu, oshọ ko muẹ ihwo rẹ orua rọyen nẹ ẹga kpokpọ rọyen na che gbowọphiyọ oyerinkugbe rayen. Oshọ rẹ oborẹ akpeyeren rọyen cha dia vwẹ obaro na ji mu ayen fikirẹ orhiẹn ro bruru rọ vwọ dia Oseri ri Jihova. Kẹ, die yen Anna ruru vwo si oshọ rayen kpotọ? Ọ da ta: “Me da kọn bru ihwo rẹ orua mẹ ra, ke me vuẹ ayen kpahen oborẹ mi ruẹ rọ reyọ ọke mẹ. Mi ji durhie ayen cha uwevwin mẹ ji dje ayen kẹ igbeyan mẹ. Fikirẹ ọnana, ihwo orua mẹ buebun da nabọ rhi vughe igbeyan mẹ, oshọ rhe mu ayeen. Ihwo orua mẹ buebun riẹnre nẹ mẹvwẹ ohwo rẹ oma vwerhan, ọtiọyena ayen rha ro ẹnwan kpahen ovwẹẹ.”

16. Idjerhe vọ yen Jesu vwo djephia nẹ o vwo ọdavwẹ rẹ oniọvo rọyen Jems? (Ni eta rehẹ obotọ.)

¹⁶ Vwo ọdavwẹ rayen. Jesu vwo vrẹn nushi nu, ọ vwọ vwomaphia kẹ oniọvo rọyen Jems vwo djephia nẹ o vwo ọdavwẹ rọyen. (1 Kọr. 15:7) Wọ sa vwẹ ẹwẹn roro oborẹ oma ru Jems rọ vwọ riẹn nẹ Jesu je rhe kpairoro vrẹ ọyeen? Ọ họhọre nẹ ọke nana rẹ ayen vwọ rhoma mrẹ ohwohwo na yen Jems vwo vwo imuẹro nẹ Jesu yen Mesaya na. Ayen vwọ mrẹ nu, ọ sa dianẹ Jems je vwẹ ukẹcha kẹ ihwo orua rọyen efa vwọ riẹn nẹ Jesu yen Mesaya na.c​—Iruo 1:14.

17. Mavọ yen a sa vwọ reyọ odjekẹ rọhẹ Rom 12:15 vwo ruiruo? (Ni ifoto na.)

¹⁷ Se Rom 12:15. E de dje ọdavwẹ kẹ ihwo rẹ orua vwẹ ọke rẹ ebẹnbẹn vẹ ọke erọnvwọn de yovwin kẹ ayen​—kọyen ọke ayen ma vwọ guọnọ, ọnana sa nẹrhẹ ayen wene ẹro ayen vwo nẹ avwanre jovwo.d Kerẹ udje, e se ruẹse kẹ ayen ji nene ayen ghọghọ ọ da dianẹ ohwo ọvo vwevunrẹ orua na vwiẹre. Ohwo ọvo vwevunrẹ orua na de ghwu, a sa vwẹ ukẹcha ro fori vẹ ọbọngan vwọ kẹ ayen ji si ovuẹ yẹrẹ vwẹ ikadi rhe ayen. Vwọrẹ uyota, a sa nokpẹn rayen kọke kọke, ma rho ayen de hirharokuẹ ẹdia ọgangan.

18. Mavọ yen avwanre sa vwọ vwẹrokere Andru?

¹⁸ Dje ayen kẹ iniọvo ukoko na. Ọke rẹ Andru vwọ mrẹvughe nẹ Jesu yen Mesaya na nu, o de brokpakpa dje oniọvo rọyen re se Pita kẹ Jesu. (Jọn 1:40-42) A sa vwẹrokere uruemu tiọyena? Kerẹ udje, nọke ra ruọke e se durhie ohwo rẹ orua kpo uyono yẹrẹ nẹ ọ vwomaba avwanre vẹ igbeyan vwọ riemu kugbe? Re vwo dje ohwo na kẹ iniọvo na ye, kọ cha mrẹ nẹ Iseri ri Jihova ihwo dẹndẹn re pha kerẹ ayen.

19. Mavọ yen ofori nẹ e nene ihwo orua avwanre yerin wan ọ da tobọ dianẹ ayen vwo ẹruọ rẹ erọnvwọn evo rẹ avwanre segbuyotaa? (1 Pita 3:15)

¹⁹ Se 1 Pita 3:15. Ọkiọvo ihwo orua avwanre che se vwo ẹruọ rẹ oboresorọ ra vwọ sian nẹ e che se ru erọnvwọn evoo, jẹ ọkieje yen ayen cha vwọ karophiyọ ọghọ vẹ uruemu esiri rẹ avwanre dje kẹ ayen. Oma je sa vwerhen ayen avwanre da davwẹngba vwo nene ayen ghwọrọ ọke kugbe ọke efa. Kerẹ udje, avwanre che se vwobọ vwẹ ẹkuruemu vẹ erẹ re vwọso Baibol naa, ẹkẹvuọvo a sa kọn bru ayen ra, nene ayen riemu kugbe, ji ruẹse kẹ ayen vwẹ ọke efa.

WỌ KPAIRORO VRẸ IHWO RẸ ORUA WẸẸN

20. Ọbọngan vọ yen udje ri Jems vwọ kẹ avwanre?

²⁰ Uphẹn rẹ Jems vwo nene Jesu vwẹ iruo aghwoghwo rọyen va rọ abọ, ẹkẹvuọvo ọ je rhe dia odibo ukuko na. (Gal. 1:18, 19; 2:9) Iyono ri Jesu nabọ te Jems ẹwẹn, dede nẹ ọ ka dia odibo rọyeen. Kerẹ udje, ẹwẹn ọfuanfon na muro vwo si ileta rọ rionbọ kpo ota ri Jesu vwẹ Enu rẹ Ugbenu na.e

21. Diesorọ o vwo fo e vwo jẹ ihwo orua rẹ avwanre re vwẹ ẹga kẹ Jihovaa ẹ kpairoro vrẹ?

²¹ Ọ da tobọ dianẹ a davwẹngba avwanre eje ji vwo ọdavwẹ rẹ ihwo orua avwanre dede, ayen se jẹ uyota na e rhiabọreyọ yẹrẹ vwo omavwerhovwẹn kpahọn. Diesorọ o vwo fo e vwo jẹ ayen ẹ kpairoro vrẹ? Kidie kọke kọke re de dje uruemu esiri kẹ ihwo orua, jẹ a vwẹrokere Ọghẹnẹ avwanre Jihova kugbe Ọmọ rọyen Jesu. (Luk 6:33, 36) Ọke vwọ yanran na, uruemu avwanre se mu ayen vwo wene ẹro rẹ ayen vwo nẹ avwanre. Ayen je sa karophiyọ oborẹ avwanre vuẹ ayen jovwo kpahen oborẹ avwanre segbuyota. A cha sa mrẹ vwo dje aghọghọ ro che te avwanre obọ siẹrẹ ihwo orua avwanre da vwomaba avwanre vwẹ ẹga rẹ uyota, a rha kpairoro vrẹ ayeen!