Ozighi Egbe Cha Sa Rhuẹrẹ Ebẹnbẹn Phiyọọ

Ihwo buebun nonẹna roro nẹ siẹrẹ ebẹnbẹn yẹrẹ ohọnre da vwomaphia, ozighi egbe ọvo yen a sa vwọ rhuẹrẹ phiyọ. Ẹkẹvuọvo oka rẹ iroro tiọyena fẹnẹ iyono vẹ idje ri Jesu kristi dibidibi. Ja fuẹrẹn erọnvwọn evo ri Jesu tare ji ru.

Oborẹ Jesu Tare

Vwẹ eta rọ tare enu rẹ Ugbenu, Jesu yono ihwo nẹ ophu, ẹvwọsuọ vẹ ozighi egbe cha sa rhuẹrẹ ebẹnbẹn phiyọọ. Ja ta ota kpahen idje evo.

• “Erọnvwọn eje rẹ ovwan guọnọre nẹ ihwo ru kẹ ovwan, ovwan ji ru ọtiọyen kẹ ayen.” (Matiu 7:12; Luk 6:31) Odjekẹ nana re se Urhi Oro na,a jiriro kẹ avwanre nẹ avwanre nene ihwo efa yerin kirobo rẹ avwanre guọnọre nẹ e nene avwanre yerin wan. Rọ vwọ dianẹ o vwo ohwo ọvuọvo rọ guọnọre nẹ e nene ọyen gbe ozighii na, o rhe fo nẹ avwanre davwẹngba vwo muọghọ kẹ ihwo ji dje uruemu esiri kẹ ayen​—ọ da tobọ dianẹ avwanre vwo ẹruọ rayen dedee?

• “Kohwo kohwo rọ ghwiẹ ọhwa rẹ obọrhen wẹn, je vwẹ ọ ro chekọ na ke.” (Matiu 5:​38, 39; Luk 6:29) Ọ dia Jesu yono avwanre nẹ, e ruo lọhọ vwọ kẹ ihwo nẹ ayen ru obore brare kẹ avwanree. Ukperẹ ọtiọyena, ọ nabọ kpọviẹ iroro echọchọ rẹ ilori rẹ ẹga evo ri yono nẹ, e se ru orukeri. Ọ vuẹ idibo rọyen nẹ ayen ru orukerii, ukperẹ ọtiọyen ihwo da kpare ophu rayen, ayen ru dẹndẹn.b

• “Ovwan rhe vwo ẹguọnọ rẹ ivwighrẹn rẹ ovwan.” (Matiu 5:​43, 44; Luk 6:27) Jesu tare nẹ avwanre dje ẹguọnọ vwọ kẹ ihwo ri vwo utuoma kpahen avwanre ji te ihwo ri ruẹ avwanre chọ. Ọ dia ọ vuẹ avwanre nẹ a rhọnvwephiyọ iruemu echọchọ rayen naa.c Avwanre de dje uruemu esiri kẹ ihwo ri vwo utuoma kpahen avwanre, ọnana sa nẹrhẹ ẹwẹn rayen kpotọ ji nene avwanre yerin dẹndẹn.

Obori Jesu Ruru vẹ Obo Ro Che Ru

Jesu yonori nẹ o fori e vwo gbe ozighii​—o ji ru nene obo rọ tare na. Vwẹ ason re che vwo muo, ọvo vwẹ usun rẹ idibo rọyen de nene isodje na họnre ẹkẹvuọvo Jesu da ta: “Phi ọlọkọ wẹn phiyọ ẹdia rọyen, kidie ihwo eje re vwẹ ọlọkọ họnre cha ghwọrọ womarẹ ọlọkọ.” (Matiu 26:52) Jesu dje ẹguọnọ vwọ kẹ ivwighrẹn rọyen, o vwo ghovwo ayen je nẹrhovwo kẹ ayen!​—Luk 23:​33, 34; 1 Pita 2:23.

Baibol na veri nẹ Jesu rọ dia Osun rẹ Ufuoma che phi oba phiyọ ozighi egbe. (Aizaya 9:​6, 7) Wo se vwo yono kpahen erọnvwọn iyoyovwin re cha phia vwẹ obaro na, se uyovwinrota na “Oborẹ Ofovwin vẹ Ozighi Egbe Che Vwo Vwoba.”