Me Vwẹ Uphẹn kẹ Jihova nẹ o ru Vwe Phiyọ Omamọ rẹ Ohwo

Ọvo usun rẹ erọnvwọn buebun re me jokaphiyọ vwẹ ẹdẹ yena yen ihwo na. Me mrẹ ighene rẹ eya vẹ eshare ri dje owian ọvo ẹvwẹvwariẹn. Ayen dia ihwo ra fobọ nẹ suaa. Dedena, ayen vwo otekẹvwẹ vẹ omavwerhovwẹn. Udje rayen yono uvwe obo ro mudiaphiyọ ra vwọ vwomakpotọ ga Ọghẹnẹ.

Vwẹ ikpe nana eje, Jihova yono uvwe vwọ dia omamọ rẹ ohwo rọ vwẹ ẹga kẹ. Ẹkẹvuọvo, je me ka vuẹ ovwan oborẹ me guọnọ uyota na wan ọke me vwọ hẹ ẹga ri Buddha.

ME GUỌNỌ ỌGHẸNẸ VWẸ ỌKIEMỌ

Chicago, Illinois vwẹ U.S.A. yen e de vwiẹ vwẹ je yọnrọn ovwẹ ghwanre, mẹvwẹ yen ọkpako usun rẹ emọ ẹne ọsẹ vẹ oni mẹ vwiẹre. Ọsẹ vẹ oni mẹ kua nẹ Japan kpo America rere ayen se vwo yerin omamọ akpọ. Ayen guọnọre nẹ emọ rayen kpo omamọ isikuru ji yerin uvi rẹ akpọ.

Ọsẹ vẹ oni mẹ nabọ muomaphiyọ ẹga ri Buddha. Uwevwin oni mẹ dia ghwanre vwẹ ẹshẹ ri Buddha. Ọsẹ rọyen vẹ iniọvo rọyen eshare ivẹ vwomakpahotọ vọnvọn vwọ kẹ ẹga ri Buddha. Ẹga ri Buddha pha ghanghanre kẹ vwẹ ọke me vwọ ghwanra cha. Orọnvwọn rẹsosuọ ri mi ruẹ mi de nẹ isikuru te uwevwin yen me vwọ torhẹ insẹnsi je reyọ ame vẹ irosu vwọ kẹ oma ri Buddha rẹ avwanre. Kẹdidjana kẹdidjana yen avwanre vwo kpo uwevwin rẹ ẹga ri Buddha je vwẹ ẹga kẹ oma rọ họhọ ọ rọhẹ evun rẹ uwevwin avwanre na​—rọ pha rhuarho ra je vwẹ oro phare.

Me vwọ hẹ omarẹ ẹgbukpe ighwrẹn, me karophiyọ ọke mi vwo ni oma rọhẹ uwevwin avwanre na kpee je me nọ oma mẹ, ‘Mavọ yen akpeyeren mẹ cha dia siẹrẹ mi de ghwu nu?’ E yono uvwe vwẹ ẹga ri Buddha nẹ siẹrẹ mi de ghwu mi che kpo asan ọfa da rha dia. Mi de rhi noso nẹ ẹdẹ ọvo che te ri mi che vwo ghwu. Ọ da vwẹ mamọ nẹ me cha dia ohwo rẹ ẹwẹn, ẹkẹvuọvo me rha cha sa riavwerhen rẹ akpeyeren kerẹ ohworakpọọ. Kpregede na, oma di ku vwe ame.

Me vwọ hẹ omarẹ ẹgbukpe 15, me da rhe mrẹ nẹ irueru rẹ ẹga ri Buddha na vwẹ otọọ. Orọnvwọn ọvo kanre ovwẹ vwẹ akpeyeren. (Mat. 5:3) Vwẹ ẹwẹn mẹ, mi roro nẹ o vwo Ọghẹnẹ ọvo ro vwo ẹgba rọ herọ. Me guọnọ riẹn. Mi rorori nẹ ọkiọvo Baibol na che vwo ẹkpahọnphiyọ rẹ enọ mẹ. Ọtiọyena, me da dẹ Baibol rẹ King James Version ọvo vwẹ orẹ ri Buddha​—asan me vwẹ ẹwẹn roro nẹ me da cha mrẹ Baibool!

Me vwọ hẹ ẹgbukpe 17, oniọvo ọshare ọvo re se Wilson Bashou da yan bru vwe rhe ọke me vwọ reyọ eranko mẹ vwọ yan oyan vwẹ urhuvwu. Ọ da nọ vwẹ, “Wọ riẹn oborẹ Ọghẹnẹ veri nẹ ọyen che ru vwẹ obaro na?” Onọ yena da nẹrhẹ avwanre ta ota kpahen Baibol na phiyọ. Wilson de se Ẹvwọphia 17:1 je nọ vwẹ, “Die yen ‘ame buebun’ rẹ igberadja na chidia na mudiaphiyọ?” Me riẹnrẹẹ. Ọ da vuẹ vwẹ nẹ mi se ọwọ 15, rọ tare nẹ ame na mudiaphiyọ ihwo. Oma vwerhen ovwẹ nẹ Iseri ri Jihova vwẹ uphẹn kẹ Baibol na nẹ o dje obo rehẹ evun rọyen fiotọ. Tavwen avwanre ke yanjẹ ohwohwo vwo, Wilson da kẹ vwẹ ọbe na, The Truth That Leads to Eternal Life. Ọmọbe nana wene akpeyeren mẹ.

Ẹdẹ ihwe vwọ wan nu, mi de kpo uyono obọ rẹsosuọ vwẹ Ọguan Ruvie. Oborẹ ayen dede uvwe wan cha sa chọrọ ovwẹ ẹroo. Nẹ ọke yena rhe, mi ji rhi jẹ uyono vwoo. Ọke vwọ yanran na, Wilson da vwẹ uyono ri Baibol vwọ mu kẹ vwẹ. Mi vwo omavwerhovwẹn mi vwo yono Baibol na mamọ, ọkievo avwanre sa ghwọrọ inọke erenren soso vwo yono ofuọvo. Oshọ mu ọsẹ vẹ oni mẹ mamọ, ọtiọyena ayen da vwọso uyono ri Baibol mẹ. Ẹkẹvuọvo, mi vwo yono phiyọ ye, jẹ imuẹro mẹ nẹ ọnana yen uyota na je ghwa ganphiyọ. Mi de bromaphiyame vwẹ ukpe ri 1983.

ME KPAIRORO VRẸ YUNIVASITI FIKIRẸ IRUO ỌKOBARO

Ọke mi vwo bromaphiyame, ji mi kpo yunivasiti ọvo ro titiri mamọ ri mi de yono kpahen iruo rẹ idọktọ. Ọsẹ vẹ oni mẹ vwẹ erọnvwọn buebun vwo ze rere mi se vwo kpo isikuru nana. Mi rhe se kpo yunivasiti na wontọ, ẹkẹvuọvo me guọnọ ga Jihova vọnvọn je ro ẹga rẹ ọkieje.

Ọsẹ mẹ si vwe orhọ jovwo nẹ, “Wọ da dobọ rẹ yunivasiti na ji, me cha djẹ wẹ nẹ uwevwin!” Ofu de dje vwe hwe, ọnana da nẹrhẹ mi muomaphiyọ. Mi vwo ẹguọnọ rẹ ọsẹ vẹ oni mẹ, me je guọnọ ku ayen phiyotọọ. Ọtiọyena, ọke buebun vwẹ ason rẹ isio de lo, ki mi kpo otegodo rẹ isikuru na ra nẹrhovwo, “Jihova biko, vwẹ ukẹcha kẹ vwẹ vwẹ orhiẹn nana ri mi che bru na.” Me vwọ yanjẹ yunivasiti na vwo nu, ọsẹ mẹ da vuẹ vwẹ nẹ mi vrẹn nẹ uwevwin rọyen. Mi de se Wilson je vuẹ obo re phiare. Ọ da vuẹ vwẹ nẹ mi rhi nene ọyen dia. Me da kua erọnvwọn mẹ eje phiyọ ekpu ọvo je ro imoto kpo asan rọyen. Me karophiyọ nẹ ugege yena ẹwẹn mẹ da rhe dia dọe. Me riẹnre nẹ omamọ rẹ orhiẹn ọyen mi bruru na.

Oma de rhi ru vwe kerẹ ọphran rọhẹ ikeji re siobọnu! Enẹna, ọmuvwiẹ ri mi vwo vwobọ vwẹ iruo aghwoghwo na vọnvọn rhiephiyọ re. Vwẹ ukpe ri 1984, me da ton iruo ọkobaro phiyọ.

Uvwre rẹ ọke me vwọ ga kerẹ ọkobaro ọkieje na, Jihova yono uvwe iruemu eghanghanre buebun kerẹ erhiorin. O vwo emuọvo rọ sorọ vwẹ ẹdẹ ọvo mi vwo jẹ iruo aghwoghwo na ẹra. Ofu dje vwe hwe kidie ohwo vuọvo herọ rọ cha vwomaba vwẹ vwẹ aghwoghwo oghẹruvo rẹ ẹdẹ yenaa. Dedena, mẹvwẹ ọvo da ra. Inọke evo vwọ wan nu, mi de kpo uwevwin rọ koba de rhe ghwoghwo. Oma bru vwe ku re kidie mẹvwẹ ọvo yen hẹ iruo aghwoghwo na, ọ je họhọ nẹ osio guọnọ rhọ. Ẹwẹn ọvo kọ vuẹ vwẹ, ‘Wo rhe rhivwin kpo?’ Mi vwo yerin te ubruwevwin rerha, me da mrẹ eghene ọshare ọvo rọ dia ohwo rẹ Philippines ro mudia obaro mẹ. Me da ta kẹ oma mẹ, ‘Biko, ọ cha kerhọọ.’ Ọnana ororochọ dẹn! Me vẹ ọshare na da ton uyono ri Baibol phiyọ, ukuko na, ọ da rhe dia odibo ri Jihova.

MI YONO ERỌNVWỌN BUEBUN VWẸ BẸTẸL RỌHẸ BROOKLYN

Mi vwo nene Wilson dia ẹgbukpe ivẹ nu, e de se vwe kpo Bẹtẹl rọhẹ Brooklyn vwẹ 1985. Kirobo re me tare siẹvure vwẹ obenu na, asan re de ko ẹbe yen a tare nẹ me da wian. Ẹdẹ ọvo me vwọ reyọ imashini ọvo vwo ruiruo, obọ da chọ vwẹ, mi de miovwon erọnvwọn ra vwọ phare ẹbe buebun kufia. Iniọvo na da vuẹ vwẹ nẹ me rha niyẹnrẹn rẹ ota na kẹ oniọvo rọ vwẹrote Akon iruo na. Me da vuẹ oboresorọ obọ vwọ chọ vwẹ, ẹkẹvuọvo orọnvwọn ọvo ji chekọ. Vẹ upho bọrọbọrọ, oniọvo na da vuẹ vwẹ nẹ, “E vwo yovwunu ọkieje ọyen obo ri fori.” Ugege yena, mi de yono obo rọ ghanre te me vwọ rhọnvwe echobọ mẹ je tanẹ, “Biko wọ ghwọọ.”

Ẹro mi vwo nẹ uruemu ra vwọ ga ihwo efa de rhi wene, ọke me vwọ fuẹrẹn iruemu rẹ iniọvo re kpakore re fuevun ga vwẹ Bẹtẹl. Ẹdẹ ọvo, Oniọvo Milton Henschel rọ dia ọvo usun rẹ Ẹko Rọvwẹrote na de chidia imẹjẹ rẹ avwanre ọke avwanre vwọ riemu vwẹ oghẹruvo. Ẹdẹ yena, ihwo bunru mamọ, ọnana da nẹrhẹ owian rẹ iniọvo re ghare emu nene imẹjẹ na ganphiyọ. Avwanre ighene eshare ri chidia imẹjẹ na ki brenu kidie emu fobọ te avwanree. Oniọvo Henschel kpahen ota vuọvoo, o de vrẹn je vwomaba iniọvo re ghare emu na, ji nene ayen mu ijọgu ame vẹ imize re che phi ibrẹdi kugbe ibọta phiyọ. Uruemu rẹ omaevwokpotọ rọyen na nẹrhẹ me karophiyọ oborẹ Jesu ga iyinkọn rọyen wan, ọnana cha sa chọrọ ovwẹ ẹro bẹdi bẹdẹẹ.​—Jọn 13:3-5.

“OFORI NẸ WO YONO EPHẸRẸ RI JAPAN!”

Vwẹ 1987, mi de kpo Japan, oma vwerhen ovwẹ me vwọ mrẹ oruru vẹ omaevwokpotọ rẹ iniọvo rehẹ oboyin. Me guọnọ vwẹ ukẹcha kẹ ayen, jẹ obẹnbẹn ri mi vwori yen me riẹn obo ra jẹ ephẹrẹ ri Japanii. Oniọvo aye ọvo re se Michiko Oda rọ ga vwẹ Bẹtẹl de ni vwe phiọgun je vuẹ vwẹ nẹ, “Ofori nẹ wo yono ephẹrẹ ri Japan!” Ọyena yen ghwa hẹ obo ri mi ruru. Kono yen riẹnre nẹ eta rọyen na che wene akpeyeren mẹ!

Emeranvwe evo vwọ wan nu, mi de kpo ukoko ra da jẹ ephẹrẹ ri Japan vwẹ New York. Japan ri mi yonori na nẹrhẹ mi vwo uphẹn buebun me vwọ ga Jihova. Vwẹ 1989, mi de kpo ọghwẹkoko rẹ ephẹrẹ ri Japan rẹsosuọ mẹ vwẹ Los Angeles, California. Ọkobaro aye ọvo re se Miwako Onami ro ji vwobọ vwẹ eha rudje na, da ro ovwẹ ẹro.

Me vẹ Miwako da rọvwọn vwẹ 1992, a je vwẹ uphẹn kẹ avwanre nẹ avwanre ga vwẹ Bẹtẹl rọhẹ Brooklyn. Miwako ọyen ohwo vẹ ọhọ ro ji vwo ọdavwẹ rẹ ihwo mamọ, o muegbe ọkieje rọ vwọ vwẹ ukẹcha kẹ ayen. Udje rọyen vwẹ ukẹcha kẹ vwẹ vwo ru yovwinphiyọ vwẹ obo ri mi nene ihwo efa yerẹn wan. Miwako ọyen okẹ ro nẹ obọ ri Jihova rhe​—rọ vwẹ ọbọngan vẹ omavwerhovwẹn vwọ kẹ vwẹ.

OWIAN RI BẸTẸL KUGBE IRUO RẸ ỌKOBARO OGHẸRESAN VWẸ JAPAN

Ọke vwọ yanran na, ọsẹ vẹ oni ri Miwako re dia Japan de rhi she ro ọga. Ọtiọyena a da vwẹ uphẹn kẹ avwanre nẹ avwanre kpo oghọn ukoko ri Japan rere avwanre sa vwọ dia kẹrẹ ayen je vwẹrote ayen. Avwanre da kua yanran vwẹ 1999.

O kririi, iniọvo re ga vwẹ oghọn ukoko ri Japan de dede avwanre, avwanre de ji ru ewene rere asan na sa vwọ fobọ riẹnriẹn avwanre oma. Omamọ iruemu ri rhe iniọvo rẹ eya vẹ eshare rehẹ oghọn ukoko ri Japan, kerẹ e vwo dede erhorha je kokẹ ghwologhwolo nẹrhẹ iruemu mẹ yovwinphiyọ. Siẹrẹ a da ta ota kpahen owian, ayen vwọ hehaa, ayen nabọ gbẹrophiyọ. Ayen nabọ wian kuẹgbe kerẹ ẹko. Diesorọ ọ vwọ dia ọtiọyen? Vwẹ ẹkuruemu rẹ ihwo ri Japan, ayen no nẹ ọyen obo re ghanre a vẹ ihwo efa vwọ wian kugbe vwọrẹ okugbe vwọ kẹ erhuvwu rẹ ihwo eje ukperẹ ohwo ọvo vwọ wian fikirẹ erhuvwu romobọ rọyen. Udje rayen vwẹ ọbọngan kẹ vwẹ me vwọ vwomakpotọ nene ihwo efa wian ji vwo ọdavwaro kpahen oborẹ emerọnvwọn ri mi ruẹ vwo toroba orugba rẹ ọhọre ri Jihova.

Dedena, o vwo ẹdia evo rọ da bẹn kẹ vwẹ mi vwo vwo ẹruọ rẹ oboresorọ e vwo ru erọnvwọn vwẹ idjerhe evo kidie nẹ ẹkuruemu rẹ avwanre fẹnẹre. Mi yono obo ri mi se vwo sun oma mẹ ji vwo edirin. Ọke vwọ yanran na, ẹro mi vwo nẹ erọnvwọn de rhi wene, me je rhe mrẹvughe nẹ Jihova se bruba korhiẹn korhiẹn siẹrẹ e de nene odjekẹ rọ vwọ kẹ avwanre womarẹ ukoko rọyen. Ukuotọ rọyen, Jihova yen nẹrhẹ avwanre se ru erọnvwọn ejobi wiẹn.

Ọkieje yen me vwọ reyọ obo ri mi yonori vwẹ Bẹtẹl vwọ vwanvwen ọ rẹ ọmraro Mosis. Jihova vwẹ ukẹcha kẹ Mosis vwo yono obo ra vwomakpotọ vwẹ uvwre rẹ ẹgbukpe 40 rọ vwọ dia osuigodẹ. Kerẹ Mosis, orua rẹ ihwo ri yono ẹbe kodo yen mi nurhe. Ẹbe eyono tiọyena nẹrhẹ me dia ohwo rọ kparoma rọ je vwẹroso omobọ. Bẹtẹl yono uvwe obo ra vwomakpotọ je vwẹroso Jihova. Kerẹ oborẹ Jihova vwo erhiorin vwo yono Mosis vwọ dia omamọ rẹ ohwo na, ọtiọyen o ji ru kẹ vwẹ vwẹ ikpe nana eje.

Avwanre vwẹrote ọsẹ vẹ oni ri Miwako omarẹ ẹgbukpe 24 tavwen ayen ki ghwu. Ọ dia ọmọrhiẹ ihwo yen avwanre seri vwẹ ifonuu, oshọ mu avwanre ọke buebun, ọtiọyen ji te oyan rẹ yanrhe yan kpo rẹ họspito na. Oma rẹ oni rẹ Miwako da rhe braphiyọ te ẹdia rẹ kọ mrẹ bẹnbẹn ro se vwo vrẹ yan. Ọ lọhọ kẹ Masako ro se vwo kpo uyono vẹ aghwoghwoo. Agbara rẹ ukpono kọyen o chidia vwẹ udughwrẹn evo tavwen o ki rhi ghwu. Vwẹ erọnvwọn nana eje ro hirharoku na, ẹguọnọ rọyen kpahen Jihova nama shekpotọọ. Kọke kọke rọ da ta ota kpahen uyota na, yen opharo rọyen vwọ dia sasasa. Udje rẹ obo ra ga Ọghẹnẹ vẹ aghọghọ ọtiọyen ji te ẹwẹn rẹ otekẹvwẹ ro rhe Masako, phi ẹgba phiyọ uvwẹ oma.

Vwẹ 2024, ewene ri kpregede ọvo da vwomaphia vwẹ akpeyeren rẹ avwanre. Avwanre vwọ ga vwẹ Bẹtẹl ikpe re vrẹ 30 nu, a da vuẹ avwanre nẹ avwanre re ruiruo rẹ ọkobaro oghẹresan. Enẹna avwanre ga vwẹ omokere rẹ Okinawa, avwanre ji vwo uphẹn rẹ avwanre vwo ghwoghwota kẹ erua re dia ogba rẹ isodje rọ kẹrẹ avwanre. Uvi rẹ uyono rẹ avwanre yonori vwẹ Bẹtẹl nẹrhẹ ewene nana lọhọ kẹ avwanre. Avwanre davwẹngba vwọ yanmu ọrhuẹrẹphiyotọ rẹ avwanre, je reyọ ọke avwanre vwo ruiruo vwẹ idjerhe ro fori womarẹ avwanre vwọ wian gangan je tẹnrovi iruo aghwoghwo na. Jihova bruba kẹ avwanre rọ vwọ kẹ avwanre ihwo ra vwẹ Baibol yono re pha kerẹ orua vwọ kẹ avwanre. Avwanre nabọ rhe riẹn obo rọ ghanre te re vwo vwo ẹguọnọ rẹ ihwo vrẹ obo ri jovwo re. Kẹdi kẹdẹ yen me vẹ Miwako vwọ kpẹvwẹ Jihova fikirẹ uvi rẹ owian nana.

MI VWO OWEVWE RẸ JIHOVA VWO RU VWE PHIYỌ OMAMỌ OHWO ỌKIEJE

Dede nẹ ihwo rẹ orua mẹ gbe reyọ vwọso ovwẹẹ, jẹ ayen je rhe vwomaba vwẹ vwẹ ẹga rẹ uyota naa. Dedena, Jesu veri nẹ ihwo re yanjẹ orua rayen vwo vwọ dia idibo rọyen che jẹ erua buebun evwo abọ 100 asaọkiephana vwevunrẹ ukoko naa. (Mak 10:29, 30) Me mrẹ uyota rẹ ọnana vughe vwẹ akpeyeren mẹ. Mi cha sa karophiyọ erua sansan rehẹ akpọeje re vwẹrote vwẹ ji dje ẹguọnọ kẹ vwẹ vwẹ ikpe nana eje naa.

Ọbe na The Truth That Leads to Eternal Life rẹ Wilson vwọ kẹ vwẹ na ji rhe vwẹ rhi te nonẹna. Ọbe yena nẹrhẹ me karophiyọ oborẹ Jihova ruru me sa vwọ riẹn. (1 Ikun 28:9) Mi vwo owenvwe rẹ Jihova vwo ru vwe phiyọ omamọ rẹ ohwo ọkieje je vwẹ ukẹcha kẹ ihwo efa vwo yono uyota ro suẹn ohwo kpo arhọ ri bẹdi bẹdẹ na.