Rhuẹrẹ Ẹghwọ na Phiyọ Kpakpata!
ONIỌVO ọvo ru we obo re da wẹ jovwo re tẹdia ọ da so ẹghwọ vwẹ uvwre rẹ ovwan? Wọ sa vwọ rhuẹrẹ ẹghwọ na phiyọ, oyerinkugbe rẹ ovwan je sa vwọ dia, ofori nẹ wọ jowọ kpakpata ji ruo vẹ omamọ rẹ ẹwẹn.a
Kerẹ udje, ubeku de vwirhin, ofori nẹ a gba o vwo jẹ ohwo ẹmiavwọn. Ẹkẹvuọvo, a rha fobọ gbaa, ọmiaovwẹ rọyen che jẹ ohwo vwoo. Ma bra kparobọ, ubeku na se nẹ ẹdia kakare, e rhe che se vwo ru emuọvoo.
Kerẹ ubeku ro vwirhirin, a rha fobọ rhuẹrẹ ẹghwọ phiyọọ, oyerinkugbe rọhẹ uvwre rẹ avwanre sa hra. E rhe ru ọtiọyeen, ẹghwọ na kọ cha dia otọ kri, ọnana je cha kẹ avwanre omavwerhovwẹẹn. Ophu se mu we tẹdia rẹ ugbeyan rẹ ovwan na me fan. Jesu da ta: “Brokpakpa nene ohwo” ru wẹ vẹ ọyen vwo ẹghwọ na rhuẹrẹ kugbe. (Mat. 5:25) Ọtiọyena bru ugbeyan wẹn ra, wo ji rhievun nene ta ota bọrọbọrọ kpahen obo re phiare na. Diesorọ ọnana vwọ bẹn? Ja mrẹ iroro ivẹ re sorọ.
Ẹsosuọ, wo se no nẹ a rha rhuẹrẹ phiyọọ yen me yovwin, nẹ a ghwa kpairoro vrẹ ẹghwọ na kidie wọ guọnọ ta ota kpahen obo re phiare naa.b Roro kpahen udje rẹ Yuodia vẹ Sintiki, iniọvo eya ivẹ re sa rhuẹrẹ ẹghwọ rayen phiyọọ. Ọhọhọre nẹ ẹghwọ rayen na krotọ mamọ te ẹdia rẹ ọyinkọn Pọl rọhẹ Rom rọ dia asan ro sherabọ de nyo vwọ kpahọn. Ọ vuẹ ayen nẹ ayen ru oborẹ ayen se ru eje vwọ rhuẹrẹ ẹghwọ na phiyọ. (Fil. 4:2) Oyerinkugbe rayen sa rhoma kpẹkpẹ phiyọ siẹrẹ ayen da vwomakpotọ, nene ohwohwo ta ota kugbe ji vwo ghovwo ohwohwo nẹ otọ rẹ ubiudu rhe.
Ọrivẹ, wo se no nẹ ofori ugbeyan wẹn na vwọ rhọnvwe oruchọ rọyen. Ọdavwẹ wẹn ọ dia ọ ru wo vwo vughe ohwo ro ru chọọ, ẹkẹvuọvo oborẹ ovwan sa vwọ rhoma vwo oyerinkugbe rọhẹ uvwre rẹ ovwan jovwo. Idọktọ rọ gba ubeku ro vwirhirin cha tẹnrovi oborẹ ubeku na sa vwọ ro ẹdia ukperẹ ọ vwọ guọnọ otọ rẹ oboresorọ rẹ ubeku na vwo vwirhin. Wo nenesi rẹ ohwo rọ so ẹghwọ na siẹrẹ wẹ vẹ ugbeyan wẹn da ta otaa. Ukperẹ ọtiọyen, karophiyọ oborẹ oyerinkugbe rẹ ovwan ghanre te kẹ wẹ, wọ je tẹnrovi oborẹ wo se ru vwọ rhuẹrẹ ẹghwọ na phiyọ.
Diesorọ wo rhe nene oniọvo rẹ wẹ vẹ ọyen gbe vwo ẹghwọ ta ota kugbe je rhuẹrẹ phiyọ nonẹnaa? “Wo jẹ ọnre she ghene uwe rẹ wo ji vwo muophu na-a.” (Ẹfe. 4:26) Wọ da jowọ wọ vwọ fobọ rhuẹrẹ ẹghwọ na phiyọ, jẹ wọ sẹro rẹ ‘ufuoma ro churu avwanre kuẹgbe.’—Ẹfe. 4:1-3.
a Ẹmẹghwọ da vwomaphia uvwre wẹn vẹ ohwo ọfa, ovwan ihwo ivẹ ọvo rhuẹrẹ ẹghwọ na phiyọ, ovwan je reyọ vwo ghovwo ohwohwo nẹ otọ evun rhe. (Mat. 5:23, 24) A sa guọnọ ukẹcha rẹ ekpako na a sa vwọ rhuẹrẹ ẹghwọ ọgangan phiyọ. (Mat. 18:17) Ẹkẹvuọvo, Onenikristi se ru ọyena ọ da dianẹ o nene owọẹjẹ rọhẹ Matiu 18:15, 16 nu.